Dikay Kumita “iti Bambanag iti Likudan”

“Awan ti tao a nangyiggem ti imana iti arado ket kumita iti bambanag iti likudan ti maikari maipaay iti pagarian ti Dios.”​—LUC. 9:62.

ANIA TI SUNGBATMO?

Apay a rumbeng a ‘laglagipentayo ti asawa ni Lot’?

Ania dagiti tallo a banag a masapul a liklikantayo a pampanunoten?

Kasanotayo a makidanggay iti panagrang-ay ti organisasion ni Jehova?

1. Ania ti impakdaar ni Jesus, ken ania a saludsod ti tumaud?

“LAGLAGIPENYO ti asawa ni Lot.” (Luc. 17:32) Napatpateg itan dayta nga impakdaar ni Jesu-Kristo agarup 2,000 a tawenen ti napalabas. Ngem ania ti kayat a sawen ti serioso a pakdaar ni Jesus? Saanen a kasapulan nga ilawlawagna dayta kadagiti Judio a dumdumngeg kenkuana. Ammoda no ania ti napasamak iti asawa ni Lot. Bayat a pumampanawda a sangapamiliaan idiay Sodoma, nagsukir iti bilin ni Jehova ket timmaliaw isu a nagbalin nga adigi nga asin.​—Basaen ti Genesis 19:17, 26.

2. Apay ngata a timmaliaw ti asawa ni Lot, ket ania ti resulta ti panagsukirna?

² Ngem apay ngata a timmaliaw ti asawa ni Lot? Kayatna kadi a makita no ania ti mapaspasamak? Timmaliaw kadi gapu ta saan a mamati wenno kimmapuy ti pammatina? Wenno gapu ta masayangan kadagiti bambanag a nabatina idiay Sodoma? (Luc. 17:31) Aniaman ti rason, ti panagsukirna ti nakaigapuan ti ipapatayna. Panunotem daytoy! Natay ti asawa ni Lot iti mismo nga aldaw a pannakatay dagiti nadangkes iti Sodoma ken Gomorra. Di pakasdaawan a kinuna ni Jesus: “Laglagipenyo ti asawa ni Lot”!

3. Kasano nga impaganetget ni Jesus a ditay tumaltaliaw iti bambanag a tinallikudantayo?

³ Nagpateg met ita a ditay tumaltaliaw wenno ditay pampanunoten ti bambanag a tinallikudantayo. Impaganetget dayta ni Jesus idi nagsaludsod ti maysa a lalaki no mabalinna ti agpakada nga umuna iti pamiliana sakbay nga agbalin nga adalan. Kinuna ni Jesus: “Awan ti tao a nangyiggem ti imana iti arado ket kumita iti bambanag iti likudan ti maikari maipaay iti pagarian ti Dios.” (Luc. 9:62) Istrikto kadi wenno di nainkalintegan ti sungbat ni Jesus? Saan, gapu ta ammona nga agpampambar laeng  ti lalaki tapno makaliklik iti responsabilidad. Dineskribir ni Jesus dayta a panangitantan kas panangkita iti “bambanag iti likudan.” Ania ngata ti epektona no ti agar-arado ket tumaliaw apagbiit iti likudan wenno isardengnan ti agarado sa sumangon iti likudanna? Aniaman kadagita ti aramidenna, masinga ken saan a nasayaat ti epektona iti trabahona.

4. Ania ti masapul a pangipamaysaantayo kadagiti matatayo?

⁴ Imbes a subliantayo ti napalabas, masapul nga ipamaysatayo ti atensiontayo iti masanguanan. Kitaem no kasano a silalawag a nayebkas dayta iti Proverbio 4:25: “No maipapan kadagita matam, rebbeng a kumitada a sililinteg iti sanguanan, wen, dagita bukodmo nga agsilnasilnag a mata rebbeng a kumitada a sililinteg iti sanguanam.”

5. Apay a ditay tumaliaw iti bambanag iti likudan?

⁵ Adda naimbag a rason a ditay tumaliaw iti bambanag iti likudan. Ania dayta? Agbibiagtayon kadagiti ‘maudi nga al-aldaw.’ (2 Tim. 3:1) Saan la a dua a dakes a siudad ti mapaspasungadantayo a madadael no di ket ti intero a sistema ti bambanag. Ania ti makatulong kadatayo tapno saantayo a maitulad iti asawa ni Lot? Masapul nga ammotayo dagiti bambanag a mabalin a mangsulisog kadatayo a kumita iti likudan. (2 Cor. 2:11) Adalentayo ngarud no ania dagita ken no kasanotayo a maliklikan nga ipamaysa ti atensiontayo kadagita.

