Kasanoka a Mangbalakad?

Adda kadin nagpabalakad kenka? Kas pagarigan, adda kadin nangisaludsod kenka: ‘Ania ti rumbeng nga aramidek? Mapanak kadi iti daytoy a party? Daytoy kadi ti alaek a kurso? Rumbeng kadi a makideytak iti daytoy a tao?’

Nalabit adda agpatulong kenka a mangaramid iti desision a mabalin a makaapektar iti relasionna ken Jehova, kadagiti gagayyemna, wenno kapamiliana. Pangibatayam iti balakadmo? Ania ti nakairuamam no mangbalakadka? Napateg man wenno saan dagita, kuna ti Proverbio 15:28: “Ti puso daydiay nalinteg agmennamenna tapno makasungbat.” Kitaentayo no kasano a makatulong ti sumaganad a lima a prinsipio ti Biblia no mangbalakadtayo.

1 Ammuem ti Pudno a Situasion.

“No ti asinoman sumungbat iti maysa a banag sakbay a mangngegna, kinamaag dayta iti biangna ken maysa a pannakaipababa.”​—PROV. 18:13.

Tapno nasayaat ti ibalakadtayo, masapul nga ammuentayo dagiti kasasaad ken kapanunotan ti agpabpabalakad. Kas pagarigan: No adda immawag ken nagsaludsod kenka no ania ti kasayaatan a dalan nga agturong iti balayyo, ania ti masapul nga ammuem tapno matulongam? Ibagam kadi lattan ti kasayaatan a dalan uray dimo pay ammo ti eksakto nga ayanna? Siempre, saan! Umasping iti dayta, masapul nga ammuem nga umuna ti eksakto nga “ayan”​—ti kasasaad ken kapanunotan​—ti agpatpatulong tapno makaipaayka iti maitutop a balakad. Adda pay kadi dimo ammo maipapan iti kasasaadna a mabalin a mangapektar iti ibalakadmo? No ditay ammo ti pudno a situasion, mabalin makaipaaytayo iti balakad a mangriro iti agpatpatulong.​—Luc. 6:39.

Ammuem No Kasano Kaadun ti Nasukimatna. Nasayaat met nga isaludsodmo iti agpabpabalakad: “Ania ngata dagiti prinsipio ti Biblia nga agaplikar iti situasionmo?” “Ania dagiti bentaha ken disbentaha dagiti desision nga aramidem?” “Ania dagiti nasukimatmon?” “Ania ti imbalakaden dagiti panglakayen, nagannakmo, wenno ti mangyad-adal kenka?”

Makatulong ti sungbatna kadagita a saludsod tapno maammuam no ania dagiti naaramidnan ken no ania ti naibalakaden kenkuana. Iti kasta, ammom ti ibalakadmo. Madlawmo met no agsapsapul laeng iti mangbalakad a mangibaga iti kayatna a mangngeg a ‘manggagatel iti lapayagna.’​—2 Tim. 4:3.

  2 Liklikan ti Nadarasudos a Panangbalakad.

“Tunggal tao masapul a nasiglat no iti panagdengngeg, nainayad no iti panagsao.”​—SANT. 1:19.

Mabalin a nasayaat met ti intensiontayo a mangbalakad a dagus. Ngem nainsiriban kadi dayta nangruna no ti saludsodna ket ditay pay nasukimat a naimbag? Kuna ti Proverbio 29:20: “Nakakitaka kadin iti tao a nadarasudos iti sasaona? Ad-adu ti namnama a maipaay iti maysa a maag ngem iti maipaay kenkuana.”

