Situtured nga Impakaammoda ti Sao ti Dios!

Kinatured a mangsango iti ibubusor. Dayta a galad ti impakita dagiti pudno a Kristiano kas mabasatayo kadagiti publikasion a Naan-anay nga Ikasabam ti Pagarian ti Dios ken Dagiti Saksi ni Jehova​—Manangiwaragawag iti Pagarian ti Dios. Kas kadagiti kapammatiantayo idi umuna a siglo, ikararagtayo ti espiritu ken tulong ni Jehova tapno situtured a maipakaammotayo ti saona.​—Ara. 4:23-31.

Kastoy ti insurat ti maysa a kabsat maipapan iti trabahotayo a panangasaba bayat ti umuna a gubat sangalubongan: “Aktibo nga iwarwaras dagiti adipen ti Dios ti maikapito a tomo ti Studies in the Scriptures a napauluan iti The Finished Mystery. Dayta pay laeng ti kaaduan idi a naiwaras a libro. Naipablaak idi 1918 ti Kingdom News No. 1. Simmaruno ti Kingdom News No. 2 a nangilawlawag no apay a linapdan dagiti autoridad a maiwaras ti The Finished Mystery. Sinaruno met dayta ti Kingdom News No. 3. Dagita a publikasion ket sisasaknap nga inwaras dagiti matalek a napulotan. Agkasapulan iti pammati ken kinatured ti panagiwaras kadagiti Kingdom News.”

Masansanay ita iti ministerio dagiti kabbaro nga agibumbunannag iti Pagarian ngem saan a kanayon a kasta idi. Malagip ti maysa a Polish a kabsat nga agnanaed iti United States ti damo a kapadasanna a nangasaba idi 1922. Kunana: “Uray diak ammo ti agipaima iti literatura ken diak unay makasao iti Ingles, nagtuktokak iti klinika ti maysa a doktor. Linuktan dayta ti maysa a nars. Diak pulos malipatan dayta ta agpada a magagaran ken maamakak. Bayat a lukluktak ti bagko, naiburais amin a libro iti saka ti nars. Diak malagipen no ania ti naibagak ngem nakaipaimaak iti publikasion. Idi nakapanawakon, nariknak a timmuredak ken binendisionannak ni Jehova. Adu a bokleta ti naipaimak iti daydi nga aldaw iti dayta a lugar ti negosio.”

“Idi agarup 1933, adu a kakabsat ti agus-usar iti sound car a mangiwaragawag iti mensahe ti Pagarian,” kuna ti maysa a kabsat a babai. Naminsan, kaduana ti agassawa a Saksi a nangasaba iti kabambantayan a paset ti California, U.S.A. Malagipna: “Impan ti kabsat a lalaki ti sound car iti nangatngato a paset ti bantay, ket nagtalinaedkami iti ili iti baba. Idi pinatokarna ti nairekord a mensahe, kasla naggapu dayta idiay langit. Sinapul dagiti umili ti kabsat ngem dida nasarakan. Idi nalpas ti tokar, kinasabaanmi dagiti tattao. Dua pay a sound car ti nakikaduaak ket talaga a saan a kayat ti kaaduan a tattao ti dumngeg. Ngem awan mabalinanda ta silalawag a mangngeg kadagiti pagtaenganda ti mensahe. Kanayon a mapaneknekanmi nga usaren ni Jehova ti umiso a pamay-an iti umiso a tiempo. Nupay agkasapulan dayta iti tured,  kanayon a naibanag ti panggepna, ken naidaydayaw ti nagan ni Jehova.”

Bayat ti dekada ’30 ken ti rugrugi ti dekada ’40, nausar iti ministerio dagiti ponograpo ken nairekord a naibatay-Biblia a palawag. Malagip ti maysa a kabsat a babai: “Maysa nga agtutubo a babai ti nangusar iti ponograpo iti panangasabana iti binalaybalay. Bayat a patpatokarenna ti nairekord a mensahe iti maysa a balay, napalalo ti pungtot ti bumalay a lalaki nga uray la kinugtaranna ti ponograpo. Natnag dayta manipud balkon ngem saan a nadadael. Tallo a lallaki a mangal-aldaw iti nakaparking a trak ti nakakita iti napasamak. Inawisda ti kabsat a mangipangngeg iti nairekord a mensahe, ken nangalada iti literatura. Dayta ti subad ti di nasayaat a pannakatratona.” Talaga a kasapulan ti tured tapno maibturan dagita a suot.

Innayon ti isu met la a kabsat: “Malagipko idi nangrugi ti panagipaima iti magasin iti igid ti kalsada idi 1940. Sakbay dayta, agmartsa dagiti kakabsat iti igid ti kalsada nga adda plakardda a nakaisuratan ti ‘Religion Is a Snare and a Racket’ (Ti Relihion ket Maysa a Silo ken Pananggundaway) ken ‘Serve God and Christ the King’ (Agserbikayo iti Dios ken ni Kristo nga Ari). Bayat dayta, agiwaraskami kadagiti libre a tract kadagiti tattao. Agkasapulan iti tured ti pannakiraman kadagita a pamay-an ti panangasaba ngem naitungpalda ti panggep a panangipakaammo iti publiko iti nagan ni Jehova ken iti ilina.”

Kuna ti maysa a kabsat a babai: “Nakarigrigat ti agipaima iti magasin iti babassit nga ili, nangruna no nakaro ti ibubusor kadagiti Saksi. . . . Talaga nga agkasapulan iti tured ti panagtakder iti kanto a nakaiggem kadagiti magasin ken mangipukkaw iti islogan a naisingasing nga usaren. Ngem dandani Sinabado a makiramankami. Adda dagiti nasingpet a tattao. Ngem no dadduma, adda met dagiti naranggas a tattao a mangaribungbong kadakami. Pasaray libasanmi ida tapno dikam madangran.”

Nupay maidaddadanes dagiti Saksi ni Jehova bayat ti Gubat Sangalubongan II, situtured nga intungpalda ti ministerioda. Iti 43 nga aldaw a kampania manipud Disiembre 1, 1940, agingga iti Enero 12, 1941, agarup 50,000 nga agibumbunannag iti United States ti nakaiwaras iti dandani 8 a milion a bokleta.

Malaglagip pay laeng ti adu a nabayagen nga agserserbi iti Dios a dagiti nakaipasanguanda a karit ket agkasapulan iti kinatured. Dadduma ti makalagip nga adu a tawen a kanayon nga ibagbagada, ‘Mangasabatayo a sireregta agingga iti panungpalan,’ a mangipakita iti kinaturedda. Ditay ammo no ania pay a pamay-an ti usarentayto a mangipakaammo iti inted-Dios a mensahe sakbay nga agpatingga ti dakes a sistema. Ngem iti tulong ni Jehova, maitultuloytayo a maipakaammo ti saona buyogen ti pammati ken kinatured.

[Blurb iti panid 9]

Kanayon a kasapulan ti kinatured tapno maikasaba ti Pagarian