Ammo ni Jehova No Kasano nga Ispalen ti Ilina

“Ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot.”​—2 PED. 2:9.

APAY A MAKAPAGTALEKTAYO A NI JEHOVA:

Kontroladona no kaano a mapasamak ti bambanag tapno matungpal ti panggepna?

Usarenna ti pannakabalinna a mangispal iti ilina?

Ammona no kasano ti eksakto a pannakapasamak ti bambanag bayat ti dakkel a rigat?

1. Ania dagiti kasasaad bayat ti “dakkel a rigat”?

KELLAATTO ti panangrugi ti panangdadael ti Dios iti lubong ni Satanas. (1 Tes. 5:2, 3) Bayat ti “dakkel nga aldaw ni Jehova,” mariribukto ti kagimongan dagiti tattao. (Sof. 1:14-17) Nasaknapto ti rigat ken panagsagaba. Tiemponto dayta ti ‘dakkel a rigat a saan pay a napasamak nanipud idi pangrugian ti lubong agingga ita.’​—Basaen ti Mateo 24:21, 22.

2, 3. (a) Ania ti pakaipasanguan ti ili ti Dios inton “dakkel a rigat”? (b) Ania ti mangpabileg iti panagtalektayo iti abilidad ni Jehova a mangispal iti ilina?

² Bayat nga umas-asideg ti panagpatingga ti “dakkel a rigat,” ti ili ti Dios ti puntiria ti maudi nga iraraut ti “Gog iti daga ti Magog.” Bayat dayta, “maysa a puersa militar a nakaad-adu” a “kas ul-ulep a mangabbong iti daga” ti rumaut iti ili ti Dios. (Ezeq. 38:2, 14-16) Awanto ti natauan nga organisasion a mangidepensa iti ili ni Jehova. Ti laeng Dios ti makaisalakan kadakuada. Anianto ti aramidenda inton umay dagiti kabusor a mangikisap kadakuada?

³ No maysaka nga adipen ni Jehova, agtalekka kadi a kabaelan ken talaga nga isalakan ni Jehova ti ilina iti dakkel a rigat? Insurat ni apostol Pedro: “Ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot, ngem isaganana dagiti nakillo a tattao maipaay iti aldaw a panangukom tapno magessatda.” (2 Ped. 2:9) Bumileg ti panagtalektayo iti abilidad ni Jehova a mangispal iti ilina no utobentayo dagiti pagarigan no kasanona nga inispal dagiti adipenna iti napalabas. Usigentayo ti tallo a pagarigan.

 PANNAKAISPAL ITI SANGALUBONGAN A LAYUS

4. Ania dagiti masapul a maileppas sakbay nga umay ti Layus?

⁴ Umuna, usigentayo ti salaysay maipapan iti Layus idi kaaldawan ni Noe. Tapno maitungpal ti pagayatan ni Jehova, nasken a maileppas dagiti bambanag iti naikeddeng a tiempo. Masapul a maibangon ti dakkel a daong, ken sitatalged a maiserrek dagiti animal sakbay a dumteng ti Layus. Ipalgak ti salaysay ti Genesis a saan nga inuray ni Jehova a maibangon ti daong sakbay nga ikeddengna no kaano ti iyaay ti Layus, a kas man la masapul a baliwanna ti panangrugi ti Layus no kas pagarigan ta saan a malpas dayta iti naikeddeng a tiempo. Imbes ketdi, nabayagen nga inkeddeng ti Dios ti eksakto a panangrugi ti Layus sakbay pay nga imbagana ken Noe ti maipapan iti panagaramid iti daong. Kasanotay nga ammo dayta?

5. Ania a pangngeddeng ti impakaammo ni Jehova iti Genesis 6:3, ken kaano nga impakaammona dayta?

⁵ Kuna ti Biblia a nangaramid ni Jehova iti pangngeddeng idiay langit. Kinunana iti Genesis 6:3: “Ti espirituk saanto nga agtignay iti tao iti di nakedngan gapu ta isu lasag met. Iti kasta ti al-aldawna agdagupto iti sangagasut ket duapulo a tawen.” Saan a tuktukoyen dayta ti gagangay a kaatiddog ti biag ti tao. Ipakpakaammo ni Jehova no kaanona a pagpatinggaen ti amin a kinadakes ditoy daga. * Gapu ta nangrugi ti Layus idi 2370 B.C.E., maibagatayo ngarud nga impakaammo dayta ti Dios idi 2490 B.C.E. Agtawen idi ni Noe iti 480. (Gen. 7:6) Agarup 20 a tawen kalpasanna, idi 2470 B.C.E., naaddaan ni Noe iti annak. (Gen. 5:32) Agarup 100 a tawen laengen ti nabatbati sakbay a mangrugi ti Layus ngem saan pay nga impalgak ni Jehova ken Noe ti naisangsangayan nga annongenna iti pannakaisalakan dagiti tattao. Kasano pay kabayag sakbay nga ibaga dayta ti Dios ken Noe?

