Taginayonem a Naan-anay ti Pusom ken Jehova
Taginayonem a Naan-anay ti Pusom ken Jehova
“Anakko, ammuem ti Dios ni amam ket agserbika kenkuana buyogen ti naan-anay a puso.”—1 CRON. 28:9.
BIROKEM TI SUNGBAT DAGITOY A SALUDSOD:
Ania ti piguratibo a puso?
Ania ti maysa a pamay-an a masukimattayo ti pusotayo?
Kasanotayo a makapagtultuloy nga agserbi ken Jehova buyogen ti naan-anay a puso?
1, 2. (a) Ania a paset ti bagi ti masansan a dakamaten ti Sao ti Dios iti piguratibo a pamay-an? (b) Apay a nagpateg a matarusantayo ti kaipapanan ti piguratibo a puso?
DAGITI paset ti bagi ti tao ket masansan a tukoyen ti Sao ti Dios iti piguratibo a pamay-an. Kas pagarigan, kinuna ni patriarka Job: “Awan kinaranggas kadagiti dakulapko.” Napaliiw ni Ari Solomon: “Ti damag a naimbag palukmegenna dagiti tulang.” Impasigurado ni Jehova ken ni Ezequiel: “Pinagbalinko ti mugingmo . . . a natangtangken ngem iti pamulinawen.” Ken adda nagkuna ken apostol Pablo: “Mangidatdatagka iti sumagmamano a bambanag a karkarna kadagiti lapayagmi.”—Job 16:17; Prov. 15:30; Ezeq. 3:9; Ara. 17:20.
2 Ngem adda maysa a paset ti bagi a masansan a madakamat iti Biblia iti piguratibo a pamay-an. Dayta ti dinakamat ti matalek a ni Anna iti kararagna: “Ti pusok agrag-o ken Jehova.” (1 Sam. 2:1) Kinapudnona, dandani sangaribu a daras a dinakamat dagiti mannurat ti Biblia ti puso, a kaaduan kadagita ket piguratibo. Nagpateg a matarusantayo ti iladladawan ti puso gapu ta kuna ti Biblia a masapul a salaknibantayo dayta.—Basaen ti Proverbio 4:23.
ANIA TI PIGURATIBO A PUSO?
3. Kasanotayo a matarusan ti kaipapanan ti sao a “puso” iti Biblia? Iyilustrarmo.
3 Nupay saan a depinaren ti Biblia ti sao a “puso,” tulongannatayo dayta a mangtarus iti kaipapananna. Kasano? Kas panangyilustrar, panunotem ti maysa a nagpintas a ladawan a naaramid iti rinibu a napagdedekket a babassit a bato. Tapno makitam ti intero a ladawan, masapul nga umatraska. Umasping iti dayta, arigna umatrastayo tapno makitatayo ti adu a nakausaran ti sao a “puso” iti Biblia. No mapagkakadua dagita, makabukeltayo iti maysa a ladawan. Ania a ladawan?
4. (a) Ania ti iladladawan ti “puso”? (b) Ania ti kaipapanan ti sasao ni Jesus iti Mateo 22:37?
4 Usaren dagiti mannurat iti Biblia ti sao a “puso” a mangiladawan iti makin-uneg a kinatao ti maysa. Ramanen dayta ti tarigagay, pampanunot, personalidad, kababalin, abilidad, motibo, ken kalattayo. (Basaen ti Deuteronomio 15:7; Proverbio 16:9; Aramid 2:26.) Sigun iti maysa a reperensia, dayta “ti makin-uneg a pakabuklan ti maysa a tao.” No dadduma, limitado laeng ti tuktukoyen ti “puso.” Kas pagarigan, kinuna ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mat. 22:37) Iti dayta a teksto, ti puso tuktukoyenna ti emosion, tarigagay, ken rikrikna ti maysa a tao. Ti saggaysa a panangdakamat ni Jesus iti puso, kararua, ken panunot, ipaganetgetna a masapul a makita iti rikna, panagbiag, ken panagpampanunottayo ti panagayattayo iti Dios. (Juan 17:3; Efe. 6:6) Ngem no “puso” laeng ti nadakamat, tuktukoyenna ti makin-uneg a kinatao.
