Nagunggonaanak Kadagiti Inaramidko a Panagbalbaliw

Kas Insalaysay ni James A. Thompson

Nayanakak idi 1928 iti makin-abagatan a paset ti United States. Adda idi linteg a panaglalasin dagiti puraw ken nangisit a tattao. Mabalin a maibalud wenno nakarkaro pay ti dusa ti mangsalungasing iti dayta.

ITI dadduma a paset ti United States, masapul nga aglalasin idi ti kongregasion, sirkito, ken distrito dagiti puraw ken nangisit a Saksi ni Jehova. Idi 1937, nagserbi ni tatangko kas company servant (maawagan itan a koordineytor ti bagi dagiti panglakayen) iti kongregasion dagiti nangisit idiay Chattanooga, Tennessee. Ni Henry Nichols met ti company servant iti kongregasion dagiti puraw.

Adu ti nasayaat a kapadasak idi ubingak pay. No rabii, agtugawak iti beranda iti likud ti balaymi sa dumngegak kada Tatang ken Kabsat Nichols. Uray diak maaw-awatan ti amin nga ibagbagada, maragragsakanak a mangkadua ken Tatang bayat a pagsaritaanda no kasano idi ti kasayaatan a panangitungpal iti trabaho a panangasaba.

Sakbay dayta, adda trahedia a napasamak idi 1930. Natay ni nanangko nga agtawen laeng idi iti 20 isu a ni Tatang ti nangaywan kadakami nga agkabsat. Uppat ti tawen ni Manang Doris ken dua met ti tawenko. Nabiit pay idi a nabautisaran ni tatangko ngem rumangrang-ay iti naespirituan.

Dagiti Nasayaat nga Ulidan

Idi 1933, naam-ammo ni Tatang ti nasingpet a kabsat nga agnagan iti Lillie Mae Gwendolyn Thomas ket nagkasarda idi agangay. Nasayaatda nga ulidan kadakami ken Manang Doris iti matalek a panagserbi ken Jehova.

 Idi 1938, nakiddaw kadagiti kongregasion dagiti Saksi ni Jehova a suportaranda ti resolusion a dagiti panglakayen ket dutokan ti hedkuarter iti Brooklyn, New York, imbes a butosan ti kongregasion. Dadduma a kakabsat iti Chattanooga ti saan a simmuporta ngem naan-anay a sinuportaran dayta ni Tatang. Ti kinasungdona agraman ti naimpusuan a suporta ni Nanang ti nakatulong kaniak agingga ita.

Bautismo ken Amin-Tiempo a Serbisio

Idi 1940, kaduami ti dadduma a kakongregasionmi a nangarkila iti bus a mapan makikombension idiay Detroit, Michigan. Nagpabautisar sadiay ti dadduma a kakaduami. Adda dagiti nasdaaw no apay a diak nagpabautisar idinto ta lima pay laeng ti tawenko, naregtaakon a mangaskasaba.

Idi dinamagdak, insungbatko: “Diak naan-anay a maawatan no ania ti bautismo.” Nasdaaw ni Tatang iti nangngegna isu nga inkagumaannak a tinulongan tapno maawatak ti kaipapanan ken kinapateg ti bautismo. Kalpasan ti uppat a bulan bayat ti nakalamlamiis nga aldaw ti Oktubre 1, 1940, nabautisaranak iti maysa a danaw iti ruar ti Chattanooga.

Nangrugiak a nagpayunir iti edad a 14, bayat ti kalgaw nga awanen ti klase. Nangasabaak iti babassit nga ili ti Tennessee ken iti kabangibangna nga estado ti Georgia. Nasapaak nga agriing, isaganak ti balonko, ken kamakamek ti tren wenno bus nga agluas iti 6:00 ti bigat a mapan iti teritoria. Agawidak iti agarup 6:00 ti rabii. Masansan a maibus ti balonko sakbay ti pangaldaw. Nupay adda kuartak, diak makastrek iti paggatangan ti taraon gapu ta maysaak a nangisit. Naminsan, simrekak iti paglakuan iti ice cream ngem pinapanawdak. Imbag laengen ta inggatangannak ti maysa a nasingpet a babai a puraw.

