Magna Maitunos iti Espiritu Agpaay iti Biag ken Talna

“Magna, saan a maitunos iti lasag, no di ket maitunos iti espiritu.”​—ROMA 8:4.

1, 2. (a) Apay a napeggad no masinga ti drayber iti panagmanehona? (b) Apay a napeggad no masinga ti maysa iti naespirituan?

 “ITI kada tawen, umad-adu ti pakasingaan dagiti drayber.” Dayta ti komento ti sekretario ti transportasion iti Estados Unidos. Ti selpon ti maysa kadagiti pakasingaan dagiti drayber iti panagmanehoda. Iti maysa a surbey, nasurok a kakatlo kadagiti nainterbiu ti nagkuna a nadungpar wenno dandani dinungpar ida ti lugan gapu ta agus-usar iti selpon ti drayber. Ipagarup ti dadduma a makainut iti tiempo ti panagusar iti selpon bayat ti panagmaneho ngem napeggad dayta.

² Pudno met dayta iti espiritualidadtayo. No kasano a ti masingsinga a drayber masansan a dina makita dagiti peggad iti dalanna, kasta met ti maysa a masingsinga iti naespirituan. No ipalubostayo a masingatayo kadagiti Nakristianuan nga aktibidad, mabalin a marba ti pammatitayo. (1 Tim. 1:18, 19) Imbaga ni apostol Pablo dayta a peggad idi pinakdaaranna  dagiti padana a Kristiano idiay Roma: “Ti panangpampanunot iti lasag kaipapananna ti ipapatay, ngem ti panangpampanunot iti espiritu kaipapananna ti biag ken talna.” (Roma 8:6) Ania ti kayatna a sawen? Kasanotayo a maliklikan ti “panangpampanunot iti lasag” ken maipamaysa ti “panangpampanunot iti espiritu”?

“Awan Pannakakondenarda”

3, 4. (a) Ania ti insurat ni Pablo a napasaranna a dangadang? (b) Apay a nasken nga interesadotayo iti kasasaadna?

³ Insurat ni Pablo kadagiti taga-Roma ti napasaranna a panagbinnusor ti lasag ken panunotna. (Basaen ti Roma 7:21-23.) Saan nga ikalkalintegan wenno ay-ay-ayen ni Pablo ti bagina a kasla ket ‘tay napnuan-basol ken awanen ti umiso a maaramidanna. Kinapudnona, isu ket nataengan, napulotan iti espiritu a Kristiano, ken napili kas “apostol iti nasnasion.” (Roma 1:1; 11:13) Apay ngarud nga insuratna dayta a panagbinnusor?

⁴ Bigbigen ni Pablo a dina kabaelan nga aramiden ti pagayatan ti Dios iti pamay-an a kayatna. Apay? “Amin nagbasol ken agkurang iti dayag ti Dios,” kinunana. (Roma 3:23) Kas kaputotan ni Adan, imperpekto ni Pablo ken addaan iti dakes a tarigagay. Matarusantayo ni Pablo ta imperpektotayo amin ken inaldaw a makidangdangadangtayo iti dakes a tarigagay. Ken adu dagiti pakasingaan a mabalin a mangisiasi kadatayo iti ‘nailet a dalan nga agturong iti biag.’ (Mat. 7:14) Ngem adda namnama ni Pablo ket kasta met kadatayo.

5. Pakasarakan ni Pablo iti tulong ken pannakawayawaya?

⁵ Insurat ni Pablo: “Siasinonto ti mangalaw kaniak . . . ? Pagyamanan iti Dios baeten ken Jesu-Kristo nga Apotayo!” (Roma 7:24, 25) Kalpasanna, dinakamatna dagidiay “naikaykaysa ken Kristo Jesus”​—dagiti napulotan a Kristiano. (Basaen ti Roma 8:1, 2.) Babaen ti nasantuan nga espiritu ni Jehova, inamponna ida kas annak ken pinagbalinna a “makipagtawid ken Kristo.” (Roma 8:14-17) Makatulong ti espiritu ti Dios agraman ti pammatida iti pangsubbot a daton ni Kristo tapno agballigida iti dangadang a dinakamat ni Pablo, iti kasta, “awan pannakakondenarda.” Nawayawayaanda “manipud iti linteg ti basol ken ti ipapatay.”

