“Temporario nga Agnanaed” iti Dakes a Lubong

“Amin dagitoy . . . silalatak nga indeklarada a ganggannaetda ken temporarioda nga agnanaed iti daga.”​—HEB. 11:13.

1. Ania ti kuna ni Jesus a takder dagiti pasurotna mainaig iti daytoy a lubong?

 “ADDADA iti lubong,” kuna ni Jesus maipapan kadagiti adalanna. Ngem inlawlawagna: “Saanda a paset ti lubong, a kas kaniak a saan a paset ti lubong.” (Juan 17:11, 14) Silalawag ngarud nga impakita ni Jesus ti takder dagiti pudno a Kristiano iti “daytoy a sistema ti bambanag,” a ni Satanas ti diosna. (2 Cor. 4:4) Nupay agbibiagda iti daytoy dakes a lubong, saanda a paset dayta. ‘Ganggannaet ken temporarioda nga agnanaed’ iti daytoy a lubong.​—1 Ped. 2:11.

Nagbiagda kas “Temporario nga Agnanaed”

2, 3. Apay a maikuna a da Enoc, Noe, Abraham, ken Sara nagbiagda kas ‘ganggannaet ken temporario nga agnanaed iti daga’?

² Manipud idi un-unana, naiduma dagiti matalek nga adipen ni Jehova no idilig kadagiti tattao iti dakes a lubong. Sakbay ti Layus, ‘nakipagna da Enoc ken Noe iti pudno a  Dios.’ (Gen. 5:22-24) Situtured nga inkasabada dagiti panangukom ni Jehova iti dakes a lubong ni Satanas. (Basaen ti 2 Pedro 2:5; Judas 14, 15.) Inaramidda ti umiso uray nadangkes dagiti tattao iti aglawlawda. Dayta ti makagapu a naikuna a ni Enoc “naay-ayona a naan-anay ti Dios” ken ni Noe “pinaneknekanna ti bagina nga awan pagkuranganna iti tengnga dagiti kapatadanna.”​—Heb. 11:5; Gen. 6:9.

³ Iti bilin ti Dios, pinanawan da Abraham ken Sara ti komportable a biagda iti Ur a siudad dagiti Caldeo ken nagakar-akarda iti ganggannaet a daga. (Gen. 11:27, 28; 12:1) Insurat ni apostol Pablo: “Babaen iti pammati nagtulnog ni Abraham, idi naayaban, a mapan iti disso a naikeddeng nga awatenna kas tawid; ket napan, nupay saanna nga ammo no sadino ti pagturonganna. Babaen iti pammati isu nagnaed kas ganggannaet iti daga ti kari a kas iti sabali a daga, ket nagnaed kadagiti tolda a kaduana da Isaac ken Jacob, dagiti makipagtawid kenkuana iti daydi met laeng a kari.” (Heb. 11:8, 9) Kuna ni Pablo maipapan kadagita a matalek nga adipen ni Jehova: “Iti pammati natay amin dagitoy, nupay saanda a nagun-odan ti kaitungpalan dagiti kari, ngem nakitada ida iti adayo ket inabrasada ida ken silalatak nga indeklarada a ganggannaetda ken temporarioda nga agnanaed iti daga.”​—Heb. 11:13.

Pakdaar Kadagiti Israelita

4. Ania ti naipakdaar kadagiti Israelita sakbay a nagnaedda iti dagada?

⁴ Immadu dagiti Israelita a kaputotan ni Abraham ket nagbalinda a nasion nga addaan kadagiti linteg ken daga. (Gen. 48:4; Deut. 6:1) Ngem masapul a dida liplipatan a ni Jehova ti pudno a Makinkukua iti dagada. (Lev. 25:23) Nayarigda kadagiti agab-abang a masapul nga agtulnog iti pagayatan ti Makinkukua. Masapul a laglagipenda a “saan a babaen iti tinapay laeng nga agbiag ti tao”; dida met liplipatan ni Jehova gapu laeng iti material a bambanag. (Deut. 8:1-3) Sakbay a nagnaed dagiti Israelita iti dagada, napakdaaranda: “Mapasamakto nga inton ni Jehova a Diosmo ipannaka iti daga nga insapatana kadagidi ammam a da Abraham, Isaac ken Jacob nga ited kenka, ti dadakkel ken napipintas a siudad a saanmo nga imbangon, ken ti balbalay a napno iti amin a naimbag a bambanag ken saanmo a pinunno, ken dagiti nakutkot a pagurnongan ti danum a saanmo a kinutkot, dagiti kaubasan ken kaykayo nga olibo a saanmo nga immula, ket nangankanto ket napnekka, agaluadka tapno saanmo a malipatan ni Jehova.”​—Deut. 6:10-12.

