“Baldadoak Ita Ngem Saan nga Agnanayon!”

Kas Insalaysay ni Sara van der Monde

Masansan nga ibaga dagiti tattao: “Nakasamsam-it ti panagis-isemmo, Sara. Apay a nakaragragsakka a kanayon?” Ibagak kadakuada nga adda naisangsangayan a namnamak, “Baldadoak ita ngem saan nga agnanayon!”

NAYANAKAK idi 1974 idiay Paris, France. Adda dagiti problema idi nayanakak, ken nadayagnosak idi agangay nga addaan iti cerebral palsy. Diak unay maigaraw dagiti saka ken imak, ken narigat a maawatan ti panagsaok. Naaddaanak pay iti epilepsy ken nalakaak a maak-akaran iti sakit.

Idi dua ti tawenko, immakar ti pamiliami idiay Melbourne, Australia. Kalpasan ti dua a tawen, pinanawannakami ni Daddy. Dayta ti damo a nariknak a nasingedak iti Dios. Ni Mommy ket maysa a Saksi ni Jehova ken kanayon nga ikuyognak kadagiti gimong. Sadiay a naammuak nga ay-ayatennak ti Dios ken maseknan kaniak. Gapu iti dayta a pannakaammo, agraman ti pammateg ni Mommy, nariknak a natalgedak iti laksid ti nagbaliw a kasasaadmi.

Insuronak met ni Mommy nga agkararag ken Jehova. Kinapudnona, adayo a nalaklaka kaniak ti agkararag ngem iti agsao. No agkararagak, saanen a masapul nga agpakarigatak a mangibalikas kadagiti sasao ta naglawag dagita iti panunotko. Ken gapu ta nagrigat a maawatan ti panagsaok, makaparagsak a maammuan a maawatan ni Jehova ti amin, ibalikasko man dayta wenno saan.​—Sal. 65:2.

Panangdaer Kadagiti Problema

Idi lima ti tawenkon, kimmaro ti sakitko isu a kasapulakon ti natibker a caliper splint tapno makapagnaak. Ngem no isuotko dagita, kaslaak la matumba no magnaak! Idi 11 ti tawenko, saanakon a makapagna. Idi agangay, diak payen makapan ken makapanaw iti iddak no awan ti de koriente nga aparato a mangikabil kaniak iti de motor a wheelchair-ko, a kontrolek babaen ti imak.

No dadduma, nalidayak gapu iti kasasaadko. Ngem malaglagipko ti prinsipio ti pamiliami: “Dimo problemaen dagiti bambanag a saanmo a maaramid. Aramidem laeng ti kabaelam.” Dayta ti nakatulong kaniak a mangaramid iti bambanag kas iti panagsakay iti kabalio, panaglayag, panagbangka, panagkamping, ken uray pay panagmaneho! Magusgustuak met ti agpinta, agdait, ag-quilting, agborda, ken agdamili.

Gapu ta baldadoak, pagduaduaan ti dadduma no kabaelak ti agserbi iti Dios. Idi 18 ti  tawenkon, imbaga ti maysa a mannursuromi a pumanawakon iti balaymi tapno “mapanawak” ti relihion ni Mommy. Tulongannak kano nga agbirok iti pagyanak. Ngem imbagak kenkuana a diak pulos tallikudan ti pammatik ken saakto la pumanaw iti balaymi no nakasaganaakon nga agsolo.

Di nagbayag kalpasanna, nabautisaranak kas maysa a Saksi ni Jehova. Kalpasan ti dua a tawen, immakarak iti bassit nga apartment. Maragragsakanak ta nagun-odko ti tulong a kasapulak ken ti wayawaya a tinarigagayak.

Di Ninamnama a Tukon

Adu ti napasamak iti biagko a nangsubok iti pammatik. Naminsan, naklaatak idi kiniddaw ti kaeskuelaak a padak a baldado a makikallaysaak kenkuana. Maragsakanak idi damo. Kayatko met ti makiasawa, kas iti kaaduan a babbalasang. Ngem gapu ta agpadakami a baldado saan a masigurado a naragsakkaminto. Kangrunaanna, saanko a kapammatian. Naan-anay a nagduma dagiti patpatien, aktibidad, ken kalatmi. Kasanokami ngarud nga agkatunosan? Determinadoak met nga agtulnog iti nalawag a bilin ti Dios a mangasawa laeng iti kapammatian, isu a pinaayko.​—1 Cor. 7:39.

Agingga ita, ammok nga umiso ti inaramidko. Ken siguradoak a naragsakakto iti baro a lubong nga inkari ti Dios. (Sal. 145:16; 2 Ped. 3:13) Kabayatanna, determinadoak nga agtalinaed a matalek ken ni Jehova ken agbalin a kontento iti agdama a kasasaadko.

Il-iliwek ti tiempo a saankonton a kasapulan ti wheelchair ken mabalinkon ti agtaray. Iti daytanto a gundaway a maibagak, “Baldadoak idi ngem nasalun-atak itan nga agnanayon!”