6. Apay a nasken a matarusan ti amin nga adipen ti Dios ti insurat ni Pablo?

⁶ Nupay naiturong ti sasao ni Pablo kadagiti napulotan a Kristiano, ti imbagana maipapan iti espiritu ti Dios ken iti pangsubbot a daton ni Kristo ket makagunggona met iti amin nga adipen ni Jehova aniaman ti namnamada. Impaisurat ti Dios ti imbalakad ni Pablo kadagiti napulotan a Kristiano isu a nasken a matarusan ti amin nga adipen ti Dios ken agtulnogda iti dayta.

No Kasano a ti Dios “Kinondenarna ti Basol iti Lasag”

7, 8. (a) Kasano a ti Linteg ket ‘nakapuy babaen ti lasag’? (b) Ania ti naibanag ti Dios babaen ti espirituna ken ti subbot?

⁷ Iti Roma kapitulo 7, binigbig ni Pablo a nabileg ti impluensia ti basol iti imperpekto a lasag. Iti kapitulo 8, dinakamatna ti bileg ti nasantuan nga espiritu. Inlawlawagna no kasano a makatulong ti espiritu ti Dios iti pannakidangadang dagiti Kristiano iti bileg ti basol tapno maaramidda ti pagayatan ni Jehova ken magun-odda ti anamongna. Intampok ni Pablo a babaen ti espiritu ti Dios ken ti pangsubbot a daton ti Anakna, intungpal ti Dios ti banag a saan a naaramidan ti Mosaiko a Linteg.

⁸ Ti Linteg, agraman ti adu a bilin a linaonna, kondenarenna dagiti managbasol. Ken imperpekto dagiti nangato a padi ti Israel nga agserserbi sigun iti Linteg isu a dida makaidaton iti naan-anay a mangabbong iti basol. Gapuna, ti Linteg ket ‘nakapuy babaen ti  lasag.’ Ngem “babaen ti panangibaonna iti bukodna nga Anak iti kaas-asping ti managbasol a lasag” ken panangidatonna kas subbot, ti Dios “kinondenarna ti basol iti lasag,” iti kasta, naibanagna ti ‘di kabaelan ti Linteg.’ Kas resultana, naibilang a nalinteg dagiti napulotan a Kristiano maibatay iti pammatida iti pangsubbot a daton ni Jesus. Naiparegta kadakuada a ‘magnada, saan a maitunos iti lasag, no di ket maitunos iti espiritu.’ (Basaen ti Roma 8:3, 4.) Wen, masapul nga agtalinaedda a matalek agingga nga agpatingga ti naindagaan a biagda tapno magun-odda ti “korona ti biag.”​—Apoc. 2:10.

9. Ania ti kaipapanan ti termino a “linteg” a nausar iti Roma 8:2?

⁹ Malaksid iti “Linteg,” dinakamat pay ni Pablo ti “linteg dayta nga espiritu” ken ti “linteg ti basol ken ti ipapatay.” (Roma 8:2) Ania dagita a linteg? Ti termino ditoy a “linteg” saanna a tukoyen dagiti espesipiko a pagalagadan, kas kadagiti adda iti Mosaiko a Linteg. Kuna ti maysa a reperensia: “Ti Griego ditoy a termino para iti linteg tukoyenna dagiti naimbag wenno dakes nga ar-aramiden dagiti tattao ken mangkonkontrol kadakuada a kas iti linteg. Tukoyenna pay dagiti pagalagadan a kayatda nga annuroten.”