DAGITI NASAYSAYAAT A BIAG ITI NAPALABAS

6. Apay a saan a kanayon a mapangnamnamaan ti memoriatayo?

⁶ Ti maysa a nalawag a peggad ket ti di umiso a kapanunotan a nasaysayaat ti biag iti napalabas. Saan a kanayon a mapangnamnamaan ti memoriatayo. Mabalin a panunotentayo a saan unay a nadagsen ti problematayo idi ken naragragsaktayo, a kas man la nasaysayaat ti kasasaad idi uray no saan met. No kasta ti kapanunotantayo, amangan no birbirokentayo dagidi a naragsak a biag iti napalabas. Ngem pakdaarannatayo ti Biblia: “Dimo kunaen, ‘Apay a nasaysayaat nga adayo ti kasasaad idi un-unana?’ Saan a nainsiriban daytoy a saludsod.” (Ecl. 7:10, Ti Baro a Naimbag a Damag Biblia) Apay a nakapegpeggad dayta a panagpampanunot?

7-9. (a) Ania ti napasamak kadagiti Israelita idiay Egipto? (b) Ania ti panggapuan dagiti Israelita nga agragsak? (c) Ania ti inreklamo dagiti Israelita?

⁷ Usigentayo ti napasamak kadagiti Israelita idi kaaldawan ni Moises. Idi kasangsangpetda iti daga ti Egipto, naibilangda a sangaili. Ngem kalpasan ti ipapatay ni Jose, dagiti Egipcio “nangisaadda [kadagiti Israelita] iti papanguluen ti pinuersa a panagtrabaho iti panggep a panangirurumen kadakuada iti panagibaklayda iti awit.” (Ex. 1:11) Di nagbayag, imbilin pay ni Faraon a mapapatay dagiti maladaga a lallaki nga Israelita tapno saan nga umadu ti bilangda. (Ex. 1:15, 16, 22) Di ngarud pakasdaawan a kinuna ni Jehova ken ni Moises: “Di mapagduaduaan a nakitak ti pannakaparigat ti ilik nga adda idiay Egipto, ket nangngegko ti ikkisda kas imbunga dagidiay mangdagdagdag kadakuada nga agtrabaho; agsipud ta ammok unay dagiti rigat a sagsagabaenda.”​—Ex. 3:7.

⁸ Mailadawanmo kadi ti ragsak dagiti Israelita bayat a rumrummuarda iti daga a nakaadipenanda kas nawayawayaan nga ili? Iti  nakaskasdaaw a pamay-an, nakitada ti pannakabalin ni Jehova idi impagtengna ti Sangapulo a Saplit iti natangsit a ni Faraon ken kadagiti iturayanna. (Basaen ti Exodo 6:1, 6, 7.) Kinapudnona, saan laeng a basta pinalubosan dagiti Egipcio a pumanaw dagiti Israelita. Dinagdagda pay ida a pumanaw ken inikkanda iti adu a balitok ken pirak a ti kaaduna ket arigna ‘binakasan ti ili ti Dios dagiti Egipcio.’ (Ex. 12:33-36) Ad-adda pay a nagragsakda idi nakitada ti pannakatalipupos ni Faraon ken ti buyotna iti Nalabaga a Baybay. (Ex. 14:30, 31) Anian a makapabileg iti pammati ti pannakakita iti kasta a naisangsangayan a pasamak!

⁹ Ngem narigat a patien a kalpasan ti nabiit pay a namilagruan a pannakaisalakan dagiti Israelita, nangrugidan nga agreklamo ken agtanabutob. Maipapan iti ania? Taraon! Saanda a nakontento iti ipapaay ni Jehova isu a nagreklamoda: “Anian ta malagipmi ti ikan a kinkinnanmi idiay Egipto nga awan bayadna, dagiti pipino ken dagiti sandia ken dagiti kutsay ken dagiti lasona ken ti bawang! Ngem ita mamagmagan ti kararuami. Awan lattan ti makitkita dagiti matami no di ti manna.” (Num. 11:5, 6) Wen, tiritir ti panagpampanunotda​—ta kaykayatda payen ti agsubli iti daga a nakaadipenanda! (Num. 14:2-4) Kimmitada iti bambanag iti likudan ket napukawda ti anamong ni Jehova.​—Num. 11:10.

10. Ania ti maadaltayo iti kapadasan dagiti Israelita?

¹⁰ Ania ti maadaltayo iti dayta? No agpasartayo kadagiti pakarigatan ken problema, ditay koma kanayon a panunoten a nasaysayaat ti kasasaadtayo iti napalabas​—nalabit uray idi sakbay a naammuantayo ti kinapudno. Saan met ketdi a dakes nga utoben dagiti nasursurotayo kadagiti napalabas a kapadasantayo wenno lagipen dagiti naragsak a napalabastayo. Ngem masapul a balanse ken realistiko ti panangmatmattayo kadagita. Ta no saan, ad-adda laeng a ditay makontento iti agdama a kasasaadtayo ket masulisogtayo nga agsubli iti dati a panagbiagtayo.​—Basaen ti 2 Pedro 2:20-22.

