Idaldalan ti Espiritu ti Dios Idi Umuna a Siglo ken Ita

“Amin dagitoy a panagtignay aramiden ti maymaysa ken isu met laeng nga espiritu.”​—1 COR. 12:11.

1. Ania dagiti adalentayo iti daytoy nga artikulo?

 ANIA a naisangsangayan a pasamak ti malagipmo no mangngegmo ti sao a Pentecostes? (Ara. 2:1-4) Naiparukpok idi ti nasantuan nga espiritu, a nangrugian ti dakkel a panagbalbaliw ti pannakilangen ti Dios kadagiti adipenna. Iti napalabas nga artikulo, naadaltayo no kasano a tinulongan ti espiritu ti Dios dagiti matalek a tattao tapno maitungpalda dagiti narigat ken detalyado nga annongenda. Ngem ania ti nagdumaan ti panagtignay ti espiritu ti Dios sakbay ti panawen Kristiano ken idi umuna a siglo? Ken kasano a magunggonaan dagiti Kristiano ita iti panagtignay ti nasantuan nga espiritu ti Dios? Kitaentayo.

‘Adtoy! Ti Babai nga Adipen ni Jehova!’

2. Kasano a nakita ni Maria ti panagtignay ti nasantuan nga espiritu?

² Presente ni Maria idi naiparukpok ti nasantuan nga espiritu iti nalawa a makinngato a siled ti Jerusalem. (Ara. 1:13, 14) Ngem nasurok a 30 a tawen sakbayna, nakitanan dagiti  naisangsangayan a panagtignay ti espiritu ni Jehova. Manipud langit, inyakar ni Jehova ti biag ti Anakna ditoy daga. Inusarna ti “nasantuan nga espiritu” tapno agsikog ni Maria nupay maysa idi a birhen.​—Mat. 1:20.

3, 4. Ania a kababalin ti impakita ni Maria, ken kasanotayo a matulad?

³ Apay a naikkan ni Maria iti awan kaaspingna a pribilehio? Idi nailawlawag ti anghel no ania ti pagayatan ni Jehova, kinuna ni Maria: “Adtoy! Ti adipen a babai ni Jehova! Maaramid koma kaniak sigun iti deklarasionmo.” (Luc. 1:38) Ipakita dagita a sasao no ania ti kababalin ni Maria. Sidadaan a mangaramid iti pagayatan ti Dios aniaman ti ibaga dagiti kalugaranna maipapan iti panagsikogna wenno iti epekto ti relasionna iti nobiona. Iti panangtukoy ni Maria iti bagina kas adipen, impakitana ti naan-anay a panagtalekna ken Jehova kas Apona.

⁴ Marigrigatanka kadi no dadduma kadagiti responsabilidadmo iti panagserbi iti Dios? Nasayaat nga isaludsod ti tunggal maysa kadatayo: ‘Naan-anay kadi nga agtalekak nga itungpal ni Jehova dagiti bambanag maitunos iti pagayatanna? Sidadaanak kadi nga agtulnog?’ Mangnamnamaka nga ipaay ti Dios ti espirituna kadagidiay naan-anay nga agtalek ken agtulnog kenkuana kas Agturay.​—Ara. 5:32.

Ti Nasantuan nga Espiritu Tinulonganna ni Pedro

5. Kadagiti ania a pamay-an a nakita ni Pedro ti panagtignay ti nasantuan nga espiritu sakbay ti Pentecostes 33 C.E.?

⁵ Kas ken Maria, nakita ken narikna ni apostol Pedro ti panagtignay ti nasantuan nga espiritu ti Dios sakbay ti Pentecostes 33 C.E. Isu ken ti dadduma nga apostol ket inikkan ni Jesus iti pannakabalin a mangparuar kadagiti demonio. (Mar. 3:14-16) Nupay saan a dakamaten ti Kasuratan ti amin a detalye, agparang nga inusar ni Pedro dayta a pannakabalin. Makita met ti pannakabalin ti Dios idi nakapagna ni Pedro iti rabaw ti Baybay ti Galilea a nagturong ken Jesus. (Basaen ti Mateo 14:25-29.) Nalawag a nakaaramid ni Pedro kadagiti milagro gapu ta nagtalek iti tulong ti nasantuan nga espiritu. Idi agangay, nagtignay dayta nga espiritu ken Pedro ken iti dadduma nga adalan iti baro a pamay-an.

