Apay nga Agpaidalantayo iti Espiritu ti Dios?

“Sika ti Diosko. Ti espiritum naimbag; idalannak koma dayta.”​—SAL. 143:10.

1. Iyilustrarmo no kasano a ti di makita a puersa igiyana ti tao.

 NAPADASAM kadin ti nagusar iti kompas? Ti kompas ket maysa a simple nga instrumento nga addaan iti magnetiko a dagum a nakatudo iti amianan. Aggaraw ti dagum gapu iti di makita a puersa a maawagan iti magnetismo. Sinigsiglon nga us-usaren dagiti tattao ti kompas a mangigiya iti panagdaliasatda iti takdang ken baybay.

2, 3. (a) Ania a nabileg a puersa ti inusar ni Jehova di mabilang a panawenen ti napalabas? (b) Apay a manamnamatayo nga idalannatayo ita ti aktibo a puersa ti Dios?

² Adda napatpateg a di makita a puersa a mangigiya kadatayo. Ania dayta? Daydiay nadakamat iti umuna a dua a bersikulo ti Biblia. Kuna ti Genesis maipapan iti inaramid ni Jehova, di mabilang a panawenen ti napalabas: “Idi punganay, ti Dios pinarsuana ti langlangit ken ti daga.” Tapno maaramidna dayta, inusarna ti nagbileg a puersa ta innayon ti Biblia: “Ti aktibo a puersa ti Dios agtigtignay idi nga agsublisubli.” (Gen. 1:1, 2) Ania dayta a puersa? Ti nasantuan nga espiritu​—ti dinamiko a puersa a nausar iti panamarsua. Utangtayo ti biagtayo ken Jehova, a nangusar iti espirituna a nangparsua iti amin a bambanag.​—Job 33:4; Sal. 104:30.

³ Yantangay naparsuatayo babaen ti aktibo a puersa ti Dios, adda kadi sabali pay a maaramidan dayta iti biagtayo? Adda ta kinuna ni Jesus kadagiti adalanna: “Ti espiritu . . . idalannakayto iti isuamin a kinapudno.” (Juan 16:13) Ania dayta nga espiritu? Ken apay a masapul nga agpaidalantayo iti dayta?

No Ania ti Nasantuan nga Espiritu

4, 5. (a) Ania ti di umiso a pagarup dagiti mangisursuro iti Trinidad maipapan iti nasantuan nga espiritu? (b) Ania a talaga ti nasantuan nga espiritu?

⁴ Mabalin nga adda dagiti makasaritam iti ministerio a di nainkasuratan ti pannakatarusda iti nasantuan nga espiritu. Di umiso ti pagarup dagiti mangisursuro iti Trinidad a ti espiritu ket persona a kapatas ti Dios nga Ama. (1 Cor. 8:6) Nalawag ngarud a ti doktrina a Trinidad ket maikontra iti Kasuratan.

⁵ Ania a talaga ti nasantuan nga espiritu? Kuna ti footnote ti Genesis 1:2 iti New World Translation of the Holy Scriptures​—With References: “Ti [Hebreo a] ruʹach a naipatarus nga ‘espiritu’ ket naipatarus met kas ‘angin’ wenno iti dadduma pay a sasao a tumukoy iti di makita nga aktibo a puersa.” (Idilig kadagiti footnote iti Genesis 3:8; 8:1, Reference Bible.) Ti angin ket saan a makita ngem adda puersana. Kasta met ti nasantuan nga espiritu, saan a makita ken saan a persona ngem adda epektona. Dayta nga espiritu ket puersa a nagtaud iti Dios a maus-usar kadagiti tattao wenno bambanag tapno matungpal ti pagayatanna. Narigat kadi a patien a ti Gubuayan dayta a nakaskasdaaw a puersa ket ti Mannakabalin-amin a Dios? Saan!​—Basaen ti Isaias 40:12, 13.

6. Ania ti kiniddaw ni David ken ni Jehova?

⁶ Agtultuloy kadi nga usaren ni Jehova ti espirituna a mangidalan kadatayo? Inkarina ken salmista David: “Pagbalinenkanto nga  addaan iti pannakatarus ket isuroka iti dalan a rebbeng a papanam.” (Sal. 32:8) Kayat kadi dayta ni David? Wen, ta impakaasina ken Jehova: “Isuronak a mangaramid iti pagayatam, ta sika ti Diosko. Ti espiritum naimbag; idalannak koma dayta.” (Sal. 143:10) Kasta koma met ti tarigagaytayo ken situtuloktayo nga agpaidalan iti espiritu ti Dios. Apay? Usigentayo ti uppat a rason.

