‘Dika Agtalek iti Bukodmo a Pannakaawat’

“Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat.”​—PROV. 3:5.

1, 2. (a) Ania dagiti situasion a pakaipasanguantayo? (b) No maipasangotayo iti narigat a situasion, agaramid iti desision, wenno labanantayo ti sulisog, siasino ti pagtalkantayo, ken apay?

 TI EMPLOYER ni Cynthia a ket nagkissay iti empleado iti kompaniana. Madanagan ni Cynthia amangan no isun ti sumaruno a maikkat. Ania ti aramidenna no mapasamak dayta? Kasanon dagiti babayadanna? Maysa a kabsat nga agnagan iti Pamela ti mayat nga umakar iti lugar nga agkasapulan iti ad-adu nga agibumbunannag iti Pagarian, ngem rumbeng kadi a mapan? Sabali met ti pakaseknan ti agtutubo a ni Samuel. Ubing pay idi napadasanna ti agbuya iti pornograpia. Itan ta nasurok a 20 ti tawenna, magargari nga agbuya manen. Kasanona a malabanan dayta?

² Siasino ti pagtalkam no maipasangoka kadagiti narigat a situasion, no agaramidka kadagiti napateg a desision, wenno no labanam dagiti sulisog? Agtalekka kadi laeng iti bagim, wenno “ipalladawmo ti dadagsenmo ken Jehova”? (Sal. 55:22) “Dagiti mata ni Jehova situturongda kadagidiay nalinteg,” kuna ti Biblia, “ken dagiti lapayagna situturongda iti panagpatulongda.” (Sal. 34:15) Nagpateg ngarud nga agtalektayo ken Jehova iti amin a pusotayo ken ditay agtalek iti bukodtayo a pannakaawat!​—Prov. 3:5.

3. (a) Ania ti ramanen ti panagtalek ken Jehova? (b) Apay nga agtalek ti dadduma iti bukodda a pannakaawat?

³ Ti naimpusuan a panagtalektayo ken Jehova ramanenna ti panangaramid iti bambanag maitunos iti pagayatanna. Maaramidantayo dayta babaen ti regular a panagkararagtayo tapno tulongan ken iwanwannatayo. Ngem adu ti marigatan nga agtalek a naan-anay ken Jehova. Kas pagarigan, inamin ti maysa a kabsat a ni Lynn, “Marigatanak nga agtalek a naan-anay ken Jehova.” Apay? “Diak marikna nga adda tatangko,” kinunana, “ken saan a maseknan kaniak ni nanangko. Isu nga alisto a nasursurok nga aywanan ti bagik.” Gapu iti kasta a napasaran ni Lynn, marigatan nga agtalek a naan-anay iti asinoman. Adda met dagidiay agtalek iti bagida gapu iti abilidad ken nagun-odda a balligi. Kas pagarigan, mabalin a gapu iti adu a kapadasan ti maysa a panglakayen, saanen nga agkararag nga umuna iti Dios no asikasuenna dagiti bambanag mainaig iti kongregasion.

4. Ania ti adalentayo iti daytoy nga artikulo?

⁴ Namnamaen ni Jehova nga ikagumaantayo nga aramiden dagiti ikarkararagtayo ken agtignaytayo a maitunos iti pagayatanna. Kasanotayo a mabalanse ti panagtalektayo kenkuana ken ti panangikagumaantayo a mangsolbar iti narigat a problematayo? Ania ti pagannadantayo no agaramidtayo kadagiti desision? Apay a napateg ti kararag no ikagkagumaantayo a labanan dagiti sulisog? Sungbatantayo dagita a saludsod babaen ti panangusigtayo iti dadduma a pagarigan iti Biblia.

 No Maipasango iti Pakarigatan

5, 6. Ania ti inaramid ni Ezekias idi sakupen ida ti ari ti Asiria?

⁵ Kuna ti Biblia maipapan ken Ari Ezekias ti Juda: “Intultuloyna ti kimpet ken Jehova. Saan a simiasi iti isusurot kenkuana, no di ket intuloyna a sinalimetmetan dagiti bilinna nga imbilin ni Jehova ken Moises.” Wen, “nagtalek ken Jehova a Dios ti Israel.” (2 Ar. 18:5, 6) Adda idi gundaway a nasakup ti nabileg a buyot ti Asiria ti adu a nasarikedkedan a siudad ti Juda. Isarunodan ti Jerusalem isu nga imbaon sadiay ni Ari Senaquerib dagiti representantena​—a pakairamanan ni Rabsaque​—ken ti adu a militarna. Ania ti aramiden ni Ezekias? Napan iti balay ni Jehova ken inkararagna: “O Jehova a Diosmi, isalakannakami, pangngaasim, iti imana, tapno amin dagiti pagarian ti daga maammuanda a siksika laeng ti Dios, O Jehova.”​—2 Ar. 19:14-19.

