‘Kayat ti Anak nga Ipalgak ti Ama’

“No asino ti Ama, awan makaammo no di ti Anak, ken daydiay kayat a pangipalgakan kenkuana ti Anak.”​—LUC. 10:22.

ANIA TI SUNGBATMO?

Apay a maipalgak ni Jesus ti Amana iti naisangsangayan a pamay-an?

Kasano nga impalgak ni Jesus ti Amana iti sabsabali?

Kadagiti ania a pamay-an a matuladmo ti panangipalgak ni Jesus iti Ama?

1, 2. Ania a saludsod ti pakariruan ti adu, ken apay?

‘ASINO ti Dios?’ Adu ti mariro iti dayta a saludsod. Kas pagarigan, kaaduan nga agkunkuna a Kristiano ti mamati a ti Dios ket maysa a Trinidad. Ngem ibagada a narigat a matarusan dayta a doktrina. Kuna ti maysa nga autor ken klero a saan a mailawlawag ti pannursuro a Trinidad gapu ta adda dagiti saan a naan-anay a matarusan ti tao. Dadduma a mangakseptar iti teoria ti ebolusion ti mamati nga awan ti Dios. Ibagada a naiparna laeng a timmaud ti amin a nakaskasdaaw a parsua. Ngem saan nga ilibak ni Charles Darwin ti kaadda ti Dios. Kinunana a saan a kabaelan ti tao a tarusan a naan-anay ti maipapan iti Dios.

² Aniaman ti patpatien ti kaaduan a tattao, adda saludsodda maipapan iti kaadda ti Dios. Ngem no saanda a mapnek iti nabirokanda a sungbat, adu ti agsardengen nga agsukimat. Kinapudnona, ‘binulsek ni Satanas ti pampanunot dagiti di manamati.’ (2 Cor. 4:4) Di ngarud pakasdaawan a kaaduan a tattao ket ignorante ken mariro no ania ti kinapudno maipapan iti Ama, ti Namarsua iti uniberso!​—Isa. 45:18.

3. (a) Asino ti nangipalgak kadatayo iti Namarsua? (b) Ania dagiti saludsod nga usigentayo?

³ Ngem napateg a maammuan dagiti tattao ti kinapudno maipapan iti Dios. Apay? Gapu ta dagidiay laeng umawag iti “nagan ni Jehova” ti maisalakan. (Roma 10:13) Ti iyaawag iti nagan ti Dios ramanenna ti panangam-ammo ken Jehova kas maysa a Persona. Insuro ni Jesu-Kristo kadagiti adalanna dayta a nagpateg a pannakaammo. Impalgakna kadakuada ti Ama. (Basaen ti Lucas 10:22.) Apay a ni laeng Jesus ti makaipalgak iti Ama iti naisangsangayan a pamay-an? Kasanona nga inaramid dayta? Ken kasanotayo a matulad ti panangipalgakna iti Ama? Usigentayo dagita a saludsod.

 MAIPALGAK NI JESUS TI AMANA ITI NAISANGSANGAYAN A PAMAY-AN

4, 5. Apay a maipalgak ni Jesus ti Amana iti naisangsangayan a pamay-an?

⁴ Apay a maipalgak ni Jesus ti Amana iti naisangsangayan a pamay-an? Sakbay ngamin a naparsua ti dadduma pay a kita ti biag, addan idiay langit ti espiritu a parsua a nagbalin idi agangay a tao a ni Jesus. Isu “ti bugbugtong nga Anak ti Dios.” (Juan 1:14; 3:18) Anian a naisangsangayan a saad! Idi awan pay ti sabali a parsua, tinagiragsak ti Anak ti naipamaysa nga atension ni Amana. Gapu iti di mabilang a panawen a kaadda ti komunikasionda, adu ti nasursuro ti Anak maipapan iti Ama ken kadagiti galadna. Bayat a bumilbileg ti relasionda, umun-uneg met ti panangipategda iti maysa ken maysa. (Juan 5:20; 14:31) Nagadu la ketdi ti nasursuro ti Anak maipapan iti personalidad ti Amana!​—Basaen ti Colosas 1:15-17.

⁵ Ti Ama dinutokanna ti Anak kas pannakangiwatna, “Ti Sao ti Dios.” (Apoc. 19:13) Isu a ni laeng Jesus ti naikkan iti naisangsangayan nga annongen a mangipalgak iti Amana. Gapu iti dayta, insurat ni Juan a ti “Sao” a ni Jesus ket adda “iti saklot a saad iti Ama.” (Juan 1:1, 18) Nalabit tuktukoyen ni Juan ti kostumbre idi kaaldawanna a gagangay a maar-aramid kadagiti pannangan. Pagabayenda ti dua a bisita tapno makapagsaritada a naimbag. Gapu ta adda ti Anak “iti saklot a saad,” naaddaan iti nasinged a pannakisarita iti Amana.

