Matuladmo Kadi ni Finehas no Maipasangoka iti Parikut?

NAGPATEG a pribilehio ti agserbi kas panglakayen iti kongregasion. Ngem kuna ti Sao ti Dios a maipaspasangoda met kadagiti parikut. No dadduma, masapul a tamingenda ti kaso dagiti nakabasol ken agserbida kas ‘ukom agpaay ken Jehova.’ (2 Cron. 19:6) Wenno mabalin a makaawatda iti annongen nga iti panagriknada ket dida kabaelan, kas ken Moises a sipapakumbaba a nagsaludsod: “Siasinoak tapno mapanak koma ken Faraon?”​—Ex. 3:11.

Naisurat ti Biblia babaen ti nasantuan nga espiritu. Dayta met laeng nga espiritu ti nausar iti pannakadutok dagiti panglakayen. Gapuna, naglaon ti Biblia kadagiti pagarigan maipapan kadagiti manangaywan a sibaballigi a nangsango kadagiti parikut. Maysa kadakuada ni Finehas. Gapu ta anak ni Eleazar ken apoko ni Aaron, karaman iti linia dagiti agserbinto kas nangato a padi. Adda tallo a pasamak iti biagna a mangipakita a masapul a sanguen dagiti panglakayen ita dagiti parikut buyogen ti tured, sirib, ken panagtalek ken Jehova.

“Madagdagus a Timmakder”

Agtutubo pay laeng ni Finehas idi nagkampo dagiti Israelita iti Tantanap ti Moab. Kuna ti Biblia: “Nangrugi dagiti umili a maaddaan iti imoral a relasion iti annak a babbai ti Moab. . . . Ket nangrugi dagiti umili a mangan ken agruknoy iti didiosda.” (Num. 25:1, 2) Dinusa ni Jehova dagiti nakabasol babaen ti makapapatay a saplit. Panunotem no ania ti narikna ni Finehas idi naammuanna ti basol ken ti saplit nga inyeg dayta kadagiti Israelita.

Ituloy ti salaysay: “Adtoy! ti maysa a lalaki iti annak ti Israel immay, ket iyas-asidegna idi iti kakabsatna ti maysa a babai a Midianita iti imatang ni Moises ken iti imatang ti intero a gimong ti annak ti Israel, bayat nga agsangsangitda iti pagserkan ti tolda ti gimong.” (Num. 25:6) Ania ti aramiden ti padi a ni Finehas? Isu ket maysa laeng nga agtutubo idinto ta ti nakabasol nga Israelita ket panguluen a mangidadaulo iti panagdayaw.​—Num. 25:14.

Ni Jehova ti pagbutngan ni Finehas, saan a dagiti tattao. Idi nakitana ida, dagus a nangala iti gayang sana sinurot ti lalaki iti toldana ket dinuyokna ida a dua. Ania ti reaksion ni Jehova iti kinatured ken determinasion ni Finehas? Dagus a pinagpatingga ni Jehova ti saplit ken ginunggonaanna ni Finehas babaen ti tulag nga agtalinaed ti kinapadi iti kaputotanna iti “tiempo a di nakedngan.”​—Num. 25:7-13.

Siempre, saan a mangranggas dagiti panglakayen ita. Ngem kas ken Finehas, masapul a natured ken agtignayda a dagus. Kas pagarigan, ni Guilherme ket nabiit pay a nadutokan a panglakayen idi nakiddaw nga agserbi kas miembro ti hudisial a komite. Karaman iti kaso ti maysa a panglakayen a timmulong kenkuana idi ubing pay. “Nagrigat ti kasasaadko,”  kunana. “Diak makaturog iti rabii. Kanayon a pampanunotek no kasanok a tamingen daytoy a kaso a di agpaapektar iti emosionko tapno maannurotko dagiti pagalagadan ni Jehova. Adu nga aldaw a nagkarkararagak ken nagsukimatak kadagiti naibatay-Biblia a publikasion.” Dayta ti nangted kenkuana iti tured a nangtaming iti narigat a situasion ken nangtulong iti kabsatna a nakabasol.​—1 Tim. 4:11, 12.

