Iyan-anninawmo Kadi ti Dayag ni Jehova?

“Iyanninawtayo ti dayag ni Jehova a kasla kadagiti sarming.”​—2 COR. 3:18.

ANIA TI SUNGBATMO?

Kasanotayo a maipadayag ni Jehova uray managbasoltayo?

Kasano a dagiti kararagtayo ken ti itatabunotayo kadagiti Nakristianuan a gimong tulongandatayo a mangyanninaw iti dayag ti Dios?

Ania ti makatulong kadatayo nga agtultuloy a mangipadayag ken Jehova?

1, 2. Apay a posible a matuladtayo dagiti galad ni Jehova?

ADDA dagiti pumadaantayo kadagiti nagannaktayo. Isu a di pakasdaawan no adda mangibaga iti ubing a lalaki, ‘Kaska la ken tatangmo.’ Wenno iti ubing a babai, ‘No makitaka, malagipko ni nanangmo.’ Ken masansan a tuladen dagiti ubbing ti makitada kadagiti nagannakda. Ngem datayo ngay? Matuladtay kadi ti nailangitan nga Amatayo a ni Jehova? Nupay ditay makita, maammuantayo dagiti nagpateg a galadna no adalentayo ti Saona, paliiwentayo dagiti pinarsuana, ken utobentayo ti Kasuratan nangnangruna dagiti sasao ken inaramid ti Anakna a ni Jesu-Kristo. (Juan 1:18; Roma 1:20) Wen, mayanninawtayo ti dayag ni Jehova.

² Sakbay a pinarsua ti Dios da Adan ken Eva, ammona a kabaelan dagiti tattao nga aramiden ti pagayatanna, iyanninaw dagiti galadna, ken ipadayag Isuna. (Basaen ti Genesis 1:26, 27.) Kas Kristiano, masapul a tuladentayo dagiti galad Daydiay nangaramid kadatayo. Iti kasta, maaddaantayo iti naisangsangayan a pribilehio a mangyanninaw iti dayag ti Dios aniaman ti kultura, edukasion, wenno pulitayo. Apay? Gapu ta ti “Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”​—Ara. 10:34, 35.

3. Ania ti mariknatayo bayat nga agserserbitayo ken Jehova?

³ Iyan-anninaw dagiti napulotan a Kristiano ti dayag ni Jehova. Gapuna, insurat ti napulotan iti espiritu a ni apostol Pablo: “Datayo amin, bayat a datayo nga addaan di naabbungotan a ruprupa iyanninawtayo ti dayag ni Jehova a kasla kadagiti sarming, mapagbalbaliwtayo nga agturong iti isu met laeng a ladawan manipud iti dayag nga agturong iti dayag.” (2 Cor. 3:18) Idi bimmaba ni propeta Moises manipud Bantay Sinai nga awitna ti tapi a bato a nakaisuratan ti Sangapulo a Bilin, nagraniag ti rupana gapu iti pannakisarita ni Jehova kenkuana.  (Ex. 34:29, 30) Nupay saan a napadasan dayta dagiti Kristiano ken saan nga agraniag ti rupada, makita iti rupada ti ragsak bayat nga ibagbagada kadagiti tattao ti maipapan ken Jehova, dagiti galadna, ken ti nagsayaat a panggepna. Kas iti napasileng a metal a sarming idi nagkauna a tiempo, dagiti napulotan ken ti sabsabali a karnero iyan-anninawda ti dayag ni Jehova iti biag ken iti ministerioda. (2 Cor. 4:1) Iyan-anninawmo kadi ti dayag ni Jehova babaen ti nasayaat a konduktam ken ti regular a pannakiramanmo iti panangasaba?

KAYATTAYO NGA IYANNINAW TI DAYAG NI JEHOVA

4, 5. (a) Kas ken Pablo, ania ti pakidangdangadangantayo? (b) Ania ti epekto kadatayo ti basol?

