Maragragsakanak nga Agserbi ken Jehova

Kas Insalaysay ni Fred Rusk

Ubingak pay napaneknekakon nga umiso dagiti sasao ni David iti Salmo 27:10: “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto.” Palubosandak a mangestoria no kasano.

DIMMAKELAK iti poder ni lolok nga agnanaed iti cotton farm iti estado ti Georgia, U.S.A. bayat ti Great Depression idi dekada ’30. Nagleddaang unay ni Tatang iti ipapatay ni nanangko ken ti kayyanak nga adingko. Imbatinak iti poder ti balo a lolok tapno mapan agtrabaho iti adayo a siudad. Idi agangay, kayatnak nga alaen iti ayanna ngem saan a natuloy.

Dagiti antik ti mangas-asikaso iti amin a banag iti pagtaenganmi. Nupay saan a relihioso ni lolomi, napeklan a Southern Baptist dagiti annakna. Napilitanak a makimisa iti Dinomingo gapu ta bautendak no saanak a mapan. Dayta ti makagapu a diak interesado iti relihion. Ngem magusgustuak ti isports ken ageskuela.

Ti Ibibisita a Nangbalbaliw iti Biagko

Maysa a malem idi 1941, adda agassawa a lakay ken baket nga immay iti balaymi. Agtawenak idi iti 15. Kunada nga isu ni “Angkel Talmadge Rusk.” Diak ida am-ammo ngem imbagana nga isuda ket Saksi ni Jehova. Ti mangmangngegko iti simbaan ket naiduma iti imbagada a panggep ti Dios nga agbiag nga agnanayon dagiti tattao ditoy daga. Saan a patien dayta ti kaaduan iti pamiliami ken inuyawda pay ida. Manipud idin, naparitandan nga umay iti balaymi. Ngem ni Anti Mary, nga in-inauna laeng kaniak iti tallo a tawen, ket immawat iti Biblia ken kadagiti publikasion a naibatay iti dayta.

Nakombinsir a dagus ni antik a nabirokannan ti kinapudno isu a nagpabautisar idi 1942 kas maysa a Saksi ni Jehova. Napasaranna met ti impadto ni Jesus: “Dagiti kabusor ti maysa a tao isudanto dagiti tattao iti bukodna a sangakabbalayan.” (Mat. 10:34-36) Nakaro ti panangbusor kenkuana ti pamiliami. Napigsa kadagiti politiko ni manangna isu a kinakumplotna ti mayor a nangipaaresto ken Angkel Talmadge. Napabasol nga aglaklako nga awan lisensiana isu a naibalud.

Ti mayormi ti nagakem a hues. Naipadamag iti diario ti ilimi ti imbagana iti korte: “Dagiti literatura nga iwarwaras daytoy a tao . . . ket kas kapeggad ti sabidong.” Nagapelar ni angkelko ket nangabak ngem sangapulo nga aldawen a nakabalud.

 Tinulongannak ni Anti Mary

Saan la a siak ti kinasabaan ni Anti Mary no di ket dagiti pay kaarrubami. Kinaduak a nangyadal iti Biblia iti maysa a lalaki nga immawat iti libro a The New World. a Kuna ni baketna a nagpatnag a binasa ni lakayna ti libro. Nupay diak kayat ti makimiembro a dagus iti aniaman a relihion, nagustuak ti maad-adalko. Ngem saan a dagiti pamunganayan a pannursuro ti Biblia ti nakakombinsirak a dagiti Saksi ti ili ti Dios no di ket ti pannakatratoda.

Kas pagarigan, iti panagawidmi manipud panagsukaymi iti kakamatisan, natakuatanmi ken Anti Mary a pinuoran dagiti manangna dagiti literaturana agraman ti ponograpo ken dagiti nairekord a mensahe ti Biblia. Napalalo ti pungtotko ngem kinuna ti maysa kadagiti antik, “Agyamankayto iti inaramidmi.”

Napilitan a pimmanaw iti balaymi ni Anti Mary idi 1943 gapu ta dina kayat nga ikompromiso ti baro a pammatina ken ti panangasabana kadagiti kaarruba. Manipud idin, maragsakanak a nakaammo iti nagan ti Dios a Jehova. Naammuak pay nga isu ket naayat, naasi a Dios, ken dina dusaen dagiti tattao iti umap-apuy nga impierno. Ken uray diak pay napadasan ti nakigimong, naammuak nga addaan iti naayat nga organisasion.