Mangipaayka iti umdas a panawen tapno masiguradom a ti balakadmo ket maitunos iti sirib ti Dios. Isaludsodmo iti bagim, ‘Naimpluensiaan kadi ti panunotko iti kapanunotan ken “espiritu ti lubong”?’ (1 Cor. 2:12, 13) Laglagipem a saan a kanayon nga umdas ti nasayaat a motibo. Idi naammuan ni apostol Pedro ti narigat nga annongen ni Jesus, kinunana: “Kaasiam ta bagim, Apo; saanto a pulos mapasamak kenka daytoy a pagtungpalan.” Ania ti masursurotayo iti reaksion ni Pedro? Uray no maseknanka no dika met naannad, mabalin a “saan a ti pampanunot ti Dios, no di ket ti pampanunot ti tattao” ti maibalakadmo. (Mat. 16:21-23) Anian a nagpateg nga agpanunottayo nga umuna sakbay nga agsaotayo! Nakabasbassit laeng ngamin ti kapadasantayo no idiligtayo iti sirib ti Dios.​—Job 38:1-4; Prov. 11:2.

3 Sipapakumbaba nga Iyaplikarmo ti Sao ti Dios.

“Awan ti aramidek iti bukodko a nakem; no di ket kas iti insuro kaniak ni Ama sawek dagitoy a banag.”​—JUAN 8:28.

Ibagam kadi, “No siak ti sika, . . . ”? Uray no kasla nalawag ti sungbat iti saludsod, nasaysayaat no tuladem ti kinapakumbaba ken kinaemma ni Jesus. Nasirsirib nga amang ken ad-adu ti kapadasanna ngem iti asinoman a tao. Kaskasdi, kinunana: “Saanak a nagsao iti bukodko a pannakatignay, no di ket ti met laeng Ama . . . inikkannak iti bilin maipapan iti ibagak ken iti sawek.” (Juan 12:49, 50) Dagiti pannursuro ken balakad ni Jesus ket kanayon a maitunos iti pagayatan ni Amana.

Kas pagarigan, mabasatayo iti Lucas 22:49 a nagsaludsod dagiti adalan no rumbeng a makilabanda idi arestuenda ni Jesus. Nagusar iti kampilan ti maysa nga adalan. Makitam iti umasping a salaysay iti Mateo 26:52-54 nga uray iti dayta a narigat a kasasaad, nakirinnason pay laeng ni Jesus kadagiti adalanna maipapan iti pagayatan ti Dios. Gapu ta ammona dagiti prinsipio iti Genesis 9:6 ken dagiti padto iti Salmo 22 ken Isaias 53, nakaipaay ni Jesus iti nainsiriban a balakad a nakaispal iti biag ken nangparagsak ken Jehova.

  4 Usarem Dagiti Publikasion.

“Siasino a pudpudno ti matalek ken masirib nga adipen a dinutokan ni apona a mangaywan kadagiti katulongna, tapno ipaayna kadakuada ti taraonda iti umiso a tiempo?”​—MAT. 24:45.

Nangdutok ni Jesus iti mapagtalkan a klase adipen a mangipaay iti nagpateg a naespirituan a taraon. No mangbalakadka mainaig kadagiti napateg a banag, iwaywayaam kadi ti agsukimat a naimbag kadagiti naibatay-Biblia a publikasion?

Nalawag ken nakaad-adu nga impormasion ti magun-odtayo iti Watch Tower Publications Index ken iti Watchtower Library. * Nakasaysayang no ditay usaren dagitoy nga impormasion! Naglaon dagita iti rinibu a topiko nga addaan iti adu nga artikulo a makatulong iti agpabpabalakad. Tultulongam kadi ti sabsabali a mangusig kadagiti prinsipio ti Biblia ken agtignay a maitunos iti Sao ti Dios? No kasano a makatulong ti mapa tapno maammuan ti maysa ti pagnaanna, iti kasta, makadanon iti papananna, makatulong met dagiti publikasion tapno maammuanna ti dalan a pagnaanna ken no kasano a makapagtalinaed iti dalan ti biag.