NO APAY A MASAPUL A SALAKNIBANTAYO TI PUSOTAYO
5. Apay nga aramidentayo ti amin a kabaelantayo nga agserbi ken Jehova buyogen ti naan-anay a puso?
5 No maipapan iti puso, impalagip ni Ari David ken Solomon: “Anakko, ammuem ti Dios ni amam ket agserbika kenkuana buyogen ti naan-anay a puso ken buyogen ti naragsak a kararua; ta amin a puspuso sukimaten ni Jehova, ket tunggal pagannayasan ti pampanunot mailasinna.” (1 Cron. 28:9) Kinapudnona, ni Jehova ti Manangsukimat iti amin a puso, agraman ti pusotayo. (Prov. 17:3; 21:2) Ti makitana iti pusotayo ket dakkel ti epektona iti relasiontayo kenkuana ken iti masakbayantayo. Nainsiriban ngarud nga ipangagtayo ti naipaltiing a balakad ni David babaen ti panangaramidtayo iti amin a kabaelantayo nga agserbi ken Jehova buyogen ti naan-anay a puso.
6. Ania ti rumbeng a bigbigentayo mainaig iti determinasiontayo nga agserbi ken Jehova?
6 Kas Saksi ni Jehova, ti kinaregtatayo kadagiti Nakristianuan nga aktibidad ipakitana ti nauneg a tarigagaytayo nga agserbi iti Dios buyogen ti naan-anay a puso. Ngem ammotayo a nabileg ti impluensia ti dakes a lubong ni Satanas ken ti tendensiatayo nga agbasol. Mabalin a pakapuyenda ti determinasiontayo nga agserbi iti Dios iti amin puso. (Jer. 17:9; Efe. 2:2) Tapno masiguradotayo a saan a mapasamak dayta, masapul a regular a sukimatentayo ti pusotayo. Kasanotayo a maaramid dayta?
7. Ania ti mangipakita iti kasasaad ti pusotayo?
7 No kasano a saan a makita ti bugas ti kayo, saan met a makita ti makin-uneg a personalidadtayo. Ngem kas dinakamat ni Jesus iti Sermon iti Bantay, no kasano a makita ti kasasaad ti kayo kadagiti bungana, makita met ti pudno a kasasaad ti pusotayo kadagiti aramidtayo. (Mat. 7:17-20) Usigentayo ti maysa kadagita nga aramid.
MAYSA A PAMAY-AN A MASUKIMATTAYO TI PUSOTAYO
8. Sigun iti sasao ni Jesus iti Mateo 6:33, kasanotayo a maipakita ti linaon ti pusotayo?
8 Iti Sermon ni Jesus iti Bantay, imbagana kadagiti dumdumngeg no ania ti rumbeng nga aramidenda tapno maipakitada ti naimpusuan a tarigagayda nga agserbi ken Jehova. Kinunana: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.” (Mat. 6:33) Kinapudnona, ti iyun-unatayo iti biagtayo ipakitana ti tarigagay, pampanunot, ken panggep nga adda iti kaunggan ti pusotayo. Isu a ti maysa a pamay-an tapno maammuantayo no naimpusuan nga agserserbitayo iti Dios ket ti panangusigtayo kadagiti prioridadtayo iti biag.
9. Ania ti inyawis ni Jesus iti sumagmamano a lallaki, ken ania ti ipalgak ti reaksionda?
9 Di nagbayag kalpasan nga imbaga ni Jesus kadagiti pasurotna nga ‘itultuloyda a sapulen nga umuna ti pagarian,’ adda napasamak a mangipakita no kasano a maipalgak ti kasasaad ti puso ti maysa babaen kadagiti iyun-unana iti biag. Ti mannurat iti Ebanghelio a ni Lucas dinakamatna dayta a pasamak idi kinunana a ‘sititibker nga inturong ni Jesus ti rupana tapno mapan idiay Jerusalem’ nupay ammona no ania ti agur-uray kenkuana sadiay. Bayat a “magmagnada” kadagiti apostolna, adda sumagmamano a lallaki a nakasaritana ket inawisna: “Agbalinka a pasurotko.” Kayat dagitoy a lallaki a patgan ti awis ni Jesus ngem adda dagiti kondisionda. Kuna ti maysa a lalaki: “Palubosannak a pumanaw pay nga umuna ket itabonko ni amak.” Kinuna met ti maysa: “Sumurotakto kenka, Apo; ngem umuna pay a palubosannak nga agpakada kadagidiay adda iti sangakabbalayak.” (Luc. 9:51, 57-61) Anian a nagdakkel ti nagdumaan ti natibker a desision ni Jesus a mangaramid iti pagayatan ti Dios ken ti narabaw a pambar dagidi a lallaki! Impakitada a saan a naan-anay ti pusoda nga agserbi iti Dios gapu ta inyun-unada dagiti bukodda a pakaseknan imbes a dagiti interes ti Pagarian.