⁴ Kas adipen ni Jehova, sigurado a kayattayo nga idayaw ken ipadayag ti Namarsua kadatayo iti amin nga aramidentayo. Ngem masansan a saantayo a maaramid ti kayattayo nga aramiden. Napasaran idi dayta ni Pablo. (Basaen ti Roma 7:21-25.) Imbagana no apay nga addaantayo iti kasta a pannakidangadang: “Amin nagbasol ken agkurang iti dayag ti Dios.” (Roma 3:23) Wen, gapu iti natawid a basol ken Adan, ti sangatauan ket iturturayan ti naulpit a ni ‘Ari Basol.’​—Roma 5:12; 6:12.

⁵ Ania ti basol? Aniaman a maikontra iti personalidad, daldalan, pagalagadan, ken pagayatan ni Jehova. Gapu iti basol, nadadael ti relasion ti tao iti Dios. Kas iti pumapana a dina mapuntaan ti puntiriana, ti basol ti manglapped kadatayo a mangyanninaw iti dayag ti Dios. Mabalin nga inggagara wenno di inggagara a makaaramidtayo iti basol. (Num. 15:27-31) Nairamut ti basol kadagiti tattao, ken isinana ida iti Namarsua. (Sal. 51:5; Isa. 59:2; Col. 1:21) Naan-anay a naisina iti Dios ti kaaduan a tattao isu a napukawda ti pribilehio a mangyanninaw iti dayag ti Dios. Awanen ti kakaruan a mangparparigat iti sangatauan no di ti basol.

6. Kasanotayo a maipadayag ti Dios uray managbasoltayo?

⁶ Nupay managbasoltayo, ni Jehova ket “Dios a mangipaay iti namnama.” (Roma 15:13) Nangipaay iti mangwayawaya kadatayo iti basol​—ti pangsubbot a daton ni Jesu-Kristo. Babaen ti panangipakitatayo iti pammati iti dayta a daton, saantayon nga ‘adipen ti basol’ no di ket mayanninawtayon ti dayag ni Jehova. (Roma 5:19; 6:6; Juan 3:16) No mataginayontayo dayta a naanamongan a relasiontayo iti Dios, mainanamatayo ti bendision ni Jehova ita ken iti masanguanan, ti panagbalin a perpekto ken panagbiag nga agnanayon. Anian a pribilehio ta agtalek ti Dios a kabaelantayo nga iyanninaw ti dayagna nupay managbasoltayo!

PANANGYANNINAW ITI DAYAG TI DIOS

7. Ania ti masapul a bigbigentayo tapno mayanninawtayo ti dayag ti Dios?

⁷ Tapno siuumiso a mayanninawtayo ti dayag ti Dios, masapul a bigbigentayo a managbasoltayo. (2 Cron. 6:36) Masapul a bigbigentayo nga agannayastayo nga agbasol ken ikagumaantayo a labanan dayta tapno pudpudno a maipadayagtayo ti Dios. Kas pagarigan, no makaaramidtayo iti basol gapu iti panagbuyatayo iti pornograpia, masapul a bigbigentayo a kasapulantayo ti tulong dagiti panglakayen ket agtignaytayo tapno magun-odantayo dayta. (Sant. 5:14, 15) Dayta ti umuna nga addang nga aramidentayo tapno naan-anay a maipadayagtayo ti Dios. Kas adipen ni Jehova, masapul a kanayon a sukimatentayo ti bagitayo tapno makitatayo no agbibiagtayo maitunos iti nalinteg a pagalagadanna. (Prov. 28:18; 1 Cor. 10:12) Aniaman ti pagkapuyantayo, masapul nga itultuloytayo a labanan dayta tapno mayanninawtayo ti dayag ti Dios.