6, 7. Kasano a nagtultuloy a simminged ti relasion ti Ama ken ti Anak?

⁶ Nagtultuloy a simminged ti relasion ti Ama ken ti Anak. Isu ti ‘pakaay-ayatan unay ti Dios iti inaldaw.’ (Basaen ti Proverbio 8:22, 23, 30, 31.) Di ngarud pakasdaawan a timmibker ti relasionda bayat a nagkadkaduada a nagtrabaho ken tinulad ti Anak dagiti galad ti Amana. Bayat a naparsua ti dadduma nga intelihente a parsua, nakita ti Anak no kasano ti panangtrato ni Jehova iti tunggal maysa kadakuada. Immuneg la ketdi ti apresasionna iti personalidad ti Dios.

⁷ Uray idi kinuestionaran ni Satanas ti kalintegan ni Jehova a mangituray, nakasursuro ti Anak iti panangipakita ni Jehova iti ayat, kinahustisia, sirib, ken pannakabalin idi naipasango iti narigat a situasion. Sigurado a dayta ti nangisagana ken Jesus a mangsango kadagiti rigat a mapasaranna iti ministeriona ditoy daga.​—Juan 5:19.

8. Kasano a matulongandatayo dagiti salaysay iti Ebanghelio a mangtarus kadagiti galad ti Ama?

⁸ Gapu iti nasinged a relasionna ken Jehova, ti laeng Anak ti mas detalyado a makailawlawag maipapan iti Ama. Adda pay kadi nasaysayaat a pamay-an a maam-ammotayo ti Ama no di ti panangadaltayo iti insuro ken inaramid ti bugbugtong nga Anakna? Kas pagarigan, dimo naan-anay a matarusan ti kaipapanan ti sao nga “ayat” no basbasaem laeng ti depinasionna iti diksionario. Ngem no adalentayo a naimbag dagiti nabiag a salaysay dagiti mannurat iti Ebanghelio maipapan iti ministerio ni Jesus ken iti panangtratona iti sabsabali, matarusantayo ti kaipapanan ti sasao a “ti Dios ket ayat.” (1 Juan 4:8, 16) Pudno met dayta iti dadduma pay a galad ti Dios nga impalgak ni Jesus kadagiti adalanna idi adda ditoy daga.

NO KASANO NGA IMPALGAK NI JESUS TI AMANA

9. (a) Ania ti dua a pamay-an nga impalgak ni Jesus ti Amana? (b) Ania nga ilustrasion ti inusar ni Jesus a nangipalgak iti Amana?

⁹ Kasano nga impalgak ni Jesus ti Ama  kadagiti adalanna ken kadagidiay agbalinto a pasurotna? Inaramidna dayta iti dua a pamay-an: babaen kadagiti pannursurona ken iti konduktana. Usigentayo nga umuna dagiti pannursuro ni Jesus. Makita kadagiti pannursurona ti nauneg a pannakaammona iti pampanunot, rikrikna, ken daldalan ni Amana. Kas pagarigan, inyarig ni Jesus ti Amana iti nadungngo a tao nga addaan iti arban a pimmanaw tapno birokenna ti maysa a napukaw a karnero. Kuna ni Jesus nga idi nasarakanna dayta, ‘nagrag-oanna nga ad-adda dayta ngem iti siam a pulo ket siam a di naiwawa.’ Ania ti kaipapanan dayta nga ilustrasion? Inlawlawag ni Jesus: “Kasta met, di matarigagayan a banag ken ni Amak nga adda sadi langit a mapukaw ti maysa kadagitoy a babassit.” (Mat. 18:12-14) Ania ti maadalmo iti dayta nga ilustrasion maipapan ken Jehova? Nalabit mariknam no dadduma a nabaybay-anka ken dika napateg. Ngem interesado ken maseknan kenka ti nailangitan nga Ama. Ibilangnaka a maysa “kadagitoy a babassit.”

