Kas insalaysay ni Leonard Smith

Adda dua a teksto iti Biblia a magusgustuak idi agtutuboak pay. Kalpasan ti nasurok a 70 a tawen, malagipko pay laeng ti tiempo a naawatak ti kaipapanan ti Zacarias 8:23 a nangdakamat iti “sangapulo a lallaki” a kumkumpet iti “pandiling ti maysa a lalaki a Judio.” Kinunada iti Judio: “Kumuyogkaminto kadakayo, ta nangngegmi a ti Dios adda kadakayo.”

TI Judio a lalaki iladawanna dagiti napulotan a Kristiano, ken ti “sangapulo a lallaki” iladawanda ti “sabsabali a karnero,” wenno “Jonadab,” kas awag idi kadakuada. * (Juan 10:16) Idi natarusak dayta a kinapudno, nabigbigko a ti pannakatungpal ti namnamak a biag nga agnanayon ditoy daga ket nakadepende iti nasungdo a panangsuportak iti klase napulotan.

Dakkel met ti epektona kaniak ti ilustrasion ni Jesus iti Mateo 25:31-46 maipapan kadagiti “karnero” ken “kalding.” Dagiti “karnero” iladawanda dagidiay naanamongan bayat ti panangukom inton tiempo ti panungpalan gapu ta nagaramidda iti kinaimbag kadagiti napulotan a kakabsat ni Kristo nga adda pay laeng ditoy daga. Kas agtutubo a Jonadab, kinunak iti bagik, ‘Len, no kayatmo nga ibilangnaka ni Kristo kas maysa a karnero, masapul a suportaram dagiti napulotan a kakabsatna, ken surotem ti panangidauloda gapu ta ti Dios adda kadakuada.’ Dayta a pannakaawat ti nangiwanwan kaniak iti nasurok a pito a dekada.

‘ANIA TI AKEMKO?’

Nabautisaran ni nanangko idi 1925 iti maysa a paggigimongan iti Bethel. Naawagan dayta iti London Tabernacle ken us-usaren dagiti lumugar a kakabsat. Nayanakak idi Oktubre 15, 1926. Idi Marso 1940, nagpabautisarak iti maysa nga asamblea idiay Dover iti kosta ti England. Immuneg ti panagayatko iti kinapudno ti Biblia. Gapu ta napulotan a Kristiano ni Nanang, isu ti immuna nga arigna kimpetak a ‘pandiling ti maysa a Judio.’ Saan idi nga agserserbi ken Jehova da Tatang ken manangko. Naikamengkami iti kongregasion ti Gillingham iti abagatan a daya ti England, a kaaduan a kamengna ket napulotan. Mapagulidanan ti kinaregta ni nanangko a mangasaba.

Idi Setiembre 1941, iti maysa a kombension iti siudad ti Leicester, adda palawag a napauluan iti “Integrity” a nangusig iti isyu maipapan iti sapasap a panangituray. Idi laeng a natarusak a karamantayo iti isyu iti nagbaetan ni Jehova ken ni Satanas. Gapuna, masapul a dumasigtayo ken ni Jehova ken agtalinaedtayo a natarnaw kenkuana kas Soberano iti Uniberso.

Iti dayta a kombension, namin-adu a naipaganetget ti panagpayunir ken naiparegta kadagiti agtutubo a pagbalinenda dayta a kalat. Ti palawag a napauluan iti “Pioneer’s Place in the Organization” pinagpanunotnak, ‘Ania ti akemko?’ Dayta a kombension kinombinsirnak a kas maysa a Jonadab responsabilidadko  a tulongan ti klase napulotan iti trabaho a panangasaba agingga a kabaelak. Idiay a mismo Leicester a sinuratak ti aplikasionko nga agbalin a maysa kadagiti payunir.

PANAGPAYUNIR BAYAT TI GUBAT

Idi Disiembre 1, 1941, iti edad a 15, nadutokanak kas special pioneer. Ni Nanang ti umuna a partner-ko ngem kalpasan ti agarup makatawen, nagsardeng a payunir gapu iti salun-atna. Ti sanga nga opisina ti London inikkannak iti baro a partner, ni Ron Parkin a kameng itan ti Branch Committee idiay Puerto Rico.