Mapagwadan iti pammati ken kinamatalek dagiti panglakayen no agtignayda a dagus ken mangipakitada iti kinatured kadagiti situasion nga agkalikagum iti kasta. Siempre, masapul met a natured ti amin a Kristiano tapno maibagada ti dakes a naaramidan ti kabsatda. Agkasapulan met iti kinamatalek ti panangisardeng a makikadua iti nailaksid a gayyem wenno kabagian.​—1 Cor. 5:11-13.

Malapdan ti Dangadang no Adda Pannakaawat

Ti kinatured ni Finehas ket saan a resulta ti kinadarasudos ti maysa nga agtutubo. Kitaentayo no kasano a nangipakita iti pannakaawat​—yantangay nagtignay buyogen ti kinasirib ken kinaannad​—idi adda sabali pay a nadamagna. Dagiti tribu da Ruben ken Gad ken ti kagudua ti tribu ni Manases ket nangbangon iti maysa nga altar iti asideg ti Karayan Jordan. Impapan ti dadduma nga Israelita a para dayta iti palso a panagdayaw isu a nagsaganada a makigubat.​—Jos. 22:11, 12.

Ania ti inaramid ni Finehas? Kaduana ti dadduma a panguluen ti Israel a nakisarita kadagidiay nangibangon iti altar. Inlawlawag dagiti akusado a tribu a dayta ket altar para iti “panagserbi ken Jehova.” Nalapdan ngarud ti dangadang.​—Jos. 22:13-34.

No makangngeg ti maysa a Kristiano iti akusasion wenno negatibo a damag maipapan iti kapammatianna, talaga a nainsiriban a tuladenna ni Finehas! No addaantayo iti pannakaawat saantay a masair ken ditay met itsismis ti saan a nasayaat a kapaliiwantayo kadagiti kakabsattayo.​—Prov. 19:11.

Kasano a makaipakita dagiti panglakayen iti pannakaawat, kas ken Finehas? “No ibaga ti maysa nga agibumbunannag ti dida nagkinnaawatan iti maysa a kabsat,” kuna ni Jaime a nasuroken a 10 a tawen a panglakayen, “kiddawek a dagus ti tulong ni Jehova tapno makaipaayak iti Nainkasuratan a balakad ken awan dasdasigak. Naminsan, inreklamo ti maysa a kabsat a babai ti panangtrato kenkuana ti maysa a kabsat a lalaki iti sabali a kongregasion. Gayyemko ti kabsat a lalaki isu a naglaka la koma a kasaritak maipapan iti parikut. Imbes ketdi, pinagsaritaanmi iti kabsat a babai ti sumagmamano a prinsipio ti Biblia. Immanamong a makisarita nga umuna iti kabsat a lalaki. (Mat. 5:23, 24) Saan a dagus a nasolbar ti problema. Isu nga imbagak nga usigenna ti sabali pay a prinsipio ti Biblia. Inkeddengna nga ikararag manen dayta ken ikagumaanna ti mangpakawan.”

 Ania ti resultana? “Kalpasan ti sumagmamano a bulan,” kinuna ni Jaime, “immasideg ti kabsat a babai. Kinunana a nagpadispensaren ti kabsat a lalaki. Inyurnosna nga agkaduada iti ministerio ket nagyaman iti kabsat a babai. Narisut ti parikut. Saan koma a kasta kasayaat ti resultana no nakibiangak iti dida nagkinnaawatan gapu ta mabalin nga adda dinasigak.” Ibalakad ti Biblia: “Dika rummuar a sidadarasudos a mangisayangkat iti legal a kaso.” (Prov. 25:8) Dagiti panglakayen nga addaan pannakaawat nainsiriban a paregtaenda dagiti kakabsatda a no adda ti dida nagkikinnaawatan, iyaplikarda dagiti prinsipio ti Biblia tapno mataginayon ti talna.

