Maragragsakanka Kadi iti “Pribilehio a Siaasi a Panangted”?

DAGITI nagkauna a Kristiano idiay Filipos ket pagaammo a naparabur iti panangsuporta iti pudno a panagdayaw. Insurat kadakuada ni apostol Pablo: “Agyamanak a kankanayon iti Diosko iti tunggal pannakalagipko kadakayo iti tunggal ararawko a maipaay kadakayo amin, bayat nga ipapaayko ti ararawko a buyogen ti rag-o, gapu iti kontribusion nga impaayyo iti naimbag a damag nanipud idi umuna nga aldaw agingga itoy a kanito.” (Fil. 1:3-5) Saan a malipatan ni Pablo nga idi nabautisaran ni Lidia ken ti sangakabbalayanna impakaasina nga agdagus iti balayda da Pablo ken ti kakaduana a manangaskasaba.​—Ara. 16:14, 15.

Di nagbayag kalpasanna, ti kabbuangay a kongregasion ti Filipos ket namindua a nangipatulod iti abasto ken Pablo bayat ti sumagmamano a lawas a pannakikaduana kadagiti kakabsat idiay Tesalonica, agarup 100 a milia (160 km) ti kaadayona. (Fil. 4:15, 16) Sumagmamano  a tawen kalpasanna, nupay marigrigatan ken ‘nakaro ti kinakurapay’ dagiti kakabsat idiay Filipos ken ti dadduma a taga-Macedonia, kayatda latta ti tumulong idi nadamagda ti panagkasapulan dagiti maidaddadanes a Kristiano idiay Jerusalem. Pinaneknekan ni Pablo a dayta ket “nalablabes ngem iti pudno a kabaelanda.” Kaskasdi, insuratna: “Nagpakpakaasida kadakami buyogen ti kasta unay a panagdawdawat iti pribilehio a siaasi a panangted.”​—2 Cor. 8:1-4; Roma 15:26.

Saan a nagbaliw ti kinaparabur dagiti taga-Filipos uray no agarup 10 a tawenen ti naglabas manipud idi nagbalinda a Kristiano. Idi nadamagda a naibalud ni Pablo idiay Roma, imbaonda ni Epafrodito a mangitulod kadagiti abasto ti apostol nga uray la 800 a milia (1,287 km) ti dinaliasatna iti takdang ken baybay. Nabatad a kayat dagiti taga-Filipos nga ipaay ti kasapulan ni Pablo tapno maitultuloyna ti mangasaba ken mangparegta kadagiti kakabsat, uray no nakabalud.​—Fil. 1:12-14; 2:25-30; 4:18.

Dagiti pudno a Kristiano ita ibilangda met a pribilehio ti mangsuporta iti panangikasaba iti Pagarian ken panagaramid iti adalan. (Mat. 28:19, 20) Us-usarenda ti tiempo, pigsa, ken kuartada tapno masuportaranda dagiti interes ti Pagarian. Ipakita ti kahon ti sumagmamano a pamay-an a masuportarantayo ti inted-Dios a trabaho.

[Kahon iti panid 22, 23]

DAGITI PAMAY-AN TI DADDUMA A MANGTED

ITI KONTRIBUSION ITI SANGALUBONGAN A TRABAHO

Adu ti mangilasin iti kantidad tapno itinnagda kadagiti kahon ti kontribusion a namarkaan iti “Worldwide Work.”

Dagiti kongregasion binulan nga ipatulodda dagitoy a kantidad iti sanga nga opisina dagiti Saksi ni Jehova iti pagilianda. Dagiti donasionyo a kuarta ket mabalin met nga ipatulodyo a direkta iti Watch Tower Bible and Tract Society of the Philippines, Inc., PO Box 2044, 1060 Manila, wenno iti sanga nga opisina dagiti Saksi ni Jehova iti pagilianyo. (Dagiti boluntario a donasion a nadakamat iti baba ket mabalin met a maipatulod iti sanga nga opisina dagiti Saksi ni Jehova a makinsakup iti pagilianyo.) Dagiti tseke a maipatulod iti nadakamat nga adres ket nasken a maipanagan iti “Watch Tower Society.” Mabalin met nga idonar dagiti alahas wenno dadduma pay a napateg a bambanag. Dagita a kontribusion ket masapul a mapakuyogan iti ababa a surat a mangibagbaga a dayta ket direkta a sagut.

