Naisangsangayan a Miting

“INTON malpas daytoy a miting, maikunayo, ‘Talaga a naisangsangayan daytoy tinawen a miting!’” Dagita a sasao ni Stephen Lett, kameng ti Bagi a Manarawidwid dagiti Saksi ni Jehova, pinaggagarna ti tallaong. Nagtataripnongda para iti maika-126 a tinawen a miting ti Watch Tower Bible and Tract Society of Pennsylvania, a naangay idi Oktubre 2, 2010, iti Assembly Hall of Jehovah’s Witnesses idiay Jersey City, New Jersey, U.S.A. Ania ti dadduma a tampok iti dayta a miting?

Narayray ti panglukat a palawag ni Kabsat Lett maipapan iti nailangitan a karuahe ni Jehova a nailadawan iti libro nga Ezequiel. Kontrolado ni Jehova ti nagdakkel ken nadayag a karuahe a mangiladawan iti organisasionna. Kasla kimat ti kapartak ti nailangitan a paset, a buklen dagiti espiritu a parsua. Kasta kapartak ti panagpampanunot ni Jehova kuna ni Kabsat Lett. Umab-abante met ti naindagaan a paset ti organisasion ni Jehova a Dios. Dinakamat ni Kabsat Lett ti adu a makaparagsak a panagrang-ay iti makitkita a paset ti organisasion ti Dios iti napalabas a tawtawen.

Kas pagarigan, napagtitipon ti dadduma a sanga nga opisina tapno dagiti dati a Bethelite kadagita a pagilian ti mangipamaysa iti tiempoda a mangasaba. Pinaregta ni Kabsat Lett ti tallaong nga ikararaganda ti Bagi a Manarawidwid, kas representante ti klase adipen, tapno makapagtultuloyda a matalek ken masirib.​—Mat. 24:45-47.

Makaparegta a Report ken Interbiu

Ni Tab Honsberger nga agserserbi kas Branch Committee idiay Haiti makapaladingit nga impadamagna ti napasamak a ginggined idi Enero 12, 2010, a nakatayan ti agarup 300,000 a tattao. Kunana nga ibagbaga kano dagiti klero a dinusa ti Dios dagiti biktima gapu ta awan pammatida ngem sinalaknibanna dagiti nasingpet. Ngem rinibu a balud ti nakalibas idi narba dagiti pader ti maysa a pagbaludan gapu iti ginggined. Adu a nasingpet a taga-Haiti ti naliwliwa idi naammuanda ti kinapudno no apay a nariribuk ti tiempotayo. Inadaw ni Kabsat Honsberger ti kinuna ti matalek a kabsat a taga-Haiti a natay ti asawana gapu iti didigra: “Saan pay a naibus ti luak agingga ita. Diak ammo no kaano pay kabayag ti panagleddaangko ngem mariknak ti ayat nga ipakpakita ti organisasion ni Jehova. Adda namnamak ken kayatko nga iranud dayta.”

Nagreport met maipapan iti Pilipinas ni Mark Sanderson, a kameng itan ti Brooklyn Bethel. Isu ket dati a kameng ti Branch Committee  ti Pilipinas. Maragragsakan a nangipadamag iti agsasaruno a 32 a kangatuan a bilang dagiti agibumbunannag iti Pagarian ken ti nangatngato a bilang dagiti mayad-adalan iti Biblia ngem kadagiti agibumbunannag. Inyestoriana ti maipapan iti kabsat nga agnagan Miguel, a napapatay ti apokona. Inaramid ni Miguel ti amin a kabaelanna tapno maibalud ti pimmatay. Idi agangay, bayat a mangaskasaba da Miguel iti pagbaludan nakasaritana ti pimmatay. Nupay maamak ni Miguel, siaalumamay ken siaasi a kinasaritana. Idi agangay, nayadalanna iti Biblia ket nasayaat ti panagrang-ayna ken timmanor ti panagayatna ken Jehova. Maysa itan a bautisado a Saksi. Nasingeddan nga aggayyem ken Miguel ket tultulonganna daytoy kabbaro a kabsatna tapno al-alisto a mawayawayaan iti pagbaludan. a

Simmaruno ti interbiu nga indauluan ni Mark Noumair, maysa nga instruktor ti Theocratic Schools Department. Tallo a pagassawaan ti ininterbiuna​—da Alex ken Sarah Reinmueller, David ken Krista Schafer, ken Robert ken Ketra Ciranko. Imbaga ni Alex Reinmueller, katulongan iti Publishing Committee, no kasanona nga impateg ti kinapudno bayat nga agpaypayunir idiay Canada idi agtawen iti 15, uray no masansan nga agmaymaysa. Idi napagsaludsodan no asino ti nangnangruna a nakaparegta kenkuana iti Bethel, dinakamatna ti tallo a matalek a kakabsat. Kuna met ti baketna a ni Sarah a nakatulong ti pannakigayyemna iti maysa a kabsat a babai, nga adu a dekada a nagibtur kadagiti pagbaludan idiay China gapu iti pammatina. Nasursuro ni Sarah ti agpannuray ken Jehova babaen ti personal a panagkararag.