10. Kasano a kontroladonatayo ti linteg ti basol ken ipapatay?

¹⁰ Insurat ni apostol Pablo: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Gapu ta kaputotannatayo ni Adan, kontroladonatayo ti linteg ti basol ken ipapatay. Tarigagayantayo ti agaramid kadagiti saan a makaay-ayo iti Dios, nga agresulta iti ipapatay. Iti surat ni Pablo kadagiti taga-Galacia, tinukoyna dagita nga aramid ken kababalin kas “aramid ti lasag.” Sa innayonna: “Dagidiay mangannurot iti kakasta a banag saandanto a tawiden ti pagarian ti Dios.” (Gal. 5:19-21) Umasping dagita a tattao kadagidiay magmagna maitunos iti lasag. (Roma 8:4) Ar-aramidenda ti kayat ti imperpekto a lasagda. Ngem dagidiay laeng kadi agar-aramid iti nadagsen a basol kas iti pannakiabig, idolatria, ken espiritismo ti magmagna maitunos iti lasag? Saan, gapu ta dagiti aramid ti lasag ramanenna met dagiti ibilang ti dadduma a pagkapuyan kas iti imon, unget, rinnupir, ken apal. Siasino kadatayo ti saanen a makidangdangadang kadagita nga aramid ti lasag?

11, 12. Ania ti inaramid ni Jehova tapno mawayawayaantayo iti linteg ti basol ken ipapatay, ken ania ti masapul nga aramidentayo tapno matagiragsak ti anamongna?

 ¹¹ Anian a ragsaktayo ta pinagbalin ni Jehova a posible a mawayawayaantayo iti linteg ti basol ken ipapatay! Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” No awatentayo ti ayat ti Dios ken maaddaantayo iti pammati iti pangsubbot a daton ni Jesu-Kristo, mawayawayaantayo iti dusa a resulta ti natawidtayo a basol. (Juan 3:16-18) Kas ken Pablo, maibagatayo met: “Pagyamanan iti Dios baeten ken Jesu-Kristo nga Apotayo!”

¹² Ti kasasaadtayo ket umasping iti pannakapaimbag manipud iti nakaro a sakit. Tapno naan-anay a maimbagantayo, masapul nga aramidentayo ti ibaga ti doktor. Nupay mawayawayaantayo iti linteg ti basol ken ipapatay gapu iti pammati iti subbot, imperpekto ken managbasoltayo pay laeng. Adda pay masapul nga aramidentayo tapno nasalun-attayo iti naespirituan ken matagiragsaktayo ti anamong ken bendision ti Dios. Dinakamat ni Pablo a masapul a magnatayo maitunos iti espiritu tapno mawayawayaantayo iti kinaimperpekto.

Magna Maitunos iti Espiritu​—Kasano?

13. Ania ti kaipapanan ti pannagna maitunos iti espiritu?

¹³ Bayat a magmagnatayo, umas-asidegtayo iti destinasiontayo. Tapno makapagnatayo maitunos iti espiritu, saan a kasapulan nga agbalintayo a perpekto iti naespirituan no di ket agtultuloytayo a rumang-ay iti naespirituan. (1 Tim. 4:15) Inaldaw nga aramidentayo ti amin a kabaelantayo a magna wenno agbiag maitunos iti panangidalan ti espiritu. Magun-odtayo ti anamong ti Dios no ‘magnatayo babaen ti espiritu.’​—Gal. 5:16.

14. Ania ti kaykayat dagidiay “makitunos iti lasag”?

¹⁴ Iti surat ni Pablo kadagiti taga-Roma, dinakamatna ti panagbinnusor ti lasag ken panunot. (Basaen ti Roma 8:5.) Ti sao a lasag ket saan laeng a tumukoy iti pisikal a bagi. Iti Biblia, ti sao a “lasag” tukoyenna no dadduma ti kinaimperpektotayo. Dayta ti makagapu iti panagdangadang ti lasag ken panunot, a dinakamat ni Pablo. Ngem dagidiay “makitunos iti lasag” dida man la makidangadang  a kas kenkuana. Kaykayatda a ‘panunoten ti bambanag ti lasag’ imbes nga aramiden ti pagayatan ti Dios ken awaten ti tulongna. Ad-adda nga ipamaysada ti bukodda a pagnam-ayan ken dagiti nainlasagan a tarigagayda. Iti kasumbangirna, dagidiay “makitunos iti espiritu” sipapanunotda iti “bambanag ti espiritu”​—dagiti naespirituan a probision ken aktibidad.