KONDISIONAL A DONASION

Ti kuarta ket mabalin a maitalek iti “Watch Tower Society” tapno mausar iti sangalubongan a trabaho. Ngem maisubli dayta no kiddawen ti nangitalek. Para iti kanayonan nga impormasion, agsuratkayo iti Treasurer’s Office iti nadakamat nga adres wenno agteleponokayo iti (02) 411-6090.

NAIPLANO A PANAGIDONAR

Malaksid kadagiti direkta a sagut a kuarta, adda sabali pay a pamay-an ti panagidonar tapno masuportaran ti sangalubongan a panagserbi agpaay iti Pagarian. Karaman ditoy dagiti sumaganad:

Insurance: Mabalin a ti “Watch Tower Society” ti mainagan kas benepisiario ti life insurance policy wenno ti retirement/pension plan.

Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maipanagan iti “Watch Tower Society” inton matay ti nagidonar, a mayannurot kadagiti paglintegan ti banko iti lugaryo.

Stock ken Bond: Mabalin nga idonar dagiti stock ken bond iti “Watch Tower Society” kas direkta a sagut wenno pagbalinen ti “Watch Tower Society” kas benepisiario ti Transfer on Death.

Lote ken Pasdek: Mabalin nga idonar ti lote wenno pasdek, a nalaka nga ilako, kas direkta a sagut wenno, iti kaso ti maysa a balay, mapalubosan nga agnaed sadiay ti nagdonar bayat a sibibiag. Makiumankayo iti sanga nga opisina iti pagilianyo sakbay a legal nga ipanaganyo iti “Watch Tower Society” ti titulo ti aniaman a lote, balay, wenno pasdekyo.

Gift Annuity: Iti daytoy nga urnos, ti nagidonar mabalinna nga iyakar dagiti stock, bond, wenno kuarta iti maysa a natudingan a korporasion nga us-usaren dagiti Saksi ni Jehova. Ti nagidonar, wenno daydiay tinudinganna, ket makaawat met iti espesipiko a kantidad iti kada tawen bayat a sibibiag. Makissayan ti buis a bayadan ti nagidonar iti tawen a mapatalgedan ti gift annuity.

Testamento ken Bambanag a Maitalek (Trust Fund): Mabalin nga ipatawid ti sanikua wenno kuarta iti “Watch Tower Society” babaen ti legal a testamento, wenno ti “Watch Tower Society” ti pagbalinen a benepisiario ti trust agreement. Mabalin a makissayan ti bayadan a buis no narelihiosuan nga organisasion ti benepisiario ti trust.

Kas ipasimudaag ti termino a “naiplano a panagidonar,” kalikaguman daytoy ti panagplano daydiay agidonar. Tapno matulongan dagidiay agtarigagay a mangsuporta iti sangalubongan a trabaho dagiti Saksi ni Jehova babaen ti sumagmamano a kita ti naiplano a panagidonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naisurat dayta a broshur tapno maipakaammo ti nadumaduma a wagas ti panagidonar, bayat a sibibiag wenno inton matay ti nagdonar. Kalpasan a nabasada ti broshur ken nagkonsultada kadagiti abogado wenno eksperto iti panagbuis, adu dagidiay nakatulong iti panangsuporta iti narelihiosuan ken pangsaranay a trabahotayo iti intero a lubong ken dakkel met ti naksay iti buisda. Magun-odan daytoy a broshur iti Charitable Planning Office.

Para iti kanayonan nga impormasion, agsurat wenno agteleponokayo iti Charitable Planning Office, iti adres a nailista iti baba, wenno makiumankayo iti sanga nga opisina dagiti Saksi ni Jehova a makinsakup iti pagilianyo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telepono: (02) 411-6090