Taginayonenyo ti Positibo nga Espiritu ti Kongregasion

“Ti di kaikarian a kinamanangngaasi ni Apo Jesu-Kristo maadda koma iti espiritu nga ipakpakitayo.”​—FIL. 4:23.

ANIA TI MAITULONGTAYO TAPNO MATAGINAYON TI POSITIBO NGA ESPIRITU ITI KONGREGASION . . .

no makilangentayo kadagiti kakabsat?

no naregtatayo iti ministerio?

no ibagatayo kadagiti panglakayen ti nadagsen a basol?

1. Apay a nakomendaran dagiti kongregasion ti Filipos ken Tiatira?

NAPANGLAW dagiti Kristiano idiay Filipos idi umuna a siglo. Ngem naparabur ken mapagulidanan ti panagayatda kadagiti kapammatianda. (Fil. 1:3-5, 9; 4:15, 16) Isu nga idi inngudo ni apostol Pablo ti suratna kadakuada, kinunana: “Ti di kaikarian a kinamanangngaasi ni Apo Jesu-Kristo maadda koma iti espiritu nga ipakpakitayo.” (Fil. 4:23) Kasta met la ti kababalin dagiti Kristiano idiay Tiatira isu a kinuna kadakuada ti naipadayag a ni Jesu-Kristo: “Ammok dagiti aramidmo, ken ti ayat ken pammati ken ministerio ken panagibturmo, ket dagiti aramidmo a naud-udi ad-aduda ngem dagidiay immun-una.”​—Apoc. 2:19.

2. Ania ti pasettayo iti espiritu nga ipakpakita ti kongregasiontayo?

² Adda espiritu nga ipakpakita ita ti tunggal kongregasion dagiti Saksi ni Jehova. Pagaammo a naasi ken naayat ti dadduma a kongregasion. Adda met dagiti naisangsangayan ti kinaregtada a sumuporta iti panangasaba ken dakkel ti panangipategda iti amin-tiempo a ministerio. No patanoren ti tunggal maysa kadatayo ti positibo a kababalin, makatulongtayo iti irarang-ay ken panagkaykaysa ti kongregasion. (1 Cor. 1:10) Ngem no negatibo ti kababalintayo, mabalin nga agbanag dayta iti panagtuglep iti naespirituan, kinaawan regta iti ministerio, ken panangpanuynoy pay ketdi iti dakes nga aramid iti kongregasion. (1 Cor. 5:1; Apoc. 3:15, 16) Ania nga espiritu ti ipakpakita ti kongregasionyo? Ania ti maitulongmo tapno mataginayon ti positibo nga espiritu ti kongregasionyo?

 IPAREGTA TI POSITIBO NGA ESPIRITU

3, 4. Kasanotayo a ‘maidaydayaw ni Jehova iti dakkel a kongregasion’?

³ Inkanta ti salmista: “Idayawkanto [Jehova] iti dakkel a kongregasion; iti tengnga ti ili a nakaad-adu idaydayawkanto.” (Sal. 35:18) Ti salmista indaydayawna ni Jehova a kaduana ti dadduma pay nga adipen ti Dios. Dagiti linawas a gimongtayo, kas iti Panagadal iti Pagwanawanan, ket nagsayaat a gundaway a maipakitatayo ti kinaregta ken pammatitayo babaen ti panagkomentotayo. Nasayaat nga isaludsodtayo iti bagitayo: ‘Gunggundawayak kadi ti agkomento kadagiti gimong? Agsagsaganaak kadi a naimbag tapno agbalin a makaparegta dagiti komentok? Kas ulo ti pamilia, tultulongak kadi dagiti annakko nga agisagana a nasaksakbay kadagiti komentoda ken sursuruak ida a sumungbat iti bukodda a sasao?’

⁴ Innaig ni salmista David ti panagkantatayo iti kinatibker ti pusotayo, ti determinasiontayo a mangaramid iti umiso. “Ti pusok natibker, O Dios,” kinunana, “ti pusok natibker. Agkantaakto ken mangipaayak iti samiweng.” (Sal. 57:7) Dagiti kankantaentayo kadagiti gimong mangipaayda iti nagsayaat a gundaway tapno ‘kantaan ken ipaayantayo iti samiweng’ ni Jehova buyogen ti natibker a puso. No ditay ammo ti dadduma a kanta, apay a ditay praktisen dagita bayat ti Panagdaydayaw ti Pamiliatayo? Determinadotayo koma a ‘mangkanta ken Jehova iti intero a panagbiagtayo ken mangipaay iti samiweng bayat a sibibiagtayo.’​—Sal. 104:33.

