Naragsak Latta Uray Adda Sakitna

KARIRIINGMO pay laeng ngem kayatmon a malpas ti agmalem gapu ta masapul nga ibturam manen ti pisikal ken emosional nga ut-ot. Nalabit mariknam ti nayebkas ni Job: “Nasaysayaat laengen a matayak ngem ti agbiag iti kastoy a rigat.” (Job 7:15, Ti Baro a Naimbag a Damag Biblia) Kasanon no kasta ti kasasaadmo ken nabayagen nga agib-ibturka?

Kasta ti kasasaad ni Mefiboset nga anak ni Jonatan a gayyem ni Ari David. Idi lima ti tawen ni Mefiboset, ‘natnag isu a napilay.’ (2 Sam. 4:4) Kimmaro la ketdi ti saem a marikriknana idi napabasol a nangtraidor iti ari ken napukawan iti sanikua. Ngem nagtalinaed a mapagwadan no iti panangibtur iti kinabaldado, pammabasol, ken pannakaupay, a dina impalubos a mapukaw ti rag-ona.​—2 Sam. 9:6-10; 16:1-4; 19:24-30.

Ni apostol Pablo ti sabali pay a pagarigan. Naminsan, insuratna ti maipapan iti “siit iti lasag” a masapul nga ibturanna. (2 Cor. 12:7) Mabalin a tuktukoyenna ti nabayagen nga an-annayenna, wenno dagiti tattao a mangkueskuestionar iti kinaapostolna. Aniaman kadagita, nagtultuloy ti parikut, ken masapul nga ibturanna ti sakit wenno saem a resultana.​—2 Cor. 12:9, 10.

Agpaspasar ita ti dadduma nga adipen ti Dios iti nakaro a sakit wenno saem. Iti edad a 18, nadayagnos ni Magdalena nga addaan iti systemic lupus erythematosus, maysa a sakit a ti immune system mangpataud kadagiti antibody a mangdadael kadagiti organo ti bagi. “Naklaatak,” kinunana. “Iti panaglabas ti panawen, kimmaro ti kasasaadko gapu iti problema ti thyroid ken tianko, ken agmumo ti ngiwatko.” Iti kasumbangirna, saan met unay a madlaw ti kasasaad nga ib-ibturan ni Izabela. Kinunana: “Manipud pay kinaubingko, addaanakon iti depresion. Isu a nakaro ti danagko, agsakit ti tianko, ken marigatanak nga aganges. Kas resultana, kanayon nga agkakapsutak.”

Panangakseptar iti Limitasion

Makapaupay ti sakit ken pannakabaldado. No mariknam dayta, makatulong no usigem ti agdama a kasasaadmo. Mabalin a marigatanka a mangakseptar kadagiti limitasionmo. Kuna ni Magdalena: “Kumarkaro ti sakitko. Masansan nga agkakapsutak ket diak makabangon iti iddak. Nagrigat ti agplano ta diak mapakpakadaan ti panagdikar ti sakitko. Ti pakaupayak unay ket saanen a kas iti dati ti maar-aramidak a panagserbi ken Jehova.”

Kuna ni Zbigniew: “Iti panaglabas dagiti tawen, maib-ibus ti pigsak gapu iti rheumatoid arthritis ta daddadaelenna dagiti  susuopko. No lumteg iti nakaro, diak maaramidan uray dagiti simple laeng a trabaho isu a maladingitanak unay.”

Sumagmamano a tawenen ti napalabas, nadayagnos a dumakdakkel ti tumor iti utek ni Barbara. “Dagus nga adda panagbalbaliw iti bagik,” kinunana. “Agkakapuyak, masansan nga agsakit ti ulok, ken diak maipamaysa ti konsentrasionko. Gapu kadagita, masapul nga usigek manen ti kasasaadko.”

Dagita nga indibidual ket dedikado nga adipen ni Jehova. Prioridadda nga aramiden ti pagayatanna. Naan-anay nga agtalekda iti Dios ken magunggonaanda iti tulongna.​—Prov. 3:5, 6.