Naibaonkami kadagiti ili ti Broadstairs ken Ramsgate nga adda iti igid ti baybay iti probinsia ti Kent. Nagabangkami sadiay iti maysa a siled. Ti binulan nga allowance ti special pioneer ket 40 shilling (agarup $8 U.S. idi). Isu a no makabayadkamin iti abang, bassiten ti matedda a kuartami, ken kanayon a dimi sigurado no pangalaanmi iti igatangmi iti sumaruno a kanenmi. Ngem kanayon nga ipaay ni Jehova ti kasapulanmi.

Masansan nga agbisikletakami a subaenmi ti napigsa nga angin nga aggapu iti North Sea uray adu ti karga ti bisikletami. Nagpeggad met ti biagmi gapu kadagiti rumaut nga eroplano ken V-1 missile dagiti German a lumabas iti Kent a mangbomba iti London. Naminsan, limmagtoak manipud bisikletak ken timpuakak iti maysa a kanal idi adda bomba a limmabas iti ngatuen ti ulok sa bimtak iti asideg a talon. Nupay kasta, naragsak latta dagiti tawen a panagpayunirmi idiay Kent.

NAGBALINAK A BETHELITE

Kanayon a maragragsakan ni Nanang a manges-estoria iti Bethel. “Awanen ti nasaysayaat pay a kayatko para kenka no di ti panagbalinmo a Bethelite,” kunana. Isu a napalalo ti ragsak ken siddaawko idi naawisak a mapan iti Bethel idiay London idi Enero 1946 tapno tumulong iti trabaho sadiay iti uneg ti tallo a lawas. Iti ngudo dagidi a lawas, kiniddaw ti adipen ti sanga a ni Pryce Hughes nga agtalinaedak iti Bethel. Ti pannakasanayko sadiay ti nakatulong kaniak iti intero a panagbiagko.

Agarup 30 idi ti miembro ti pamilia ti London Bethel, a kaaduanna ket agtutubo a babbaro. Dadduma ket napulotan a kakabsat a lallaki a pakairamanan da Pryce Hughes, Edgar Clay, ken Jack Barr a nagbalin idi agangay a kameng ti Bagi a Manarawidwid. Anian a pribilehio a suportaran dagiti kakabsat ni Kristo babaen ti panangusarko iti kinaagtutubok nga agtrabaho iti sidong ti naespirituan a panangiwanwan dagitoy nga “ad-adigi”!​—Gal. 2:9.

Naminsan, bayat ti kaaddak iti Bethel, imbaga ti maysa a kabsat nga adda kabsat a babai iti ruar a mangbirbirok kaniak. Diak ninamnama a ni Nanang dayta nga adda iggemna a regalo. Kunana a saanen a sumrek tapno saanak a maisturbo iti trabahok, isu nga inyawatna lattan ti regalo sa pimmanaw. Naglaon dayta iti naimeng a kagay. Ti kinadungngona impalagipna kaniak ti panangited ni Anna iti lambon iti anakna a ni Samuel bayat ti panagserbina iti tabernakulo.​—1 Sam. 2:18, 19.

GILEAD​—TI SAAN A MALIPATAN A KAPADASAN

Idi 1947, lima kadakami a Bethelite ti naawis a tumabuno iti Gilead School idiay United States ket iti simmaganad a tawen, tinabunuanmi ti maika-11 a klase. Idi simmangpetkami sadiay, napalalo ti lamiisna iti makin-amianan a paset ti New York nga ayan ti eskuelaan. Anian a ragsakko ta adda naimeng a kagay nga inted ni Nanang!

Diak malipatan ti innem a bulan a panageskuelak iti Gilead. Limmawa ti  panangmatmatko gapu iti pannakikaduak kadagiti kaklasek a naggapu iti 16 a pagilian. Gapu iti panageskuelak, rimmang-ayak iti naespirituan ken nagunggonaanak iti pannakikaduak kadagiti nataengan a Kristiano. Maysa kadakuada ti kaklasek a ni Lloyd Barry; ti instruktor a ni Albert Schroeder; ken ni John Booth nga overseer ti Kingdom Farm (nga ayan idi ti Gilead School). Aminda ket nagbalin a kameng ti Bagi a Manarawidwid idi agangay. Impategko ti naayat a balakad dagitoy a kakabsat ken ti mapagwadan a kinasungdoda ken Jehova ken iti organisasionna.