6. Iti tulong ti espiritu ti Dios, ania ti naaramidan ni Pedro bayat ken kalpasan ti Pentecostes 33 C.E.?

⁶ Iti Piesta ti Pentecostes 33 C.E., nabaelan ni Pedro ken ti dadduma pay ti agsao iti lenguahe dagiti bimmisita idiay Jerusalem gapu iti nasantuan nga espiritu. Kalpasanna, nagpalawag ni Pedro iti sanguanan dagiti tattao. (Ara. 2:14-36) Adda dagiti gundaway a mabutbuteng ken nadarasudos ni Pedro. Ngem idi immawat iti nasantuan nga espiritu, naaddaan iti tured a mangasaba iti laksid dagiti pangta ken pannakaidadanes. (Ara. 4:18-20, 31) Naammuanna ti maysa a banag babaen ti panangipalgak ti Dios. (Ara. 5:8, 9) Nabalinanna pay ti nangpagungar.​—Ara. 9:40.

7. Ania dagiti pannursuro ni Jesus a natarusan laeng ni Pedro kalpasan ti pannakapulotna?

⁷ Sakbay ti Pentecostes, natarusanen ni Pedro ti adu a kinapudno nga insuro ni Jesus. (Mat. 16:16, 17; Juan 6:68) Ngem adda dagiti pannursurona a saan pay a nalawag ken Pedro sakbay dayta. Kas pagarigan, saanna a natarusan a mapagungar ni Kristo kas espiritu iti maikatlo nga aldaw ken dina natarusan a ti Pagarian ket idiay langit. (Juan 20:6-10; Ara. 1:6) Karkarna kenkuana ti panagbalin dagiti tattao nga espiritu ken ti panagturayda iti nailangitan a Pagarian. Natarusanna laeng dagita a pannursuro ni Jesus idi nabautisaran iti nasantuan nga espiritu ken naaddaan iti nailangitan a namnama.

8. Ania a pannakaammo ti agpada a magun-odan dagiti napulotan ken “sabsabali a karnero”?

⁸ Dagiti bambanag a saan a matarusan dagiti adalan ni Jesus ket nalawagen kalpasan a naiparukpok ti nasantuan nga espiritu. Ti nasantuan nga espiritu pinaltiinganna dagiti mannurat iti Kristiano a Griego a Kasuratan a mangilawlawag kadagiti naisangsangayan a  kinapudno maipapan iti panggep ni Jehova. (Efe. 3:8-11, 18) Agpada a matartaraonan ita kadagiti naespirituan a kinapudno dagiti napulotan iti espiritu ken ti “sabsabali a karnero.” (Juan 10:16) Ipatpategmo kadi ti pannakaammo ken pannakatarus iti Sao ti Dios nga ipapaay ti nasantuan nga espiritu?

‘Napno ni Pablo iti Nasantuan nga Espiritu’

9. Ania ti naibanag ni Pablo babaen ti nasantuan nga espiritu?

⁹ Agarup makatawen kalpasan ti Pentecostes 33 C.E., adda sabali pay nga immawat iti sagut a nasantuan nga espiritu. Isu ni Saulo, a naawagan idi agangay iti Pablo. Nagtignay kenkuana ti espiritu kadagiti pamay-an a pakagunggonaantayo ita. Napaltiingan ni apostol Pablo a mangisurat iti 14 a libro ti Biblia. Kas ken Pedro, ti espiritu ti Dios tinulonganna met ni Pablo a mangtarus ken silalawag a mangisurat iti namnama nga imortalidad ken di agrupsa a biag idiay langit. Iti tulong ti nasantuan nga espiritu, nabaelan ni Pablo ti nangparuar kadagiti demonio, nangpaimbag, ken nangpagungar! Ngem ti inawatna a pannakabalin babaen ti nasantuan nga espiritu ti timmulong kenkuana a nangitungpal iti napatpateg nga annongen. Dayta met la nga annongen ti itungtungpal ti amin nga adipen ti Dios ita nupay saan a namilagruan.

10. Ania ti epekto ti nasantuan nga espiritu iti panagsao ni Pablo?

¹⁰ Ni Pablo a “napno iti nasantuan nga espiritu,” situtured a tinubngarna ti maysa a mangkukulam. Nagdakkel ti epekto dayta iti prokonsul ti Chipre nga agdengdengngeg iti saritaanda! Inawatna ti kinapudno, “ta nagsiddaaw unay iti sursuro ni Jehova.” (Ara. 13:8-12) Nalawag nga ammo ni Pablo ti kinapateg ti nasantuan nga espiritu ti Dios no iti panangipakaammo iti kinapudno. (Mat. 10:20) Idi agangay, kiniddawna iti kongregasion ti Efeso nga ikararaganda a maipaayan koma iti “pannakabael nga agsao.”​—Efe. 6:18-20.

