Nainsiriban a Balakad Maipapan iti Panagasawa ken Kinaawan Asawa

“Sasawek daytoy . . . tapno tignayenkayo iti daydiay mayanatup ken iti daydiay kaipapananna ti naynay a panagserbi iti Apo nga awan ti makasinga.”​—1 COR. 7:35.

1, 2. Apay nga agpaiwanwantayo iti balakad ti Biblia maipapan iti panagasawa ken kinaawan asawa?

 MASANSAN a makariknatayo iti kinaragsak, pannakapaay, wenno danag iti pannakilangentayo iti ditay kasekso. Tapno mapagballigiantayo dagita, masapul nga agpaiwanwantayo iti Dios. Ngem adda pay sabali a rason nga agpaiwanwantayo. Nupay kontento nga awanan asawa ti maysa a Kristiano, mabalin a piliten dagiti kapamilia wenno gagayyemna nga agasawa. Adda met mayat nga agasawa ngem saan a makabirok iti maitutop nga asawa. Dadduma ti agkasapulan kadagiti balakad tapno maaramidanda dagiti responsabilidad ti addaan asawa. Ken naasawaan man wenno saan, maipasangoda iti sulisog mainaig iti seksual nga imoralidad.

² Dagita a kasasaad apektaranda ti kinaragsaktayo nangruna ti takdertayo iti imatang ni Jehova a Dios. Iti kapitulo 7 ti umuna a surat ni Pablo kadagiti taga-Corinto, binalakadanna dagiti naasawaan ken di naasawaan. Kayatna nga agtignayda a ‘mayanatup ken naynay nga agserbida iti Apo nga awan ti makasinga.’ (1 Cor. 7:35) Bayat nga ad-adalentayo dayta a balakad ni Pablo, usigentayo ti kasasaadtayo​—naasawaan man wenno saan​—tapno ad-adda a makapagserbitayo ken Jehova.

Nadagsen a Personal a Desision

3, 4. (a) Ania ti mapasamak no ti maysa ket piliten dagiti kapamilia ken gagayyemna nga agasawa? (b) Kasano a makatulong ti balakad ni Pablo tapno maaddaantayo iti umiso a panangmatmat iti panagasawa?

³ Kas kadagiti Judio idi umuna a siglo, adu ita ti mamati a nakapatpateg ti panagasawa. No malakayan wenno mabaketan ti maysa, madanagan dagiti maseknan a gagayyem ken kakabagianna isu a sugsoganda nga agasawa. Mabalin nga ibagada nga ikagumaanna ti agbirok iti maasawa wenno adda iretoda. Mangyurnosda pay ketdi iti kadeytna. Ngem no dadduma, agresulta dagita iti pannakaibabain, pannakadadael ti panaggagayyem, ken sakit ti nakem.

⁴ Saan a pulos nga impilit ni Pablo ti panagasawa wenno panagtalinaed nga awanan asawa. (1 Cor. 7:7) Nupay kontento a nagserbi ken Jehova nga awanan asawa, rinaemna ti kalintegan dagiti mayat a mangasawa. Kalintegan met ti tunggal Kristiano ita ti mangasawa wenno saan. Ditay koma diktaran ida.

Naballigi Uray Awanan Asawa

5, 6. Apay nga inrekomenda ni Pablo ti kinaawan asawa?

⁵ Ipakita dagiti sasao ni Pablo kadagiti taga-Corinto ti positibo a panangmatmatna iti kinaawan asawa. (Basaen ti 1 Corinto  7:8.) Ngem saan a kas kadagiti klero ti Kakristianuan, dina imbilang ti kinaawan asawana a nasaysayaat ngem kadagiti naasawaan. Imbes ketdi, intampokna ti bentaha a tagtagiragsaken dagiti awanan asawa a ministro. Ania dayta?

⁶ Masansan a nawaya ti awanan asawa a mangawat kadagiti pribilehio iti panagserbi ken Jehova a nalabit saan a maaramidan dagiti naasawaan. Immawat ni Pablo iti naisangsangayan a pribilehio kas “apostol iti nasnasion.” (Roma 11:13) Basaem ti Aramid kapitulo 13 agingga iti 20, ket kaduaem ni Pablo ken dagiti padana a misionero bayat a luktanda dagiti teritoria ken mangbuangayda kadagiti kongregasion iti nagduduma a lugar. Adu a rigat ti inibturanna bayat ti panagserbina, a sumagmamano laeng ti makapaspasar ita. (2 Cor. 11:23-27, 32, 33) Ngem saan a sayang ti panagibturna gapu ta adu ti natulonganna a nagbalin nga adalan, ket dayta ti nangted kenkuana iti dakkel a rag-o. (1 Tes. 1:2-7, 9; 2:19) Naaramidanna ngata amin dagita no adda asawa wenno pamiliana? Nalabit saan.