10. (a) Ania ti reaksiontayo iti awis ni Jesus nga agbalin a pasurotna? (b) Ania nga ilustrasion ti dinakamat ni Jesus?
10 Saan a kas kadagidiay nga agbalin koma nga adalan, pinatgantayo ti awis ni Jesus nga agbalin a pasurotna isu nga inaldaw nga agserserbitayo itan ken Jehova. Iti kasta, ipakpakitatayo no ania ti riknatayo ken Jehova iti kaunggan ti pusotayo. Ngem uray no aktibotayo iti kongregasion, laglagipentayo koma a mabalin nga agpeggad ti pusotayo. Kasano? Imbaga dayta ni Jesus idi nakisarita dagidiay agbalin koma nga adalanna. Kinunana: “Awan ti tao a nangyiggem ti imana iti arado ket kumita iti bambanag iti likudan ti maikari maipaay iti pagarian ti Dios.” (Luc. 9:62) Ania ti maadaltayo iti dayta nga ilustrasion?
‘KUMKUMPETTAYO KADI ITI NAIMBAG’?
11. Ania ti napasamak iti trabaho ti mannalon iti ilustrasion ni Jesus, ken apay?
11 Tapno matarusantayo a naimbag ti maadaltayo iti ababa nga ilustrasion ni Jesus, nayonantayo ti detalye daytoy nga ilustrasion. Madama nga agar-arado ti maysa a mannalon. Ngem bayat nga agar-arado, saan a maikkat iti panunotna ti nalinong a balayda, nga ayan ti pamilia ken gagayyemna a mangmangan, agkakatawa, ken agraragsak. Tartarigagayanna dagita. Kalpasan ti sumagmamano a kanito a panagaradona, tarigagayanna unayen dagita nga uray la insardengnan ti agarado ket sinangonan ti “bambanag iti likudan.” Nupay adu pay ti trabaho a mairingpas sakbay a mamulaan ti talon, nasinga ti mannalon ken naapektaran ti trabahona. Siempre, maupay ti amo gapu iti kinaawan anus ti trabahadorna.
12. Ania ti makitatayo a pagpadaan ti mannalon iti ilustrasion ni Jesus ken ti dadduma a Kristiano ita?
12 Usigentayo no kasano a mapasamak dayta a situasion iti kaaldawantayo. Ti mannalon iladawanna ti asinoman a Kristiano a kasla naregta met ngem iti kinapudnona, agpegpeggad iti naespirituan. Kas panangidilig, ipapantayo nga okupado iti ministerio ti maysa a kabsat. Nupay makigimgimong ken mangaskasaba, saan a maikkat iti panunotna dagiti magusgustuanna a bambanag iti lubong. Tartarigagayanna dagita iti kaunggan ti pusona. Kalpasan ti sumagmamano a tawen a panagserbina iti Dios, tarigagayanna unayen dagiti bambanag iti lubong nga uray la tumallikuden ket sanguennan ti “bambanag iti likudan.” Nupay adu pay ti trabaho a masapul a mairingpas iti ministerio, dina nataginayon ti “nairut a panangpetpet iti sao ti biag” isu a naapektaran ti pannakiramanna kadagiti nateokratikuan nga aktibidad. (Fil. 2:16) Ti “Apo ti panagani” a ni Jehova ket maladingitan iti kasta a kinaawan anus.—Luc. 10:2.