⁶ Nagtignay ni Ezekias maitunos iti kararagna. Sakbay pay a napan iti templo tapno agkararag, binilinnan dagiti umili a dida ikankano ti panangumsi ni Rabsaque. Nangibaon pay iti maysa a grupo a mapan ken propeta Isaias tapno agpabalakad. (2 Ar. 18:36; 19:1, 2) Dagiti laeng makaay-ayo ken Jehova ti inaramid ni Ezekias. Dina sinolbar ti bambanag babaen ti panagpatulongna iti Egipto wenno kadagiti kabangibangda a nasion ta ammona a maikaniwas dayta iti pagayatan ni Jehova. Saan a nagtalek ni Ezekias iti bukodna a pannakaawat. Kalpasan a pinapatay ti anghel ni Jehova dagiti 185,000 a soldado ti Asiria, “pimmanaw” ni Senaquerib ket nagsubli idiay Nineve.​—2 Ar. 19:35, 36.

7. Kasano a makaliwliwa kadatayo dagiti kararag da Anna ken Jonas?

⁷ Nagtalek met ken Jehova ni Anna nga asawa ti Levita a ni Elcana idi nariribukan gapu ta lupes. (1 Sam. 1:9-11, 18) Naispal ni propeta Jonas manipud iti tian ti dakkel nga ikan kalpasan nga inkararagna: “Gapu iti rigatko nagpukkawak ken Jehova, ket sinungbatannak. Manipud tian ti Sheol nagpatulongak. Nangngegmo ti timekko.” (Jon. 2:1, 2, 10) Anian a makaliwliwa a maammuan a kasanoman karigat ti kasasaadtayo, makaadanitayo ken ni Jehova ken ‘agkiddaw iti paraburna’!​—Basaen ti Salmo 55:1, 16.

8, 9. Ania ti kapatgan iti kararag da Ezekias, Anna, ken Jonas, ken ania ti masursurotayo?

⁸ Maadaltayo met iti kapadasan da Ezekias, Anna, ken Jonas no ania ti masapul nga ikararagtayo no agpasartayo iti nakaro a pakarigatan. Nagsagabada amin gapu iti narigat a kasasaadda. Ngem ipakita dagiti kararagda a ti kapatgan kadakuada ket ti nagan ti Dios, ti panangidaydayaw kenkuana, ken ti panangaramid iti pagayatanna imbes a ti bagbagida ken ti solusion dagiti parikutda. Nasaktan ni Ezekias gapu ta naumsi ti nagan ni Jehova. Inkari ni Anna nga itedna ti ipatpategna nga anak nga agserbi iti tabernakulo iti Silo. Ken kinuna ni Jonas: “Ti inkarik, tungpalekto.”​—Jon. 2:9.

⁹ No ikararagtayo a mapagballigiantayo ti narigat a situasion, nainsiriban nga usigentayo ti motibotayo. Maseknantayo laeng kadi iti solusion ti problematayo wenno sipapanunottayo ken ni Jehova ken iti panggepna? No agsagsagabatayo, mabalin a maringgorantayo unay kadagiti problematayo ket mabaybay-antayon ti espiritualidadtayo. No agkararagtayo maipaay iti tulong ni Jehova, laglagipentayo nga ikararag ti pannakasantipikar ti naganna ken ti pannakaalangon ti kinasoberanona. Iti kasta, mataginayontayo ti positibo a panangmatmat uray no saan a matungpal ti namnamaentayo a solusion. Mabalin a ti sungbat dagiti kararagtayo ket ti panangibturtayo iti situasion babaen ti tulong ti Dios.​—Basaen ti Isaias 40:29; Filipos 4:13.

 No Agaramidtayo iti Desision

10, 11. Ania ti inaramid ni Jehosafat idi naipasango iti situasion a dina ammo a tamingen?

¹⁰ Kasanoka nga agaramid kadagiti napateg a desision? Agdesisionka kadi nga umuna sa ikararagmo a bendisionan dayta ni Jehova? Kitaentayo ti inaramid ni Ari Jehosafat iti Juda idi gubaten ida ti nagtipon a puersa dagiti Moabita ken Ammonita. Saan a kabaelan ida ti Juda. Ania ti aramiden ni Jehosafat?