5, 6. Kasanotayo a maipakita ti kinamanagpadagus ken kinaparabur iti sabsabali, ken ania ti epekto dayta iti kongregasion?

⁵ Maiparegtatayo met ti ayat iti kongregasion babaen ti kinamanagpadagustayo. Iti maudi a kapitulo ti surat ni Pablo kadagiti Hebreo, imbalakadna pay: “Agtultuloy koma ti nainkabsatan nga ayatyo. Dikay lipatan ti kinamanagpadagus.” (Heb. 13:1, 2) Ipakpakitatayo ti kinamanagpadagustayo kadagiti agdaldaliasat a manangaywan ken iti assawada wenno kadagiti agserserbi iti amin-tiempo iti kongregasion no awisentay ida iti maysa a pannangan. Mabalintayo met nga awisen sagpaminsan dagiti balo, pamilia nga addaan iti agsolsolo a nagannak, wenno dadduma pay a makiraman iti panagdaydayaw ti pamiliatayo wenno iti maysa a pannangan.

 ⁶ Imbilin ni Pablo ken ni Timoteo a paregtaenna ti sabsabali nga “agaramidda iti naimbag, nga agbalinda a nabaknang iti nasayaat nga ar-aramid, nga agbalinda a naparabur, sisasagana a mangiranud, a sitatalged nga agurnongda maipaay iti bagbagida iti nasayaat a pamuon maipaay iti masanguanan, tapno mapetpetanda a sititibker ti pudpudno a biag.” (1 Tim. 6:17-19) Iparparegta ni Pablo kadagiti kapammatianna a sursuruenda ti agbalin a naparabur. Maaramidtayo dayta uray no narigat ti biag. Kas pagarigan, no adda lugantayo, mabalintayo nga ilugan dagiti kakabsattayo a mapan iti pangasabaan wenno kadagiti gimong. Ania met ti maaramidan dagidiay kakabsat a matultulongan? Iparparegtada ti positibo nga espiritu iti kongregasion no ipakitada ti panagyamanda, nalabit babaen ti panangtedda iti kantidad a kabaelanda para iti gasolina ken pannakamantener ti lugan. Kanayonanna, saan kadi a maipariknatayo kadagiti kakabsat a kasapulan ken ipatpategtayo ida no ad-adu ti tiempotayo kadakuada? No aduantayo iti naimbag nga aramid “kadagidiay nainaig kadatayo iti pammati” ken sidadaan nga iranudtayo ti tiempo ken ik-ikutantayo, saan la nga umuneg ti panagayattayo kadakuada no di ket makatulongtayo pay tapno maadda ti positibo nga espiritu iti kongregasion.​—Gal. 6:10.

7. Kasano a makatulong ti panangtaginayon iti kompidensial a bambanag tapno maadda ti positibo nga espiritu iti kongregasion?

⁷ Usigentayo ti sabali pay a mangpabileg iti ayattayo kadagiti kapammatiantayo: ti pannakigayyem ken panangtaginayon iti kompidensial a banag. (Basaen ti Proverbio 18:24.) Dagiti pudno nga aggayyem pagtalinaedenda a kompidensial dagiti personal a banag. No iyebkas kadatayo dagiti kakabsat ti personal a kapanunotan ken rikriknada ken agtalekda a saan a maammuan dayta ti sabsabali, ad-adda a bumileg ti ayattayo iti maysa ken maysa. Mapagtalkantayo koma a gayyem babaen ti ditay panangibaga kadagiti kompidensial a banag. Iti kasta, matulongantayo ti kongregasion nga agbalin a kas maysa a naayat a pamilia.​—Prov. 20:19.

PANAGBALIN A NAREGTA ITI MINISTERIO

8. Ania ti naibalakad kadagiti taga-Laodicea, ken apay?

⁸ Kinuna ni Jesus iti kongregasion ti Laodicea: “Ammok dagiti aramidmo, a saanka a nalamiis wenno uray napudot. Kayatko a nalamiiska koma wenno no saan napudotka. Gapuna, agsipud ta apaganem-emka ket saanka a napudot wenno uray nalamiis, isarwakanto manipud iti ngiwatko.” (Apoc. 3:15, 16) Saan a naregta iti ministerio dagiti taga-Laodicea. Gapu iti dayta, mabalin a naapektaran ti relasionda kadagiti kapammatianda. Isu a sidudungngo  a binalakadan ida ni Jesus: “Amin dagidiay dungdungnguek tubngarek ken disiplinaek. Gapuna agregta ken agbabawika.”​—Apoc. 3:19.