10. Kasano nga impalgak ni Jesus ti Amana babaen ti konduktana?

¹⁰ Ti maikadua a pamay-an nga impalgak ni Jesus ti Amana kadagiti adalanna ket babaen ti konduktana. Isu nga idi kinuna ni apostol Felipe ken ni Jesus: “Ipakitam kadakami ti Ama,” siuumiso a naikuna ni Jesus: “Ti nakakita kaniak nakitana met ti Ama.” (Juan 14:8, 9) Usigentayo ti dadduma a pagarigan no kasano nga impakita ni Jesus dagiti galad ni Amana. Idi adda agkukutel a nagpakaasi ken Jesus a paimbagenna, sinagidna ti lalaki a “napno iti kukutel” sa kinunana: “Kayatko. Madalusanka koma.” Idi immimbag, awan duadua nga ammona a ni Jehova ti nangted ken Jesus iti pannakabalin a mangpaimbag kenkuana. (Luc. 5:12, 13) Kasta met nga idi natay ni Lazaro, narikna la ketdi dagiti adalan ti kinaasi ti Ama idi ‘nagsennaay ti espiritu ni Jesus ket nariribukan’ ken ‘nagarubos dagiti luana.’ Nupay ammo ni Jesus a pagungarenna ni Lazaro, nariknana ti saem a marikrikna ti pamilia ken gagayyem ni Lazaro. (Juan 11:32-35, 40-43) Sigurado nga adda met dagiti paboritom a salaysay iti Biblia maipapan kadagiti inaramid ni Jesus a mangipakita kenka iti kinaasi ti Ama.

11. (a) Idi dinalusan ni Jesus ti templo, ania ti impalgakna maipapan iti Amana? (b) Apay a makaliwliwa kadatayo ti salaysay maipapan iti panangdalus ni Jesus iti templo?

¹¹ Ngem ania ti maikunam iti panangdalus ni Jesus iti templo? Iladawanmo iti panunotmo ti eksena: Nangaramid ni Jesus iti pagsaplit a tali, ken pinaruarna dagiti aglaklako iti baka ken karnero. Imbukbokna dagiti sinsilio dagiti agsuksukat iti kuarta ken imbalintuagna dagiti lamisaanda. (Juan 2:13-17) Gapu iti dayta a tignay ni Jesus, nalagip dagiti adalan ti impadto ni Ari David: “Ti bin-ig a regta maipaay iti balaymo inibusnak.” (Sal. 69:9) Ipakita ti inaramid ni Jesus ti nabileg a tarigagayna  a mangidepensa iti pudno a panagdayaw. Nakitam kadi iti dayta a salaysay ti personalidad ti Ama? Ipalagipna kadatayo nga addaan ti Dios iti awan limitasionna a pannakabalin ken nasged a tarigagay a mangikisap iti kinadakes ditoy daga. Dayta a pananggura ni Jesus iti di umiso nga aramid ipakitana ti marikrikna ti Ama bayat a kitkitaenna ti nasaknap a kinadakes ita ditoy daga. Anian a makaliwliwa dayta kadatayo no agpaspasartayo iti kinaawan hustisia!

12, 13. Ania ti masursurom maipapan ken Jehova iti panangtrato ni Jesus kadagiti adalanna?

¹² Usigentayo ti maysa pay a pagarigan​—ti panangtrato ni Jesus kadagiti adalanna. Agtultuloy a pagririrrianda no asino ti katan-okan. (Mar. 9:33-35; 10:43; Luc. 9:46) Gapu iti nabayag a pannakikadua ni Jesus iti Amana, ammona ti rikna ni Jehova maipapan iti tendensia nga agpannakkel. (2 Sam. 22:28; Sal. 138:6) Ken nakitana dayta a kababalin ken Satanas a Diablo. Daytoy a napasindayag a parsua ket maseknan laeng iti kinaprominente ken saad. Gapuna, naladingitan la ketdi ni Jesus idi nakitana nga agtultuloy ti kinaambisioso dagiti adalan a sinanayna, uray dagiti apostol a pinilina! Impakita dagiti apostol dayta a kababalin agingga iti maudi nga aldaw ti biag ni Jesus ditoy daga. (Luc. 22:24-27) Ngem intultuloyna a siaasi a tinubngar ida. Saan a naawanan iti namnama a matuladdanto met laeng ti kinapakumbabana.​—Fil. 2:5-8.

¹³ Makitam kadi ti personalidad ti Ama iti siaanus a panangilinteg ni Jesus iti di umiso a kababalin dagiti adalanna? Makitam kadi iti aramid ken sasao ni Jesus a saan a baybay-an ti Ama ti ilina uray maulit-ulit nga agkamalida? Gapu ta ammotayo dagita a galad ti Dios, ditay kadi matignay nga agkararag ken dumawat iti pammakawanna no makaaramidtayo kadagiti kamali?

KAYAT TI ANAK NGA IPALGAK TI AMANA

14. Kasano nga impakita ni Jesus a kayatna nga ipalgak ti Ama?

¹⁴ Ikagumaan ti adu a diktador a kontrolen ken pagtalinaeden nga ignorante dagiti tattao babaen ti panangilimedda kadagiti impormasion. Ngem naiduma ni Jesus ta kayatna nga ibaga iti sabsabali dagiti impormasion a masapul a maammuanda maipapan iti Amana. (Basaen ti Mateo 11:27.) Inikkan pay ni Jesus dagiti adalanna iti ‘pannakabael nga agpanunot tapno magun-odanda ti pannakaammo iti daydiay napudno,’ ni Jehova a Dios. (1 Juan 5:20) Ania ti kaipapanan dayta? Tinulongan ni Jesus dagiti pasurotna a mangtarus kadagiti pannursurona maipapan iti Ama. Dina inlemmeng ti kinasiasino ti Ama babaen iti karkarna a pannursuro a di matarusan dagiti tattao kas iti doktrina a Trinidad.