DAGITI INSAKRIPISIOTAYO

11. Kasano ti panangmatmat ti dadduma kadagiti insakripisioda iti napalabas?

¹¹ Nakalkaldaang ta idi linagip ti dadduma dagiti insakripisioda, imbilangda dagita a sayang nga oportunidad. Nalabit adda oportunidadmo idi a gumun-od iti nangatngato nga edukasion, agbalin a nalatak, wenno bumaknang, ngem inkeddengmo a saan a ragpaten dagita. Adu a kakabsattayo ti dakkel idi ti birokda iti negosio, paglinglingayan, edukasion, wenno isport ngem pinanawanda dagita. Naglabas ti panawen ngem saan pay a dimteng ti panungpalan. Pampanunotem kadi no ania koma ti kasasaadmo ita no intuloymo dagidi nga insakripisiom?

12. Ania ti nangibilangan ni Pablo kadagiti banag a pinanawanna?

¹² Dakkel ti insakripisio ni apostol Pablo tapno agbalin a pasurot ni Kristo. (Fil. 3:4-6) Ania ti nangibilanganna kadagiti banag a pinanawanna? Kunana: “Ti bambanag a gunggona kaniak idi, dagitoy imbilangko kas pukaw maigapu iti Kristo.” Apay? Intuloyna: “Pudno nga ibilangko met ti amin a bambanag kas pukaw maigapu iti naringbaw a pateg ti pannakaammo ken Kristo Jesus nga Apok. Maigapu kenkuana inawatko ti pannakaipukaw ti amin a bambanag ket  ibilangko ida kas adu a basura, tapno magun-odak ni Kristo.” * (Fil. 3:7, 8) No kasano a saanen a masayangan ti tao iti imbellengna a basura, saan met a nasayangan ni Pablo iti aniaman nga oportunidad a tinallikudanna. Saanen a napateg dagita kenkuana.

13, 14. Kasanotayo a matulad ti ulidan ni Pablo?

¹³ Ania ti rumbeng nga aramidentayo no mangrugin a masayangantayo kadagiti inidiantayon nga oportunidad? Tuladentayo ti ulidan ni Pablo. Kasano? Panunotem ti kinapateg ti agdama a tagtagiragsakem. Addaanka iti nasinged a relasion ken ni Jehova ken ammona a matalekka nga agserserbi kenkuana. (Heb. 6:10) Ania a material a bambanag ti idiaya ti lubong a kas kapateg dagiti naespirituan a bendision a tagtagiragsakentayo ita ken iti masanguanan?​—Basaen ti Marcos 10:28-30.

¹⁴ Adda pay imbaga ni Pablo a makatulong kadatayo nga agtultuloy a matalek. Kunana a ‘linipatna dagiti banag a nalikudan ken rinagpatna dagiti banag nga adda iti masanguanan.’ (Fil. 3:13) Dinakamat ni Pablo ti dua a napateg nga addang. Umuna, masapul a lipatentayo ti bambanag a tinallikudantayon. Ditay sayangen ti nagpateg a pigsa ken tiempotayo a mangpampanunot kadagita. Maikadua, kas iti tumataray nga asidegen iti pagpatinggaan, masapul a ditay sumardeng ken ipamaysatayo ti atensiontayo iti masanguanan.

15. Ania ti magunggonatayo no utobentayo ti ulidan dagiti matalek nga adipen ti Dios?

¹⁵ No utobentayo ti ulidan dagiti matalek nga adipen ti Dios​—idi ken ita​—ad-adda a maparegtatayo nga agtultuloy a kumita iti masanguanan imbes nga iti nalikudantayo. Kas pagarigan, no kanayon a pinanunot da Abraham ken Sara ti Ur, ‘naaddaanda koma iti gundaway nga agsubli.’ (Heb. 11:13-15) Ngem saanda a nagsubli sadiay. Ad-adu nga amang ti insakripisio ni Moises idiay Egipto ngem iti asinoman nga Israelita idi agangay. Ngem awan ti nairekord iti Biblia a tinarigagayanna a sublian dagidiay a banag. Imbes ketdi, kuna ti Biblia nga “imbilangna ti pannakaumsi ti Kristo kas kinabaknang a dakdakkel ngem kadagiti gameng ti Egipto; ta kimmita a sipapasnek iti pannakabayad ti gunggona.”​—Heb. 11:26.