9. Ania ti epektona iti kongregasion ti kinaregtatayo iti ministerio?

⁹ Tapno mataginayon ti nasayaat ken positibo nga espiritu iti kongregasion, masapul a naregtatayo iti ministerio. Naorganisar ti kongregasion tapno biroken dagiti marakarnero a tattao iti teritoriatayo ken isuro kadakuada ti kinapudno. Isu a masapul a sireregtatayo a makiraman iti trabaho a panagaramid iti adalan, kas ken Jesus. (Mat. 28:19, 20; Luc. 4:43) No naregregtatayo iti ministerio, ad-adda nga agkaykaysatayo kas ‘katrabahuan ti Dios.’ (1 Cor. 3:9) No makitatayo dagiti kakabsattayo a mangidepdepensa iti pammatida iti teritoria ken mangap-apresiar kadagiti naespirituan a bambanag, ad-adda nga ipateg ken raementayo ida. Kasta met, ti “abagan-abaga” a panagserbitayo iti ministerio ket agresulta iti panagkaykaysa ti kongregasion.​—Basaen ti Sofonias 3:9.

10. Ania ti epektona iti kongregasion no parang-ayentayo ti kalidad ti ministeriotayo?

¹⁰ Nasayaat met ti epektona iti sabsabali ti panangikagumaantayo a mangparang-ay iti kalidad ti ministeriotayo. No mas interesadotayo kadagiti tattao, ken ikagkagumaantayo a danonen ti pusoda, ad-adda a rumegtatayo iti ministerio. (Mat. 9:36, 37) Maparegta ti kakaduatayo gapu iti kinaregtatayo. Idi imbaon ni Jesus dagiti adalanna a mangasaba, saan a saggaysa no di ket sagdudua. (Luc. 10:1) Gapu iti dayta, saanda laeng a napabileg ken nasanay no di ket rimmegtada pay iti ministerio. Ap-apresiarentayo kadi ti pannakikaduatayo kadagiti naregta nga agibumbunannag iti Pagarian? Ti kinaregtada tulongandatayo nga agtultuloy a mangasaba.​—Roma 1:12.

DITAY AGREKLAMO KEN AGARAMID ITI DAKES

11. Ania nga espiritu ti napatanor ti dadduma nga Israelita idi kaaldawan ni Moises, ken ania ti epektona kadakuada?

¹¹ Sumagmamano pay la a lawas dagiti Israelita kas baro a nasion, nangrugidan nga agreklamo ken saandan a kontento. Nagresulta dayta iti panagrebelde ken Jehova ken kadagiti pannakabagina. (Ex. 16:1, 2) Manmano laeng kadagidiay Israelita a pimmanaw idiay Egipto ti nakastrek iti Naikari a Daga. Uray ni Moises saan a nakastrek gapu iti reaksionna iti dakes a kababalin dagiti Israelita! (Deut. 32:48-52) Kasanotay a maliklikan ti dakes a kababalin?

12. Kasanotayo a maliklikan ti agbalin a reklamador?

¹² Liklikantayo ti agbalin a reklamador. Nupay makatulong ti kinapakumbaba ken panagraem kadagidiay addaan iti autoridad, masapul a pilientayo a naimbag dagiti kakaduatayo. Dakes ti ibungana no di umiso ti paglinglingayantayo wenno adu unay ti tiempotayo a makikadua kadagiti katrabahuan wenno kaeskuelaantayo nga awanan panagraem kadagiti nalinteg a prinsipio. Nainsiriban a limitarantayo ti makikadua kadagidiay reklamador wenno managwaywayas.​—Prov. 13:20.

13. Ania ti dakes nga epekto ti panagreklamo iti naespirituan nga irarang-ay ti kongregasion?

¹³ Ti panagreklamo dadaelenna ti naespirituan nga irarang-ay ti sabsabali. Mabalin a dadaelenna pay ti talna ken panagkaykaysa ti kongregasion. Ken saan laeng a makapasakit ti panagreklamo maibusor iti maysa a kabsat no di ket agresulta pay kadagiti basol kas iti panangpardaya ken panangumsi. (Lev. 19:16; 1 Cor. 5:1) Idi umuna a siglo, adda dagidiay managreklamo iti kongregasion a “saanda nga ikankano ti kinaapo ken agsasaoda a sibabassawang  kadagidiay nadayag.” (Jud. 8, 16) Sigurado a saan nga inanamongan ti Dios ti panagreklamo maibusor kadagiti mangidadaulo iti kongregasion.

14, 15. (a) Ania ti epektona iti intero a kongregasion no ipalubostayo nga agtultuloy ti dakes nga aramid? (b) Ania ti aramidentayo no naammuantayo nga adda basol nga ilimlimed ti maysa?