11. Kasano a ti espiritu ti Dios indalanna ni Pablo?

¹¹ Iti tulong ti nasantuan nga espiritu, saan laeng a nabaelan ni Pablo ti agsao, adda met dagiti gundaway a nalapdan nga agsao iti dadduma a lugar. Idi rinugianna ti trabaho a panagmisionero, indalan ti espiritu ti Dios. (Ara. 13:2; basaen ti Aramid 16:6-10.) Idaldalan pay laeng ita ni Jehova ti trabaho a panangasaba babaen ti espirituna. Kas ken Pablo, amin a natulnog nga adipen ni Jehova situtured ken sireregta nga ikagkagumaanda nga ipakaammo ti kinapudno. Nupay ti panangidalan ti Dios ita ket saan a kas kabatad idi kaaldawan ni Pablo, manamnamatayo nga us-usaren ni Jehova ti nasantuan nga espirituna tapno dagiti maikari sigurado a mangngegda ti kinapudno.​—Juan 6:44.

“Nagduduma a Panagtignay”

12-14. Agpapada kadi ti panagtignay ti espiritu ti Dios iti amin nga adipenna? Ilawlawagyo.

¹² Makaparegta kadi kadagiti adipen ti Dios ita dagiti salaysay no kasano a binendisionan ni Jehova dagiti napulotan idi umuna a siglo? Sigurado a kasta! Lagipem ti naipaltiing a sasao ni Pablo iti kongregasion ti Corinto maipapan kadagiti namilagruan a sagut ti espiritu  idi kaaldawanna: “Ita adda nagduduma a sagut, ngem adda ti isu met laeng nga espiritu; ket adda nagduduma a ministerio, ket kaskasdi adda ti isu met laeng nga Apo; ket adda nagduduma a panagtignay, ket kaskasdi ti isu met laeng a Dios ti mangaramid kadagiti amin a panagtignay iti amin a tattao.” (1 Cor. 12:4-6, 11) Nalawag nga adda panggep ti nagduduma a panagtignay ti nasantuan nga espiritu iti nagduduma nga adipen ti Dios. Kinapudnona, agpada nga idaldalan ti nasantuan nga espiritu ti “bassit nga ipastoran” ken ti “sabsabali a karnero.” (Luc. 12:32; Juan 10:16) Ngem saan a kanayon nga agpada ti panagtignayna iti tunggal miembro ti kongregasion.

¹³ Kas pagarigan, nadutokan dagiti panglakayen babaen ti nasantuan nga espiritu. (Ara. 20:28) Ngem saan nga amin a napulotan iti espiritu ket agserserbi kas manangaywan iti kongregasion. Ania ti ipakita dayta? Nagduduma ti panagtignay ti espiritu ti Dios kadagiti kameng ti kongregasion.

¹⁴ Ti espiritu a nangpatalged kadagiti napulotan a naamponda kas annak ti Dios ket isu met laeng ti espiritu nga inusar ni Jehova a nangpagungar ken Jesus iti imortal a biag idiay langit. (Basaen ti Roma 8:11, 15.) Dayta met laeng nga espiritu ti inusar ni Jehova a nangparsua iti intero nga uniberso. (Gen. 1:1-3) Babaen dayta a nasantuan nga espiritu, ni Jehova tinulonganna ni Bezalel para iti naisangsangayan a trabaho iti tabernakulo, pinapigsana ni Samson a mangaramid kadagiti nakaskasdaaw a bambanag, ken tinulonganna ni Pedro a magna iti rabaw ti danum. Gapuna, ti panagpaidalan iti espiritu ti Dios ket naiduma iti pannakapulot iti espiritu ti Dios. Ti pannakapulot iti espiritu ti Dios ket maysa laeng a naisangsangayan a pamay-an ti panagtignay ti espirituna. Ti Dios ti mangpili iti pulotanna iti espiritu.

15. Agtultuloy kadi iti agnanayon ti pannakabautisar iti nasantuan nga espiritu? Ilawlawagyo.

¹⁵ Agtigtignay ti nasantuan nga espiritu ti Dios kadagiti matalek nga adipenna iti nagduduma a wagas iti rinibun a tawen sakbay pay a nangrugi ti panangpulot iti espiritu idi Pentecostes 33 C.E. Ngem saan nga agtultuloy dayta iti agnanayon. Agpatingga ti pannakabautisar iti espiritu ngem agtultuloy nga agtignay ti nasantuan nga espiritu iti ili ti Dios tapno maaramidda ti pagayatanna iti agnanayon.