DAGITI SAAN A NASAYAAT A KAPADASAN

16. Ania ti mabalin nga epektona kadatayo dagiti napalabas a kapadasantayo?

¹⁶ Saan nga amin a kapadasantayo ket nasayaat. Nalabit kanayon a maburiborantayo kadagiti napalabas a basol wenno nagkamaliantayo. (Sal. 51:3) Mabalin a nasakit pay la ti nakemtayo iti nadagsen a naibalakad kadatayo. (Heb. 12:11) Mabalin a pampanunotentayo pay laeng ti napasarantayo wenno ipagaruptayo a kinaawan hustisia. (Sal. 55:2) Ania ti aramidentayo tapno masiguradotayo a saan a dagiti kapadasantayo iti napalabas ti kanayon a pampanunotentayo? Usigentayo ti tallo a pagarigan.

17. (a) Apay a dineskribir ni Pablo ti bagina kas “nanumnumo ngem ti kanunumuan iti amin a sasanto”? (b) Ania ti nakatulong ken Pablo tapno saan a maburiboran kadagiti negatibo a kapanunotan?

¹⁷ Dagiti napalabas a kamali. Dineskribir  ni apostol Pablo ti bagina kas “nanumnumo ngem ti kanunumuan iti amin a sasanto.” (Efe. 3:8) Apay a kasta ti nariknana? “Agsipud ta indadanesko ti kongregasion ti Dios,” kinunana. (1 Cor. 15:9) Mailadawanmo kadi ti narikna ni Pablo idi makasaritana ti dadduma kadagiti dati nga indadanesna? Ngem imbes a dagiti negatibo a kapanunotan ti mangburibor kenkuana, impamaysana ti atensionna iti naipakita kenkuana a di kaikarian a kinamanangngaasi. (1 Tim. 1:12-16) Ti naimpusuan a panagyamanna ti nangtignay kenkuana nga agtultuloy iti ministeriona. Determinado ni Pablo a manglipat iti bambanag a tinallikudanna, a pakairamanan dagiti dakes nga inaramidna. No ipamaysatayo met ti atensiontayo iti asi nga impakita kadatayo ni Jehova, saan a maibus ti pigsatayo a mangpampanunot kadagiti pasamak iti napalabas a ditayon mabaliwan. Iti kasta, mausartayo ti pigsatayo iti agdama a trabahotayo.

18. (a) Ania ti mapasamak no nasakit latta ti nakemtayo iti naibalakad kadatayo? (b) Kasanotayo a masurot ti sasao ni Solomon iti panangawattayo iti balakad?

¹⁸ Nadagsen a balakad. Kasanon no nasakit latta ti nakemtayo iti naibalakad kadatayo? Saan laeng a nasaem dayta no di ket makapaupay pay​—nga agresulta iti ‘panagkapuy.’ (Heb. 12:5) Agpada a ditay magunggonaan iti balakad no ‘tagibassitentayo’ dayta babaen ti panangilaksid wenno ‘kumapuytayo’ babaen ti panangawat ngem kalpasanna, agsardengtayo nga agserbi. Nakasaysayaat nga ipangagtayo ti sasao ni Solomon: “Petpetam ti disiplina; saanmo a palusposan. Saluadam dayta, ta dayta ti biagmo.” (Prov. 4:13) Kas iti drayber a mangsurot kadagiti karatula iti kalsada, awatentayo ti balakad, iyaplikartayo dayta, ken umabantetayo.​—Prov. 4:26, 27; basaen ti Hebreo 12:12, 13.

19. Kasanotayo a matulad ti pammati da Habakuk ken Jeremias?

¹⁹ Napasaran wenno maipagarup a kinaawan hustisia. No dadduma, mabalin a mariknatayo ti narikna ni propeta Habakuk a dimmawat iti hustisia ken Jehova. Dina maawatan no apay nga ipalpalubos ni Jehova ti kinaawan hustisia. (Hab. 1:2, 3) Nagpateg a tuladentayo ti pammati dayta a propeta, a nagkuna: “Kaskasdi, no maipapan kaniak, agragsakakto ken Jehova a mismo; agrag-oakto iti Dios ti pannakaisalakanko.” (Hab. 3:18) Kas ken Jeremias idi, no itultuloytayo ti ‘aguray’ buyogen ti naan-anay a pammati ken Jehova, ti Dios ti kinahustisia, makapagtalektayo a mailintegto ti amin a banag iti umiso a tiempo.​—Un. 3:19-24.

20. Kasanotayo a maipakita a ‘silalagiptayo iti asawa ni Lot’?

²⁰ Agbibiagtayon kadagiti makapagagar a tiempo. Mapaspasamak itan dagiti naisangsangayan a bambanag ken adu pay ti mapasamak iti masanguanan. Makidanggaytayo koma iti panagrang-ay ti organisasion ni Jehova. Ipangagtayo ti Nainkasuratan a balakad a kumita iti masanguanan saan nga iti bambanag iti likudan. Iti kasta, ipakpakitatayo a ‘silalagiptayo iti asawa ni Lot’!

[Footnote]

[Salsaludsod]