13. Ania ti ramanen ti panagserbi ken Jehova buyogen ti naan-anay a puso?
13 Nalawag ti adal. Makomendaran no regular a makiramantayo iti makagunggona ken makapnek nga aktibidad kas iti pannakigimong ken panangasaba. Ngem saan laeng a dayta ti ramanen ti panagserbi ken Jehova buyogen ti naan-anay a puso. (2 Cron. 25:1, 2, 27) No iti kaunggan ti pusotayo ket itultuloytayo nga ayaten dagiti “bambanag iti likudan,” kayatna a sawen dagiti bambanag a paset ti panagbiag daytoy a lubong, agpegpeggad ti nasayaat a relasiontayo iti Dios. (Luc. 17:32) ‘Maikaritayo laeng maipaay iti pagarian ti Dios’ no talaga a ‘karurodtayo ti dakes, ken kumpettayo iti naimbag.’ (Roma 12:9; Luc. 9:62) Uray no kasla napateg wenno nasayaat ti dadduma a bambanag iti lubong ni Satanas, masapul a siguraduentayo nga awan ti aniaman a makapasardeng iti naimpusuan a panangaramidtayo kadagiti interes ti Pagarian.—2 Cor. 11:14; basaen ti Filipos 3:13, 14.
AGTALINAED NGA ALERTO!
14, 15. (a) Kasano nga ikagkagumaan ni Satanas nga impluensiaan ti pusotayo? (b) Iyilustrarmo no apay a nagpeggad ti pamay-an ni Satanas.
14 Ti panagayattayo ken Jehova ti nangtignay kadatayo a nangidedikar iti biagtayo kenkuana. Manipud idin, adu kadatayo ti nabayagen a mangipakpakita iti determinasiontayo nga agserbi ken Jehova buyogen ti naan-anay a puso. Ngem dinatay sardengan ni Satanas. Puntiriana pay laeng ti pusotayo. (Efe. 6:12) Siempre, ammona a saantayo a dagus a tallikudan ni Jehova. Isu a sisisikap nga us-usarenna “daytoy a sistema ti bambanag” tapno in-inut a bumaaw ti kinaregtatayo para iti Dios. (Basaen ti Marcos 4:18, 19.) Apay nga epektibo unay dayta a pamay-an ni Satanas?
15 Tapno masungbatan dayta, ipapantayo nga agbasbasaka iti libro a ti usarmo a bombilia ket 100-watt ti kalawagna. Idi kuan, napundi dayta. Gapu ta nasipnget, dagus nga ammom ti napasamak isu a sinuktam iti baro a bombilia. Limmawag manen ti kuarto. Iti sumaganad a rabii, agbasbasaka manen nga usarmo ti isu met la a bombilia. Ngem dimo ammo a nasuktan gayam dayta iti 95-watt a bombilia. Madlawmo kadi ti nagdumaanda? Nalabit saan. Kasanon no iti sumaganad nga aldaw, nasuktan manen iti 90-watt a bombilia? Nalabit dimo latta madlaw dayta. Apay? In-inut ngamin a kimmapuy ti lawag. Umasping iti dayta, ti impluensia ti lubong ni Satanas ket mabalin nga in-inut a pabaawenna ti regtatayo. No mapasamak dayta, arigna nagballigi ni Satanas a nangkissay iti 100-watt a naimpusuan a regtatayo nga agserbi ken Jehova. No ditay alerto, mabalin a ditay pay ketdi madmadlaw dayta nga in-inut a panagbalbaliw.—Mat. 24:42; 1 Ped. 5:8.
NAGPATEG TI KARARAG
16. Kasano a masalaknibantayo ti bagitayo kadagiti pamay-an ni Satanas?
16 Kasanotayo a masalakniban ti bagitayo kadagiti kasta a pamay-an ni Satanas tapno makapagtultuloytayo nga agserbi ken Jehova buyogen ti naan-anay a puso? (2 Cor. 2:11) Nagpateg ti kararag. Pinaregta ni Pablo dagiti Kristiano nga ‘agtakderda a sititibker maibusor kadagiti pangallilaw a pamuspusan ti Diablo.’ Sa kinunana kadakuada: “Iti amin a langa ti kararag ken araraw itultuloyyo ti agkararag . . . iti amin a gundaway.”—Efe. 6:11, 18; 1 Ped. 4:7.
