Dagiti Nagkauna a Matalek a Tattao nga Indalan ti Espiritu ti Dios

“Imbaonnak ti Soberano nga Apo Jehova, ti mismo nga espirituna.”​—ISA. 48:16.

1, 2. Ania ti kasapulan tapno maaddaantayo iti natibker a pammati? Kasanotayo a magunggonaan iti ulidan dagiti nagkauna a matalek nga adipen ti Dios?

 MANIPUD pay idi kaaldawan ni Abel, adun ti addaan iti ‘pammati ngem saan nga ik-ikutan dayta ti amin a tattao.’ (2 Tes. 3:2) Kasano a maaddaan ti maysa iti pammati, ken ania ti makatulong kenkuana nga agbalin a matalek? Kasapulan ti pannakaammo iti Sao ti Dios ta kuna ti Biblia: “Ti pammati sumaruno iti banag a nangngeg.” (Roma 10:17) Maysa dayta nga aspeto ti bunga ti nasantuan nga espiritu ti Dios. (Gal. 5:22, 23) Kasapulantayo ngarud ti nasantuan nga espiritu tapno maaddaantayo iti natibker a pammati.

² Saan a nayanak dagiti tattao nga addaan iti pammati. Dagiti mapagulidanan nga adipen ti Dios iti Biblia ket “addaan rikna a kas kadatayo.” (Sant. 5:17) Adda pagkapuyan, panagduadua, ken panagamakda ngem ‘pinabileg ida’ ti espiritu ti Dios a mangsango kadagiti pakarigatan. (Heb. 11:34) No adalentayo no kasano a tinulongan ida ti espiritu ni Jehova, maparegtatayo nga agtalinaed a matalek bayat nga agbibiagtayo iti tiempo nga adu ti pakasubokan ti pammatitayo.

Ti Espiritu ti Dios Pinabilegna ni Moises

3-5. (a) Kasanotayo nga ammo a ti nasantuan nga espiritu tinulonganna ni Moises a mangitungpal kadagiti responsabilidadna? (b) Ania ti maadaltayo iti ulidan ni Moises no iti panangipaay ni Jehova iti espirituna?

³ Ni Moises ti “kaemmaan” kadagiti amin a tattao a nagbiag idi 1513 B.C.E. (Num. 12:3) Naitalek iti daytoy naalumamay nga adipen ti nagdakkel a responsabilidad iti nasion ti Israel. Iti tulong ti espiritu ti Dios nabaelanna ti agaramid kadagiti milagro ken nagserbi kas propeta, ukom, mannurat, ken lider. (Basaen ti Isaias 63:11-14.) Ngem naminsan, kayatnan ti sumuko gapu kadagiti nadagsen a responsabilidadna. (Num. 11:14, 15) Gapuna, ni Jehova ‘nangala iti espiritu’ nga adda ken Moises ket inkabilna iti 70 a lallaki a tumulong a mangibaklay iti annongen. (Num. 11:16, 17) Nupay kasla nadagsen unay ti responsabilidad ni Moises, saan nga agmaymaysa a mangibaklay iti dayta​—kasta met laeng dagiti 70 a nadutokan a tumulong kenkuana.

⁴ Naikkan ni Moises iti umdas a nasantuan nga espiritu tapno maitungpalna ti annongenna. Ngem saan a naksayan dayta idi inikkan ni Jehova iti nasantuan nga espiritu dagiti 70 a lallaki. Ken saan met a simmobra ti espiritu nga adda kadakuada. Mangipapaay ni Jehova iti umdas nga espiritu a kasapulantayo sigun iti kasasaadtayo. ‘Ti espiritu nga itedna ket saan a marukrukod’ no di ket ‘naan-anay.’​—Juan 1:16; 3:34.

⁵ Maipaspasangoka kadi iti pakasuotan? Maib-ibus kadi ti tiempom gapu iti umad-adu a responsabilidadmo? Ikagkagumaam kadi nga ipaay ti naespirituan ken material a kasapulan ti pamiliam bayat a rumigrigat ti panagbiag wenno kumapkapuy ti salun-atmo? Nadagsen kadi ti responsabilidadmo iti kongregasion? Mangnamnamaka a babaen ti nasantuan  nga espiritu, maipaay ti Dios ti bileg a kasapulam tapno mapagballigiam ti aniaman a kasasaad.​—Roma 15:13.

Ti Nasantuan nga Espiritu Tinulonganna ni Bezalel

6-8. (a) Ania ti naaramidan da Bezalel ken Oholiab iti tulong ti espiritu ti Dios? (b) Ania ti pammaneknek nga indalan ti espiritu ti Dios da Bezalel ken Oholiab? (c) Apay a makaparegta kenka ti kapadasan ni Bezalel?