Idi haiskulak, mas aktibo dagiti taga-Abagatan a sumuporta iti agpapada a kalintegan ti umili. Dagiti organisasion kas iti NAACP (National Association for the Advancement of Colored People) parparegtaenda dagiti estudiante nga agbalin nga aktibista. Kalat ti dadduma nga eskuelaan dagiti nangisit, a pakairamanan ti eskuelaanmi, nga allukoyen ti amin a makimiembro. Pilpilitendak a “sumuporta iti pulimi” ngem nagkedkedak. Inlawlawagko nga awan ti puli a pabpaboran ti Dios, ken agtalekak a solbarenna amin a kinaawan hustisia.​—Juan 17:14; Ara. 10:34, 35.

Inkeddengko ti umakar iti siudad ti New York idi nagraduarak iti haiskul. Ngem dimmagasak nga umuna idiay Philadelphia, Pennsylvania tapno sarungkarak dagiti gagayyemko a naam-ammok iti maysa a kombension. Ti kongregasion sadiay ti immuna a natabunuak nga agtitipon dagiti puraw ken nangisit. Bisita idi ti agdaldaliasat a manangaywan ket imbagana nga ikkannak iti paset iti sumaruno a gimong isu nga inkeddengko ti agtalinaed sadiay.

Ti maysa kadagiti gagayyemko idiay Philadelphia ket ti agtutubo a kabsat nga agnagan iti Geraldine White. Gerri ti awagko kenkuana. Adu ti ammona iti Biblia ken nalaing a mangasaba. Kangrunaanna, agpadakami iti kalat nga agpayunir. Nagkasarkami idi Abril 23, 1949.

 Naawiskami iti Gilead

Siguden a kalatmi ti ageskuela iti Gilead ken agmisionero iti sabali a pagilian. Naragsakankami a nangbaliw iti kasasaadmi tapno makualipikar iti Gilead. Di nagbayag, nakiddaw nga umakarkami iti Lawnside, New Jersey; sa idiay Chester, Pennsylvania; ken kamaudiananna, idiay Atlantic City, New Jersey. Bayat ti kaaddami sadiay, nakualipikarkami nga agaplay iti Gilead ta dua a tawenen nga agassawakami. Ngem adda problema.

Idi rugrugi ti dekada ’50, adu nga agtutubo a lallaki ti nabilin nga agsoldado tapno makigubat idiay Korea. Agparang nga idumduma ti draft board idiay Philadelphia dagiti Saksi ni Jehova gapu iti neutral a takdertayo. Idi agangay, imbaga ti maysa a hues a nagimbestigar ti FBI ket nakitana a pudno ti imbagak maipapan iti neutral a takderko. Isu nga idi Enero 11, 1952, dinesisionan ti Presidential Appeal Board a saanakon nga agsoldado gapu ta maysaak a ministro ti relihion.

Idi Agosto 1952, naawiskami ken Gerri nga ageskuela iti maika-20 a klase ti Gilead a nangrugi iti Setiembre. Bayat ti panageskuelami, ninamnamami ti maibaon iti sabali a pagilian. Karaman ni manangko a Doris iti maika-13 a klase ti Gilead ken agserserbin idiay Brazil. Nasdaawkami idi naibaonkami iti makin-abagatan nga estado ti Alabama tapno agserbi iti sirkito ken mangbisita kadagiti kongregasion dagiti nangisit! Medio naupaykami gapu ta mangnamnamakami nga agserbi iti sabali a pagilian.

Adda iti Huntsville ti immuna a kongregasion a binisitami. Nagdiretsokami iti balay ti kabsat a pagdagusanmi. Bayat nga idisdiskargami dagiti aruatenmi, nangngegmi ti bumalay a nagkuna iti telepono: “Addan dagiti ubbing.” Agtawenkami laeng idi iti 24 ken ubing pay ti langami. Bayat ti panagserbimi iti dayta a sirkito, dagiti “Ubbing” ti awagda kadakami.

