Tulonganyo Dagiti Tattao nga ‘Agriing iti Turog’
Tulonganyo Dagiti Tattao nga ‘Agriing iti Turog’
“Ammoyo ti panawen, nga orasen tapno agriingkayo iti turog.”—ROMA 13:11.
MAILAWLAWAGMO KADI?
Apay a nagpateg nga agtalinaed a siririing dagiti Kristiano iti naespirituan?
Apay a masapul a dumngeg ken managpaliiw dagiti siririing a ministro?
Ania ti maitulong ti panagbalin a nakonsiderar ken naalumamay iti ministeriotayo?
1, 2. Iti ania nga anag a masapul nga agriing ti adu a tattao?
KADA tawen, rinibu ti matmatay gapu ta makatuglep wenno makaturog dagiti drayber bayat ti panagmanehoda. Adda met dagidiay masesante gapu ta maladawda nga agriing isu a maladawda a sumrek wenno nakaturogda iti oras ti trabaho. Ngem napegpeggad pay ti resulta ti naespirituan a panagtuglep. Gapu iti dayta, kuna ti Biblia: “Naragsak daydiay agtalinaed a siririing.”—Apoc. 16:14-16.
2 Bayat nga umas-asideg ti dakkel nga aldaw ni Jehova, matmaturog iti naespirituan ti kaaduan a tattao. Uray ti dadduma a lider ti relihion ibagada a matmaturog dagiti miembroda. Ania ti naespirituan a pannaturog? Apay a napateg nga agtalinaed a siririing dagiti pudno a Kristiano? Kasanotayo a matulongan ti dadduma nga agriing iti naespirituan?
ANIA TI NAESPIRITUAN A PANNATUROG?
3. Deskribirem ti tao a nakaturog iti naespirituan.
3 Masansan a di aktibo dagiti matmaturog. Iti kasumbangirna, dagiti nakaturog iti naespirituan ket mabalin nga okupadoda unay ngem saan a kadagiti naespirituan a bambanag. Mabalin a makumikomda iti inaldaw a pakaringgoran iti biag, ragragsak, panagpabaknang, wenno panagbalin a nalatak. Gapu kadagita, mabaybay-andan dagiti naespirituan a kasapulanda. Ngem dagidiay siririing iti naespirituan, ammoda nga agbibiagtayon iti ‘maudi nga al-aldaw’ isu nga aktiboda a mangaramid iti pagayatan ti Dios agingga a kabaelanda.—2 Ped. 3:3, 4; Luc. 21:34-36.
4. Ania ti kayat a sawen ti balakad a: “Saantay koma a maturog a kas iti ar-aramiden ti dadduma”?
4 Basaen ti 1 Tesalonica 5:4-8. Parparegtaen ni apostol Pablo dagiti padana a Kristiano a ‘saanda a maturog a kas iti ar-aramiden ti dadduma.’ Ania ti kayatna a sawen? Ti maysa a pamay-an a ‘makaturogtayo’ ket no ilaksidtayo dagiti moral a pagalagadan ni Jehova. Ti sabali pay a pamay-an a ‘makaturogtayo’ ket no ditay ikankano ti kinapudno nga asidegen a dadaelen ni Jehova dagiti nadangkes. Masapul a siguraduentayo a ditay tultuladen dagiti aramid ken kababalinda.
5. Ania ti kababalin dagidiay matmaturog iti naespirituan?
5 Pampanunoten ti dadduma nga awan ti Dios a mangdusa kadakuada. (Sal. 53:1) Adda pay dagidiay mangpampanunot a saan nga interesado ti Dios kadatayo isu nga awan met ngarud ti rason nga aginterestayo kenkuana. Ipagarup met ti dadduma nga agbalinda a gayyem ti Dios no adda relihionda. Amin dagitoy ket matmaturog iti naespirituan. Masapul nga agriingda. Kasanotayo a matulongan ida?