⁶ Adu ti maammuantayo iti kapadasan ti kakontemporario ni Moises a ni Bezalel maipapan iti panagtignay ti espiritu ti Dios. (Basaen ti Exodo 35:30-35.) Nadutokan ni Bezalel a mangidaulo iti panagaramid kadagiti alikamen iti tabernakulo. Adda kadin kapadasan ni Bezalel iti dayta? Mabalin nga adda, ngem nalabit ti kaudian a trabahona ket agaramid iti ladrilio idiay Egipto. (Ex. 1:13, 14) Kasano ngarud a maitungpalna ti narigat a trabaho? Ni Jehova ‘pinunnona ni Bezalel iti espiritu ti Dios iti kinasirib, iti pannakaawat ken iti pannakaammo ken iti tunggal kita ti kinasigo iti panagtrabaho ken maipaay iti panagdisenio kadagiti alikamen tapno mangaramid iti tunggal kita ti nasigo a gapuanan.’ Simmayaat ti nainkasigudan nga abilidad ni Bezalel iti tulong ti nasantuan nga espiritu. Kasta met ken Oholiab. Nagbalinda la ketdi nga eksperto ta naitungpalda ti trabahoda ken sinuruanda pay ti dadduma.

⁷ Ti maysa pay a pammaneknek nga indalan ti espiritu ti Dios da Bezalel ken Oholiab ket ti naisangsangayan a kinalagda dagiti inaramidda ta uray kalpasan ti agarup 500 a tawen, maus-usar pay laeng dagita. (2 Cron. 1:2-6) Dagiti agar-aramid iti produkto ita kayatda ti agbalin a nalatak gapu iti naisangsangayan nga aramidda, ngem saan a kasta ti motibo da Bezalel ken Oholiab. Kayatda a ni Jehova ti maidaydayaw iti aniaman a naaramidanda.​—Ex. 36:1, 2.

⁸ Mabalin nga addaantayo ita kadagiti nadagsen nga annongen nga agkasapulan iti naisangsangayan nga abilidad, kas iti panagibangon, panagimprenta, panangorganisar kadagiti kombension, panangtulong kadagiti nadidigra, ken pannakisarita kadagiti doktor ken personel ti ospital maipapan iti Nainkasuratan a takdertayo iti dara. No dadduma, dagiti eksperto ti mangitungtungpal kadagita nga annongen, ngem masansan nga ar-aramiden dagita dagiti boluntario nga awan unay kapadasanda kadagita a trabaho. Nagballigida gapu iti tulong ti espiritu ti Dios. Bumdengka kadi nga umawat iti pribilehio gapu ta ipagarupmo a mas kualipikado ti dadduma? Laglagipem a kabaelan ti espiritu ni Jehova a pasayaaten ti pannakaammo ken abilidadmo ken tulongannaka a mangitungpal iti aniaman nga annongen nga italekna kenka.

Nagballigi ni Josue iti Tulong ti Espiritu ti Dios

9. Ania a kasasaad ti naipasango kadagiti Israelita kalpasan ti ipapanawda idiay Egipto, ken ania a saludsod ti tumaud?

⁹ Tinulongan met ti espiritu ti Dios ti kakontemporario da Moises ken Bezalel. Kalpasan ti ipapanaw dagiti Israelita iti Egipto, rinaut ida dagiti Amalekita. Nupay saan a nasanay dagiti Israelita iti gubat, masapul a makigubatdan kas nawayawayaan nga ili. (Ex. 13:17; 17:8) Masapul nga adda mangidaulo kadakuada. Ngem asino?

10. Apay a nagballigi iti gubat dagiti Israelita nga indauluan ni Josue?

¹⁰ Ni Josue ti napili a mangidaulo. Ngem no saludsodenda ti kualipikasionna iti dayta nga annongen, ania ngata ti maibagana? Maysa laeng idi nga adipen nga agar-aramid iti ladrilio ken agur-urnong iti manna iti let-ang. Agpayso a ti lolona a ni Elisama ket panguluen ti tribu ni Efraim ken nalabit indauluanna ti maysa a buyot nga agdagup iti 108,100 a lallaki. (Num. 2:18, 24; 1 Cron. 7:26, 27) Ngem imbilin ni Jehova babaen ken Moises a ni Josue ti mangidaulo iti buyot a mangparmek iti kabusor, saan ket a ni Elisama wenno ti anakna a ni Nun. Nagpaut ti gubat iti dandani nagmalem.  Nangabak ti Israel gapu ta naan-anay a nagtulnog ni Josue ken situtulok a nagpaidalan iti nasantuan nga espiritu ti Dios.​—Ex. 17:9-13.

