Malagipyo Kadi?

Natagiragsakyo kadi a binasa dagiti nabiit pay a ruar Ti Pagwanawanan? Kitaentayo no masungbatanyo dagiti sumaganad a saludsod:

• Ania ti tallo a napateg a banag a makatulong tapno masarangettayo ti pagannayasan nga agbalin a di mapagpiaran?

(1) Umiso a panagbuteng iti Dios. (1 Ped. 3:12) (2) Nasanay-Biblia a konsiensia. (3) Pannakakontento.​—4/15, panid 6-7.

• Ti kadi panagserbi iti Dios buyogen ti kinaserioso kaipapananna a seriosotayo unay wenno ditay mabalin ti agrelaks?

Saan, kas ipakita ti inaramid ni Jesus. Tinagiragsakna ti nangan a kadua ti sabsabali. Ammotayo a saan a nainget wenno serioso unay. Umasideg ken komportable kenkuana uray dagiti ubbing.​—4/15, panid 10.

• Ania ti aramiden dagiti agassawa no lumamiis ti relasionda kalpasan a maaddaanda iti annak?

Masapul a pasingkedanda ti ayan-ayatda. Ikagumaan ti lalaki a bang-aran ti aniaman a pakadanagan ni baketna. Masapul a nawayada a mangyebkas iti rikrikna ken pisikal a kasapulanda.​—5/1, panid 12-13.

• Ania ti iladawan ti kayo nga olibo iti Roma kapitulo 11?

Ti kayo nga olibo tukoyenna ti segundario a paset ti bin-i ni Abraham, ti naespirituan nga Israel. Ni Jehova ti ramut ken ni Jesus ti sanga ti simboliko a kayo nga olibo. Kaaduan a natural a Judio ti nangilaksid ken Jesus. Isu nga idi nagbalin a manamati dagiti Gentil, naisulbongda iti simboliko a kayo ket nagbalinda a paset ti segundario a bin-i ni Abraham.​—5/15, panid 22-25.

• Ania a nakaim-imbag a damag ti mairanudtayo kadagiti napanglaw?

Isu daytoy: Ti Dios dinutokanna ni Jesus kas Ari. Isu laeng ti Agturay a makabael a mamagpatingga iti kinapanglaw. Apay? Gapu ta agturayto iti intero a sangatauan ken usarenna ti pannakabalinna; siaasi nga agtignay para kadagiti napanglaw; ken kabaelanna a pukawen ti pakaigapuan ti kinapanglaw, ti natawidtayo a kinamanagimbubukodan.​—6/1, panid 7.

• Ania ti kayat a sawen ni Jesus idi imbagana ken Caifas: “Sinaom a mismo dayta”?​—Mat. 26:63, 64.

Agparang a dagita a sasao ket kadawyan nga idiomatiko nga ebkas dagiti Judio a mangpasingked a pudno ti naibaga. Dinamag ti Nangato a Padi a ni Caifas no ni Jesus ti Kristo, ti Anak ti Dios. Pinasingkedan dayta ni Jesus idi kinunana: “Sinaom a mismo dayta.”​—6/1, panid 18.

• Karaman kadi iti subbot dagiti agbalin koma a kaputotan ti perpekto a tao a ni Jesus?

Saan. Nupay kabaelan ni Jesus ti mangpataud iti binilion a perpekto a kaputotan, saanda a karaman iti subbot. Ti laeng perpekto a biag ni Jesus ti katupag ti biag ni Adan. (1 Tim. 2:6)​—6/15, panid 13.

• Kasano a maipakita dagiti Kristiano nga ipappapusoda ti pakdaar maipapan kadagiti palso a mannursuro a nadakamat iti Aramid 20:29, 30?

Dagiti Kristiano saanda a kablaawan wenno pastreken iti pagtaenganda dagitoy a palso a mannursuro. (Roma 16:17; 2 Juan 9-11) Saanda met a basaen ti literatura dagiti apostata, dida buyaen dagiti programada iti TV, ken dida luktan dagiti Web site a naglaon iti pannursuroda.​—7/15, panid 15-16.

• Siasino ti mangisuro kadagiti annak maipapan iti Dios?

Maitunos iti balakad ti Biblia, agtinnulong ti ama ken ina a mangaramid iti dayta. (Prov. 1:8; Efe. 6:4) Ipakita dagiti panagsirarak a no agtinnulong dagiti nagannak, nasayaat ti epektona kadagiti annakda.​—8/1, panid 6-7.