Nagyaman ni David Schafer, a katulongan iti Teaching Committee, iti nabileg a pammati ni nanangna ken dinakamatna dagiti agtrostroso a kakabsat a timmulong tapno makapag-auxiliary pioneer bayat ti kinaagtutubona. Inyestoria ti baketna a ni Krista ti nasayaat nga impluensia dagiti nabayagen a kameng ti pamilia a Bethel, a nangpaneknek a ‘matalekda iti kabassitan,’ kas kinuna ni Jesus.​—Luc. 16:10.

Linagip ni Robert Ciranko, a katulongan iti Writing Committee, ti dua a lolo ken dua a lolana nga imigrante iti Hungaria ken napulotan a Kristiano. Kas maysa nga ubing, nasdaaw idi timmabuno iti dakkel a kombension idi dekada ‘50 ken naammuanna a dakdakkel nga amang ti organisasion ni Jehova ngem iti kongregasionda. Kuna ti baketna a ni Ketra a nasursurona ti kinasungdo idi nagpayunir iti maysa a kongregasion a nabingaybingay gapu  iti apostasia ken dadduma pay a parikut. Nagibtur isu nga idi agangay, nagserbi kas special pioneer iti maysa a kongregasion nga addaan panagkaykaysa, banag a nagragsakanna.

Simmaganad a nagreport ni Manfred Tonak a taga-Ethiopia. Addan daytoy a pagilian idi tiempo ti Biblia, ngem ita, addaanen iti nasurok a 9,000 nga agibumbunannag iti naimbag a damag. Kaaduan kadakuada ti agnanaed iti kabesera nga Addis Ababa wenno iti asidegna isu a dakdakkel ti panagkasapulan iti agibumbunannag kadagiti nasulinek a lugar. Tapno masolbar dayta, naawis dagiti Etiope a Saksi nga agnanaed iti sabali a pagilian a mapanda mangasaba iti dadduma a nasulinek a paset ti Ethiopia. Adu ti nangipangag iti awis, pinaregtada dagiti lumugar a Saksi, ken nakasarakda kadagiti interesado.

Ti tampok ti programa ket ti simposium maipapan kadagiti Saksi ni Jehova idiay Russia ken ti kasoda iti korte. Insalaysay ni Aulis Bergdahl, kameng ti Branch Committee idiay Russia, ti nabayagen a pannakaidadanes dagiti Saksi sadiay, nangruna idiay Moscow. Ni Philip Brumley iti Legal Department ti sanga nga opisina ti United States dinakamatna dagiti makaparagsak a pasamak iti nabiit pay a bulbulan idi dinengngeg ti European Court of Human Rights (ECHR) dagiti siam nga akusasion maibusor kadagiti Saksi. Nagkaykaysa ti Korte a nangibaga a di umiso dagiti siam nga akusasion ken sinaggaysana pay nga indetalye no apay nga ulbod dagita. Ditay pay ammo no ania ti resultana ngem mangnamnama ni Kabsat Brumley a positibo ti epekto ti desision ti Korte kadagiti kaso iti dadduma a pagilian.

Kalpasanna, impakaammo ni Kabsat Lett ti naragsak a damag nga inawat ti ECHR ti nabayagen a kaso maipapan iti buis a pakairamanan ti gobierno ti France ken dagiti Saksi ni Jehova. Aklonen daytoy mararaem a Korte a manmano dagiti maidatag a kaso nga awatenna. Addan 39 a kaso nga inusig ti ECHR mainaig kadagiti Saksi ni Jehova ket 37 kadagita ti dinesisionanna a pabor kadatayo. Pinaregta ni Kabsat Lett ti ili ti Dios nga itultuloyda nga ikararag dayta ken Jehova.

Ti maudi a nagreport ket ni Richard Morlan, instruktor ti School for Congregation Elders. Siraragsak nga inyestoriana ti eskuelaan ken ti apresasion dagiti panglakayen a nageskuela.