7. Mangted iti pagarigan kadagiti awanan asawa a Saksi a nangusar a naimbag iti kasasaadda tapno adu ti maaramidanda iti ministerio.

⁷ Adu a Kristiano nga awanan asawa ti nangusar a naimbag iti kasasaadda tapno adu ti maaramidanda iti ministerio. Dua a babbalasang a payunir idiay Bolivia a da Sara ken Limbania napanda iti maysa a purok a nabayagen a di makaskasabaan. Parikut kadi ti kaawan iti koriente? Kunada: “Awan ti radio wenno TV isu nga awan ti pakasingaan dagiti tattao nga agbasa.” Dadduma a pumurok ti nangipakita kadakuada kadagiti basbasaenda a daan a publikasion dagiti Saksi ni Jehova ngem saanen a mayim-imprenta. Gapu ta dandani interesado ti amin a bumalay, saandan a masarungkaran ti tunggal balay iti teritoria. Kuna ti maysa a baket: “Sigurado nga asidegen ti panungpalan gapu ta nadanondatayon dagiti Saksi ni Jehova.” Idi agangay, dadduma a pumurok ti makigimgimongen.

8, 9. (a) Ania ti pampanunoten ni Pablo idi imparegtana ti kinaawan asawa? (b) Ania ti pagimbagan dagiti awanan asawa?

⁸ Siempre, nasayaat met ti magapuanan dagiti naasawaan a Kristiano iti panangasabada  kadagiti narigat a teritoria. Ngem dadduma nga annongen a silulukat kadagiti payunir nga awanan asawa ket mabalin a narigat kadagidiay naasawaan wenno addaan annak. Idi sinuratan ni Pablo dagiti kongregasion, ammona nga adu pay ti masapul nga aramiden iti trabaho a panangasaba. Kayatna a marikna ti amin ti rag-o a nariknana isu nga imparegtana ti panagserbi ken Jehova kas awanan asawa.

⁹ Insurat ti maysa a balasang a payunir idiay United States: “Patien ti dadduma a saan a naragsak dagiti awanan asawa. Ngem napaneknekak a ti pudno a kinaragsak ket agdepende iti pannakigayyem ken Jehova. Nupay nagrigat ti awanan asawa, maysa dayta a naisangsangayan a regalo no usarem a naimbag.” Kinunana pay maipapan iti panangbirok iti kinaragsak: “Ti kinaawan asawa ket kasla rangtay imbes a lapped iti pananggun-od iti kinaragsak. Ammok a dungdungnguen ni Jehova ti amin, naasawaan man wenno saan.” Siraragsak nga agserserbi ita iti pagilian nga agkasapulan iti ad-adu a mangaskasaba iti Pagarian. No baro wenno balasangka, mabalinmo kadi nga usaren a naimbag ti kasasaadmo tapno ad-adu ti maaramidam iti ministerio? Mapaneknekamto a ti kinaawan asawa ket nagpateg a regalo ni Jehova.

Dagidiay Mayat nga Agasawa

10, 11. Kasano a tulongan ni Jehova dagidiay mayat a mangasawa ngem awan pay ti mabirokanda a maitutop nga asawa?

¹⁰ Adu a matalek nga adipen ni Jehova ti mayat nga agasawa kalpasan ti adu a tawen a panagtalinaedda nga awanan asawa. Gapu ta kasapulanda ti panangiwanwan iti panagbirok iti maitutop nga asawa, agpatulongda ken Jehova.​—Basaen ti 1 Corinto 7:36.

¹¹ No kayatmo ti mangasawa iti padam a matalek nga agserserbi ken Jehova, itultuloymo nga ikararag dayta. (Fil. 4:6, 7) Kasano man kabayag ti panaguraymo, dika maup-upay. Agtalekka iti naayat a Diostayo ta ammona ti kasapulam ken tulongannaka a mangdaer iti riknam.​—Heb. 13:6.