15, 16. (a) Kasano a ti panangipamaysa iti panunot iti maysa a banag apektaranna ti panagpampanunottayo? (b) Ania ti nakaipamaysaan ti panunot ti kaaduan a tattao ita?

¹⁵ Basaen ti Roma 8:6. Tapno maaramid ti maysa ti aniaman a banag​—naimbag man wenno dakes​—masapul nga ipamaysana ti panunotna iti dayta. Dagidiay kanayon a mangpampanunot iti bambanag mainaig iti lasag kayatda nga aramiden dagiti nainlasagan a bambanag. Dagitanton ti nakaipamaysaan ti panunot, interes, ken tarigagayda.

¹⁶ Ania ti nakaipamaysaan ti panunot ti kaaduan a tattao ita? Insurat ni apostol Juan: “Amin a banag iti lubong​—ti derrep ti lasag ken ti derrep dagiti mata ken ti panangiparammag iti sanikua a pagbiag ti maysa​— saan nga agtaud iti Ama, no di ket agtaud iti lubong.” (1 Juan 2:16) Ramanen dagita ti imoralidad, kinatan-ok, ken material a kinabaknang. Kasta ti adu a linaon dagiti libro, magasin, diario, pelikula, pabuya iti TV, ken Internet gapu ta dayta ti nakaisentruan ti panunot ken kayat nga aramiden ti kaaduan a tattao. Ngem ti “panangpampanunot iti lasag kaipapananna ti ipapatay”​—iti naespirituan ita ken literal nga ipapatay iti masanguanan. Apay? “Agsipud ta ti panangpampanunot iti lasag kaipapananna ti pannakibusor iti Dios, ta saan a naipasakup iti linteg ti Dios, ket, iti kinapudnona, saan a mabalin nga ipasakup. Gapuna dagidiay makitunos iti lasag saanda a mabalin nga ay-aywen ti Dios.”​—Roma 8:7, 8.

17, 18. Kasanotayo a maipamaysa ti panunottayo iti espiritu, ken ania ti resultana no aramidentayo dayta?

¹⁷ Iti kasumbangirna, ti “panangpampanunot iti espiritu kaipapananna ti biag ken talna”​—agnanayon a biag iti masanguanan ken ita, talna ti panunot ken pannakikappia iti Dios. Kasanotayo a maipakita a ‘sipapanunottayo iti espiritu’? Babaen ti kanayon a panagpaidalan iti Dios ken iti nasantuan nga espirituna tapno tumunos ti panagpampanunottayo iti panagpampanunotna. No aramidentayo dayta, ti panagpampanunottayo ket “naipasakup iti linteg ti Dios” ken “makitunos” iti pampanunotna. No maipasangotayo iti sulisog, ammotayo no ania ti rumbeng nga aramidentayo. Matignaytayo a mangaramid iti umiso​—daydiay maitunos iti espiritu.

¹⁸ Gapuna, napateg nga ipamaysatayo ti panunottayo kadagiti bambanag mainaig iti espiritu. Maaramidtayo dayta babaen ti ‘panangpatibker iti panunottayo maipaay iti trabaho’ ken panangyun-una kadagiti naespirituan nga aktibidad kas iti regular a panagkararag, panagbasa ken panagadal iti Biblia, pannakigimong, ken panangasaba. (1 Ped. 1:13) Imbes a pasingatayo kadagiti bambanag ti lasag, ipamaysatayo koma ti panunottayo kadagiti bambanag ti espiritu. Iti kasta, makapagtultuloytayo a magna maitunos iti espiritu ken magun-odtayo dagiti bendision, ta ti panangpampanunot iti espiritu kaipapananna ti biag ken talna.​—Gal. 6:7, 8.

Mailawlawagyo Kadi?

• Ania ti saan a naaramidan ti Linteg, ken ania ti naibanag ti Dios?

• Ania ti “linteg ti basol ken ti ipapatay,” ken kasanotayo a mawayawayaan iti dayta?

• Ania ti masapul nga aramidentayo tapno maipamaysatayo ti ‘pampanunottayo iti espiritu’?

[Salsaludsod]

[Dagiti Ladawan iti panid 12, 13]

Magmagnaka kadi maitunos iti lasag wenno maitunos iti espiritu?