¹¹ “Nagbuteng ni Jehosafat ket insaadna ti rupana tapno birokenna ni Jehova,” kuna ti Biblia. Imbilinna nga agayunar ti amin nga umili ti Juda ken aguummongda tapno “agimtuodda ken Jehova.” Kalpasanna, nagtakder iti sanguanan dagiti umili ti Juda ken Jerusalem sa inkararagna: “O Diosmi, saanmonto aya nga ipakat ti panangukom kadakuada? Ta awanankami iti pannakabalin iti sanguanan daytoy dakkel a bunggoy nga um-umay a bumusor kadakami; ket dakami saanmi nga ammo no ania ti rebbeng nga aramidenmi, no di ket situturong kenka dagiti matami.” Impangag ti pudno a Dios ti kararag ni Jehosafat ket simimilagro nga insalakanna ida. (2 Cron. 20:3-12, 17) No agaramidtayo kadagiti desision nangruna no mainaig iti espiritualidadtayo, saan kadi a rumbeng nga agtalektayo ken Jehova imbes nga iti bukodtayo a pannakaawat?

12, 13. Ania ti inyulidan ni Ari David no maipapan iti panagdesision?

¹² Ania ti aramidentayo no maipasangotayo kadagiti situasion a kasla nalaka a solbaren​—nalabit makapanunottayo a dagus iti solusion gapu ta napadasantayon dayta? Makatulong ti kapadasan ni Ari David. Idi rinaut dagiti Amalekita ti siudad ti Ziklag, innalada ti assawa ken annak ni David agraman ti assawa ken annak dagiti tattaona. Insaludsodna ken Jehova: “Kamatekto kadi daytoy a buyot dagiti tulisan?” Kuna ni Jehova: “Inka kumamat, ta di bumurong a makamakammonto ida, ket di bumurong a mangispalkanto.” Nagtulnog ni David ket ‘naispalna ti isuamin nga innala dagiti Amalekita.’​—1 Sam. 30:7-9, 18-20.

¹³ Kalpasan dayta, rinaut met dagiti Filisteo ti Israel. Nagsaludsod manen ni David ken Jehova. Nalawag ti sungbat ti Dios: “Sumang-atka, ta di bumurong nga iyawatkonto dagiti Filisteo kadagita imam.” (2 Sam. 5:18, 19) Di nagbayag, rimmaut manen dagiti Filisteo. Ania ti aramiden itan ni David? Mabalinna a panunoten: ‘Naminduan a naipasangoak iti kastoy a situasion. Labanak dagiti kabusor ti Dios kas iti inaramidko idi.’ Wenno masapul kadi nga agpaiwanwan ni David ken ni Jehova? Saan a nagpannuray iti napalabas a kapadasanna. Nagkararag manen ken Jehova. Anian a ragsakna ta inaramidna dayta! Naiduma ngamin dagiti instruksion nga inawatna. (2 Sam. 5:22, 23) No maipasangotayo iti umasping a situasion wenno problema, agannadtayo koma a ditay agtalek iti napalabas a kapadasantayo.​—Basaen ti Jeremias 10:23.

14. Ania ti maadaltayo iti pannakitulag da Josue ken dagiti lallakay ti Israel kadagiti Gabaonita?

¹⁴ Gapu ta imperpektotayo amin​—agraman dagiti aduan kapadasan a panglakayen​— masapul a kanayon nga agpaiwanwantayo ken Jehova no agdesisiontayo. Usigentayo ti inaramid ti suno ni Moises a ni Josue ken dagiti lallakay ti Israel idi immasideg kadakuada dagiti nasirib a Gabaonita, a nagpammarang a naggapuda iti adayo a lugar. Dagus a nakikappia ken nakitulagda kadagiti Gabaonita a dida man la nagkonsulta ken Jehova. Nupay sinuportaran ni Jehova ti tulaganda idi agangay, siniguradona a maisurat iti Kasuratan ti saanda a panagpaiwanwan tapno pakasursuruantayo.​—Jos. 9:3-6, 14, 15.