Kaaduan a tattao iti Abagatan ket nauneg ti panagraemda iti Biblia isu a naawagan iti Bible Belt dayta a paset ti United States. Gapuna, masansan nga usarenmi dagitoy tallo a punto no mangasabakami:

(1) Kasasaad ti lubong.

(2) Ti solusion nga ipaay ti Biblia.

(3) Ti ibaga ti Biblia a masapul nga aramidentayo.

Kalpasan a mailawlawagmi dagita, mangitukonkami iti publikasion a makatulong iti panagadal iti Biblia. Gapu ta nasayaat ti resultana, impaidemostrada dayta kaniak bayat ti 1953 New World Society Assembly iti New York.

Idi kalgaw ti 1953, nadutokanak kas manangaywan iti distrito nga agserbi kadagiti sirkito dagiti nangisit iti Abagatan. Ti teritoriami  ket manipud Virginia agingga iti Florida ken agpalaud iti Alabama ken Tennessee. Masapul a mannakibagay dagiti agdaldaliasat a manangaywan. Kas pagarigan, masansan nga agdaguskami kadagiti balay nga awan baniona iti uneg ken galba a bathtub ti pagdigusanmi nga adda iti likud ti paglutuan. Ngem makaparagsak ta dayta ti kaimengan a paset ti balay!

Dagiti Epekto ti Panangidumduma iti Puli

Iti panagserbimi iti Abagatan, masapul a nataktikakami tapno maileppasmi ti bambanag. Maparitan dagiti nangisit nga agusar kadagiti pangpubliko a paglabaan. Isu a no mapan aglaba ni Gerri, ibagana a bado dagita ni “Mrs. Thompson.” Adu ti mangipagarup nga isu ket maysa a katulong ket ni “Mrs. Thompson” ti amona. Idi a tiempo, ipabpabuya dagiti manangaywan iti distrito ti pelikula a The New World Society in Action. No kasapulan ti dakkel nga iskrin, teleponuak ti maysa a pagabangan tapno agpareserbaak para ken “Mr. Thompson.” Kalpasanna, mapanko alaen. Nadayawkami a kanayon ken kaaduanna a maibanagmi ti ministeriomi nga awan ti problema.

Adda sabali pay a kita ti panangidumduma iti Abagatan. Adu ti saan a mangayat kadagiti taga-Amianan. Naipadamag iti maysa a diario nga agpalawag iti asamblea ni James A. Thompson, Jr., iti Watchtower Bible and Tract Society iti New York. Ipagarup ti dadduma a maysaak a taga-New York isu a kinanselar ti eskuelaan ti kontratami a mangusar iti auditorium. Gapuna, kinasaritak dagiti mangimatmaton iti eskuelaan ken inlawlawagko a nageskuelaak idiay Chattanooga. Isu a napalubosankami met laeng a mangusar iti auditorium para iti asamblea sirkito.

Kimmaro ti panangidumduma iti puli idi katengngaan ti dekada ’50, ken nariribuk no dadduma. Idi 1954, adda dagiti kakabsat a masuron no awan ti nangisit nga agpalawag iti dadduma a kombension distrito. Pinaregtami ida nga agan-anus. Iti simmaganad a kalgaw, nadutokanak nga agpalawag. Kalpasanna, umad-adun a kakabsat iti Abagatan ti agpaspaset kadagiti kombension.

Idi agangay, bimmasit ti kinaranggas iti Abagatan. Agkakaduan nga aggimong dagiti puraw ken nangisit a kakabsat. Dadduma ti nakiddaw nga umakar iti sabali a kongregasion ken adda panagbalbaliw iti teritoria ken responsabilidad dagiti mangidadaulo iti kongregasion. Saan a kayat ti dadduma a puraw ken nangisit dayta nga urnos. Ngem kaaduan ti saan a mangidumduma kas iti nailangitan nga Amatayo. Kinapudnona, adu ti nasinged nga aggagayyem aniaman ti pulida. Napadasan dayta ti pamiliami idi dekada ’30 ken ’40 bayat a dumakdakkelak.