Idi agangay, bayat nga agdaldalusak iti arubayanmi, adda nagsardeng a lugan ket sinaludsodda no siak ni Fred. Naammuak a Saksida isu a kinunak, “Makiluganak man ngarud ta agsasaritatayo iti sabali a lugar.” Imbaga gayam ni Anti Mary a sarungkarandak. Ti maysa kadakuada ket ni Shield Toutjian nga agdaldaliasat a ministro. Pinaregtanak iti naespirituan, banag a kasapulak unay. Idi agangay, siakon ti busbusoren ti pamiliami gapu iti panangidepensak iti pammati dagiti Saksi ni Jehova.

Manipud Virginia, sinuratannak ni Anti Mary ket kinunana a no desididoak nga agserbi ken Jehova, mabalinko ti mapan iti pagnanaedanna. Inkeddengko a dagus ti mapan. Iti maysa a rabii ti Biernes idi Oktubre 1943, inkargak iti kahon ti dadduma a napateg nga aruatek ket inggalutko iti maysa a kayo iti saan unay nga adayo iti balaymi. Kabigatanna, innalak ti kahon ket nanglikawak iti balay ti kaarrubami sa nagluganak a nagpaili. Napanak iti siudad ti Roanoke. Sadiay a nagkitakami ken Anti Mary iti balay ti maysa a kabsat nga agnagan Edna Fowlkes.

 Panagrang-ay iti Naespirituan, Bautismo, Bethel

Ni Kabsat Edna ket maysa a naasi a napulotan a Saksi​—kas ken Lidia iti Biblia​—a nangabang iti dakkel a balay ken nangpadagus kada Anti Mary, ti ipagna, ken dagiti dua nga annakna a da Gladys ken Grace Gregory. Nagbalinda idi agangay a misionera. Matalek pay la nga agserserbi ni Gladys iti sanga nga opisina ti Japan nupay agtawenen iti nasurok a 90.

Bayat ti kaaddak iti balay da Kabsat Edna, regular a makigimgimongak ken nasanayak iti ministerio. Gapu ta nawayaak nga agadal iti Sao ti Dios ken makigimong, napennek ti tarigagayko a rumang-ay iti naespirituan. Nabautisaranak idi Hunio 14, 1944. Nagpayunir ni Anti Mary ken dagiti agkabsat a Gregory ket naidestinoda iti makin-amianan a Virginia. Nakatulongda iti pannakabuangay ti kongregasion iti Leesburg. Idi rugrugi ti 1946, nagpayunirak iti kabangibangna a lugar. Iti kalgaw dayta a tawen, nagkukuyogkami a timmabuno iti internasional a kombension idiay Cleveland, Ohio idi Agosto 4-11.

Iti dayta a kombension, ni Nathan Knorr, a mangidadaulo idi iti organisasion, imbagana dagiti plano a pannakapalawa ti Brooklyn Bethel a pakairamanan ti pannakaibangon ti baro a residence building ken pannakapadakkel ti printery. Adu nga agtutubo a lallaki ti kasapulan. Kayatko ti agserbi iti Bethel isu nga impasak ti aplikasionko. Sumagmamano a bulan kalpasanna, naayabanak iti Bethel idi Disiembre 1, 1946.

Kalpasan ti agarup makatawen, ti printery overseer a ni Max Larson sinarungkarannak iti Mailing Department. Imbagana a mayakarak iti Service Department. Adu ti nasursurok no kasano nga agaplikar dagiti prinsipio ti Biblia ken iti panagandar ti organisasion ti Dios nangruna iti pannakipagtrabahok ken T. J. (Bud) Sullivan, ti manangaywan iti dayta a departamento.

Namin-adu a binisitanak ni Tatang ditoy Bethel. Nagbalin a relihioso idi lumakayen. Kinunana iti maudi nga ibibisitana, “Daytoyen ti maudi a panangbisitak kenka ngem mabalinnak a bisitaen.” Sumagmamano a daras a nabisitak sakbay a natay. Kombinsido a mapan idiay langit. Ngem mangnamnamaak a pagungarento ni Jehova, saan nga iti namnamaenna a papanan no di ket ditoy daga tapno maikkan iti gundaway nga agbiag nga agnanayon iti naisubli a Paraiso.