Dadduma a Palawag Dagiti Kameng ti Bagi a Manarawidwid

Makatukay-puso ti palawag ni Guy Pierce a kameng ti Bagi a Manarawidwid. Intampokna ti teksto iti tawen 2011, ‘Agkamangkayo iti nagan  ni Jehova.’ (Sof. 3:12) Imbagana a nupay naragsak a tiempo ita para kadagiti adipen ni Jehova, mamagpanunot met daytoy a tiempo. Asidegen ti naindaklan nga aldaw ni Jehova; ngem itultuloy dagiti tattao ti agkamang iti palso a relihion, politika, kinabaknang, ken dadduma pay. Tapno masarakantayo ti pudno a pagkamangan, masapul nga umawagtayo ken Jehova, a pakairamanan ti panangammo, nauneg a panagraem, ken panagtalek iti Persona nga iladladawan dayta a nagan, nga ayatentayo buyogen ti isuamin nga adda kadatayo.

Impaay ti kameng ti Bagi a Manarawidwid a ni David Splane ti napasnek ken mamagpanunot a tema a “Nakastrekka Kadin iti Panaginana ti Dios?” Kunana a ti panaginana ti Dios dina kayat a sawen nga awan ar-aramidenna, yantangay ni Jehova ken ti Anakna ket “agtultuloy nga agar-aramid” bayat ti piguratibo nga aldaw ti panaginana tapno agtultuloy a maitungpal ti panggepna iti daga ken kadagiti tattao. (Juan 5:17) Kasanotayo ngarud a makastrek iti panaginana ti Dios? Ti maysa a pamay-an ket ti panangliklik a mangikalintegan iti bagi ken agbasol. Masapul a mangipakitatayo iti pammati ken sipapanunottayo iti panggep ti Dios, nga ikagumaantayo ti makidanggay iti dayta a panggep. Narigat dayta no dadduma ngem masapul nga awatentayo dagiti balakad ken agpaiwanwantayo iti organisasion ni Jehova. Impaganetget ni Kabsat Splane iti tallaong nga ikagumaanda ti sumrek iti panaginana ti Dios.

Ti maudi a palawag ket impaay ni Anthony Morris a kameng ti Bagi a Manarawidwid. Napauluan dayta iti “Ania ti Ur-urayentayo?” Buyogen ti kinaganat ken kinabara a kas iti maysa nga ama, impalagip ni Kabsat Morris iti tallaong dagiti padto a mapasamak iti masanguanan a sigagagar a segseggaan ti amin a matalek a Kristiano. Ramanen daytoy ti pannakaipukkaw ti “Talna ken talged!” ken ti pannakadadael ti palso a relihion. (1 Tes. 5:2, 3; Apoc. 17:15-17) Pinakdaaran ni Kabsat Morris dagidiay agkuna, “Daytoyen ti Armagedon,” no mangngegda dagiti damag a saan met a kaitungpalan dagiti padto. Imparegtana ti agtultuloy a panaguray buyogen ti rag-o ken kinaanus kas nadakamat iti Mikias 7:7. Ngem indagadagna met iti amin a makikaykaysada iti Bagi a Manarawidwid, kas kadagiti soldado nga adda iti paggugubatan. Kinunana: “Pumigsa koma ti pusoyo, dakayo amin nga agur-uray ken Jehova.”​—Sal. 31:24.

Iti konklusion, adda sumagmamano a makapagagar ken naisangsangayan a pakaammo. Imbaga ni Geoffrey Jackson a kameng ti Bagi a Manarawidwid ti plano a mangpadas iti napasimple a pagadalan nga edision Ti Pagwanawanan, para kadagidiay marigatan iti Ingles. Kalpasanna, impakaammo ni Stephen Lett nga inyurnos ti Bagi a Manarawidwid nga adda panagsarungkar a panagipastor kadagiti manangaywan iti distrito ken kadagiti assawada idiay United States. Imbagana pay a ti Ministerial Training School ket maawaganen iti Bible School for Single Brothers. Ken adda baro nga eskuelaan a maawagan iti Bible School for Christian Couples. Mangted daytoy kadagiti agassawa iti kanayonan a pannakasanay tapno ad-adda a mausarda iti organisasion ni Jehova. Impakaammo pay ni Kabsat Lett a ti School for Traveling Overseers and Their Wives ken ti School for Branch Committee Members and Their Wives ket maminduan a maikondukta iti kada tawen idiay Patterson, ken adda probision a tumabuno iti maikadua a gundaway dagidiay nagraduaren iti dayta.

Dimtengen ti makatukay-puso a konklusion ti programa idi indauluan ni John E. Barr ti napakumbaba ken napasnek a kararag. b Agtawen iti 97 ken nabayagen a kameng ti Bagi a Manarawidwid. Narikna ti amin a timmabuno a talaga a naisangsangayan dayta a miting.

[Footnotes]

[Blurb iti panid 19]

Tinagiragsak ti amin a timmabuno ti makaparegta nga interbiu

[Blurb iti panid 20]

Binendisionan ni Jehova ti panangasaba idiay Ethiopia