Baro nga Annongen

Idi Enero 1969, maragsakankami a nangawat iti awis nga agserbi idiay Guyana, South America. Napankami nga immuna idiay Brooklyn, New York. Sadiay a nasanayak a mangimaton iti trabaho a panangasaba idiay Guyana. Simmangpetkami sadiay idi Hulio 1969. Kalpasan ti 16 a tawen iti trabaho  a panagdaliasat, makaikawa ti agtalinaed iti maysa a lugar. Dandani inaldaw nga adda iti ministerio ni Gerri kas misionera, ken agtrabahoak met iti sanga nga opisina.

Karaman iti trabahok ti panagarbas, panangipatulod iti literatura ti 28 a kongregasion, ken panagsurat iti hedkuarter idiay Brooklyn. Inaldaw nga agtrabahoak iti 14 agingga iti 15 nga oras. Makabannog ti trabahomi ngem naragsakkami. Idi sangsangpetmi, 950 laeng ti agibumbunannag idiay Guyana ngem nasurok itan a 2,500.

Nupay napintas ti klima ken adu a prutas ken nateng ti magustuanmi, ti talaga a pakaay-ayuanmi ket dagiti nasingpet a tattao a mayat a mangammo iti isursuro ti Biblia maipapan iti Pagarian ti Dios. Masansan a 20 a panangyadal iti Biblia ti linawas nga ikonkondukta ni Gerri, ken adu kadakuada ti nagpabautisar. Dadduma ti nagbalin a payunir, panglakayen, ken nageskuela iti Gilead tapno agmisionero.

Dagiti Parikut ken Nakapuy a Salun-at

Idi 1983, nagkasapulan iti tulong dagiti nagannakko iti United States. Nagsasaritakami kada Manang Doris, a 35 a tawenen a misionera idiay Brazil. Inkeddengna nga isu ti agawid ken mangaywan kadakuada. Kinunana: ‘Apay a masapul a dua a misionero ti agsardeng idinto ta kabaelan met ti maysa ti agaywan?’ Idi natay dagiti nagannakmi, nagtalinaed ni Manang Doris idiay Chattanooga ken nagserbi kas special pioneer.

Nadayagnos nga adda prostate kanserko idi 1995 isu a nagsublikami ditoy United States. Nagnaedkami iti Goldsboro, North Carolina ta adda dayta iti nagbaetan ti Tennessee nga ayan ti pamiliak ken Pennsylvania nga ayan ti pamilia ni Gerri. Nakontrol ti kanserko ken agserserbikami itan iti maysa a kongregasion iti Goldsboro kas infirm special pioneer.

No lagipek ti nasurok nga 65 a tawenko iti amin-tiempo a serbisio, agyamanak unay ken Jehova ta binendisionanna ti panangaramidmi ken Gerri kadagiti panagbalbaliw tapno makapagserbikami kenkuana. Pudno ti kinuna ni David: ‘Iti daydiay nasungdo agtignay ni Jehova a sisusungdo’!​—2 Sam. 22:26.

[Dagiti Ladawan iti panid 3]

Nagsayaat nga ulidan kaniak da Tatang ken Kabsat Nichols

[Dagiti Ladawan iti panid 4]

Dakami ken Gerri sakbay a mapankami iti Gilead idi 1952

[Dagiti Ladawan iti panid 5]

Kalpasan ti panageskuelami iti Gilead, nagserbikami iti Abagatan iti trabaho a panagdaliasat

[Ladawan iti panid 6]

Dagiti agdaldaliasat a manangaywan ken dagiti assawada nga agsagsagana para iti kombension distrito dagiti puraw ken nangisit, idi 1966

[Ladawan iti panid 7]

Naragsak ti agserbi a misionero idiay Guyana