16. Ania ti ar-aramiden dagiti adipen ti Dios ita babaen ti espirituna?

¹⁶ Ania ti maar-aramid ita ditoy daga babaen ti nasantuan nga espiritu ni Jehova? Kuna ti Apocalipsis 22:17: “Ti espiritu ken ti nobia agtultuloy a kunaenda: ‘Umayka!’ Ket ti asinoman a dumdumngeg kunaenna koma: ‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.” Iti tulong ti espiritu ti Dios, aw-awisen dagiti Kristiano ita “ti asinoman a mayat” nga umawat iti danum ti biag. Idadauluan dayta dagiti napulotan a Kristiano. Ngem tultulongan ida ti sabsabali a karnero. Agpada dagita a grupo nga agpapaidalan iti isu met laeng a nasantuan nga espiritu. Impakitada ti dedikasionda ken Jehova babaen ti panagpabautisarda “iti nagan ti Ama ken ti Anak ken ti nasantuan nga espiritu.” (Mat. 28:19) Iparparangarangda ti bunga ti espiritu iti panagbiagda. (Gal. 5:22, 23) Iti tulong ti espiritu ti Dios, ikagkagumaanda a taginayonen ti nadalus a wagas ti panagbiag a makaay-ayo iti Dios.​—2 Cor. 7:1; Apoc. 7:9, 14.

Itultuloymo ti Agkiddaw iti Nasantuan nga Espiritu

17. Ania ti pammaneknek nga adda kadatayo ti espiritu ti Dios?

¹⁷ Aniaman ti namnamam, biag nga agnanayon idiay langit wenno ditoy daga, ikkannaka ni Jehova iti “pannakabalin a nalablabes ngem ti gagangay” tapno mataginayonmo ti kinatarnawmo ken masagrapmo dagiti bendision. (2 Cor. 4:7) Mabalin a maumsika gapu iti agtultuloy a panangikasabam iti naimbag a  damag ti Pagarian. Ngem laglagipem a ‘no maumsika gapu iti nagan ni Kristo, naragsakka, agsipud ta ti nadayag nga espiritu ti Dios, agtataeng kenka.’​—1 Ped. 4:14.

18, 19. Kasanonaka a tulongan ni Jehova babaen ti nasantuan nga espirituna, ken ania ti determinasionmo?

¹⁸ Sibubulos nga ipaay ti Dios ti nasantuan nga espirituna kadagidiay sipapasnek nga agkidkiddaw iti dayta. Saanna laeng a pasayaaten dagiti abilidadmo no di ket parayrayenna pay ti tarigagaymo nga agserbi iti Dios iti amin a kabaelam. “Ti Dios isu daydiay, maigapu iti pakaragsakanna unay, agtigtignay kadakayo tapno agpadpada nga agtarigagay ken agtignaykayo.” Ti nagpateg a sagut ti nasantuan nga espiritu agraman ti napasnek a panagreggettayo a ‘mangpetpet a siiirut iti sao ti biag’ ti tumulong kadatayo nga ‘agtultuloy a mangitrabaho iti bukodtayo a pannakaisalakan buyogen ti buteng ken panagpigerger.’​—Fil. 2:12, 13, 16.

¹⁹ Gapuna, naan-naay koma nga agtalektayo iti espiritu ti Dios, ipapusotayo ti amin nga annongentayo, agbalintayo nga eksperto kadagita, ken agpatulongtayo ken Jehova. (Sant. 1:5) Tulongannaka a mangtarus iti Saona, mangsango kadagiti problema iti biag, ken mangikasaba iti naimbag a damag. Kuna ni Jesus: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo.” (Luc. 11:9, 13) Ramanen dayta ti panagdawat iti nasantuan nga espiritu. Wen, itultuloymo nga ipakaasi ken Jehova a matuladmo koma dagiti matalek nga adipenna​—idi ken ita​—a nagpaidalan iti nasantuan nga espirituna.

Mailawlawagyo Kadi?

• Kas ken Maria, ania a kababalin ti iparangarangtayo tapno masagraptayo dagiti bendision?

• Iti ania a pamay-an a ti espiritu ti Dios indalanna ni Pablo?

• Kasano a ti espiritu ti Dios idaldalanna dagiti adipen ti Dios ita?

[Salsaludsod]

[Ladawan iti panid 24]

Ti espiritu ti Dios tinulonganna ni Pablo a nangparmek iti impluensia dagiti dakes nga espiritu

[Ladawan iti panid 26]

Magun-odan dagiti Kristiano ita ti tulong ti nasantuan nga espiritu, aniaman ti namnamada