Malagipyo Kadi?

Natagiragsakyo kadi a binasa dagiti nabiit pay a ruar Ti Pagwanawanan? Kitaentayo no masungbatanyo dagiti sumaganad a saludsod:

• Asino ni Olivétan, ken apay a rumbeng nga interesadotayo iti inaramidna?

Dayta ti pagaammo a nagan ti Pranses a ni Pierre Robert. Bayat ti Repormasion idi maika-16 a siglo, impatarusna ti Biblia iti Pranses. Inaramatna ti “manangaywan” imbes nga “obispo” ken “kongregasion” imbes nga “iglesia.” Iti dadduma a paset ti patarusna, inusarna ti nagan ti Dios a “Jehova.”​—9/1, panid 18-20.

• Ania ti kayat a sawen ti Dios idi imbagana kadagiti Levita: “Siak ti binglaymo”?

Adda bingay a daga ti tunggal tribu ti Israel. Ngem ni Jehova ti ‘bingay’ dagiti Levita. (Num. 18:20) Awan ti tawidda a daga ngem adda naisangsangayan a pribilehioda nga agserbi. Kaskasdi, impaay ni Jehova ti material a kasapulanda. Dagidiay mangyun-una kadagiti interes ti Pagarian ita makapagtalekda met nga ipaay ti Dios dagiti kangrunaan a kasapulanda.​—9/15, panid 7-8, 13.

• Kasanotayo nga ammo no kaano a pinarmek dagiti taga-Babilonia ti nagkauna a Jerusalem?

Agduduma ken agsisimparat ti ibaga dagiti historiador maipapan kadagiti ari ti Babilonia ken iti panagturayda. Ngem umanamong dagiti eskolar a pinarmek ni Ciro II ti Babilonia idi 539 B.C.E., maysa a napateg a petsa. Nawayawayaan dagiti Judio ken nakasublida iti dagada idi 537 B.C.E. Kuna ti Biblia a nagpaut iti 70 a tawen ti pannakaidestieroda. No kasta, naparmek ti Jerusalem idi 607 B.C.E. (2 Cron. 36:21, 22; Jer. 29:10; Dan. 9:1, 2)​—10/1, panid 26-31.

• Ania ti makatulong iti maysa a Kristiano a mangikeddeng no makagunggona wenno saan ti paglinglingayanna?

Tapno maikeddengtayo no ania a paglinglingayan ti makagunggona ken makaay-ayo iti Dios, nasayaat nga isaludsodtayo: Ania ti ramanenna? Kasano kapaut nga aglinglingayak? Siasino dagiti kakaduak?​—10/15, panid 9-12.

• Apay a dakes ti aborsion?

Ti biag ket sagrado iti Dios ken matmatanna ti sikog kas sibibiagen a parsua. (Sal. 139:16) Ibilangna a panangpapatay ti panangiregreg iti sikog, kas ipakita ti kinapudno a sigun iti Linteg, manungsungbat ti asinoman a makadangran iti sikog. (Ex. 21:22, 23)​—11/1, panid 6.

• Kasano a matulongannatayo ti Proverbio 7:6-23 a mangliklik iti panagbuya iti pornograpia?

Dakamaten ti teksto ti maysa nga agtutubo a lalaki a nagna iti dalan a pagaammo a pagnanaedan ti imoral a babai. Ginuyugoyna ti agtutubo. Ita, nasayaat a liklikantayo dagiti site ti Internet a naglaon kadagiti makagargari a ladawan, ken napateg nga ikararagtayo ti tulong ti Dios sakbay pay a makakitatayo kadagiti kasta a ladawan iti Internet.​—11/15, panid 9-10.

• Kasanotayo nga ammo a makalasat ti daga inton 2012?

Dadduma ti mangipagarup nga agpatingga ti lubong inton tawen 2012 gapu kadagiti siklo ti nagkauna a kalendario dagiti Maya. Ngem imposible dayta gapu ta pinarsua ni Jehova ti daga a pagnaedan. Kuna ti Biblia nga agtalinaed ti daga iti agnanayon. (Ecl. 1:4; Isa. 45:18)​—12/1, panid 10.

• Siasino a mannurat iti Biblia ti presente idi Pentecostes 33 C.E.?

Agparang nga innem kadagiti mannurat iti Kristiano a Griego a Kasuratan ti presente idi. Ti tallo nga apostol a da Mateo, Juan, ken Pedro, sa ti dua a kakabsat ni Jesus iti ina a da Santiago ken Judas. Nalabit presente met ti agtutubo a ni Marcos.​—12/1, panid 22.