 Dagiti Saan a Malipatan a Kombension ken Panagibangon

Dakkel ti naitulong dagiti kombension iti naespirituan a panagrang-ay. Naisangsangayan dagiti internasional a kombension iti Yankee Stadium iti New York idi dekada ’50. Bayat ti maysa a sesion idi 1958, adda 253,922 manipud iti 123 a pagilian ti timmabuno iti Yankee Stadium ken Polo Grounds. Adda diak malipatan iti dayta a kombension. Bayat a tumultulongak iti convention office, agdardaras nga immasideg ni Kabsat Knorr. Kinunana: “Fred, nalipatak ti nangdutok iti agpalawag kadagiti amin a payunir nga adda iti naabangan a patakder iti asideg. Di la mabalin a mapanka sadiay ket mangisaganaka iti makaparegta a palawag bayat magmagnaka?” Nagkarkararagak agingga a nakadanonak nga urayak la umanangsab.

Alisto nga immadu dagiti kongregasion iti New York City idi dekada ’50 ken ‘60 isu nga agkurangen dagiti naabangan a Kingdom Hall. Gapuna, manipud 1970 agingga iti 1990, tallo a pasdek ti nagatang ken natarimaan idiay Manhattan tapno adda nasayaat a paggigimongan. Siak ti nagserbi a tserman ti building committee a mangas-asikaso iti panagibangon kadagitoy a proyekto. Adu ti diak malipatan a kapadasan no kasano a sibabaknang a binendisionan ni Jehova dagiti kongregasion a nangsuporta ken nangiringpas kadagitoy a patakder, nga agingga ita ket maus-usar pay laeng para iti pudno a panagdayaw.

Panagbalbaliw iti Biagko

Maysa nga aldaw idi 1957, iti ipapanko iti trabahok bigla a nagtudo bayat a magmagnaak iti parke iti nagbaetan ti Bethel Home ken Printery. Adda nasarunok a napintas a balasang a nabiit pay a Bethelite. Awan payongna isu nga inyopresek nga agkapayongkami. Kasta ti panagam-ammomi ken Marjorie. Manipud nagkasarkami idi 1960, siraragsak nga agkadkaduakami nga agserbi ken Jehova iti rigat ken nam-ay. Sinelebraranmi ti maika-50 nga anibersario ti kasarmi idi Setiembre 2010.

Sangsangpetmi pay laeng a nag-honeymoon idi imbaga ni Kabsat Knorr a siak ti maysa nga instruktor ti Gilead School. Anian a nagsayaat a pribilehio! Manipud 1961 agingga iti 1965, lima a napaut a klase ti nabukel a kaaduanna ket branch personnel tapno masanayda a mangimaton iti sanga nga opisina. Idi agngudo ti 1965, naisubli ti lima a bulan a kapaut dagiti klase para iti pannakasanay dagiti misionero.

 Idi 1972, nadutokanak kas overseer ti Writing Correspondence Department. Ti panagsukimat tapno masungbatan ti adu a saludsod ken parikut ti nangtulong kaniak nga ad-adda a mangtarus kadagiti pannursuro ti Sao ti Dios ken mangyaplikar kadagiti nangato a pagalagadan ti Dios tapno matulongak ti sabsabali.

Idi 1987, nayakarak manen iti Hospital Information Services. Nayurnos dagiti seminar tapno matulongan dagiti panglakayen a kameng ti Hospital Liaison Committee no kasanoda a makisarita kadagiti doktor, hues, ken social worker maipapan iti Nainkasuratan a takdertayo mainaig iti dara. Ngem ti dakkel a problema ket ti panangipilit ti dodoktor a mayalisonan iti dara ti annak dagiti kakabsat, a masansan nga agkiddawda iti permiso ti korte.