6. Kaano nga imbilin ni Jehova a mangbangon ni Noe iti daong?

⁶ Agparang a dinekdekada a naguray ni Jehova sakbay nga imbagana ken ni Noe ti aramidenna. Apay a maibagatayo dayta? Ipakita ti naipaltiing a rekord a nataengan ken naasawaanen dagiti annak ni Noe idi imbilin ti Dios ti pannakaibangon ti daong. Kinuna kenkuana ni Jehova: “Ipasdekko ti tulagko kenka; ket masapul a sumrekka iti daong, sika ken ti annakmo ken ti asawam ken ti assawa ti annakmo a maikuyog kenka.” (Gen. 6:9-18) Posible ngarud nga idi naibilin ken Noe a mangaramid iti daong, 40 wenno 50 laengen a tawen ti nabatbati sakbay a dumteng ti Layus.

7. (a) Kasano nga impakita ni Noe ken ti pamiliana ti pammatida? (b) Kaano nga imbaga ti Dios ti eksakto a panangrugi ti Layus?

⁷ Bayat a maibangbangon ti daong, pampanunoten la ketdi ni Noe ken ti pamiliana no kasano nga itungpal ti Dios ti panggepna ken no kaano nga umay ti Layus. Ngem nupay awan ti ammoda kadagita a detalye, intultuloyda latta nga imbangon ti daong. Kuna ti Kasuratan: “Inaramid ni Noe ti maitunos iti isuamin nga imbilin kenkuana ti Dios. Inaramidna ti kasta met laeng.” (Gen. 6:22) Pito nga aldaw sakbay a nagtudo​—apag-isu la a tiempo tapno maiserrek ni Noe ken ti pamiliana dagiti animal iti daong​—imbaga met laengen ni Jehova ti eksakto a panangrugi ti Layus. Gapuna, nakasaganan ti amin idi naluktan dagiti aribengbeng ti langlangit “idi maikanem a gasut a tawen ti panagbiag ni Noe, iti maikadua a bulan, iti maikasangapulo ket pito nga aldaw ti bulan.”​—Gen. 7:1-5, 11.

8. Kas ipakita ti salaysay maipapan iti Layus, kasano a makapagtalektayo nga ammo ni Jehova no kaano nga ispalen ti ilina?

 ⁸ Ti salaysay maipapan iti Layus paneknekanna nga ammo ni Jehova ti kasayaatan a tiempo ken kasayaatan a pamay-an a mangispal iti ilina. Bayat nga umas-asideg ti panagpatingga ti agdama a sistema ti bambanag, masiguradotayo a matungpal ti amin a pinanggep ni Jehova iti mismo nga “aldaw ken oras” nga inkeddengna.​—Mat. 24:36; basaen ti Habakuk 2:3.

NAISPALDA ITI NALABAGA A BAYBAY

9, 10. Kasano nga inusar ni Jehova ti ilina kas appan tapno masiluan ti buyot ti Egipto?

⁹ Kas naadaltayon, naan-anay a kontrolado ni Jehova no kaano a mapasamak ti bambanag tapno maitungpal ti panggepna. Ti maikadua a pagarigan nga usigentayo itampokna ti sabali pay a rason a makapagtalektayo a kabaelan ni Jehova nga ispalen ti ilina: Usarenna ti awan patinggana a pannakabalinna tapno sigurado a mapasamak ti pagayatanna. Kanayon a kabaelan ni Jehova nga ispalen dagiti adipenna a no dadduma, iyappanna pay ida tapno masiluan dagiti kabusorna. Kasta ti napasamak idi winayawayaanna dagiti Israelita manipud pannakaadipenda idiay Egipto.

¹⁰ Agarup tallo a milion ti bilang dagiti Israelita a pimmanaw idiay Egipto. Ni Jehova inusarna ni Moises a nangidalan kadakuada iti maysa a ruta tapno ipagarup ni Faraon a nayaw-awanda. (Basaen ti Exodo 14:1-4.) Gapu ta kayatna a gundawayan dayta nga oportunidad, indauluan ni Faraon ti buyotna a nangkamat kadagiti dati nga adipenda, ket napupokna ida iti Nalabaga a Baybay. Kasla awanen ti pagruaranda. (Ex. 14:5-10) Ngem ti agpayso, saan nga agpegpeggad dagiti Israelita. Apay? Gapu ta dandanin bumallaet ni Jehova para kadakuada.