8. Nupay imperpektotayo, ania ti masapul nga aramidentayo?

⁸ Ni Jesus laeng ti nagbiag a tao a kanayon a nakaaramid iti makaay-ayo iti Dios ken naan-anay a nangyanninaw iti dayag ti  Dios. Nupay saantayo a perpekto a kas ken Jesus, masapul nga ikagumaantayo a tuladen ti ulidanna. (1 Ped. 2:21) Makita ni Jehova ti panagreggettayo ken ti panagrang-aytayo, ken bendisionanna ti panagreggettayo a mangipadayag kenkuana.

9. Kasano a matulongannatayo ti Biblia tapno nasaysayaat ti panangyanninawtayo iti dayag ti Dios?

⁹ Matulongannatayo ti Sao ti Dios a mangtarus no kasano ti nasaysayaat a panangyanninawtayo iti dayag ti Dios. Nagpateg ti nauneg a panagadal iti Kasuratan ken panangutob iti nabasatayo iti Biblia. (Sal. 1:1-3) Ti inaldaw a panagbasatayo iti Kasuratan tulongannatayo a rumang-ay iti naespirituan. (Basaen ti Santiago 1:22-25.) Ti nakaibatayan ti pammatitayo ket ti pannakaammotayo iti Biblia. Dayta ti mangpabileg iti determinasiontayo a mangay-ayo ken Jehova ken mangliklik nga agaramid iti nadagsen a basol.​—Sal. 119:11, 47, 48.

10. Kasano a matulongannatayo ti kararag a naan-anay a makapagserbi ken Jehova?

¹⁰ Tapno mayanninawtayo ti dayag ti Dios, masapul met a ‘reggetantayo ti agkararag.’ (Roma 12:12) Masapul nga ikararagtayo ti tulong ni Jehova tapno agbalin a makaay-ayo ti panagserbitayo kenkuana. Gapuna, maitutop laeng a kiddawentayo iti Dios nga ipaayannatayo iti nasantuan nga espiritu, ad-adu a pammati, bileg a manglaban iti sulisog, ken abilidad a ‘mangaramat a siuumiso ti sao ti kinapudno.’ (2 Tim. 2:15; Mat. 6:13; Luc. 11:13; 17:5) Kas iti maysa nga ubing nga agtalek ken tatangna, masapul nga agtalektayo met iti nailangitan nga Amatayo a ni Jehova. No idawattayo a tulongannatayo nga agserbi kenkuana a naan-anay, makapagtalektayo nga aramidenna dayta. Ditay koma panunoten a makasinga iti Dios dagiti kararagtayo! Imbes ketdi, usarentayo ti panagkararag a mangidayaw, agyaman, ken agpaiwanwan kenkuana nangruna no maipaspasangotayo kadagiti narigat a kasasaad. Kiddawentayo met a tulongannatayo nga agserbi kenkuana iti pamay-an a maipadayagtayo ti nasantuan a naganna.​—Sal. 86:12; Sant. 1:5-7.

11. Kasano a makatulong dagiti gimong ti kongregasion tapno mayanninawtayo ti dayag ti Dios?

¹¹ Impaaywan ni Jehova ti nagpateg nga arbanna iti “matalek ken masirib nga adipen.” (Mat. 24:45-47; Sal. 100:3) Maseknan unay ti klase adipen no kasano a mayanninaw dagiti padada a Kristiano ti dayag ni Jehova. No kasano a ti mannait retubarenna ti badotayo tapno napimpintas ti langatayo, dagiti gimong arigna retubarenda met ti langatayo kas Kristiano a ministro. (Heb. 10:24, 25) Gapuna, sumangpettayo koma a nasapa kadagiti gimong ta no naruamtayon a maladladaw, adda dagiti pakaikapisantayo a naespirituan a ‘pannakaretubar’ a mangpasayaat iti langatayo kas ad-adipen ni Jehova.

