Kas Insalaysay ni Lois Didur

Namin-anon a naibagam, ‘No la koma maibabawik ti desision nga inaramidko?’ Ngem kalpasan ti 50 a tawenko iti amin-tiempo a serbisio, awan pay napanunotko a di nasayaat a resulta ti kaaddak iti makannawan nga ima ni Jehova. Palubosandak a mangestoria no apay a naibagak dayta.

NAIPASNGAYAK idi 1939 ken dimmakkelkami nga agkakabsat iti probinsia ti Saskatchewan, Canada. Limakami a babbai ken maysa a lalaki. Naragsak ti biagmi iti katantanapan. Maysa nga aldaw, simmarungkar dagiti Saksi ni Jehova ken tatangko, ket dinamagko kadakuada no adda nagan ti Dios. Impabasada ti nagan a Jehova iti Salmo 83:18. Dayta ti nangtignay kaniak a mangammo ti ad-adu pay maipapan iti Dios ken iti Saona.

Kadagidi a tiempo, agkakadua nga ageskuela dagiti ubbing iti away iti maymaysa a kuarto manipud umuna agingga iti maikawalo a grado. Agsakayda kadagiti kabalio wenno magnada iti adu a kilometro no mapanda ageskuela. Dagiti pamilia iti distrito ti mangipaay kadagiti kasapulan ti mannursuro. Makatawen a batang ti pamiliami a padagusen ti baro a mannursuro a ni John Didur.

Diak ammo a daytoy nga agkabannuag a lalaki ket interesado unay iti Sao ti Dios. Naminsan, ap-apresiarek ti komunismo ken sosialismo a supsuportaran ni tatangko. Ngem siaalumamay a kinuna ni John: “Awan ti karbengan ti tao a mangituray iti padana a tao. Ti laeng Dios ti addaan karbengan.” Nagresulta dayta iti adu a makapainteres a saritaan.

Naipasngay ni John idi 1931, isu nga ammona dagiti pakarigatan nga epekto ti gubat. Idi bimtak ti Gubat ti Korea idi 1950, pinagsaludsodan ni John ti nadumaduma a lider ti relihion maipapan ti pannakiramanda iti gubat. Aminda ti nagkuna a mabalin a makiraman dagiti Kristiano iti gubat. Idi agangay, dinamagna met dayta kadagiti Saksi ni Jehova.  Impakitada manipud Biblia ti takder dagiti nagkauna a Kristiano maipapan iti gubat. Nabautisaran ni John idi 1955. Nabautisaranak met iti simmaganad a tawen. Agpada a kayatmi nga usaren ti biag ken pigsami nga agserbi ken Jehova. (Sal. 37:3, 4) Nagkasarkami ken John idi Hulio 1957.

Masansan a mairana iti kombension ti anibersariomi. Maragragsakankami a makikadua iti rinibu a tattao a mangraraem iti panagasawa. Ti damo nga internasional a kombension a tinabunuanmi ket idi 1958. Limakami a nagbiahe iti kotse manipud Saskatchewan a nagturong idiay New York City. Makalawas a nagbiahekami iti aldaw sa maturogkami iti tolda no iti rabii. Anian a ragsakmi idi a ti naam-ammomi a kabsat iti Bethlehem, Pennsylvania, pinadagusnakami iti pagtaenganda iti dayta a rabii! Gapu iti kinaimbagna, nakadanonkami iti New York City a nadalus ken nadalimanek. Iti dayta a dakkel a kombension, naipaganetget kadakami a nakaragragsak ti agserbi ken Jehova! Kas iti insurat ti salmista, “adda pakaay-aywan iti makannawan nga imam iti agnanayon.”​—Sal. 16:11.

PANAGPAYUNIR

Makatawen kalpasanna, idi 1959, nagpayunirkami idiay Saskatchewan. Nagnaedkami iti bassit a treyler a balay iti tuktok ti maysa a turod. Manipud iti dayta, adu a kilometro ti matannawaganmi ken dadduma kadagita ti teritoriami.