No Kasano a Tumulong ni Jehova

Ditay koma ipapan a saannatay nga an-anamongan ti Dios no agsakittayo. (Un. 3:33) Nagsagaba ni Job nupay “awan pakababalawanna ken nalinteg.” (Job 1:8) Saan a susuoten ti Dios ti asinoman iti dakes a bambanag. (Sant. 1:13) Amin nga an-annayen​—a pakairamanan ti napaut a pisikal ken emosional a sakit​—ket impatawid da Adan ken Eva.​—Roma 5:12.

Ngem saan a baybay-an ni Jehova ken ni Jesus dagiti nalinteg. (Sal. 34:15) Nangruna kadagiti narigat a kasasaadtayo, maapresiartayo a ti Dios ti ‘kamang ken salindegtayo.’ (Sal. 91:2) Kasanom ngarud a mataginayon ti rag-om no agpaspasarka iti narigat a kasasaad?

Kararag: Kas kadagiti nagkauna a matalek nga adipen ti Dios, ikararagmo ti amin a pakaringgoram iti nailangitan nga Amatayo. (Sal. 55:22) Iti kasta, maaddaanka iti “talna ti Dios a mangringbaw iti isuamin a panunot.” Dayta a talna ti ‘mangsaluad iti pusom ken iti pannakabalin ti isipmo.’ (Fil. 4:6, 7) Nadaeran ni Magdalena ti nakaro a sakitna gapu iti panagpannurayna iti Dios babaen ti kararag. Kunana: “Mabang-aran ken maragsakanak no iyebkasko ken Jehova ti linaon ti pusok. Ammok itan no ania ti kaipapanan ti inaldaw a panagtalek iti Dios.”​—2 Cor. 1:3, 4.

 Kas sungbat iti kararagmo, pabilgennaka ni Jehova babaen ti nasantuan nga espirituna, ti Saona, ken dagiti kakabsat. Dimo namnamaen a simimilagro a paimbagennaka ti Dios. Ngem makapagtalekka nga ipaayannaka iti sirib ken pigsa tapno madaeram ti amin a pakarigatan. (Prov. 2:7) Patibkerennaka babaen ti panangipaayna iti “pannakabalin a nalablabes ngem ti gagangay.”​—2 Cor. 4:7.

Pamilia: Ti ayat ken kinadungngo dagiti kapamilia ket makatulong iti panangibturmo iti sakitmo. Ngem laglagipem a marigrigatan met dagiti ipatpategmo. Kas kenka, mabalin a mariknada nga awanen ti maaramidanda. Kaskasdi, didaka baybay-an uray kadagiti narigat a kasasaad. No sangsangkamaysa nga agkararagkayo, maaddaanka iti natalinaay a puso.​—Prov. 14:30.

Kuna ni Barbara maipapan kadagiti annakna a babbai ken iti dadduma pay a babbalasang iti kongregasion: “Tultulongandak iti ministerio. Mapabpabilegak gapu iti kinaregtada.” Para ken Zbigniew, napateg ti suporta ni baketna. “Asikasuenna ti kaaduan a trabaho iti balaymi. Tulongannak nga agsukat ken masansan a bagkatenna ti bagko no makigimong ken mangasabakami.”

Kapammatian: Maparegta ken maliwliwatayo no kaduatayo dagiti kapammatiantayo. Ngem kasanon no dika makagimong gapu iti sakitmo? Kuna ni Magdalena: “Sigsiguraduen ti kongregasionmi a magunggonaanak kadagiti gimong babaen ti panangirekordda kadagiti programa. Masansan a teleponuandak tapno maammuanda no ania ti maitulongda. Patulodandak pay kadagiti makaparegta a surat. Nakapagibturak gapu ta ammok a malaglagip ken maseknanda kaniak.”

Kuna ni Izabela nga agsagsagaba iti depresion: “Adu a kakongregasionmi ti kasla tatang ken nanangko nga umimdeng ken mangikagumaan a mangtarus kaniak. Isuda ti pamiliak a pakariknaak iti talna ken rag-o.”