Ditay Kabaelan nga Idalan ti Bagitayo

7, 8. (a) Apay a ditay kabaelan nga idalan ti bagitayo? (b) Iyilustrarmo no apay a kasapulantayo ti panangiwanwan ti Dios iti daytoy dakes a lubong.

⁷ Umuna, rumbeng nga agpaidalantayo iti espiritu ti Dios gapu ta ditay kabaelan nga idalan ti bagitayo. Idalanmo ti maysa no isurom ti umiso a dalan a papananna. Ngem dinatay pinarsua ni Jehova nga addaan iti abilidad a mangidalan iti bagitayo, ken imperpektotayo. Insurat ni propeta Jeremias: “Pagaammok unay, O Jehova, a saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jer. 10:23) Apay a saan? Imbaga ni Jehova ti rason babaen ken Jeremias: “Ti puso nagulgulib ngem iti aniaman a banag ket desperado. Siasino ti makaammo iti dayta?”​—Jer. 17:9; Mat. 15:19.

⁸ Ipapanmo a mapan ti maysa iti saanna a pagaammo ken napeggad a kabakiran. Nainsiriban kadi nga agmaymaysa, nga awan ti nalaing a giya wenno kompasna? Agpeggad ti biagna no dina ammo ti agbiag iti kabakiran ken dina ammo ti natalged a dalan. Kasta met ti tao a mangipagarup a kabaelanna nga idalan ti biagna iti daytoy dakes a lubong, agpeggad no saan nga agpaidalan iti Dios para iti umiso a dana. Ti laeng pamay-an tapno sibaballigi a makalasattayo iti daytoy sistema ti bambanag ket ti panangipakaasi ken Jehova, kas iti inaramid ni David: “Dagiti addangko kumpetda koma kadagiti desdesmo, a kadagita sigurado a saanto a mapagdiwengdiweng dagiti addangko.” (Sal. 17:5; 23:3) Kasanotayo a magun-odan ti kasta a panangiwanwan?

9. Kas nailadawan iti panid 17, kasano a ti espiritu ti Dios agserbi kas mapagtalkan a giya kadatayo?

⁹ No napakumbaba ken situtuloktayo nga agpannuray ken Jehova, ipaayna ti nasantuan nga espirituna a mangidalan kadatayo. Kasano a matulongannatayo dayta nga aktibo a puersa? Kinuna ni Jesus kadagiti adalanna: “Ti katulongan, ti nasantuan nga espiritu, nga ibaonto ti Ama iti naganko, isuronto dayta kadakayo ti amin a bambanag ket ipalagipna kadakayo ti amin a bambanag nga imbagak kadakayo.” (Juan 14:26) No regular ken sipapasnek nga adalentayo ti Sao ti Dios, ken dagiti pannursuro ni Kristo, tulongannatayo ti nasantuan nga espiritu a mangtarus iti nauneg a kinasirib ni Jehova tapno maaramidtayo ti pagayatanna. (1 Cor. 2:10)  Ken no adda di ninamnama a pasamak iti biagtayo, isuro ti espiritu no ania ti aramidentayo. Ipalagipna dagiti prinsipio ti Biblia a naadaltayon ken tulongannatayo a mangyaplikar kadagita tapno makaaramidtayo kadagiti nasayaat a desision.

Ni Jesus​—Indalan ti Espiritu ti Dios

10, 11. Ania ti ninamnama ni Jesus nga aramiden ti nasantuan nga espiritu para kenkuana? Kasano a tinulongan ti nasantuan nga espiritu?

¹⁰ Ti maikadua a rason nga agpaidalantayo iti nasantuan nga espiritu ket gapu ta dayta ti nangidalan iti bugbugtong nga Anak ti Dios. Sakbay nga immay ditoy daga, ammonan daytoy a padto: “Agtaengto kenkuana ti espiritu ni Jehova, ti espiritu ti kinasirib ken ti pannakaawat, ti espiritu ti pammatigmaan ken ti kinamannakabalin, ti espiritu ti pannakaammo ken ti panagbuteng ken Jehova.” (Isa. 11:2) Saan a nalaka para ken Jesus ti biag ditoy daga. Awan duadua a magagaran unay nga umawat iti tulong ti espiritu ti Dios!