12. Apay a panunoten a naimbag ti maysa a Kristiano no adda mangitukon kenkuana iti kasar?

¹² Mabalin a kayatmon ti mangasawa, ngem kasanon no ti mangitukon kenka iti kasar ket nakapuy ti espiritualidadna wenno di manamati? Laglagipem a no kamali ti desisionmo, nakarkaronto ti saem a mariknam ngem iti kinalidaymo gapu iti kinaawan asawam. Ket no nagkasarkayon, tungpal-biag nga agkaduakayon iti rigat ken nam-ay. (1 Cor. 7:27) Dika koma mangasawa gapu laeng ta pampanunotem a daytan ti maudi a gundawaymo amangan no pagbabawyamto inton agangay.​—Basaen ti 1 Corinto 7:39.

Saganaam Dagiti Realidad ti Panagasawa

13-15. Ania dagiti kasasaad a masapul a pagtungtongan dagiti agplamplano nga agasawa?

¹³ Nupay imparegta ni Pablo ti panagserbi ken Jehova kas awanan asawa, dina binabalaw dagidiay mayat a mangasawa. Imbes ketdi, makatulong dagiti balakadna tapno mapagballigian ti agnobio dagiti realidad ti panagasawa ken tapno tungpal-biag ti panagkaduada.

¹⁴ Masapul a balbaliwan ti dadduma ti panangmatmatda iti biag ti naasawaan. Bayat ti panaginnarem, ipagarup dagiti agnobio a naisangsangayan ti ayan-ayatda ken isuda laeng ti makarikna iti kasta. Uray inton agasawadan, patienda a kanayonto a naragsakda. Ngem saan a realistiko dayta. Nupay makaparagsak ti panaglinnailo, saan nga umdas dayta a mangsolbar kadagiti problema ken pakarigatan a mapasaran dagiti agassawa.​—Basaen ti 1 Corinto 7:28. a

 ¹⁵ Adu a kakaskasar ti masdaaw ken madismaya pay ketdi no maammuanda nga agduma ti kapanunotanda mainaig iti napateg a bambanag kas iti panaggasto, panaglinglingay, pagnaedan, ken kasansan ti ibibisitada kadagiti katuganganda. Nalabit adda pay ugalida a mabalin a makapasuron iti tunggal maysa. Bayat ti panaginnarem, mabalin a panunotenda a saan a kasapulan a pagtungtongan dagita a bambanag. Ngem posible a pagtaudanto dayta iti parikutda isu a nasaysayaat a pagtungtonganda sakbay nga agkasarda.

16. Apay a masapul a pagtungtongan dagiti agassawa no kasanoda a sanguen dagiti problemada?

¹⁶ Tapno naballigi ken naragsak dagiti agassawa, masapul nga agtinnulongda a mangsango kadagiti problemada. Pagtungtonganda no kasanoda a disiplinaen dagiti annakda ken aywanan dagiti nataenganen a nagannakda. Ngem dida koma ipalubos a dagita ti mamagsina kadakuada. No iyaplikarda ti balakad ti Biblia, masolbar ti adu a problema, maibturanda dagiti saan a marisut a parikut, ken makapagtalinaedda a naragsak kas agasawa.​—1 Cor. 7:10, 11.

17. Ania a ‘bambanag iti lubong’ ti namnamaen dagiti agassawa a pakaringgoranda?

¹⁷ Dinakamat ni Pablo iti 1 Corinto 7:32-34 ti sabali pay a realidad ti panagasawa. (Basaen.) Dagiti naasawaan ‘maringgoranda iti bambanag ti lubong,’ kas iti taraon, kawes, pagnaedan, ken dadduma pay. Apay? No baroka pay, mabalin a maipamaysam ti ministeriom. Ngem no addan asawam, masapul a bingayem ti tiempo ken pigsam tapno maipaaymo ti kasapulan ni baketmo. Kasta met ti aramiden ti asawa a babai. Ammo ni Jehova nga agpada a kasapulan dayta ti agassawa. Ammona a saanen a kas idi baro ken balasangda pay ti kaadu ti tiempo ken pigsada nga agserbi. Dadduma kadagita  ti usarendan a mangpatibker iti panagasawada.