Nakiuman ken Jehova

Pribilehio ni Finehas ti agserbi kas maysa a padi iti ili a pinili ti Dios. Kas naadaltayon, uray idi agtutubo pay laeng naisangsangayanen ti kinatured ken pannakaawatna. Ngem nagballigi a nangsango kadagiti parikut gapu ta nagtalek ken Jehova.

Dagiti lallaki ti Gabaa iti tribu ni Benjamin rinames ken pinapatayda ti kamalala ti maysa a Levita. Kalpasan dayta a nakalkaldaang a pasamak, nagsagana dagiti dadduma a tribu a manggubat kadagiti Benjamita. (Uk. 20:1-11) Sakbay dayta, inkararagda ti tulong ni Jehova ngem namindua a nakaro ti pannakaabakda. (Uk. 20:14-25) Kayatna kadi a sawen a saan nga epektibo ti kararagda? Talaga kadi a kayat ni Jehova nga ilinteg ti dakes a naaramidanda?

Nakatibtibker latta ti pammati ni Finehas, a maysan a nangato a padi. Inkararagna: “Rummuarakto kadi manen a makibakal iti annak ni Benjamin a kabsatko wenno sardengakon?” Kuna ni Jehova nga itedna dagiti Benjamita iti imada. Kas resultana, napuoran ti Gabaa.​—Uk. 20:27-48.

Ania ti maadaltayo? Agtultuloy ti dadduma a problema iti kongregasion iti laksid ti panagregget dagiti panglakayen ken iti panangikararagda iti tulong ti Dios. No kasta ti kasasaad, nasayaat a laglagipenda ti sasao ni Jesus: “Itultuloyyo ti agdawat [wenno agkararag], ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo.” (Luc. 11:9) Uray no kasla maitantan ti sungbat ti kararag, manamnama dagiti panglakayen a sungbatan dayta ni Jehova iti umiso a tiempo.

Kas pagarigan, maysa a kongregasion idiay Ireland ti agkasapulan unay iti Kingdom Hall ngem saan nga aprobaran ti local planning officer ti amin a plano dagiti kakabsat a pagibangonan. Ti sabali pay a mabalin a mangaprobar ket ti chief planning officer ti intero a pagilian. Makatulong ngata ti kararag, kas idi kaaldawan ni Finehas?

Kuna ti maysa a lumugar a panglakayen: “Kalpasan ti adu a kararag ken panagpakaasi, napankami iti hedkuarter ti planning office. Kunada a mabalin nga adu a lawas pay sakbay a makasaritami ti chief officer. Ngem iti uneg laeng ti lima a minuto, nakasaritamin ti opisial. Idi nakitana ti naidrowing manen a plano, dagus a nangted iti permit ket nanipud idin, tinulongannakami ti local planning officer. Ipakita dayta a kapadasan a nakabilbileg ti kararag.” Wen, sungbatan ni Jehova dagiti napasnek a kararag dagiti panglakayen nga agtalek kenkuana.

Nadagsen ti annongen ni Finehas iti nagkauna nga Israel. Ngem babaen ti kinatured, pannakaawat, ken panagtalek iti Dios, napagballigianna dagiti parikut. Inanamongan ni Jehova ti panagregget ni Finehas a mangaywan iti kongregasion ti Dios. Agarup 1,000 a tawen kalpasanna, napaltiingan ni Esdras a mangisurat: “Ni Finehas nga anak ni Eleazar ti panguluen idi kadakuada iti napalabas. Ni Jehova adda idi kenkuana.” (1 Cron. 9:20) Sapay koma ta kasta met ti amin a mangidadaulo ita iti ili ti Dios ken iti amin a Kristiano a simamatalek nga agserserbi kenkuana.