¹¹ Pimmudno ti sasao ni Jehova. Inlawlawag ti Ebanghelio no ania ti napasamak kalpasan la unay ti bautismo ni Jesus: “Itan ni Jesus, a napno iti nasantuan nga espiritu, pimmanaw iti Jordan, ket naiturturong idiay let-ang babaen ti espiritu.” (Luc. 4:1) Bayat ti panagayunar, panagkararag, ken panagutobna idiay let-ang, agparang a binilin ken insagana ni Jehova ti Anakna iti mapasamakto kenkuana. Nagtignay ti aktibo a puersa ti Dios iti isip ken puso ni Jesus, nga indalanna ti pampanunot ken desisionna. Kas resultana, ammo ni Jesus ti aramidenna iti tunggal situasion, ken inaramidna ti pagayatan ni Amana.

12. Apay a napateg a kiddawen nga idalannatayo ti espiritu ti Dios?

¹² Ammo ni Jesus no kasano kapateg iti biagna ti espiritu ti Dios isu nga impaganetgetna kadagiti adalanna nga agkiddaw ken agpaidalanda iti dayta. (Basaen ti Lucas 11:9-13.) Apay a napateg dayta kadatayo? Gapu ta kabaelanna a baliwan ti pampanunottayo tapno maitunos iti panunot ni Kristo. (Roma 12:2; 1 Cor. 2:16) No agpaidalantayo iti espiritu ti Dios, matuladtayo ti pampanunot ken ulidan ni Kristo.​—1 Ped. 2:21.

Mayaw-awannatayo ti Espiritu ti Lubong

13. Ania ti espiritu ti lubong, ken ania ti iparegtana?

¹³ Ti maikatlo a rason nga agpaidalantayo iti espiritu ti Dios ket gapu ta mabalinnatayo nga iyaw-awan ti dakes nga espiritu nga iparparangarang ti kaaduan a tattao ita. Nabileg dayta a puersa a mangtignay kadagiti tattao nga agaramid iti kasungani ti panangiwanwan ti nasantuan nga espiritu. Imbes nga iparegtana kadakuada ti pampanunot ni Kristo, ti espiritu ti lubong isungsongna ida a mangtulad iti panagpampanunot ken panagtigtignay ti agturay ti lubong a ni Satanas. (Basaen ti Efeso 2:1-3; Tito 3:3.)  No agpaimpluensia ti maysa iti espiritu ti lubong ken kadagiti aramid ti lasag, apitenna ti dakes a resulta ken dina tawiden ti Pagarian ti Dios.​—Gal. 5:19-21.

14, 15. Kasanotayo a malabanan ti espiritu ti lubong?

¹⁴ Tultulongannatayo ni Jehova a manglaban iti espiritu ti lubong. Kuna ni apostol Pablo: “Itultuloyyo a gun-oden ti pannakabalin iti Apo ken iti kinabileg ti pigsana . . . tapno mabalinanyo ti sumaranget iti nadangkes nga aldaw.” (Efe. 6:10, 13) Babaen ti espiritu ni Jehova, pabpabilgennatayo a mangsaranget iti panangikagumaan ni Satanas a mangyaw-awan kadatayo. (Apoc. 12:9) Nabileg ti espiritu ti lubong ken ditay naan-anay a maliklikan dayta. Ngem malabanantayo gapu ta nabilbileg ti nasantuan nga espiritu ken tulongannatayo!

¹⁵ Kinuna ni apostol Pedro maipapan kadagidiay timmallikud iti Kristianidad idi umuna a siglo: “Idi binaybay-anda ti nalinteg a dana, nayaw-awanda.” (2 Ped. 2:15) Anian a yamantayo ta inawattayo, ‘ti espiritu a naggapu iti Dios saan ket a ti espiritu ti lubong’! (1 Cor. 2:12) No agpaidalantayo iti nasantuan nga espiritu ken usarentayo ti amin nga ipapaay ni Jehova a mangpabileg iti relasiontayo kenkuana, maaramidtayo ti umiso ken malabanantayo ti espiritu ti lubong.​—Gal. 5:16.