11. Kas ken Josue, kasanotayo nga agballigi iti annongentayo iti panagserbi iti Dios?

¹¹ Idi agangay, ni Josue a “napno iti espiritu ti kinasirib,” ti simmukat ken Moises. (Deut. 34:9) Saan nga impaayan ti nasantuan nga espiritu iti abilidad nga agipadto wenno agaramid iti milagro kas ken Moises, ngem dayta ti timmulong ken Josue a mangidaulo iti adu a pannakigubat ti Israel tapno masakupda ti Canaan. Mabalin a mariknatayo ita a ditay kabaelan wenno ditay kualipikado a mangitungpal iti dadduma nga annongentayo iti panagserbi iti Dios. Ngem kas ken Josue, sigurado nga agballigitayo no surotentayo a naimbag ti bilin ti Dios.​—Jos. 1:7-9.

“Ti Espiritu ni Jehova Binalkutna ni Gideon”

12-14. (a) Ania ti masursurotayo iti panangparmek ti bassit a buyot ti Israel iti nagdakkel a buyot ti Midian? (b) Kasano a pinabileg ni Jehova ni Gideon? (c) Kasanonatayo ita a pabpabilgen ti Dios?

¹² Idi natayen ni Josue, intultuloy ni Jehova nga inusar ti pannakabalinna a mangpabileg kadagiti matalek a tattao. Napno ti libro nga Uk-ukom iti salaysay maipapan kadagiti tattao a “manipud iti nakapuy a kasasaad napabilegda.” (Heb. 11:34) Inusar ti Dios ti espirituna a nangtulong ken Gideon a makigubat maipaay iti ilina. (Uk. 6:34) Nagbassit ti buyot ni Gideon no idilig iti buyot ti Midian. Uppat a soldado a Midianita ti katupag ti maysa a soldado nga Israelita. Ngem para ken Jehova, adu pay laeng ti buyot ti Israel. Namindua nga imbilinna a kissayan ni Gideon ti buyotna agingga a 1 a soldado nga Israelita ti katupag ti 450 a soldado a Midianita. (Uk. 7:2-8; 8:10) Dayta a bilang ti anamongan ni Jehova ta no mangabakda, awan ti mangipannakkel a maigapu dayta iti bileg wenno sirib ti tao.

¹³ Nakasaganan ni Gideon ken ti buyotna. No karamanka iti bassit a buyot, natalged ngata ti riknam gapu ta napagawiden dagiti mabutbuteng ken saan nga alerto? Wenno agkebbakebba ti barukongmo bayat a pampanunotem no ania ti mapasamak? Sigurado a nagtalek ni Gideon iti Dios. Inaramidna ti naibilin kenkuana! (Basaen ti Uk-ukom 7:9-14.) Saan a binabalaw ni Jehova ti panagkiddaw ni Gideon iti pagilasinan a mangipakita nga adda kenkuana ti Dios. (Uk. 6:36-40) Pinabilegna ketdi ti pammati ni Gideon.

¹⁴ Awan patinggana ti pannakabalin ni Jehova a mangispal. Kabaelanna nga ispalen ti ilina iti aniaman a narigat a kasasaad, nga usarenna pay ketdi dagiti kasla nakapuy wenno awan gawayna. Mabalin a mariknatayo no dadduma nga adu ti bumusbusor kadatayo wenno awanen ti namnamatayo. Ditay ekspektaren a mangted ti Dios kadagiti pagilasinan kas iti inaramidna ken Gideon. Ngem iwanwan ken liwliwaennatayo babaen ti Biblia ken ti kongregasion, nga idaldalan ti espirituna. (Roma 8:31, 32) Dagiti naayat a kari ni Jehova pabilgenda ti pammati ken panagtalektayo a kabaelannatayo a tulongan.

‘Ti Espiritu ni Jehova Dimteng ken Jefte’

15, 16. Apay a sidadaan nga agsakripisio ti balasang ni Jefte? Apay a makaparegta dayta kadagiti nagannak?

¹⁵ Usigentayo ti maysa pay a pagarigan. Idi makigubat dagiti Israelita kadagiti Ammonita, ti espiritu ni Jehova ‘dimteng ken Jefte.’ Gapu ta kayatna ti mangabak iti gubat tapno maidaydayaw ni Jehova, inkari ni Jefte ti maysa a nakapatpateg kenkuana. Kinunana a no maparmekna ti Ammon, itedna ken Jehova ti umuna a rummuar iti balayna a sumabet kenkuana. Idi nagawid kalpasan a nagballigi iti gubat, sinabet ti balasangna. (Uk. 11:29-31, 34) Nasdaaw kadi ni Jefte? Nalabit saan gapu ta maymaysa ti anakna. Tinungpalna ti karina babaen ti panangitedna iti anakna nga agserbi iti santuario ni Jehova idiay Silo. Kas nasungdo nga adipen ni Jehova, kombinsido ti balasang ni Jefte a masapul a matungpal ti  kari ni tatangna. (Basaen ti Uk-ukom 11:36.) Agpada a pinabileg ida ti espiritu ni Jehova.