Maysa nga aldaw, nakaawatkami iti makaparagsak a surat manipud sanga nga opisina. Nagdardarasak a napan ken John a mangtartarimaan iti traktor. Aw-awisendakami nga agbalin nga special pioneer idiay Red Lake, Ontario. Gapu ta dimi ammo no sadino daytoy a lugar, dagus a kinitami iti mapa.

Anian a naiduma daytoy a lugar iti nawayang a tanap! Mapadasanmi itan ti agnaed iti lugar nga addaan iti nalawa a kabakiran ken babassit nga ili iti asideg ti pagminasan iti balitok. Iti umuna nga aldawmi sadiay, nagbirokkami iti pagdagusan. Adda balasitang a nakangngeg iti pannakisaritami iti kaarrubada. Nagtartaray a nagawid ket imbagana dayta ken nanangna. Siaayat a pinadagusnakami iti dayta a rabii. Naturogkami iti kama nga adda iti sirok ti balay a daga ti diding ken suelona. Kabigatanna, nakasarakkami iti dua ti kuartona a balay a naaramid iti kayo. Awan ti gripo ken mueblesna ngem adda pagpapudotan a galba a masungrodan iti kayo. Gimmatangkami iti sumagmamano nga alikamen iti paglakuan iti segunda mano ket kontentokamin kadagita.

Ti kaasitgan a kongregasion ket 130 a milia (209 km) ti kaadayona. Taga-Europe ti adu a minero. Nagkiddawda iti Biblia iti bukodda a lenguahe. Di nagbayag, naaddaankami iti 30 a narang-ay nga iyad-adalan iti Biblia. Iti uneg ti innem a bulan, nabuangay ti maysa a bassit a kongregasion.

Ti asawa ti maysa a babai nga iyad-adalanmi tineleponuanna ti padida tapno umayna kombinsiren ni baketna a di umiso ti isursuromi. Idi simmangpet ti padi, kinunana a masapul koma nga isuromi ti doktrina a Trinidad. Innala ti babai ti Bibliada a Katoliko ket kiniddawna iti padi a paneknekanna ti ibagbagana. Impuruakna ti Biblia iti lamisaan sa imbagana nga awan ti masapul a paneknekanna. Idi pumanawen, kinunana iti pagsasao a Ukrainian a paruarendakamin ket didakamin paspastreken. Ngem dina ammo a matarusan ni John ti Ukrainian!

Di nagbayag, pimmanawkami iti Red Lake gapu ta masanay ni John kas manangaywan iti sirkito. Ngem agarup makatawen kalpasanna, nangipaay ni John iti palawag ti bautismo iti maysa a kombension. Maysa dayta a lalaki kadagiti kandidato ti bautismo! Natignay a makipagadal iti Biblia gapu iti inaramid ti padi.

 OKUPADO ITI TRABAHO A PANAGDALIASAT

Iti panagserbimi iti sirkito, maragragsakankami a makipagnaed iti nagduduma a pamilia. Simmingedkami kadagidiay nangpadagus ken timmulong kadakami. Naminsan bayat ti panawen ti lam-ek, nagdaguskami iti makinngato a siled nga awan ti paginuduanna. Parbangon pay laeng, mapuotanmin ti maysa a kabsat a baket nga agin-inayad a sumrek iti kuartomi tapno pasgedanna ti bassit a paginuduan. Kalpasanna, agsubli nga adda iggemna a palanggana ken napudot a danum tapno makapagsaganakamin iti dayta nga aldaw. Adu ti nasursurok iti kinaalumamayna.