TULADENTAYO TI DIOS

12. Kasanotayo a matulad ti Dios?

¹² Tapno mayanninawtayo ti dayag ni Jehova, masapul nga ‘agbalintayo a tumutulad iti Dios.’ (Efe. 5:1) Ti maysa a pamay-an a maaramidtayo dayta ket babaen ti panangtuladtayo iti panangmatmat ni Jehova kadagiti bambanag. Maibabain ti Dios ken agproblematayo no aramidentayo ti bambanag iti bukodtayo a pamay-an. Gapu ta agbibiagtayo iti lubong nga iturturayan daydiay nadangkes a ni Satanas a Diablo, masapul nga ikagumaantayo a guraen dagiti kagura ni Jehova ken ayatentayo dagiti ay-ayatenna. (Sal. 97:10; 1 Juan 5:19) Masapul a naan-anay a kombinsidotayo a ti laeng umiso a pamay-an a panagserbi iti Dios ket ti panangaramid iti amin a bambanag agpaay a pakaidayawanna.​—Basaen ti 1 Corinto 10:31.

13. Apay a masapul a kaguratayo ti basol? Ania ti aramidentayo no kaguratayo ti basol?

¹³ Kagura ni Jehova ti basol isu a masapul a guraentayo met dayta. No kaguratayo ti basol, ikagumaantayo nga adaywan ti aniaman a mangituggod kadatayo nga agbasol ken ditay subsuboken no pagpatinggaan  ti kabaelantayo a sarangten. Kas pagarigan, masapul nga agannadtayo tapno ditay maimpluensiaan iti apostasia, maysa a basol a mamagbalin kadatayo a saan a kualipikado a mangidayaw ken Jehova. (Deut. 13:6-9) Gapuna, naan-anay a liklikantayo dagiti apostata wenno asinoman nga agkunkuna a kabsat ngem ibabainna met ti Dios. Kasta ti aramidentayo uray no isu ket kapamiliatayo. (1 Cor. 5:11) Awan ti magunggonatayo no kontraentayo dagiti argumento dagiti apostata wenno dagidiay mangkritkritikar iti organisasion ni Jehova. Kinapudnona, makadangran dayta iti espiritualidadtayo ken di rumbeng a basaentayo dagiti impormasion nga impablaakda, iti man literaturada wenno iti Internet.​—Basaen ti Isaias 5:20; Mateo 7:6.

14. No ikagkagumaantayo nga iyanninaw ti dayag ti Dios, ania a galad ti kangrunaan a makita koma kadatayo, ken apay?

¹⁴ Ti panangipakita iti ayat ket maysa a nagsayaat a pamay-an a matuladtayo ti nailangitan nga Amatayo. Wen, masapul a naayattayo kas kenkuana. (1 Juan 4:16-19) Kinapudnona, ti panagayattayo iti maysa ken maysa paneknekanna nga adalannatayo ni Jesus ken adipennatayo ni Jehova. (Juan 13:34, 35) Gapu iti natawidtayo a basol, marigatantayo no dadduma a mangipakita iti ayat. Ngem masapul nga ikagumaantayo ti agbalin a naayat iti amin a gundaway. Ti panangikagumaantayo a mangipakita iti ayat ken iti dadduma pay a Nakristianuan a kababalin ti tumulong kadatayo a mangliklik iti basol ken iti panangaramid iti dakes a bambanag.​—2 Ped. 1:5-7.

15. No ay-ayatentayo ti sabsabali, kasanotayo a tratuen ida?

¹⁵ Ti ayat tignayennatayo nga agaramid iti naimbag iti sabsabali. (Roma 13:8-10) Kas pagarigan, agtalinaed a matalek ti agassawa iti maysa ken maysa no agin-innayatda. Ti panagayattayo kadagiti panglakayen a napakuyogan iti panagraem gapu iti trabahoda tulongannatayo nga agbalin a natulnog ken managpasakup iti panangiwanwanda. No ay-ayaten dagiti annak dagiti nagannakda, agtulnogda, mangipakitada iti panagraem, ken dida agsao iti saan a nasayaat maipapan kadakuada. No ay-ayatentayo ti sabsabali, ditay ibilang ida a nababbaba wenno agsao kadakuada nga awan daydayawna. (Sant. 3:9) Ken dagiti panglakayen a mangay-ayat iti arban ti Dios sidudungngo a tratuenda ida.​—Ara. 20:28, 29.