MASAPUL NGA AGTALINAEDTAYO A SIRIRIING
6. Apay a masapul nga ikagumaan dagiti Kristiano ti agtalinaed a siririing?
6 Tapno mariingtayo ti dadduma, masapul a siririingtayo. Ania ti ramanen dayta? Ti Sao ti Dios innaigna ti piguratibo a pannaturog kadagiti “aramid nga agpaay iti sipnget” kas iti naariwawa a panagragragsak, panagbarbartek, maiparit a pannakidenna, nalulok a kababalin, ringgor, ken imon. (Basaen ti Roma 13:11-14.) Mabalin a narigat a liklikan dagita a dakes nga aramid. (Efe. 4:17-19) Nakapatpateg ti panagridam. Mabalin nga irisgo ti drayber ti biagna no tagtagilag-anenna ti peggad a resulta ti pannakaturog bayat ti panagmanehona. Anian a nagpateg a laglagipen ti maysa a Kristiano nga agresulta iti ipapatay ti naespirituan a pannaturog!
7. Ania ti mabalin nga epektona ti di umiso a panangmatmattayo kadagiti tattao?
7 Kas pagarigan, mabalin a panunoten ti maysa a Kristiano nga awanen ti mangipangag iti naimbag a damag iti teritoriada. (Prov. 6:10, 11) Mabalin nga irasonna, ‘No awan met laeng ti mangipangpangag, apay pay laeng a reggetak a tulongan dagiti tattao?’ Pudno nga adu ita ti nakaturog iti naespirituan, ngem mabalin nga agbaliw dagiti kasasaad ken kababalinda. Addanto met laeng dagidiay makariing ken mangipangag. Ken matulongantayo ida no agtalinaedtayo a siririing babaen ti panangpadastayo kadagiti baro a wagas a panangidatag iti mensahe ti Pagarian iti makapainteres a pamay-an. Makapagtalinaedtayo a siririing no laglagipentayo a nagpateg ti ministeriotayo.
APAY A NAGPATEG TI MINISTERIOTAYO?
8. Apay a nagpateg ti Nakristianuan a ministeriotayo?
8 Aniaman ti reaksion dagiti tattao, laglagipentayo a ti panangasabatayo idaydayawna ni Jehova ken makatulong iti pannakaitungpal ti panggepna. Din agbayag, maukom dagidiay saan a mangipangag iti naimbag a damag. Ti pannakaukom dagiti tattao ket agdepende iti reaksionda iti panangasabatayo. (2 Tes. 1:8, 9) Ken maysa a kamali no panunotentayo a saan a napateg ti naregta a panangasaba gapu ta ‘mapagungar met agpadpada dagiti nalinteg ken dagiti nakillo.’ (Ara. 24:15) Nalawag nga ibaga ti Sao ti Dios a dagidiay maukom kas “kalding” ‘magessatda iti agnanayon.’ Ti panangasabatayo ket ebkas ti asi ti Dios ta ikkanna dagiti tattao iti gundaway nga agbalbaliw ken makagun-od iti “agnanayon a biag.” (Mat. 25:32, 41, 46; Roma 10:13-15) No saantayo a mangasaba, kasano ngarud a mangngegan dagiti tattao ti makaited-biag a mensahe?
9. Kasano a ti panangikasabatayo iti naimbag a damag ket makagunggona kadatayo ken iti sabsabali?
9 Makagunggona met kadatayo ti panangikasaba iti naimbag a damag. (Basaen ti 1 Timoteo 4:16.) Saan kadi a timmibker ti pammati ken panagayatmo ken Jehova gapu iti panangisarsaritam iti maipapan kenkuana ken iti namnama nga ipaay ti Pagarian? Saan kadi a tinulongannaka dayta a mangpatanor kadagiti Nakristianuan a galad? Saan kadi a naragragsakka bayat nga iyeb-ebkasmo ti debosionmo iti Dios babaen ti panangasabam? Adu a Kristiano ti maragragsakan gapu ta makitkitada a simmayaat ti wagas ti panagbiag dagiti iyad-adalanda babaen ti tulong ti espiritu ti Dios.
AGBALIN A MANAGPALIIW
10, 11. (a) Kasano nga impakita da Jesus ken Pablo nga alerto ken managpaliiwda? (b) Iyilustrarmo no kasano a makatulong iti ministeriotayo ti kinaalerto ken kinamanagpaliiw.