Ti Nasantuan nga Espiritu Mangpataud iti Nasayaat a Bunga

16. Ania a bunga ti patauden kadatayo ti nasantuan nga espiritu?

¹⁶ Ti maikapat a rason nga agpaidalantayo iti espiritu ti Dios ket gapu ta mangpataud dayta iti nagsayaat a bunga kadagidiay agpaiwanwan iti dayta. (Basaen ti Galacia 5:22, 23.) Siasino ti madi nga agbalin nadungdungngo, naragragsak, ken mannakikappia? Siasino ti madi a maaddaan iti naruay a mabayag a panagitured, kinaasi, ken kinaimbag? Siasino kadatayo ti saan a magunggonaan no naun-uneg ti pammatitayo, naal-alumamaytayo, ken napigpigsa ti panagteppeltayo? Ti espiritu ti Dios pataudenna kadatayo dagiti agkakaimbag a galad a pakagunggonaantayo, agraman dagiti kapamilia ken kakongregasiontayo. Itultuloytayo ngarud a parayrayen ti bunga ti espiritu yantangay awan limitasion ti bunga a mabalin a patauden dayta kadatayo.

17. Kasano nga ad-adda a maparayraytayo ti maysa nga aspeto ti bunga ti espiritu?

¹⁷ Nainsiriban a panunotentayo daytoy: Ipakpakita kadi ti panagsasao ken panagtigtignayko nga agpapaidalanak iti nasantuan nga espiritu ken patpataudek ti bungana? (2 Cor. 13:5a; Gal. 5:25) No makitatayo a masapul a patanorentayo ti dadduma nga aspeto ti bunga ti espiritu, ikagumaantayo ti agpaidalan iti nasantuan nga espiritu tapno mapataudtayo dagita a galad. Maaramidtayo dayta no adalentayo ti tunggal aspeto a naipalgak iti Biblia ken nailawlawag kadagiti Nakristianuan a publikasiontayo. Iti kasta, makitatayo no kasanotayo nga iparangarang ti bunga ti espiritu ken ikagumaantayo nga ad-adda a parayrayen dayta. a No makitatayo ti resulta ti panagtignay ti espiritu ti Dios iti biagtayo ken kadagiti padatayo a Kristiano, matarusantayo no apay a masapul nga agpaidalantayo iti dayta.

Agpapaidalanka Kadi iti Espiritu ti Dios?

18. Kasano a mapagwadan ni Jesus iti panagpaidalan iti espiritu ti Dios?

¹⁸ Kas “nasigo a managobra” ti Dios iti pannakaparsua ti uniberso, ammo ni Jesus ti amin maipapan iti magnetiko a puersa ti  daga a tumultulong kadagiti tattao no agusarda iti kompas. (Prov. 8:30; Juan 1:3) Awan ti mabasatayo iti Biblia nga inusar ni Jesus dayta a puersa a nangidalan kenkuana idi adda ditoy daga. Ngem ibaga ti Biblia a ti nasantuan nga espiritu ti Dios ket nabileg a puersa iti biag ni Jesus kas tao. Situtulok a nagpaidalan iti dayta. Idi tinignay ti espiritu, nagtulnog iti panangiwanwanna. (Mar. 1:12, 13; Luc. 4:14) Kastaka met kadi?

19. Ania ti masapul nga aramidentayo tapno maidalannatayo ti nasantuan nga espiritu?

¹⁹ Agtigtignay pay laeng ti aktibo a puersa ti Dios kadagidiay situtulok nga agpaidalan iti dayta. Kasanom a maipakita nga agpapaidalanka iti umiso a dana? Kanayon nga ikararagmo ken Jehova nga ipaayannaka iti espirituna ken tulongannaka nga agpaidalan iti dayta. (Basaen ti Efeso 3:14-16.) Agtignayka maitunos iti kararagmo babaen ti panangsukimatmo iti balakad ti Biblia​—a gapuanan ti nasantuan nga espiritu. (2 Tim. 3:16, 17) Agtulnogka kadagiti nainsiriban a balakadna ken situtulok nga agpaidalanka iti nasantuan nga espiritu. Agtalekka a maidalannaka ni Jehova iti kasayaatan a pamay-an bayat nga agbibiagka iti daytoy dakes a lubong.

[Footnote]

Natarusanyo Kadi Dagiti Kangrunaan a Punto?

• Kasano a maimpluensiaannatayo ti nasantuan nga espiritu?

• Ania ti uppat a rason nga agpaidalantayo iti espiritu ti Dios?

• Ania ti aramidentayo tapno naan-anay a magunggonaantayo iti panangidalan ti nasantuan nga espiritu?

[Salsaludsod]

[Ladawan iti panid 15]

Ti espiritu ti Dios ti puersa a nangidalan iti biag ni Jesus

[Ladawan iti panid 17]

Agtigtignay ti espiritu ti Dios kadagidiay situtulok nga agpaidalan iti dayta