5. Apay nga inlaksid ni Jehova ti Israel, ken ania a baro a nasion ti pinilina?

⁵ Adda nakaibatayan dayta a pakdaar. Idi tinagikua dagiti Israelita ti Naikari a Daga, nagnaedda kadagiti dadakkel a balay ken aduanda iti taraon ken arak isu a nalipatanda ni Jehova. Idi kaaldawan ni Nehemias, linagip ti maysa a grupo dagiti Levita ti nakababain a napasamak, kas mabasa iti Nehemias 9:25-27. (Basaen.) Kunada a dagiti tattao “nangrugida a mangan ken mapnek ken lumukmeg.” Nagrebeldeda iti Dios, ken pinapatayda pay dagiti propeta nga imbaonna a mangpakdaar kadakuada. Dayta ti makagapu nga inyawat ida ni Jehova kadagiti kabusorda. (Os. 13:6-9) Idi agangay, dagiti awanan pammati a Judio pinapatayda ti naikari a Mesias bayat ti turay ti Roma! Inlaksid ida ni Jehova ken nangpili iti baro a nasion, ti naespirituan nga Israel.​—Mat. 21:43; Ara. 7:51, 52; Gal. 6:16.

‘Saan a Paset ti Lubong’

6, 7. (a) Kasanom nga ilawlawag ti imbaga ni Jesus a takder dagiti pasurotna mainaig iti lubong? (b) Apay a dagiti pudno a Kristiano saanda a paset ti lubong ni Satanas?

⁶ Kas nadakamaten, ti Ulo ti kongregasion Kristiano a ni Jesu-Kristo, silalawag nga impakitana a dagiti pasurotna ket saan a paset ti lubong ni Satanas, ti dakes a sistema ti bambanag. Sakbay unay ti ipapatayna, kinunana kadagiti adalanna: “No pasetnakayo koma ti  lubong, ti lubong maayatan iti kukuana. Ita agsipud ta saankayo a paset ti lubong, no di ket pinilikayo manipud iti lubong, gapu iti daytoy guraennakayo ti lubong.”​—Juan 15:19.

⁷ Bayat nga agsaksaknap ti Kristianidad, mabalin kadin a suroten dagiti Kristiano ti ar-aramid ti lubong ken makiramanda iti dayta? Saan. Sadinoman ti pagnanaedanda, masapul a naidumada iti lubong ni Satanas. Agarup 30 a tawen kalpasan ti ipapatay ni Kristo, insurat ni apostol Pedro kadagiti Kristiano iti nagduduma a lugar a masakupan ti Roma: “Dungdungnguen, bagbagaankayo kas ganggannaet ken temporario nga agnanaed nga itultuloyyo ti umadayo kadagiti nainlasagan a tarigagay, nga isuda a mismo ti makibimbinnusor iti kararua. Taginayonenyo a nasayaat ti kababalinyo iti tengnga dagiti nasion.”​—1 Ped. 1:1; 2:11, 12.

8. Ania ti insurat ti maysa a historiador a mangipakita a dagiti nagkauna a Kristiano saanda a paset ti lubong?

⁸ Paneknekan ti komento ti historiador a ni Kenneth Scott Latourette a dagiti nagkauna a Kristiano nagbiagda kas “ganggannaet ken temporario nga agnanaed” iti turay ti Roma. Insuratna: “Kadagiti immuna a tallo a siglo, pagaammo a napasaran dagiti nagkauna a Kristiano ti agtultuloy ken masansan a nakaro a pannakaidadanes . . . Nagduduma ti pammabasol kadakuada. Naawaganda kas ateista gapu ta dida kayat ti makipaset kadagiti pagano a seremonia. Ken nababalawda kas gumurgura kadagiti tattao gapu ta dida nakiraman iti adu nga aktibidad ti komunidad​—kas kadagiti pagano a piesta, paglinglingayan ti publiko nga ibilang dagiti Kristiano a napno kadagiti pagano a patpatien, ar-aramid, ken imoralidad.”

Saan a Naan-anay a Panangusar iti Lubong

9. Kas pudno a Kristiano, kasanotayo a maipakita a saantayo a “gumurgura kadagiti tattao”?

⁹ Ania ti kasasaad ita? Kas kadagiti nagkauna a Kristiano, saantayo a paset ti “agdama a nadangkes a sistema ti bambanag.” (Gal. 1:4) Isu nga adu ti saan a makatarus kadatayo ken gurguraendatayo pay ti dadduma. Ngem saantayo a “gumurgura kadagiti tattao.” Gapu iti ayattayo iti padatayo a tao, mapantayo iti binalaybalay ken ikagkagumaantayo nga ikasaba iti tunggal maysa ti “naimbag a damag ti Pagarian” ti Dios. (Mat. 22:39; 24:14) Aramidentayo dayta gapu ta kombinsidotayo a ti Pagarian  ni Jehova babaen ken Kristo dandaninan pagpatinggaen ti imperpekto a turay dagiti tattao, ket sukatanna iti nalinteg a baro a sistema ti bambanag.​—Dan. 2:44; 2 Ped. 3:13.