Ad-adda a simmingedak ken Jehova gapu iti trabaho a panagdaliasat. Karaman iti maysa a sirkito ti Alberta ti pagminasan nga ili ti Far North, a pagnanaedan ti maysa a kabsat a babai. Kasano nga ay-aywanan ti organisasion ni Jehova dayta a kabsat nga adda iti nasulinek a lugar? Kada innem a bulan, ageroplanokami a mapan iti lugarda ket makalawas a kaduaenmi a mangasaba ken aggimong kas iti ar-aramidenmi kadagiti kongregasion iti dakkel a siudad. Ipalagip dayta ti nadungngo a panangaywan ni Jehova iti tunggal adipenna.

Nagtultuloy ti komunikasionmi iti adu a nangpadagus kadakami. Dayta ti nangipalagip iti umuna a regalo kaniak ni John​—maysa a namaris a kahon a napno iti papel a pagsuratan. Babaen kadagita, tinagiragsakmi ti nakisinsinnurat kadagiti gagayyemmi. Iduldulinko pay laeng dayta a kahon ti surat.

Bayat ti panagserbimi iti maysa a sirkito idiay Toronto, adda kabsat manipud Bethel iti Canada a nagtelepono kadakami. Dinamagna no kayatmi ti agserbi iti Bethel. Kaano a kayatna a maammuan ti sungbat? “Kabigatanna no posible!” Ket naawatna ti sungbatmi.

PANAGSERBI ITI BETHEL

Nadumaduma nga aspeto ti kinaimbag ni Jehova ti matagiragsakmi tunggal agbaliw ti pribilehiomi. Nagtultuloy dayta uray idi immakarkami iti Bethel idi 1977. Gapu iti pannakilangenmi iti dadduma a napulotan, saan laeng a ti nagduduma a personalidadda ti nakitami no di pay ket ti nauneg a panagraemda iti Sao ti Dios.

Magustuak ti baro a rutina iti Bethel. Kas pagarigan, addan iti drawer ti badomi imbes nga iti maleta, ken naikamengkamin iti maysa a kongregasion. Malaksid iti trabahok, maragragsakanak met a mangipasiar kadagiti bumisita iti Bethel. Ilawlawagko kadakuada ti trabaho iti Bethel, denggek dagiti komentoda, ken sungbatak dagiti saludsodda.

Napartak ti panaglabas dagiti tawen. Idi 1997, naimbitaran ni John a tumabuno iti School for Branch Committee Members iti Patterson, New York. Kalpasanna, dinamagda no kayatmi ti umakar idiay Ukraine. Imparegtada a panunotenmi a naimbag ken ikararagmi dayta. Iti dayta met la a rabii, nakapagdesisionkamin a mapan.

SABALI PAY A PANAGBALBALIW​—UKRAINE

Natabunuanmi ti dadakkel nga internasional a kombension idiay St. Petersburg, Russia, idi 1992, ken idiay Kiev, Ukraine, idi 1993. Dagitoy ti nangpasinged kadakami kadagiti kakabsat iti Eastern Europe. Ti baro a pagtaenganmi idiay Lviv, Ukraine ket iti maikadua a kadsaaran ti daanen a balay. Matannawagan iti tawa ti paraangan nga addaan iti bassit a hardin, maysa a dakkel a nalabaga a kawitan, ken pangen dagiti upa. Panagriknak, kasla addaak iti away ti Saskatchewan. Sangapulo ket duakami iti dayta a balay. Inaldaw a masapakami a mapan iti siudad tapno agtrabaho iti Bethel.

Ania ti nariknami bayat ti kaaddami iti Ukraine? Mamagpakumbaba ti pannakilangen iti adu a kakabsat a nakapasar kadagiti pakasuotan,  pannakaiparit, ken pannakaibalud. Ngem nagtalinaed a natibker ti pammatida. No komendaranmi ida, kunada, “Inaramidmi daydiay para ken Jehova.” Dida pulos narikna a nabaybay-anda. Uray ita, no agyamanka iti maysa gapu iti kinaimbagna, isungbatna, “Ni Jehova ti pagyamanam,” kas panangbigbigna iti Gubuayan ti amin a naimbag a bambanag.