¹⁶ Apay a sidadaan nga agsakripisio ti balasang ni Jefte? Napabileg la ketdi ti pammatina gapu iti kinaregta ken nadiosan a debosion ni tatangna. Dakayo a nagannak, makitkita dagiti annakyo ti ulidanyo. Ipakita dagiti desisionyo no kombinsidokayo iti ibagbagayo. Umim-imdengda iti napasnek a kararagyo ken iti isursuroyo, ken makitada ti panagreggetyo nga agserbi a naimpusuan ken Jehova. Makatulong amin dagita tapno maaddaanda iti nabileg a tarigagay nga agserbi ken Jehova. Dayta ti mangparagsak kadakayo.

‘Ti Espiritu ni Jehova Nagtignay’ ken Samson

17. Ania ti naaramidan ni Samson babaen ti espiritu ti Dios?

¹⁷ Usigentayo ti sabali pay a pagarigan. Idi a ti Israel iturturayan dagiti Filisteo, ‘ti espiritu ni Jehova nagtignay’ ken Samson tapno maispal ti Israel. (Uk. 13:24, 25) Ti Dios inikkanna ni Samson iti naisangsangayan a pigsa. Idi sinugsogan dagiti Filisteo ti dadduma nga Israelita a tiliwenda ni Samson, “nagtignay kenkuana ti espiritu ni Jehova, ket dagiti tali nga adda kadagiti takiagna nagbalin a kas kadagiti lienso a sinulid a nakset iti apuy, iti kasta nalunag dagiti griliosna manipud im-imana.” (Uk. 15:14) Idi agangay, nakaaramid iti di umiso a desision, a nakapukawan ti pigsana. Ngem napasubli ni Samson ti pigsana “babaen ti pammati.” (Heb. 11:32-34; Uk. 16:18-21, 28-30) Gapu iti kasasaadna, nagtignay ti espiritu ni Jehova ken Samson iti naisangsangayan a pamay-an. Ti napasamak ken Samson ket makaparegta unay kadatayo. Kasano?

18, 19. (a) Kasano a maparegtatayo iti kapadasan ni Samson? (b) Kasanonaka a natulongan dagiti pagarigan a nausig iti daytoy nga artikulo?

¹⁸ Makapagtalektayo iti nasantuan nga espiritu a timmulong ken Samson. Ipakpakitatayo dayta bayat nga itungtungpaltayo ti trabaho nga imbilin ni Jesus kadagiti pasurotna, ‘ti panangasaba kadagiti tattao ken naan-anay a panangsaksi.’ (Ara. 10:42) Agkasapulan dayta iti abilidad a mabalin a saan a nainkasigudan. Anian a yamantayo ta us-usaren ni Jehova ti espirituna tapno maitungpaltayo ti nadumaduma  nga annongen a naitalek kadatayo! Umanamongtayo iti naikuna ni propeta Isaias: “Imbaonnak ti Soberano nga Apo Jehova, ti mismo nga espirituna.” (Isa. 48:16) Wen, imbaonnatayo ti espiritu ti Dios! Ipapusotayo ti trabaho nga intalekna kadatayo, a mangnamnamatayo a pasayaatenna ti abilidadtayo kas iti inaramidna kada Moises, Bezalel, ken Josue. Usarentayo ti “kampilan ti espiritu, a dayta ti, sao ti Dios,” nga agtalektayo a tulongannatayo kas iti inaramidna kada Gideon, Jefte, ken Samson. (Efe. 6:17, 18) No agtalektayo iti tulong ni Jehova, mapapigsanatayo iti naespirituan kas iti literal a panangpapigsana ken Samson.

¹⁹ Nalawag a bendisionan ni Jehova dagidiay situtured a dumasig iti pudno a panagdayaw. Bumileg ti pammatitayo no agpaidalantayo iti nasantuan nga espiritu ti Dios. Makaparagsak met nga adalen ti dadduma a salaysay iti Kristiano a Griego a Kasuratan. Ipakitada no kasano a tinulongan ti espiritu ni Jehova dagiti matalek nga adipenna idi umuna a siglo, sakbay ken kalpasan ti Pentecostes 33 C.E. Usigentayo dagita iti sumaruno nga artikulo.

Apay a maparegtaka a makaammo no kasano a ti nasantuan nga espiritu tinulonganna ni . . .

• Moises?

• Bezalel?

• Josue?

• Gideon?

• Jefte?

• Samson?

[Salsaludsod]

[Blurb iti panid 22]

Ti espiritu ti Dios mapapigsanatayo iti naespirituan kas iti literal a panangpapigsana ken Samson

[Ladawan iti panid 21]

Dakayo a nagannak, dakkel ti epektona kadagiti annakyo ti kinaregtayo