 No Labanantayo Dagiti Sulisog

15. Ilawlawagyo no apay a napateg ti kararag tapno malabanan ti sulisog.

¹⁵ Gapu ta adda iti unegtayo ti “linteg ti basol,” masapul nga ikagumaantayo a labanan ti dakes a tarigagaytayo. (Roma 7:21-25) Agballigitayo iti dayta a laban. Kasano? Imbaga ni Jesus kadagiti pasurotna a napateg ti kararag tapno malabanan ti sulisog. (Basaen ti Lucas 22:40.) No agtultuloy latta dagiti dakes a tarigagay wenno pampanunot kalpasan a nagkararagtayo, masapul nga ‘agtultuloytayo nga agdawat iti sirib ti Dios’ tapno mapagballigiantayo ti suot. Naipasigurado kadatayo nga isu ket “mangted a sipaparabur kadagiti isuamin ken awanan panangumsi.” (Sant. 1:5) Insurat met ni Santiago: “Adda aya asinoman a masaksakit kadakayo [iti naespirituan]? Ayabanna koma dagiti lallakay iti kongregasion, ket ikararaganda koma, nga isu sapsapuanda iti lana iti nagan ni Jehova. Ket ti kararag ti pammati paimbagennanto ti addaan sagubanit.”​—Sant. 5:14, 15.

16, 17. Tapno malabanantayo ti sulisog, kaano ti kasayaatan a panagkararagtayo?

¹⁶ Nupay napateg ti kararag tapno malabanantayo ti sulisog, masapul nga ammotayo met no kaanotayo nga agkararag. Usigentayo ti napasamak iti agtutubo a nadakamat iti Proverbio 7:6-23. Idi sumipngeten, magmagna iti dalan a pagaammona a pagnanaedan ti imoral a babai. Gapu ta naallilaw ken naguyugoy iti makaay-ayo a panagsasao ti babai, simmurot a kasla toro a mapan iti pagpartian. Apay a napan sadiay daytoy nga agtutubo? Yantangay “awanan puso,” wenno, awanan kapadasan, nalabit lablabananna dagiti dakes a tarigagayna. (Prov. 7:7) Kaano koma ti kasayaatan a panagkararagna? Siempre, makatulong ti panagkararag iti aniaman a kanito bayat a makisasao ti babai kenkuana. Ngem ti kasayaatan a panagkararagna ket idi koma damo a napanunotna ti magna iti dayta a dalan.

¹⁷ Mabalin a lablabanan ita ti maysa ti agbuya iti pornograpia. Ngem kasanon no lukluktanna dagiti site ti Internet nga ammona a naglaon kadagiti makagargari a ladawan wenno video? Saan kadi nga umasping ti kasasaadna iti agtutubo a nadakamat iti Proverbio kapitulo 7? Mayarig dayta iti pannagna iti napeggad a dalan. Tapno malabananna ti agbuya iti pornograpia, masapul nga ikararagna ti tulong ni Jehova sakbay a masulisog a manglukat iti napeggad a site ti Internet.

18, 19. (a) Apay a narigat a labanan ti sulisog, ngem kasanom a mapagballigian dayta? (b) Ania ti determinasionmo?

¹⁸ Saan a nalaka a labanan ti sulisog wenno mapagballigian dagiti dakes nga aramid. Insurat ni apostol Pablo: “Ti lasag ket bumusor iti espiritu ti tarigagayna, ket ti espiritu  bumusor iti lasag.” Isu a ti ‘mismo a bambanag a kayattayo koma nga aramiden saantayo nga ar-aramiden.’ (Gal. 5:17) Tapno mapagballigiantayo dayta, sipapasnek nga agkararagtayo no masulisog wenno adda di umiso a mapanunottayo sa agtignaytayo maitunos iti kararagtayo. “Awan ti sulisog a nangkemmeg kadakayo malaksid iti kadawyan kadagiti tattao,” ken iti tulong ni Jehova, makapagtalinaedtayo a matalek kenkuana.​—1 Cor. 10:13.

¹⁹ Maipaspasangotayo man iti narigat a situasion, agar-aramid iti napateg a desision, wenno ikagkagumaantayo a labanan ti sulisog, inikkannatayo ni Jehova iti nagsayaat a sagut​—ti panagkararag. Babaen iti dayta, maipakitatayo ti panagtalektayo kenkuana. Masapul met nga itultuloytayo ti agdawat iti nasantuan nga espiritu ti Dios a mangiwanwan ken mangpabileg kadatayo. (Luc. 11:9-13) Ken aniaman ti mapasamak, agtalektayo ken ni Jehova imbes nga iti bukodtayo a pannakaawat.

[Footnote]

Malagipyo Kadi?

• Ania ti nasursurom kada Ezekias, Anna, ken Jonas maipapan iti panagtalek ken Jehova?

• Kasano a ti kapadasan da David ken Josue ipakitada a masapul ti panagannad no agaramid iti desision?

• No maipasangotayo iti sulisog, kaano ti kasayaatan a panagkararagtayo?

[Salsaludsod]

[Ladawan iti panid 9]

Tapno malabanan ti sulisog, kaano ti kasayaatan a panagkararag?