Dagidiay agsagsagaba iti nagduduma a pakasuotan dida koma ‘iputputong ti  bagbagida.’ Imbes ketdi, makilangenda iti kongregasion. (Prov. 18:1) Iti kasta, agserbida a nabileg a pammaregta. Mabalin a mabainka a mangibaga iti kasapulam kadagiti kakabsat. Ngem apresiarenda no ibagam dayta tapno maipakitada kenka ti “di managinsisingpet a nainkabsatan a panagayat.” (1 Ped. 1:22) Apay a dimo ibaga a kasapulam ti pakiluganan a makigimong, kayatmo a makadua ida iti ministerio, wenno kayatmo nga iyebkas kadakuada ti riknam? Ngem ditay koma agkiddaw iti nalablabes. Apresiarentayo koma ti aniaman a maitulongda.

Agbalin a positibo: Masansan nga agpannuray kenka no kasano a mataginayonmo ti rag-om bayat nga ib-ibturam ti napaut a sakitmo. Negatibo ti mapanunotmo no naliday ken maup-upayka. Kuna ti Biblia: “Ti espiritu ti maysa a tao maanusanna ti saksakitenna; ngem no maipapan iti nadanar nga espiritu, siasino ti makaibtur iti dayta?”​—Prov. 18:14.

Kuna ni Magdalena: “Liklikak a panunoten dagiti problemak. Tagtagiragsakek dagiti aldaw a nasayaat ti riknak. Maparegtaak no agbasaak iti kapadasan dagidiay nakapagtalinaed a matalek iti laksid ti napaut a sakitda.” Napabileg ni Izabela ta ammona nga isu ket ay-ayaten ken ipatpateg ni Jehova. Kunana: “Mariknak a napategak ken adda rason nga agbiagak. Nagsayaat pay ti namnamak iti masanguanan.”

Kuna ni Zbigniew: “Gapu iti sakitko, nasursurok ti agpakumbaba ken agtulnog. Nagbalinak nga ad-adda a mannakaawat ken manangpakawan. Nasursurok a tagiragsaken ti panagserbik ken Jehova a diak ay-ay-ayen ti bagik. Kinapudnona, naparegtaak a rumang-ay iti naespirituan.”

Laglagipem nga ammo ni Jehova ti panagibturmo. Makipagrikna iti panagsagabam ken maseknan kenka. Dina ‘lipaten ti aramidmo ken ti ayat nga impakitam maipaay iti naganna.’ (Heb. 6:10) Laglagipem ti karina kadagiti amin nga agbuteng kenkuana: “Saankanto a pulos panawan ket saankanto a pulos baybay-an.”​—Heb. 13:5.

No kasta a maupayka, panunotem ti nagsayaat a namnama a panagbiag iti baro a lubong. Nakaas-asidegen ti tiempo a masagrapmo dagiti bendision nga iburay ti Pagarian ti Dios!

[Kahon/Dagiti Ladawan iti panid 28]

Mangasabada Uray Nakaro ti Sakitda

“Diak makapagna a maymaysa isu a no mangasabaak, kaduaennak ni baketko wenno ti dadduma a kakabsat. Mangikabesaak kadagiti presentasion ken teksto iti Biblia.”​—Jerzy, adda depekto ti panagkitana.

“Malaksid iti panangasaba babaen ti telepono, agaramidak kadagiti surat ken regular a makisinnuratak kadagiti interesado. No mayospitalak, kanayon nga ikabilko iti abay ti kamak ti Biblia ken dagiti publikasion. Nakatulong dayta tapno mairugik ti adu a nasayaat a saritaan.”​—Magdalena, addaan iti systemic lupus erythematosus.

“Maragragsakanak a mangasaba iti binalaybalay ngem no agkakapsutak, mangasabaak babaen ti telepono.”​—Izabela, addaan iti clinical depression.

“Maragragsakanak a sumarungkar ken tumulong kadagiti iyad-adalak iti Biblia. No nasalun-atak, kaykayatko ti mangasaba iti binalaybalay.”​—Barbara, adda tumor iti utekna.

“Nalag-an laeng ti bagko a pagkargaak iti magasin. Mangasabaak agingga a kabaelak nga ibturan ti ut-ot dagiti susuopko.”​—Zbigniew, addaan iti rheumatoid arthritis.

[Ladawan iti panid 30]

Agpada a makapabileg dagiti ubbing ken nataengan