18. Ania ti rumbeng a balbaliwan dagiti agassawa maipapan iti panaglinglingay?

¹⁸ Saan la a dayta ti maadaltayo. No ti dadduma a tiempo ken pigsa dagiti agassawa nga agserbi iti Dios ket usarendan para iti maysa ken maysa, saan kadi a kasta met ti aramidenda no maipapan iti tiempo ken pigsada nga aglinglingay? Ania ngata ti marikna ti asawa a babai no saan a kissayan ni lakayna ti tiempona a makikadua kadagiti gagayyemna? Ania met ti marikna ti asawa a babai no kasta met ti aramiden ni lakayna? Mabalin nga agpada a nalidayda ken mariknada a saanda a maipatpateg. Maliklikan dayta no ikagumaanda a palagdaen ti relasionda kas agassawa.​—Efe. 5:31.

Kalikaguman ni Jehova ti Moral a Kinadalus

19, 20. (a) Apay a maipasango iti imoralidad uray dagiti naasawaan? (b) Ania a peggad ti pakaipasanguan dagiti agassawa no aginnaddayoda iti napaut?

¹⁹ Determinado dagiti adipen ni Jehova nga agtalinaed a nadalus iti moral. Dadduma ti agasawa tapno maliklikanda ti imoralidad. Ngem saan nga automatiko a maliklikam dayta no agasawaka. Idi tiempo ti Biblia, masalakniban laeng dagiti tattao no agtalinaedda iti uneg ti napaderan a siudad. Ngem no rummuarda, mabalin a takawan wenno papatayen ida dagiti kriminal. Umasping iti dayta, masalakniban dagiti agassawa iti imoralidad no agtulnogda kadagiti linteg ni Jehova mainaig iti panagasawa.

²⁰ Dinakamat ni Pablo dagita a limitasion iti 1 Corinto 7:2-5. Kalintegan ti asawa a babai nga isu laeng ti kadenna ni lakayna. Kasta met ti namnamaen ti asawa a lalaki ken baketna. Manamnama nga ipaay ti tunggal maysa ti seksual a “karbenganna” iti asawana ta dayta ti kalinteganna. Ngem adda dagiti agassawa nga aginnaddayo iti napaut​—nalabit gapu iti bakasion wenno trabaho, isu a dida maipaay ti ‘karbenganda’ iti tunggal maysa. Panunotem ti nakalkaldaang a resultana no makikamalala ti maysa gapu ta saanna a ‘mamedmedan ti bagina.’ Bendisionan ni Jehova ti asawa a lalaki a mangipapaay iti kasapulan ti pamiliana ken dina irisgo ti relasionda nga agassawa.​—Sal. 37:25.

Agtulnog iti Balakad ti Biblia

21. (a) Apay a narigat ti agdesision maipapan iti panagasawa ken kinaawan asawa? (b) Apay a makatulong ti balakad iti 1 Corinto kapitulo 7?

²¹ Ti pangngeddeng nga agasawa wenno agtalinaed nga awanan asawa ket maysa kadagiti karirigatan a desision. Ngem mangasawaka man wenno saan, adda latta problema gapu ta imperpektotayo amin. Ken uray bendisionannatayo ni Jehova, maupaytayo latta no dadduma. Bumassit ti problema no iyaplikarmo ti nainsiriban a balakad ni Pablo iti 1 Corinto kapitulo 7. Naasawaantayo man wenno saan, maparagsaktayo ni Jehova. (Basaen ti 1 Corinto 7:37, 38.) Ti pananggun-od iti anamong ti Dios ti kasayaatan a kalat. No an-anamongannaka, agbiagkanto iti inkarina a baro a lubong, a sadiay awanton ti rigat ken parikut a pakaipaspasanguan ita dagiti lallaki ken babbai.

[Footnote]

Ania ti Sungbatyo?

• Apay a saan a rumbeng a piliten ti maysa nga agasawa?

• No awan asawam, kasano a mausarmo a naimbag ti tiempom?

• Kasano a masaganaan ti agnobio dagiti realidad ti panagasawa?

• Apay a ti panagasawa dina automatiko a masalakniban ti maysa iti seksual nga imoralidad?

[Salsaludsod]

[Dagiti Ladawan iti panid 14]

Naragsak dagiti Kristiano nga awanan asawa a mangipampamaysa iti tiempoda iti ministerio

[Ladawan iti panid 16]

Ania a panagbalbaliw ti rumbeng nga aramiden ti dadduma nga agassawa?