PANAGSERBI ITI SIRKITO KEN PANAGSUBLI ITI BETHEL

Idi nagraduarak iti Gilead, nadutokanak kas manangaywan iti sirkito iti estado ti Ohio, U.S.A. Agtawenak laeng idi iti 21, ngem sibabara nga inabrasa dagiti kakabsat ti kinagagarko kas maysa nga agtutubo. Iti dayta a sirkito, adu ti nasursurok kadagiti aduan kapadasan a natataengan a kakabsat a lallaki.

Kalpasan ti sumagmamano a bulan, naawisak nga agsubli iti Brooklyn Bethel para iti kanayonan a panagsanay. Naam-amok idi dagiti adigi a kas kada Milton Henschel, Karl Klein, Nathan Knorr, T. J. (Bud) Sullivan, ken Lyman Swingle. Nagserbida amin idi a kameng ti Bagi a Manarawidwid. Makapabileg a kapadasan ti pannakakita kadakuada nga agtartrabaho ken pannakapaliiw ti wagas ti panagbiagda kas Kristiano. Bimmileg unay ti panagtalekko iti organisasion ni Jehova. Kalpasanna, pinagsublidak idiay Europe tapno itultuloyko sadiay ti ministeriok.

Natay ni Nanang idi Pebrero 1950. Kalpasan ti pumpon, nagsasaritakami iti nalapat kada Tatang ken Manang Dora. Dinamagko no ania ti planoda maipapan iti kinapudno ita ta awanen ni Nanang ken awanak iti poderdan. Am-ammo ken raraemenda ti maysa a nataengan a napulotan a kabsat a ni Harry Browning, ket immanamongda a makipagadal iti Biblia kenkuana. Iti uneg laeng ti makatawen, nabautisaranen da Tatang ken Manang Dora. Idi agangay, nadutokan ni Tatang kas adipen iti kongregasion ti Gillingham. Kalpasan ti ipapatay ni Tatang, nakiasawa ni Manang Dora iti matalek a panglakayen a ni Roy Moreton. Sisusungdo a nagserbi ken Jehova agingga iti ipapatayna idi 2010.

ITUTULONG ITI FRANCE

Nagadalak idi iti French, German, ken Latin iti maysa a publiko nga eskuelaan. Kadagita a tallo a lenguahe, French ti pakarigatak unay. Isu nga aglalaok ti mariknak idi kiniddawda a tumulongak iti Bethel iti Paris, France. Naaddaanak iti pribilehio sadiay a makipagtrabaho iti adipen ti sanga a ni Henri Geiger a maysa a nataengan a napulotan a kabsat. Saan a kanayon a nalaka ti trabaho ken sigurado nga adu ti kamalik ngem adu ti nasursurok iti pannakilangenko iti sabsabali.

Kalpasan ti gubat, naiplano ti umuna nga internasional a kombension idiay Paris. Naangay dayta idi 1951. Karamanak kadagiti nangorganisar iti dayta. Immaynak tinulongan ditoy Bethel ti maysa nga agtutubo nga agdaldaliasat a manangaywan a ni Léopold Jontès. Idi agangay, nadutokan ni Léopold kas manangaywan iti sanga. Naangay ti kombension idiay Palais des sports, nga asideg ti Eiffel Tower. Naggapu dagiti delegado iti 28 a pagilian. Iti maudi nga aldaw, adda 10,456 a timmabuno. Naragsakan dagiti 6,000 a Saksi a French a nakakita iti dayta!

Idi kasangsangpetko ditoy France, bassit laeng ti ammok a French. Ti kamalik ket agsaoak laeng iti  French no siguradoak iti ibagak. Ngem no dika agkamali, di pulos mailinteg ti panagsaom ket dika rumang-ay.