16. Ania ti maitulong ti ayat iti ministeriotayo?

¹⁶ Nalawag met koma a makita ti ayat iti ministeriotayo. Gapu iti nauneg a panagayattayo ken Jehova, ditay ipalubos a maupaytayo no saan nga interesado wenno di mangipangag dagiti tattao. Imbes ketdi, itultuloytayo nga ikasaba ti naimbag a damag. Ti ayat ti mangtignay kadatayo nga agsagana a naimbag ken mangikagumaan nga agbalin nga epektibo iti ministerio. No talaga nga ay-ayatentayo ti Dios ken dagiti tattao, ditay ibilang ti trabaho a panangikasaba iti Pagarian kas obligasion. Imbes ketdi, ibilangtayo a maysa a dakkel a pribilehio ken siraragsak nga itungpaltayo dayta.​—Mat. 10:7.

ITULTULOYTAYO NGA IPADAYAG NI JEHOVA

17. Gapu ta ammotayo a lapdannatayo ti basol a mangyanninaw iti dayag ti Dios, ania ti rumbeng nga aramidentayo?

¹⁷ Saan a kas iti kaaduan a tattao ditoy lubong, bigbigentayo ti kinaserioso ti basol. Gapu iti dayta, ammotayo a masapul a labanantayo ti tendensiatayo nga agbasol ken sanayentayo ti konsiensiatayo tapno makaaramidtayo iti umiso no masulisogtayo nga agaramid iti dakes. (Roma 7:22, 23) Pudno, mabalin a nakapuytayo ngem mapabilegnatayo ti Dios nga agaramid iti umiso aniaman ti situasion.​—2 Cor. 12:10.

18, 19. (a) Ania ti tumulong kadatayo nga agballigi a mangsaranget kadagiti dakes nga espiritu? (b) Ania koma ti determinasiontayo?

¹⁸ No kayattayo nga ipadayag ni Jehova, masapul a sarangtentayo dagiti dakes nga  espiritu. Maaramidtayo dayta iti tulong ti inted ti Dios a naespirituan a kabal. (Efe. 6:11-13) Saan nga agsardeng ni Satanas a mangagaw iti dayag a maikari laeng ken Jehova. Agtultuloy nga ikagkagumaan ti Diablo a dadaelen ti relasiontayo ken Jehova. Ngem anian a pannakaabak ni Satanas no datayo agraman ti minilion nga imperpekto a lallaki, babbai, ken ub-ubbing ket agtalinaed a matalek ken ipadayagtayo ti Dios! Gapuna, itultuloytayo koma nga idaydayaw ni Jehova kas kadagiti parsua idiay langit a nangikuna: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.”​—Apoc. 4:11.

¹⁹ Determinadotayo koma nga agtultuloy a mangipadayag ken Jehova aniaman ti mapasamak. Sigurado a maragsakan ta adu a nasungdo nga indibidual ti mangar-aramid iti amin a kabaelanda a mangtulad kenkuana ken mangyanninaw iti dayagna. (Prov. 27:11) Mariknatayo koma met ti narikna ni David a nangikanta: “Idayawka, O Jehova a Diosko, buyogen ti isuamin a pusok, ket idaydayawkonto ti naganmo agingga iti tiempo a di nakedngan.” (Sal. 86:12) Magagarantayo a mangpadaan iti aldaw inton naan-anay a mayanninawtayo ti dayag ni Jehova ken maidaydayawtayo iti agnanayon! Matagiragsakto dayta dagiti natulnog a tattao. Iyan-anninawmo kadi ti dayag ni Jehova a Dios, a mangnamnamaka nga aramidem dayta iti agnanayon?

[Salsaludsod]

[Dagiti Ladawan iti panid 27]

Iyan-anninawmo kadi ti dayag ni Jehova kadagitoy a pamay-an?