Ditoy Ukraine, adu a kakabsat ti magmagna a mapan makigimong isu nga adda panawenda nga agpipinnaregta. Magmagnada iti maysa nga oras wenno nasursurok pay. Adda nasurok a 50 a kongregasion iti Lviv, 21 kadagitoy ti agus-usar iti dakkel a Kingdom Hall complex. No iti Domingo, nakaay-ayat a buyaen ti adu a kakabsat nga agsasaruno a sumangpet a makigimong.

Nalakami la a maipasig ti bagbagimi kadagiti kakabsat a naalumamay ken sidadaan a mangasikaso iti sabsabali. Agingga ita, no adda diak maawatan a sasao, nakan-anusda a mangilawlawag. Masansan a makita dayta iti ekspresion ti rupada.

Napaneknekak ti pudno a panagtalek iti panagkakabsattayo bayat ti 2003 nga internasional a kombension idiay Kiev. Idi addakami iti adu ti taona a pagurayan ti tren iti uneg ti daga, immasideg ti maysa nga ubing a babai ket sikakalma a kinunana, “Nayaw-awanak. Diak masarakan ni lolak.” Ammona a Saksikami gapu ta nakitana dagiti badge card-mi. Nakaturtured ta saan man la a nagsangit. Ti kaduami nga asawa ti manangaywan iti sirkito sidudungngo nga intulodna ti ubing iti Lost and Found Department iti estadium. Di nagbayag, nagkitada met laeng ken lolana. Natukay ti riknak iti naisangsangayan a panagtalek daytoy nga ubing, uray nayaw-awan iti rinibu a tattao.

Idi Mayo 2001, adu a kakabsat manipud iti nadumaduma a pagilian ti immay ditoy Ukraine tapno atendaranda ti pannakaidedikar ti baro a pasilidad ti sanga nga opisina. Kalpasan ti espesial a palawag a naangay iti estadium iti bigat ti Domingo, nagadu a kakabsat ti nagnagna tapno mapanda pasiaren ti baro a Bethel. Diak pulos malipatan dayta a buya! Naragsakanak a nakakita kadagitoy a nakataltalna a kakabsat. Dayta ti nangpauneg iti apresasionko iti kinaimbag nga itden ti panagserbi iti Dios.

DAKKEL A PANAGBALBALIW

Nakalkaldaang ta idi 2004, nadayagnos nga adda kanser ni John. Nagsublikami idiay Canada tapno agpaagas. Dandani saan a kinaya ti bagina ti umuna a sesion ti chemotherapy, ken sumagmamano a lawasna iti intensive care. Imbag laengen ta nagsubli met la ti puotna. Nupay marigatan nga agsao, kanayon a makita kadagiti matana ti panagyamanna iti amin a bumisita kenkuana.

Ngem saanen nga immimbag ni John, ket natay idi Nobiembre 27, 2004. Kasla saanen a kompleto ti biagko. Tinagiragsakmi ken John ti panagkaduami a nagserbi ken Jehova. Ania itan ti aramidek? Pinilik ti agsubli ditoy Ukraine. Agyamanak unay iti nabara nga ayat ti pamilia ti Bethel ken ti kongregasion.

Dimi pulos pinagbabawyan dagiti desision nga inaramidmi. Nagragsak ti agbiag a kadua dagiti nagsayaat a kakabsat. Ammok nga adu pay ti masursurok maipapan iti kinaimbag ni Jehova, ken sapay koma ta makapagserbiak kenkuana iti agnanayon gapu ta napaneknekak nga ‘adda pakaay-aywan iti makannawan nga imana.’

[Blurb iti panid 6]

“Dimi pulos pinagbabawyan dagiti desision nga inaramidmi”

[Ladawan iti panid 3]

Idi nagkasarkami ken John

[Ladawan iti panid 4]

Idi espesial payunirak idiay Red Lake, Ontario

[Ladawan iti panid 5]

Dakami ken John idi 2002, Ukraine