¹⁴ Kasanon no maammuam nga adda basol nga ilimlimed ti maysa, kas koma iti nalabes a panaginum iti arak, panagbuya iti pornograpia, wenno imoral a panagbiag? (Efe. 5:11, 12) No kalubantayo dayta a nadagsen a basol, malapdan ti panagayus ti nasantuan nga espiritu ni Jehova ken agpeggad ti talna ti intero a kongregasion. (Gal. 5:19-23) Kas kadagiti nagkauna a Kristiano idiay Corinto a nangikkat iti kinadakes, nasken met nga ikkatentayo ita iti kongregasion ti aniaman a kinadakes tapno mataginayon ti nasalun-at ken positibo nga espiritu. Ania ti maitulongmo tapno mataginayon ti talna iti kongregasion?

¹⁵ Kas nadakamaten, napateg a taginayonen ti bambanag a kompidensial, nangruna no ibaga kadatayo ti sabsabali ti rikrikna ken kapanunotanda. Makapasakit ken di umiso nga iwaras ti kompidensial nga impormasion maipapan iti maysa! Ngem no adda nakaaramid iti nadagsen a basol, masapul a maammuan dayta dagiti panglakayen iti kongregasion ta isuda ti addaan iti Nakristianuan a responsabilidad a mangasikaso iti dayta. (Basaen ti Levitico 5:1.) Isu a no adda ammotayo a kabsat a nakaaramid iti nadagsen a basol, paregtaentayo a makisarita ken agpatulong kadagiti panglakayen. (Sant. 5:13-15) Ngem no dina aramiden iti kabiitan a tiempo, datayon ti mangibaga iti dayta.

16. Kasano a makatulong iti panangtaginayon iti positibo nga espiritu iti kongregasion ti panangibagatayo kadagiti nadagsen a basol?

¹⁶ Ti kongregasion Kristiano ket pagkamangan iti naespirituan. Masalaknibantayo dayta babaen ti panangibagatayo kadagiti nadagsen a basol. No matulongan dagiti panglakayen ti nakabasol a makaamiris iti kinadagsen ti basolna ken awatenna ti disiplina buyogen ti panagbabawi, saanen nga agpeggad ti kongregasion. Ngem kasanon no saan nga agbabawi ken dina awaten ti naayat a balakad dagiti panglakayen? Isu ket mailaksid iti kongregasion. Iti kasta, ‘madadael,’ wenno maikkat, ti dakes nga impluensia ken mataginayon ti positibo nga espiritu iti kongregasion. (Basaen ti 1 Corinto 5:5.) Tapno maaramid dayta, masapul nga agtignaytayo amin, makikooperartayo iti bagi dagiti panglakayen, ken salaknibantayo dagiti kapammatiantayo.

IPAREGTA TI “PANAGMAYMAYSA TI ESPIRITU”

17, 18. Ania ti makatulong kadatayo a ‘mangsalimetmet iti panagmaymaysa ti espiritu’?

¹⁷ Babaen ti ‘panangipamaysada iti bagbagida iti sursuro dagiti apostol,’ nakatulong dagiti nagkauna a pasurot ni Jesus iti panagkaykaysa ti kongregasion. (Ara. 2:42) Ipatpategda ti Nainkasuratan a balakad ken panangiwanwan dagiti lallakay. Gapu iti pannakikooperar dagiti panglakayen ita iti klase matalek ken masirib nga adipen, maparegta ken matulongan ti amin a kameng ti kongregasion nga agtalinaed nga agkaykaysa. (1 Cor. 1:10) No agtulnogtayo iti naibatay-Biblia nga instruksion ti organisasion ni Jehova ken iti panangiwanwan dagiti panglakayen, ipakpakitatayo a ‘sipapasnek nga ikagkagumaantayo a salimetmetan ti panagmaymaysa ti espiritu iti mamagkaykaysa a singgalut ti talna.’​—Efe. 4:3.

¹⁸ Sapay koma ta aramidentayo ti amin a kabaelantayo a makitinnulong tapno mataginayon ti positibo nga espiritu iti kongregasion. Iti kasta, masiguradotayo a ti ‘di kaikarian a kinamanangngaasi ni Apo Jesu-Kristo maadda iti espiritu nga ipakpakitatayo.’​—Fil. 4:23.

[Salsaludsod]

[Ladawan iti panid 19]

Iparparegtam kadi ti positibo nga espiritu babaen ti panangisaganam kadagiti makagunggona a komento?

[Ladawan iti panid 20]

Iparparegtam ti positibo nga espiritu babaen ti panagbalinmo a pamiliar kadagiti kantatayo