Adu a panglakayen ti nangsanay kadagiti agibumbunannag nga agbirok kadagiti artikulo babaen ti panangusarda iti Index wenno iti Watchtower Library, isu a natulonganda ida a mangyaplikar iti Kasuratan. Ti kasta a panangsanay tinulonganna dagiti agibumbunannag a mangsolbar iti pakaseknanda, mangyugali nga agsukimat, ken agpannuray kadagiti naespirituan a probision ni Jehova. Iti kasta, ‘masanay dagiti pannakabalin ti pannakaawatda a mangilasin agpadpada iti umiso ken di umiso.’​—Heb. 5:14.

5 Liklikam nga Idesisionan ti Sabsabali.

“Tunggal maysa awitennanto ti bukodna nga awit.”​—GAL. 6:5.

Iti kamaudiananna, daydiayto met laeng agpatpatulong ti masapul nga agpili iti balakad a surotenna. Inikkannatayo ni Jehova iti wayawaya a mangngeddeng no surotentayo dagiti prinsipiona wenno saan. (Deut. 30:19, 20) Iti dadduma a kasasaad, adu a prinsipio ti Biblia ti masapul nga ikabilangan, ket inton agangay, daydiay agpabpabalakad ti masapul nga agdesision. Maibatay iti problema wenno edad ti agpabpabalakad, nasayaat met nga isaludsodtayo iti bagitayo, ‘Adda kadi karbengak a mangsungbat iti saludsodna?’ No dadduma, dagiti panglakayen ti kasayaatan a pagpatulongan wenno, no ubing pay ti agpabalakad, agkonsulta kadagiti nagannakna.

[Footnote]

[Kahon/Ladawan iti panid 8]

Proyekto Para iti Panagdaydayaw ti Pamilia

Kas proyekto iti panagadal, apay a dimo sukimaten ti sungbat dagiti nabiit pay nga insaludsodda kenka? Ania dagiti artikulo ken prinsipio ti Biblia a mabalinmo a kitaen a makatulong iti agsalsaludsod? Kas pagarigan, ipapantayo nga adda kabsat a nagsaludsod maipapan iti pannakideyt iti kayatna a maasawa. No usarem ti Index wenno Watchtower Library, kitaem nga umuna ti suheto a direkta a mainaig iti saludsodna. Kas pagarigan, mabalinmo a kitaen iti Index ti “Dating” wenno “Marriage.” Kalpasanna, kitaem dagiti subtitulo nga adda koneksionna iti topiko. Bayat a palpalabsam ti kangrunaan a paulo, kitaem met no adda nakasurat a topiko iti “See also” a mabalin a mangdakamat iti maysa a paulo a mas direkta a mainaig iti suksukimatem.

[Kahon iti panid 9]

Makaipaay ken makaawattayo iti kasayaatan a balakad gapu kadagiti probision ni Jehova babaen ti organisasionna. Kuna ti Eclesiastes 12:11: “Ti sasao dagidiay masirib kaslada kadagiti tirad a pagabug iti kapon a baka, ket dagidiay maigamgamer iti inummong a sarsarita kaslada kadagiti lansa a naipalok; isuda ket naited manipud iti maysa a pastor.” Ti naayat ken nainsiriban a balakad ket kas “kadagiti tirad a pagabug iti baka”​—maysa a natirad a baston a mangiturong kadagiti animal​—a mangiwanwan kadagiti napasnek a tattao iti umiso a dalan. ‘Dagiti naipalok a lansa’ patibkerenda dagiti pasdek. Umasping iti dayta, ti nasayaat a balakad pagbalinenna a natibker ti maysa. Dagiti masirib ‘naigamerda,’ wenno maragragsakanda unay a mangadal kadagiti ‘naummong a sarsarita’ a mangyanninaw iti kinasirib ti “maysa a pastor” a ni Jehova.

Tuladentayo koma ti Pastor no mangbalakadtayo. Dakkel a pribilehio ti umimdeng ken mangipaay iti makatulong a balakad agingga a kabaelantayo! No naibatay ti balakadtayo kadagiti prinsipio ti Biblia, nasayaatto ti resultana ken agnanayonto a pagimbagan daydiay umimdeng.