“Mabalin Kadi a Retratuennakami?”

Ni Josué ket maysa a Bethelite idiay Mexico. Kalpasan ti maikadua nga aldaw ti kombension distrito, isu ket nagpasiar iti siudad ti Querétaro. Adda agassawa a turista a taga-Colombia a da Javier ken Maru a nagkiddaw ken Josué a retratuenna ida. Gapu ta natakneng ti kawesna agraman dagiti gagayyemna a Saksi ken nakasuotda iti badge iti kombension, dinamag dagitoy nga agassawa no immatenderda iti graduation wenno iti espesial nga okasion. Kuna ni Josué a timmabunoda iti kombension dagiti Saksi ni Jehova. Kalpasanna, inawisna ida a tumabuno iti programa iti Domingo.

Ngem mabainda a tumabuno ta awan ti badoda a maitutop iti dayta nga okasion. Nupay kasta, inted latta ni Josué ti naganna ken ti numero ti telepono ti sanga nga opisina a pagtartrabahuanna.

Uppat a bulan kalpasanna, nasdaaw ni Josué idi nakasaritana ni Javier. Timmabunoda gayam nga agassawa iti kombension ket kayatda a sarungkaran ida dagiti Saksi ni Jehova idiay Mexico City a pagnanaedanda idi. Di nagbayag, nayadalan iti Biblia da Javier ken Maru ken dagus a nakigimongda. Kalpasan ti 10 a bulan, nagbalinda nga agibumbunannag. Nupay immakarda idiay Toronto, Canada, nagtultuloyda a rimmang-ay iti naespirituan ken nagpabautisarda.

Di nagbayag, nakaawat ni Josué iti surat manipud ken Javier a manges-estoria no ania ti nakatignayanna nga immawat iti kinapudno. “Sakbay nga immatenderkami iti kombension, nagsaritaanmi ken baketko a kasapulanmi ti panangiwanwan ti Dios. Idi makitami a nanakman ti panagbadbadoyo, pinanunotmi a naggapukayo iti maysa nga espesial nga okasion. Iti kombension, naapresiarmi ti nasayaat a kondukta dagiti timmabuno, ti panangtulongda kadakami nga agbirok iti pagtugawan ken mangukag iti Biblia. Awan ti nangdillaw a nakabadokami iti pangpasiar.”

Pimmudno ken Josué ti sasao ti masirib a ni Ari Solomon! Kunana: “Iti bigat imulam ti bin-im ket agingga iti rabii saanmo a paginanaen ta imam; ta saanmo nga ammo no sadino nga agballiginto daytoy, no ditoy wenno sadiay, wenno no isuda a dua agpadadanto a naimbag.” (Ecl. 11:6) Mabalinmo kadi ti agmula iti bin-i babaen ti panangibagam iti sabsabali ti maipapan iti mapaspasungad a kombension wenno iti palawag publiko? Mabalin nga usarennaka ni Jehova a mangtulong kadagidiay mabisin ken mawaw iti naespirituan, kas kada Javier ken Maru.​—Isa. 55:1.

[Ladawan iti panid 32]

Manipud kannigid nga agpakannawan: Alejandro Voeguelin, Maru Pineda, Alejandro Pineda, Javier Pineda, ken Josué Ramírez, iti sanga nga opisina ti Mexico