17. Ania ti maadaltayo iti panagkararag ni Jesus?
17 Tapno masarangettayo ni Satanas, nainsiriban a tuladentayo ti naimpusuan a panagkararag ni Jesus a nangipakita iti nasged a tarigagayna a mangtaginayon iti naan-anay a puso ken Jehova. Kas pagarigan, kitaem ti inrekord ni Lucas a panagkararag ni Jesus iti rabii sakbay ti ipapatayna: “Idi matutuok intultuloyna ti nagkararag nga ad-adda a sipapasnek.” (Luc. 22:44) Datin a napasnek ti panagkararag ni Jesus, ngem idi dandanin maipasango iti kakaruan a pannubok iti biagna ditoy daga, nagkararag nga “ad-adda a sipapasnek” ket nasungbatan dayta. Ipakita ti ulidan ni Jesus a nagduduma ti kapasnek dagiti kararag. Gapuna, no nakarkaro ti pakasuotantayo ken napigpigsa ti impluensia ni Satanas, masapul a ‘napaspasnek’ koma nga ikararagtayo ti proteksion ni Jehova.
18. (a) Ania ti isaludsodtayo iti bagitayo maipapan iti kararag, ken apay? (b) Ania ti bambanag a makaapektar iti pusotayo, ken kadagiti ania a pamay-an? (Kitaem ti kahon iti panid 16.)
18 Ania ti epekto dagiti kasta a kararag kadatayo? Kinuna ni Pablo: “Iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo.” (Fil. 4:6, 7) Wen, masapul a napasnek ken masansan nga agkararagtayo tapno mataginayontayo a naan-anay ti pusotayo ken Jehova. (Luc. 6:12) Isaludsodmo ngarud iti bagim: ‘Kasano kapasnek ken kasansan ti panagkararagko?’ (Mat. 7:7; Roma 12:12) Ti sungbatmo ipakitana no kasano kapasnek ti naimpusuan a tarigagaymo nga agserbi iti Dios.
19. Ania ti aramidem tapno makapagtultuloyka nga agserbi ken Jehova buyogen ti naan-anay a puso?
19 Kas naadaltayon, dagiti prioridadtayo iti biag ipakitana ti kasasaad ti pusotayo. Kayattayo a siguraduen a dagiti bambanag a tinallikudantayo ken dagiti nasikap a pamay-an ni Satanas dida pakapuyen ti determinasiontayo nga agserbi ken Jehova buyogen ti naan-anay a puso. (Basaen ti Lucas 21:19, 34-36.) Kas ken David, itultuloytayo koma nga ikararag ken Jehova: “Pagkaykaysaem ti pusok.”—Sal. 86:11.
[Salsaludsod]
[Kahon iti panid 16]
TALLO A BANAG A MANGIMPLUENSIA ITI PUSOTAYO
No kasano nga adda maaramidantayo tapno nasayaat ti kasasaad ti literal a pusotayo, adda met maaramidantayo tapno agtalinaed a nasalun-at ti piguratibo a pusotayo. Usigentayo ti tallo a nagpateg a banag:
1 Nasustansia a taraon: Kasapulan ti literal a pusotayo ti umdas a nasustansia a taraon. Umasping iti dayta, masapul a siguraduentayo a makagun-odtayo iti umdas a nasustansia a naespirituan a taraon babaen ti regular a personal a panagadal, panagutob, ken pannakigimong.—Sal. 1:1, 2; Prov. 15:28; Heb. 10:24, 25.
2 Ehersisio: Tapno nasalun-at ti literal a pusotayo, kasapulan no dadduma nga agibomba iti napigsa. Umasping iti dayta, ti naregta a pannakiraman iti ministerio—nalabit babaen ti panangikagumaantayo a mangpalawa iti dayta nga aktibidad—pagtalinaedenna a nasalun-at ti piguratibo a pusotayo.—Luc. 13:24; Fil. 3:12.
3 Aglawlaw: Ti dakes nga aglawlaw a pagbibiagantayo ket mangyeg iti stress iti literal ken piguratibo a pusotayo. Ngem makissayan dayta no masansan a makilangentayo agingga a posible kadagiti kapammatiantayo, a pudpudno a maseknan kadatayo ken agserserbi ken ni Jehova buyogen ti naan-anay a puso.—Sal. 119:63; Prov. 13:20.