Tapno masolusionan dayta, nagenrolak iti eskuelaan nga agisursuro iti French kadagiti ganggannaet. Ageskuelaak iti rabii no kasta nga awan ti gimong. Nasursurok nga ipateg ti pagsasao a French, ken immuneg dayta iti panaglabas dagiti tawen. Gapu iti dayta, nakatulongak iti trabaho a panagipatarus iti sanga nga opisina ti France. Idi agangay, nagbalinak a translator nga ipatarusko ti English iti French. Maysa a pribilehio ti mangtulong kadagiti kakabsat nga agsasao iti French iti intero a lubong tapno maawatanda ti naespirituan a taraon nga ipapaay ti klase adipen.​—Mat. 24:45-47.

PANAGASAWA KEN DADDUMA PAY A PRIBILEHIO

Idi 1956, nagkasarkami ken Esther, maysa a Swiss a payunir a naam-ammok sumagmamano a tawen ti napalabasen. Nagkasarkami iti Kingdom Hall nga abay ti London Bethel (ti dati a London Tabernacle, a nagbautisaran ni nanangko). Ni Kabsat Hughes ti nangipaay iti palawag ti kasar. Presente ti Nanang ni Esther, a nailangitan met ti namnamana. Gapu iti panagasawak, saanak la a naaddaan iti napintas ken nasungdo a kadua no di ket naaddaanak pay iti adu a gundaway a makilangen iti nasingpet ken naespirituan a katugangan. Naturposna ti naindagaan a biagna idi 2000.

Kalpasan ti kasarmi, nagnaedkami ken Esther iti ruar ti Bethel. Nagtultuloyak latta a translator ti Bethel bayat nga agserserbi ni Esther kas special pioneer iti makinruar a paset ti Paris. Adu ti natulonganna a nagbalin nga adipen ni Jehova. Idi 1964, naawiskami nga agserbi iti Bethel. Idi damo a mabukel ti Branch Committee idi 1976, nadutokanak kas maysa a kameng dayta. Nagtultuloy ti naayat a suporta ni Esther iti panaglabas dagiti tawen.

“SAANTO A KANKANAYON NGA ADDAAK KADAKAYO”

Ibilangko a pribilehio ti sagpaminsan a panagsubli iti sangalubongan a hedkuarter idiay New York. Bayat dagita nga ibibisitak, nagsayaat dagiti balakad nga impaay ti nadumaduma a kameng ti Bagi a Manarawidwid. Kas pagarigan, idi inyebkasko ti pakaseknak maipapan iti panangileppas iti dadduma a trabaho, immisem ni Kabsat Knorr ket kinunana: “Dika madanagan. Agtrabahoka laeng!” Manipud idin, no maurnonganak iti trabaho, imbes a madanaganak, masansan a rugiak ti maysa a trabaho kalpasanna isarunok manen ti sabali ket kaaduanna a malpas ti trabaho iti eksakto a tiempo.

Sakbay ti ipapatay ni Jesus, kinunana kadagiti adalanna: “Saanto a kankanayon nga addaak kadakayo.” (Mat. 26:11) Kas kameng ti sabsabali a karnero, ammotayo met a saan a kanayon a kaduatayo ditoy daga dagiti napulotan a kakabsat ni Kristo. Gapuna, ibilangko a dakkel a pribilehio ti nasurok a 70 a tawen a nasinged a pannakikadua iti adu a napulotan​—a maragragsakan a kumkumpet iti pandiling ti maysa a Judio.

[Footnote]

[Blurb iti panid 21]

Immisem ni Kabsat Knorr ket kinunana: “Dika madanagan. Agtrabahoka laeng!”

[Dagiti Ladawan iti panid 19]

(Kannigid) Da Nanang ken Tatang

(Kannawan) Iti aglawlaw ti eskuelaan ti Gilead idi 1948, suotko ti naimeng a kagay nga inted ni Nanang

[Ladawan iti panid 20]

Ipatpatarusko ti palawag ni Kabsat Lloyd Barry iti dedikasion ti sanga nga opisina ti France idi 1997

[Dagiti Ladawan iti panid 21]

(Kannigid) Iti aldaw ti kasarmi ken Esther

(Kannawan) Bayat ti panangasabami a dua