15. Apay a saan nga imbaga ni Jesus ti amin nga impormasion maipapan iti Amana?

¹⁵ Impalgak kadi ni Jesus ti amin nga ammona maipapan iti Amana? Saan. Adda dagiti dina imbaga ket nainsiriban dayta a tignay. (Basaen ti Juan 16:12.) Apay? Gapu ta dagita a pannakaammo ket ‘saan a kabaelan idi nga awiten,’ wenno tarusan, dagiti adalanna. Ngem kas imbaga ni Jesus, adu a pannakaammo ti maipalgak inton dumteng ti “katulongan,” ti nasantuan nga espiritu, a mangidalan kadakuada “iti isuamin a kinapudno.” (Juan 16:7, 13) Adda dagiti impormasion a saan nga ibaga dagiti masirib a nagannak kadagiti annakda agingga a saanda pay a matarusan a naimbag dagita. Umasping iti dayta, inuray met ni Jesus ti tiempo a kabaelanen dagiti adalanna a tarusan ti dadduma a kinapudno maipapan iti Ama. Siaasi nga inkabilangan ni Jesus ti limitasionda.

 TULADEN NI JESUS BABAEN TI PANANGTULONG ITI SABSABALI A MANGAM-AMMO KEN JEHOVA

16, 17. Apay a kabaelam nga ipalgak ti Ama iti sabsabali?

¹⁶ No am-ammomon a naimbag ti maysa ken maapresiarmo ti naayat a personalidadna, dika kadi matignay a mangibaga iti sabsabali iti maipapan kenkuana? Idi adda ni Jesus ditoy daga, imbagana ti maipapan ken Amana. (Juan 17:25, 26) Posible kadi a matuladtayo ti panangipalgakna ken Jehova iti sabsabali?

¹⁷ Kas naadaltayon, naun-uneg nga amang ti pannakaammo ni Jesus iti Amana ngem iti asinoman. Ngem kayatna nga ibaga ti dadduma nga ammona ken inikkanna pay dagiti pasurotna iti abilidad a mangtarus kadagiti naun-uneg a bambanag maipapan iti personalidad ti Dios. Saan a kas iti kaaduan a tattao ita, ad-adda a maapresiartayo ti Amatayo babaen ti tulong ni Jesus. Anian a yamantayo ta kayat ni Jesus nga ipalgak kadatayo ti Amana babaen kadagiti pannursuro ken konduktana! Kinapudnona, maitutop nga ipannakkeltayo nga am-ammotayo ti Ama. (Jer. 9:24; 1 Cor. 1:31) Suminged kadatayo ni Jehova bayat nga ikagkagumaantayo ti suminged kenkuana. (Sant. 4:8) Iti kasta, kabaelantayon nga iranud ti pannakaammotayo iti sabsabali. Kasanotayo a maaramid dayta?

18, 19. Kadagiti ania a pamay-an a maipalgakmo ti Ama iti sabsabali? Ilawlawagmo.

¹⁸ Masapul a tuladentayo ti panangipalgak ni Jesus iti Ama babaen ti sao ken aramidtayo. Laglagipentayo nga adu a makasarsaritatayo iti ministerio ti saan a makaam-ammo iti Dios. Mabalin a di umiso ti kapanunotanda maipapan iti Dios gapu kadagiti ulbod a pannursuro. Mabalin nga isurotayo kadakuada ti ibaga ti Biblia a nagan ti Dios, ti panggepna para iti sangatauan, ken ti personalidadna. Kasta met, mabalin nga isaritatayo kadagiti kapammatiantayo ti dadduma a salaysay ti Biblia a mangipalgak iti personalidad ti Dios a ditay unay maapresiar idi. Iti kasta, magunggonaanda met.

¹⁹ Iti panangikagumaam a mangtulad ken Jesus, kasanom met a maipalgak ti Ama babaen iti konduktam? No makita dagiti tattao ti ayat ti Kristo iti konduktayo, umadanida iti Ama kasta met ken Jesus. (Efe. 5:1, 2) Pinaregtanatayo ni apostol Pablo a ‘mangtulad kenkuana, kas iti panangtuladna ken Kristo.’ (1 Cor. 11:1) Anian a nagsayaat a pribilehio ti panangtulong kadagiti tattao a mangam-ammo ken Jehova babaen iti konduktayo! Wen, itultuloytayo koma a tuladen ni Jesus babaen ti panangipalgaktayo iti Ama iti sabsabali.

[Salsaludsod]