10 Matignaytayo dagiti tattao nga aginteres iti naimbag a damag iti nagduduma a pamay-an. Isu a masapul a nalaingtayo nga agpaliiw kas Kristiano a ministro. Ni Jesus ti ulidantayo iti dayta. Gapu ta perpekto, ammona ti naimpusuan a panagbabawi ti managbasol a babai, ti kinamanagsakripisio ti maysa a balo, ken ti rurod dagiti Fariseo. (Luc. 7:37-50; 21:1-4) Matulongan ni Jesus dagiti tattao gapu ta ammona ti naespirituan a kasapulanda. Ngem saan a masapul nga agbalin a perpekto ti maysa nga adipen ti Dios tapno agbalin a nalaing nga agpaliiw. Inyulidan dayta ni apostol Pablo ta imbagayna dagiti presentasionna tapno maalana ti interes ti amin a tattao a nagduduma ti kababalinda.—Ara. 17:22, 23, 34; 1 Cor. 9:19-23.
11 No ikagumaantayo ti agbalin nga alerto ken managpaliiw a kas ken Jesus ken ni Pablo, maammuantayo no kasano ti kasayaatan a panangtukay iti interes dagiti makasaritatayo. Kas pagarigan, bayat nga umas-asidegka iti bumalay, mangkitaka iti banag a mangted kenka iti ideya no naasawaan wenno saan, no ania ti kultura, wenno paginteresanna. Nalabit makitam ti ar-aramidenna ket iruanganmo ti saritaan babaen iti dayta.
12. No addatayo iti ministerio, apay a masapul nga agannadtayo iti pannakisaritatayo?
12 Ti alerto a managpaliiw ikagumaanna a liklikan ti aniaman a pakasingaan. No addatayo iti ministerio, makapabileg ti pannakisaritatayo iti kaduatayo. Ngem laglagipentayo a ti panggep ti ministeriotayo ket tapno mangasaba. (Ecl. 3:1, 7) Agannadtayo amangan no masinga ti ministeriotayo gapu iti pannakisaritatayo iti kaduatayo. Ti maysa a nagsayaat a pamay-an tapno nakapokustayo iti panangasaba ket no pagtungtonganyo nga agkadua dagiti kayatyo nga iranud iti maysa nga interesado. Ken nupay makatulong no dadduma ti selpon iti ministerio, siguraduentayo a saan a makasinga daytoy iti pannakisaritatayo iti bumalay.
MANGIPAKITA ITI PERSONAL NGA INTERES
13, 14. (a) Kasanotayo a maammuan ti paginteresan ti maysa a tao? (b) Ania ti mabalin a mangtignay iti maysa nga aginteres iti naespirituan a bambanag?
13 Ti alerto ken siririing a ministro dumngeg a naimbag iti kasarsaritana. Ania dagiti mabalinmo nga isaludsod tapno matignaymo ti bumalay a mangyebkas iti kapanunotanna? Maburiboran kadi iti kinaadu ti relihion, kinaranggas iti lugarda, wenno pannakapaay dagiti gobierno? Matignaymo kadi nga aginteres iti naespirituan a bambanag babaen ti panangkomentom kadagiti nakaskasdaaw a disenio dagiti sibibiag a parsua wenno panangipakitam no kasano a makatulong dagiti balakad iti Biblia? Interesado iti topiko a kararag ti kaaduan a tattao, aniaman ti kulturada, uray dagidiay saan a mamati iti Dios. Pagduaduaan ti adu no adda met la umim-imdeng kadagiti kararagda. Dadduma ti mabalin nga aginteres kadagiti saludsod a: Denggen kadi ti Dios ti amin a kararag? No saan, ania ti masapul nga aramidentayo tapno denggen ti Dios ti kararagtayo?
