Malagipyo Kadi?
Malagipyo Kadi?
Binasayo kadi a naimbag dagiti nabiit pay a ruar Ti Pagwanawanan? Kitaentayo no masungbatanyo dagiti sumaganad a saludsod:
Kasano nga agserbi a pakdaar kadatayo ti pagarigan ni Solomon?
Ni Ari Solomon ket binendisionan ken inusar ti Dios. Ngem bayat ti panagturayna, linabsingna ti bilin ti Dios. Inasawana ti pagano nga anak a babai ni Faraon, nagasawa iti adu, ken pinalubosanna dagiti pagano a babbai nga in-inut a nangiturong kenkuana iti palso a panagdayaw. Masapul a liklikantayo nga in-inut a tumaud kadatayo ti di umiso a kababalin wenno pagannayasan. (Deut. 7:1-4; 17:17; 1 Ar. 11:4-8)—12/15, panid 10-12.
Apay a maibagatayo a ni Sara ket managbuteng iti Dios ken maipatpateg nga asawa?
Idi imbilin ti Dios ken ni Abraham a pumanaw iti Ur, kaipapananna a panawanna ti pamilia, gagayyem, ken ti nanam-ay a biagna tapno mapan iti lugar a dina ammo. Ngem nakikooperar ni Sara ken nagtalek nga isu ket bendisionan ti Dios. Rinaemna ni Abraham ken nangipakita iti nagsasayaat a galad.—1/1, panid 8.
Apay a kiniddaw ni Jehova nga idaton ni Abraham ti ipatpategna nga anak?
Nagpateg a laglagipentayo a saan nga impalubos ti Dios nga ituloy ni Abraham nga idaton ni Isaac. Ipakita dayta a pasamak no kasano kadakkel ti insakripisio ti Dios iti panangidatonna iti Anakna a ni Jesus.—1/1, panid 23.
Ania ti mangipakita a manipud pay idi umuna a siglo, kanayon nga adda dagiti pudno a napulotan a Kristiano ditoy daga?
Iti pangngarig ni Jesus maipapan kadagiti “trigo” ken “dakes a ruot,” ti “nasayaat a bin-i” tuktukoyenna dagiti “annak ti pagarian.” (Mat. 13:24-30, 38) Aggiddan a dumakkel dagiti dakes a ruot ken dagiti trigo agingga iti panagani. Nupay ditay masigurado no siasino dagiti klase trigo, kanayon nga adda dagiti napulotan agingga iti kaaldawantayo.—1/15, panid 7.
Ania dagiti pasamak a direkta nga agresulta iti Armagedon?
Mangipaulogto dagiti nasion iti maysa a deklarasion ti “Talna ken talged!” (1 Tes. 5:3) Dagiti gobierno busorendanto ti palso a relihion. (Apoc. 17:15-18) Marautto dagiti pudno nga agdaydayaw. Kalpasanna, dumtengton ti panungpalan.—2/1, panid 9.
Kasanotayo a malabanan ti tendensia nga umapal?
Makatulong kadatayo dagitoy nga addang: Patanoren ti panagayat kadagiti kakabsat, makilangen kadagiti agserserbi iti Dios, mangbirok kadagiti pamay-an nga agaramid iti naimbag, ken ‘makipagrag-o kadagiti tattao nga agrag-o.’ (Roma 12:15)—2/15, panid 16-17.
Siasino dagiti agsasao iti lenguahe a Nahuatl, ken ania ti maar-aramid para kadakuada?
Lenguahe dayta dagiti nagkauna nga Aztec ken us-usaren pay laeng dayta ti 1.5 a milion a tattao idiay Mexico. Mangaskasaba dagiti Saksi iti lenguahe a Nahuatl, ken magun-odan ti dadduma a literatura iti dayta a lenguahe.—3/1, panid 13-14.
Ania dagiti prinsipio a laglagipem no mangbalakadka?
Ammuem ti pudno a situasion. Liklikam ti nadarasudos a panangbalakad. Sipapakumbaba nga iyaplikarmo ti Sao ti Dios. Usarem dagiti publikasion. Liklikam nga idesisionan ti sabsabali.—3/15, panid 7-9.
Ania ti kayat a sawen ni Jesus idi pinaregtana dagiti dumdumngeg kenkuana a kumuyogda iti dua a milia? (Mat. 5:41)
Idi a tiempo, dagiti Romano a simmakup iti Israel mabalin a pilitenda nga agserbi ti maysa a tao. Idi pinaregta ni Jesus dagiti dumdumngeg kenkuana a kumuyogda iti dua a milia, ibagbagana a masapul a situtulok koma nga aramidenda dagiti serbisio a kalikaguman dagiti agturay.—4/1, panid 9.