11, 12. (a) Kasano a bimmallaet ni Jehova para iti ilina? (b) Ania ti resulta ti ibaballaet ti Dios, ken ania ti maadaltayo iti dayta maipapan ken Jehova?

¹¹ “Ti munmon nga ulep” a mangidaldalan kadagiti Israelita immakar iti likudanda a nangbangen iti buyot ni Faraon ken namagsipnget iti ayanda. Ngem ti munmon  ti nanglawag iti ayan dagiti Israelita iti rabii. (Basaen ti Exodo 14:19, 20.) Kalpasanna, binisngay ni Jehova ti baybay babaen ti napigsa a wayaway nga angin, ket “pinagbalinna ti labneng ti baybay a namaga a daga.” Bimmayag la ketdi dayta ta kuna ti salaysay: “Idi agangay limmasat ti annak ti Israel iti tengnga ti baybay iti namaga a daga.” No idilig kadagiti nakakaruahe a buyot ni Faraon, nabunbuntog ti panagabante dagiti Israelita. Ngem imposible latta a makamakam ida dagiti Egipcio ta ni Jehova ti makilablaban para iti Israel. “Riniribukna ti pakarso dagiti Egipcio. Ket inik-ikkatna ti pilpilid dagiti karuaheda iti kasta marigatanda idi a mangpataray.”​—Ex. 14:21-25.

¹² Idi sitatalged a nakaballasiw aminen nga Israelita, imbilin ni Jehova ken ni Moises: “Iyunnatmo ta imam iti ngatuen ti baybay, tapno agsubli ti dandanum iti ngatuen dagiti Egipcio, kadagiti karuaheda a pakigubat ken kadagiti kabalieroda.” Bayat nga ikagkagumaan dagiti soldado nga itarayan dagiti napegges a danum, “ni Jehova inwagnesna dagiti Egipcio iti tengnga ti baybay.” Awanen ti pagtarayanda. “Awan uray maysa kadakuada ti natedda.” (Ex. 14:26-28) Iti kasta, impakita ni Jehova a kabaelanna nga ispalen ti ilina iti aniaman a kasasaad.

NAKALASATDA ITI PANNAKADADAEL TI JERUSALEM

13. Ania dagiti instruksion nga inted ni Jesus, ken ania ti mabalin a pinanunot dagiti pasurotna?

¹³ Ammo ni Jehova no kasano ti eksakto a pannakapasamak ti bambanag tapno matungpal ti panggepna. Maitampok dayta iti maikatlo a pagarigan nga usigentayo: Ti pannakalakub ti Jerusalem idi umuna a siglo. Sakbay a madadael ti siudad idi 70 C.E, inusar ni Jehova ti Anakna a mangted kadagiti instruksion kadagiti Kristiano nga agnanaed idiay Jerusalem ken Judea tapno makalasatda. Kinuna ni Jesus: “Inton makitayo ti makarimon a banag a mamaglangalang, kas naisao babaen ken ni Daniel a mammadto, a sitatakder iti maysa a nasantuan a disso, . . . iti kasta dagidiay adda idiay Judea rugianda koma ti agkamang iti bambantay.” (Mat. 24:15, 16) Ngem kasano a maammuan dagiti pasurot ni Jesus no kaano a matungpal dayta a padto?

14. Ania dagiti pasamak a namagbalin a nalawag iti kaipapanan dagiti instruksion ni Jesus?

¹⁴ Iti panaglabas ti tawtawen, limmawag ti kaipapanan dagiti sasao ni Jesus. Idi 66 C.E., dimteng idiay Jerusalem ti buyot ti Roma nga indauluan ni Cestius Gallus tapno pasardengenda ti panagrebelde dagiti Judio. Idi nagkamang iti templo dagiti rebelde a Judio, a pagaammo kas Zealot, dagiti Romano a soldado dinadaelda ti pader ti templo. Para kadagiti alerto a Kristiano, nalawag ti kaipapanan dayta: Ti pagano a buyot a nakaawit iti idolatroso a bandera (“ti makarimon a banag”) nakadanonda agingga iti pader ti templo (“maysa a nasantuan a disso”). Panawenen nga “agkamang iti bambantay” dagiti pasurot ni Jesus. Ngem kasanoda a makaruar iti  nalakub a siudad? Adda dagiti di ninamnama a mapasamak.

15, 16. (a) Ania nga espesipiko nga instruksion ti inted ni Jesus, ken apay a nagpateg a tungpalen dayta dagiti pasurotna? (b) Ania ti pagpannurayan ti pannakaisalakantayo?