14 Mabalin nga adu ti masursurotayo no kasano nga irugi ti saritaan babaen ti panangpaliiwtayo kadagiti aduan kapadasan a kakabsat. Siputam no kasanoda a liklikan ti kasla agpalpalutpot wenno mannakibiang. Siputam met no kasano a ti tono ti bosesda ken ekspresion ti rupada ipakitana nga interesadoda iti opinion ti bumalay.—Prov. 15:13.
AGBALIN A NAKONSIDERAR KEN NATAKTIKA
15. Apay a rumbeng nga agbalintayo a nakonsiderar no mangasabatayo?
15 Kayatmo kadi ti mariing no naimas ti turogmo? Adu ti masuron no adda bigla a mangriing kadakuada. Masansan a kaykayattayo no saan a bigla ti pannakariingtayo. Pudno met dayta no iti panangikagumaantayo a mangriing kadagiti tattao iti naespirituan. Kas pagarigan, no makaunget ti bumalay iti isasarungkarmo, ania ti masansan a kasayaatan nga aramidem? Agbalinka a nakonsiderar, raemem ti opinionna, ken sikakalmado a pumanawkan. (Prov. 15:1; 17:14; 2 Tim. 2:24) Gapu iti naimbag a kababalin nga impakitam, nalabit nasaysayaatton ti pannakisaritana iti sabali a Saksi a sumarungkar kenkuana.
16, 17. Kasanotayo a maipakita ti pannakaawat iti ministerio?
16 Iti dadduma a kasasaad, mapagballigiantayo ti negatibo a reaksion. Mabalin nga adda agkuna, “Pagyamanan laengen, adda relihionkon,” wenno, “Saanak nga interesado.” Dayta ngamin ti kalakaan a pangpasardeng iti saritaan. Ngem no nataktika ken naasi ti pannakisaritam, mabalin a makaibangonka iti mamagpanunot a saludsod a mangtignay iti bumalay nga aginteres kadagiti naespirituan a bambanag.—Basaen ti Colosas 4:6.
17 No ibaga ti bumalay nga okupado isu a dina masango ti makisarita, nasaysayaat no mangipakitatayo iti konsiderasion sa agpakadatayon. Ngem no dadduma, nalabit makitam a mabalinmo met ti mangibaga iti ababa ken makatukay-rikna a mensahe. Kabaelan met ti dadduma a kakabsat ti mangukrad iti Biblia, mangibasa iti mamagpanunot a teksto, ken mangibati iti saludsod iti bumalay iti awan pay maysa a minuto. No dadduma, epektibo dayta ta makita ti bumalay nga adda gayam panawenna para iti ababa a saritaan. Apay a dimo padasen dayta no ipalubos ti kasasaad?
18. Ania ti mabalintayo nga aramiden tapno mas epektibotayo a mangasaba iti di pormal?
18 No nakasaganatayo a mangasaba iti di pormal, masansan a mariing ti interes dagiti tattao a makasaritatayo iti inaldaw. Adu a kakabsat ti mangibulsa wenno mangikabil iti bagda kadagiti literatura. Mabalin nga adda met insaganada a teksto a kayatda nga ibasa no maikkanda iti oportunidad. Mabalinmo ti agpatulong iti manangaywan iti serbisio wenno kadagiti payunir iti kongregasionyo no kasanom a maaramid dayta.
SIAALUMAMAY A RIINGENTAYO DAGITI KABAGIANTAYO
19. Apay a ditay mauma a mangtulong iti kakabagiantayo?
19 Normal laeng a kayattayo a tulongan ti kakabagiantayo nga umawat iti naimbag a damag. (Jos. 2:13; Ara. 10:24, 48; 16:31, 32) Ngem mabalin a bumaaw ti regtatayo a mangtulong kadakuada no dida dumngeg iti damo a pannakisaritatayo. Mabalin a panunotentayo nga awanen ti maaramidan wenno maibagatayo a mangbalbaliw iti kababalinda. Kaskasdi, mabalin nga adda dagiti pasamak a mangbalbaliw iti biag wenno panangmatmatda. Wenno nalabit simmayaaten ti pamay-an ti panangasabam isu a nasaysayaat dagiti resultana itan.