No mairekomenda kadagiti doktor a mausar dagiti alternatibo ti dara, masansan nga ibagada a nangina ken saan a magun-odan dagita. Ti kanayon a sungbatko iti doktor a mangibagbaga iti kasta ket, “Pangngaasim ta ukradem ta imam.” No iyukradna, ibagak manen, “Ammom, adda iti imam ti kasayaatan nga alternatibo ti dara.” Dayta a pammadayaw ipalagipna kadakuada a no naannadda nga agopera, bassit ti agsayasay a dara.

Iti napalabas a dua a dekada, sibabaknang a binendisionan ni Jehova dagitoy a panagregget a mangisuro kadagiti doktor ken hues. Dakkel ti nagbalbaliwan ti panangmatmatda idi nalawlawag kadakuada ti takdertayo. Sigun kadagiti panagsukimat iti medisina, naammuanda nga epektibo dagiti alternatibo ti dara ken adun a mannakikooperar a doktor ken hospital ti mabalin a pagpaagasan dagiti pasiente a saan nga agpayalison iti dara.

Manipud 1996, agserserbikamin ken Marjorie iti Watchtower Educational Center ditoy Patterson, New York, nga agarup 110 a kilometro iti amianan ti Brooklyn. Nagtrabahoak iti apagbiit iti Service Department. Adda met gundaway a nangisuroak kadagiti branch personnel ken agdaldaliasat a manangaywan. Iti napalabas a 12 a tawen, agserserbiak manen kas overseer iti Writing Correspondence, a nayakar ditoy Patterson manipud Brooklyn.

Dagiti Rigat ti Panaglakay ken Panagbaket

Gapu ta agtawenakon iti 85, marigatanakon a mangaramid kadagiti trabahok iti Bethel. Nasurok a 10 a tawenen a lablabanak ti kanserko. Kas ken Ezekias, mariknak a pinaatiddog ni Jehova ti biagko. (Isa. 38:5) Kumapkapsut metten ni baketko ken agtintinnulongkami a mangdaer iti sakitna nga Alzheimer. Ni Marjorie ket maysa a naregta a ministro ni Jehova, mangbalbalakad kadagiti agtutubo, ken matalek ken nasungdo nga asawa. Naanep nga agadal ken nalaing a mangisuro iti Biblia ken adu a naespirituan nga annakmi ti kanayon a mangkomkomusta kadakami.

Natay ni Anti Mary idi Marso 2010 iti edad a 87. Nalaing a mannursuro iti Sao ti Dios ken tinulonganna ti sabsabali a dumasig iti pudno a panagdayaw. Adu a tawen a nagserbi kas amin-tiempo a ministro. Agyamanak unay ta tinulongannak a mangammo iti kinapudno a linaon ti Sao ti Dios ken agbalin nga adipen ti naayat a Diostayo a ni Jehova. Naitabon ni Anti iti abay ti tanem ni lakayna, a dati a misionero idiay Israel. Masiguradok nga addada iti lagip ni Jehova nga agur-uray iti panagungar.

No lagipek ti nasurok nga 67 a tawen a panagserbi ken Jehova, agyamanak iti adu a bendision a naawatko. Maragragsakanak a mangaramid iti pagayatan ni Jehova! Agtalekak iti di kaikarian a kinamanangngaasina ken manginanamaak iti kari ti Anakna: “Tunggal maysa a nangpanaw iti balbalay wenno kakabsat a lallaki wenno kakabsat a babbai wenno ama wenno ina wenno annak wenno dagdaga maigapu iti naganko umawatto iti adu a daras nga ad-adu ken tawidennanto ti agnanayon a biag.”​—Mat. 19:29.

[Footnote]

[Ladawan iti panid 19]

Iti cotton farm ni lolok idiay Georgia, U.S.A., idi 1928

[Ladawan iti panid 19]

Da Anti Mary ken ni Angkel Talmadge

[Ladawan iti panid 20]

Da Anti Mary, Gladys, ken Grace

[Ladawan iti panid 20]

Idi nabautisaranak idi Hunio 14, 1944

[Ladawan iti panid 20]

Iti Service Department iti Bethel

[Ladawan iti panid 21]

Kaduak ni Anti Mary iti internasional a kombension iti Yankee Stadium idi 1958

[Ladawan iti panid 21]

Idi kasarmi ken Marjorie

[Ladawan iti panid 21]

Duakami idi 2008