10, 11. (a) Kasanotayo nga usaren ti lubong? (b) Ania ti sumagmamano a pamay-an a maipakita dagiti naridam a Kristiano a dida naan-anay nga usaren ti lubong?

¹⁰ Gapu ta dandanin agpatingga ti agdama a sistema ti bambanag, ammotayo a saan nga ita ti tiempo a maaddaantayo iti komportable a biag. Ipangagtayo ti balakad ni apostol Pablo: “Daytoy kunaek, kakabsat, ti tiempo a nabati ket ababan. Manipud ita . . . dagidiay gumatang [agbalinda koma] kas kadagidiay di agtagtagikua, ket dagidiay mangus-usar iti lubong kas kadagidiay di mangus-usar a naan-anay iti dayta; ta ti buya daytoy a lubong agbaliwbaliw.” (1 Cor. 7:29-31) Kas Kristiano, kasanotayo nga us-usaren ita ti lubong? Babaen kadagiti moderno a teknolohia ken komunikasion, isaknaptayo iti intero a lubong ti pannakaammo iti Biblia iti adu a lenguahe. Agtrabahotayo met tapno adda pagbiagtayo. Gumatangtayo kadagiti kangrunaan a kasapulantayo. Ngem ditay usaren a naan-anay ti lubong. Saan a dagiti material a bambanag ken ti panggedan ti kangrunaan iti biagtayo.​—Basaen ti 1 Timoteo 6:9, 10.

¹¹ Dagiti naridam a Kristiano dida usaren a naan-anay ti lubong no maipapan iti nangato nga edukasion. Adu ti mangibilang a nagpateg ti nangato nga edukasion tapno agbalinda a nalatak ken nabaknang. Ngem kas Kristiano, temporario nga agnanaedtayo iti lubong ken naiduma ti kalattayo. Ditay ‘panunoten dagiti nangato a bambanag.’ (Roma 12:16; Jer. 45:5) Ipangagtayo ti pakdaar ni Jesus: “Pagtalinaedenyo a silulukat dagiti matayo ket agaluadkayo iti tunggal kita ti kinaagum, agsipud ta uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Luc. 12:15) Maitunos iti dayta, maparegta dagiti agtutubo a Kristiano a rumagpatda kadagiti naespirituan a kalat, a gumun-odda laeng iti kasapulan nga edukasion tapno masustentuanda ti kangrunaan a kasapulanda. Isaganada ti bagida nga agserbi ken Jehova iti ‘intero a puso, kararua, pigsa, ken panunotda.’ (Luc. 10:27) Iti kasta, agbalinda a “nabaknang iti Dios.”​—Luc. 12:21; basaen ti Mateo 6:19-21.

Dikay Madagsenan Kadagiti Pakaringgoran iti Biag

12, 13. Kasano a naidumatayo kadagiti tattao iti lubong no ipangagtayo ti sasao ni Jesus iti Mateo 6:31-33?

¹² Naiduma ti panangmatmat dagiti adipen ni Jehova iti material a bambanag no idilig kadagiti tattao iti lubong. Maipapan iti dayta, kinuna ni Jesus kadagiti pasurotna: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo. Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.” (Mat. 6:31-33) Napaneknekan ti adu a kakabsattayo nga ipaay ti nailangitan nga Ama dagiti kasapulanda.

¹³ “Dakkel a gunggona ti nadiosan a biag nga addaan pannakapnek.” (1 Tim. 6:6, New International Version) Kasungani dayta ti panangmatmat dagiti tattao iti lubong. Kas pagarigan, kayat ti adu a kakaskasar a magun-odda amin a kayatda​—balay wenno apartment a kompleto iti alikamen, napintas a lugan, ken kabaruan a gadyet. Ngem dagiti Kristiano nga agbibiag kas temporario nga agnanaed saanda a tarigagayan dagiti bambanag a dida kabaelan ken kasapulan. Makomendaran dagidiay nangisakripisio kadagiti material a pagnam-ayan tapno ad-adu ti tiempo ken pigsada nga agserbi ken Jehova kas naregta nga agibumbunannag. Dadduma ti agserserbi kas payunir, Bethelite, misionero,  wenno agdaldaliasat a manangaywan. Apresiarentayo unay ti naimpusuan a panagserbi dagiti padatayo nga agdaydayaw ken Jehova!