20. Apay a napateg ti kinataktika no makisaritaka kadagiti kabagiam?
20 Masapul nga ikabilangantayo ti rikna dagiti kabagiantayo. (Roma 2:4) No nasayaat ti pannakisaritatayo kadagiti makasabaantayo, saan kadi a kasta met ti rumbeng a pannakisaritatayo kadagiti kabagiantayo? Naalumamay ken nadayaw koma ti panagsaotayo. Ibagam no kasanonaka a natulongan ti kinapudno ngem saanka a kasla agsersermon. (Efe. 4:23, 24) Makitada koma a simmayaat ti wagas ti panagbiagmo gapu ta ni Jehova ti ‘mangisursuro kenka agpaay a pakagunggonaam.’ (Isa. 48:17) Makita met koma dagiti kabagiam a mapagulidanan ti panagbiagmo kas Kristiano.
21, 22. Mangisalaysay iti kapadasan a mangipakita iti kinapateg ti panangikagumaan a mangtulong iti naespirituan kadagiti kabagian.
21 Itay laeng nabiit, insurat ti maysa a kabsat a babai: “Kanayon nga ikagkagumaak a kasabaan ti 13 a kakabsatko babaen ti sasao ken konduktak. Saan a lumabas ti makatawen nga awan ti suratko iti tunggal maysa kadakuada. Ngem iti uneg ti 30 a tawen, siak laeng ti Saksi iti pamiliami.”
22 Intuloyna: “Naminsan, tineleponuak ti maysa kadagiti manangko nga agnanaed iti adayo. Kinunana a kiniddawna iti maysa a lider ti relihion nga iyadalanna iti Biblia ngem dina met inaramid dayta. Idi imbagak a siakon ti mangyadal kenkuana, kinunana: ‘Sige, ngem ipakpakaunakon: Diakto pulos agbalin a Saksi ni Jehova.’ Idi napatulodakon iti libro nga Ania a Talaga ti Isursuro ti Biblia? inawagak iti kada sumagmamano nga aldaw. Ngem dina pay naluktan ti libro. Kamaudiananna, immawagak manen ken imbagak nga alaenna ti libro ket iti uneg ti agarup 15 a minuto, binasa ken nagsaritaanmi ti dadduma a nakotar a teksto. Kalpasan ti sumagmamano nga iyaawagko, kayatnan a nasursurok pay ngem 15 a minuto ti panagadalmi. Idi kuan, isun ti umawag kaniak tapno agadalkami ket no dadduma, nakaiddaak pay laeng wenno mamindua iti agmalem nga umawag. Nabautisaran iti simmaganad a tawen, ken kalpasan ti makatawen, nagpayuniren.”
23. Apay a ditay mauma a mangriing kadagiti tattao a nakaturog iti naespirituan?
23 Agkasapulan iti abilidad ken kinaanus ti panangtulong kadagiti tattao nga agriing iti naespirituan. Ngem adda latta dagiti nasingpet a tattao a matignay iti panangikagumaantayo a mangriing kadakuada. Iti kada bulan, nasurok a 20,000 ti mababautisaran kas Saksi ni Jehova. Ipapusotayo ngarud ti balakad ni Pablo ken Arquipo idi umuna a siglo: “Itultuloymo nga aluadan ti ministerio nga inawatmo iti Apo, a tungpalem dayta.” (Col. 4:17) Tulongannatayo ti sumaganad nga artikulo a mangtarus iti kaipapanan ti pannakarikna iti kinaganat iti panangasaba.
[Salsaludsod]
[Kahon iti panid 13]
NO KASANOKA NGA AGTALINAED A SIRIRIING
▪ Okupadoka koma a kanayon a mangaramid iti pagayatan ti Dios
▪ Liklikam dagiti aramid a kukua ti kinasipnget
▪ Sipapanunotka koma iti peggad nga itden ti pannaturog iti naespirituan
▪ Mangipakitaka koma a kanayon ti naimpusuan a pannakaseknan kadagiti tattao iti teritoriayo
▪ Padasem dagiti baro a pamay-an ti panangasaba
▪ Laglagipem ti kinapateg ti ministeriom