¹⁵ Ngem nakaskasdaaw ta nagsanud ni Cestius Gallus ken ti buyotna ken pimmanawda idiay Jerusalem. Kinamat ida dagiti Zealot. Gapu ta awan dagiti aglalaban a grupo, dagus a naaddaan dagiti pasurot ni Jesus iti gundaway nga agtalaw. Espesipiko nga imbilin ni Jesus a panawanda dagiti material a sanikuada ken agtalawda a dagus. (Basaen ti Mateo 24:17, 18.) Talaga kadi a masapul nga agtignayda a dagus? Wen, kas ipakita dagiti simmaganad a napasamak. Sumagmamano nga aldaw kalpasanna, nagsubli dagiti Zealot ket pinilitda dagiti umili ti Jerusalem ken Judea a makikadua iti panagrebelde. Nagpartak a kimmaro ti riribuk bayat nga agiinnagaw dagiti rebelde a Judio a mangkontrol iti siudad. Ad-adda a rimmigat ti agtalaw. Idi nagsubli dagiti Romano idi 70 C.E., imposiblen ti pumanaw. (Luc. 19:43) Napupoken ti asinoman a nagtalinaed iti siudad! Ngem naispal dagiti Kristiano a nangipangag kadagiti instruksion ni Jesus nga agkamang kadagiti bambantay. Napaneknekanda a mismo nga ammo ni Jehova no kasano nga ispalen ti ilina. Ania ti maadaltayo iti dayta a salaysay?

¹⁶ Bayat ti dakkel a rigat, masapul nga ipangag dagiti Kristiano dagiti instruksion manipud iti Sao ti Dios ken iti organisasionna. Kas pagarigan, adda moderno a kaitungpalan ti bilin ni Jesus a ‘rugianda ti agkamang iti bambantay.’ Ditay pay ammo ti eksakto a kaipapanan dayta a panagkamang. * Ngem masiguradotayo a silalawag nga ibaga ni Jehova ti kaipapanan dagita nga instruksion iti maitutop a tiempo. Gapu ta agpannuray iti kinatulnogtayo ti pannakaisalakantayo, isaludsodtayo iti bagitayo: ‘Agtultulnogak kadi kadagiti instruksion ni Jehova iti ilina ita? Agtultulnogak kadi a dagus wenno saan?’​—Sant. 3:17.

MAPABPABILEG PARA ITI MASANGUANAN

17. Ania ti ipakita ti padto ni Habakuk maipapan iti asidegen a pannakaraut ti ili ti Dios?

¹⁷ Subliantayo ti maudi nga iraraut ti Gog a nadakamat iti rugi. Iti umasping a padto, kinuna ni Habakuk: “Nangngegko, ket ti tianko nangrugi a makibur; gapu iti uni nagtayegteg dagiti bibigko; ti kinarinuker nangrugi a sumrek kadagiti tulangko; ket iti kasasaadko nariribukanak, tapno urayek koma a siuulimek ti aldaw ti rigat, iti isasang-atna [ti Dios] kadagiti tattao [dagiti mamutbuteng a soldado], tapno rubbuotenna ida.” (Hab. 3:16) Idi nangngeg ti propeta ti iraraut dagiti kabusor iti ili ti Dios, agkiburen ti tianna, agtigergeren ti bibigna, ken aglusdoyen. Ipakita ti reaksion ni Habakuk no kasano karigat ti kasasaadtayo inton rautendatayo ti nagdakkel a buyot ni Gog. Ngem sidadaan nga inuray ti propeta ti dakkel nga aldaw ni Jehova, nga agtalek nga ispalen ni Jehova ti ilina. Kasta met koma ti panagtalektayo.​—Hab. 3:18, 19.

18. (a) Apay nga awan panggapuantayo nga agbuteng iti asidegen a pannakarauttayo? (b) Ania ti sumaganad a pagsasaritaantayo?

¹⁸ Nalawag nga ipakita ti tallo a pagarigan nga inusigtayo nga ammo ni Jehova no kasano nga ispalen ti ilina. Matungpal ti panggepna ken sigurado nga agballigi. Ngem tapno makitatayo dayta a nadayag a panagballigi, masapul nga agtalinaedtayo a matalek agingga iti panungpalan. Kasanonatayo a tultulongan ita ni Jehova nga agtalinaed a natarnaw? Dayta ti pagsasaritaantayo iti sumaganad nga artikulo.

[Footnotes]

[Salsaludsod]

[Ladawan iti panid 24]

Talaga kadi nga agpegpeggad dagiti Israelita manipud iti buyot ni Faraon?