14. Ania ti maadaltayo iti pangngarig ni Jesus maipapan iti agmulmula?

¹⁴ Iti pangngarig ni Jesus maipapan iti agmulmula, kinunana a ti “pakaringgoran daytoy a sistema ti bambanag ken ti makaallilaw a pannakabalin ti kinabaknang” leppesenda ti sao ti Dios iti pusotayo tapno agbalintayo a di nabunga. (Mat. 13:22) Maliklikantayo dayta a silo no kontentotayon nga agbiag kas temporario nga agnanaed iti daytoy a lubong. Iti kasta, mataginayontayo ti “simple” a mata a naipamaysa iti Pagarian ti Dios ken kadagiti interesna.​—Mat. 6:22.

“Ti Lubong Aglabas”

15. Ania ti kuna ni apostol Juan maipapan iti daytoy a lubong?

¹⁵ Kas pudno a Kristiano, ti kangrunaan a rason nga agbibiagtayo kas “ganggannaet ken temporario nga agnanaed” iti daytoy a lubong ket gapu ta kombinsidotayo a dandanin agpatingga dayta. (1 Ped. 2:11; 2 Ped. 3:7) Agminar dayta a panangmatmat kadagiti desision, tarigagay, ken kalattayo iti biag. Binalakadan ni apostol Juan dagiti kapammatianna a saanda nga ayaten ti lubong wenno dagiti bambanag nga adda iti lubong gapu ta “ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”​—1 Juan 2:15-17.

16. Kasanotayo a maipakita a pasetnatayo ti “ili” nga inlasin ni Jehova manipud iti lubong?

¹⁶ Imbaga ni Jehova kadagiti Israelita a no agtulnogda, agbalinda a ‘naisangsangayan a sanikuana manipud iti amin a sabsabali nga ili.’ (Ex. 19:5) Idi matalekda pay, naiduma ti panagdayaw ken wagas ti panagbiagda iti dadduma a nasion. Umasping iti dayta, nangilasin ni Jehova iti ilina a naiduma iti lubong ni Satanas. Ibaga ti Biblia a ‘tallikudantayo ti di kinanadiosan ken ti nailubongan a tartarigagay ken agbiagtayo buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema ti bambanag, bayat nga urayentayo ti naragsak a namnama ken nadayag a pannakaiparangarang ti naindaklan a Dios ken ti Manangisalakantayo, ni Kristo Jesus, a nangyawat iti bagina maipaay kadatayo tapno maispalnatayo iti tunggal kita ti kinakillo ket dalusanna a maipaay iti bagina ti maysa nga ili a naisangsangayan a kukuana, naregta iti nasayaat nga ar-aramid.’ (Tito 2:11-14) Dayta nga “ili” ket buklen dagiti napulotan a Kristiano ken minilion a “sabsabali a karnero” ni Jesus a tumultulong kadakuada.​—Juan 10:16.

17. Apay a dagiti napulotan ken ti sabsabali a karnero didanto pulos pagbabawyan ti panagbiagda kas temporario nga agnanaed iti daytoy dakes a lubong?

¹⁷ Ti “naragsak a namnama” dagiti napulotan ket ti pannakipagturayda ken Kristo idiay langit. (Apoc. 5:10) Inton matungpal ti namnama ti sabsabali a karnero nga agbiag nga agnanayon ditoy daga, saandanton a temporario nga agnanaed iti dakes a lubong. Napintasto dagiti balbalayda ken adunto ti makan ken mainum. (Sal. 37:10, 11; Isa. 25:6; 65:21, 22) Saan a kas kadagiti Israelita, didanto pulos malipatan a nagtaud amin dagita ken Jehova, “ti Dios iti intero a daga.” (Isa. 54:5) Napulotan man wenno kameng ti sabsabali a karnero, didanto pulos pagbabawyan ti panagbiagda kas temporario nga agnanaed iti daytoy dakes a lubong.

Ania ti Sungbatyo?

• Iti ania a pamay-an a dagiti nagkauna a matalek a tattao nagbiagda kas temporario nga agnanaed?

• Ania ti takder dagiti nagkauna a Kristiano mainaig iti lubong?

• Kasano a limitaran dagiti pudno a Kristiano ti panangusarda iti lubong?

• Apay a ditayto pulos pagbabawyan ti panagbiagtayo kas temporario nga agnanaed iti daytoy dakes a lubong?

[Salsaludsod]

[Ladawan iti panid 18]

Liniklikan dagiti nagkauna a Kristiano ti naranggas ken imoral a paglinglingayan