Positibo a Panangmatmat iti Problemado a Panagasawa

“Kadagiti naasawaan a tattao mangtedak kadagiti pammilin, kaskasdi a saan a siak no di ket ti Apo.”​—1 COR. 7:10.

MAILAWLAWAGMO KADI?

Kasano a ti Dios pinagsinnangolna ti agassawa?

Kasano a makatulong dagiti panglakayen kadagiti Kristiano a problemado ti panagasawada?

Ania ti rumbeng a panangmatmattayo iti panagasawa?

1. Kasano ti panangmatmat dagiti Kristiano iti panagasawa, ken apay?

NO AGASAWA dagiti Kristiano, agkinnarida iti imatang ti Dios​—maysa a serioso a responsabilidad. (Ecl. 5:4-6) Gapu ta ni Jehova ti Namunganay iti urnos a panagasawa, isu ti ‘namagsinnangol’ kadagiti agassawa. (Mar. 10:9) Aniaman dagiti linteg ti pagilian, agtalinaedda nga agassawa iti imatang ti Dios. Masapul a matmatan dagiti adipen ni Jehova a permanente nga urnos ti panagasawa uray no saanda pay nga agdaydayaw kenkuana idi nagkasarda.

2. Ania dagiti saludsod a mapagsasaritaan iti daytoy nga artikulo?

² Agresulta iti napalalo a kinaragsak ti naballigi a panagasawa. Ngem ania ti mabalin nga aramiden no problemado ti relasion ti agassawa? Mapasayaat pay kadi dayta? Ania ti makatulong kadagidiay problemado ti panagasawada?

NARAGSAKTO KADI WENNO NALADINGIT?

3, 4. Ania ti mabalin a mapasamak no saan a nainsiriban ti panagpili ti maysa iti pakiasawaanna?

³ Mangyeg iti kinaragsak ken pakaidayawan ni Jehova no naballigi ti panagasawa ti maysa a Kristiano. Ngem no saan, mangyeg iti ladingit. No suroten dagiti agplamplano nga agasawa ti panangiwanwan ti Dios, nasayaatto ti rugi ti panagasawada. Ngem no di umiso ti panagpilida iti maasawa, mabalin nga agresulta dayta iti pannakapaay ken ladingit. Kas pagarigan, dadduma nga agtutubo ti makideyt uray dida pay nakasagana kadagiti responsabilidad ti naasawaan. Dadduma ti agbirok iti maasawa iti Internet ken agapurada a makiasawa ket inton agangay, saan a naragsak ti panagasawada. Adda met dagidiay makaaramid iti nadagsen a basol bayat ti pannakinobia wenno pannakinobioda sadanto agkasar.  Ngem bassiten ti panagraemda iti maysa ken maysa no rugianda ti biagda kas agassawa.

⁴ Dadduma a Kristiano ti saan nga agtulnog iti bilin a makiasawa ‘laeng iti Apo’ isu a mapasaranda ti nasaem a bunga ti saan nga agkakarelihionan a sangakabbalayan. (1 Cor. 7:39) No kasta ti kasasaadmo, ikararagmo ti pammakawan ken tulong ti Dios. Saanna nga ikkaten dagiti epekto ti napalabas a basol ngem tulonganna ti maysa nga agbabbabawi tapno mapagballigianna dagiti pakasuotan. (Sal. 130:1-4) Determinadoka koma a mangparagsak ken Jehova ita ken iti agnanayon tapno ‘ti rag-ona isu ti salindegmo.’​—Neh. 8:10.

NO PROBLEMADO TI RELASION TI AGASSAWA

5. Ania a panagpampanunot ti masapul a liklikan dagiti saan a naragsak ti panagasawada?

⁵ Mabalin a maisaludsod dagiti problemado ti panagasawada: ‘Napateg pay kadi a salbaren ti saan a naragsak a panagasawak? No laeng koma maisublik ti napalabas tapno sabali koma ti naasawak!’ Mabalin a pampanunotenda ti makisina​—‘Nawayaak koma manen! No ngata makideborsioak? Uray no saan a Nainkasuratan ti pannakideborsiok, mabalinko met latta ti makisina tapno naragsakak manen.’ Imbes a kasta ti pampanunotenda, masapul nga ikagumaanda a pasayaaten ti agdama a kasasaadda babaen ti panagpaiwanwanda iti Dios.

6. Ilawlawag ti kaipapanan ti sasao ni Jesus iti Mateo 19:9.

⁶ No makidiborsio ti maysa a Kristiano, mabalin a saan a nawaya a makiasawa manen sigun iti Kasuratan. Kinuna ni Jesus: “Siasinoman a mangidiborsio iti asawana a babai, malaksid no maibatay iti pannakiabig, ket mangasawa iti sabali makaaramid iti pannakikamalala.” (Mat. 19:9) Ti nadakamat a “pannakiabig” ramanenna ti pannakikamalala ken dadduma pay a serioso a basol mainaig iti sekso. No pampanunoten ti maysa ti makidiborsio uray no awan ti Nainkasuratan a nakaibatayanna, nagpateg nga agpatulong ken agpaiwanwan iti Dios.

7. Ania ti mabalin a panunoten ti sabsabali no saan a naballigi ti panagasawa ti maysa a Kristiano?

⁷ Mabalin a mapagduaduaan ti espiritualidad ti maysa a saan a naballigi ti panagasawana. Inyebkas ni apostol Pablo daytoy a serioso a saludsod: “Iti kinapudnona no ti asinoman a lalaki saanna nga ammo ti mangidaulo iti bukodna a sangakabbalayan, kasanonto ti panangaywanna iti kongregasion ti Dios?” (1 Tim. 3:5) No ibaga ti agassawa a Kristianoda ngem saan met a naballigi ti panagasawada, mabalin a panunoten ti sabsabali a saanda nga ar-aramiden ti ikaskasabada.​—Roma 2:21-24.

8. Ania ti mabalin a problema no ikeddeng ti Kristiano nga agassawa ti agsina wenno agdiborsio?

 ⁸ No plano ti Kristiano nga agassawa ti agsina wenno agdiborsio uray saan a Nainkasuratan, adda la ketdi problema ti espiritualidadda. Nalabit maysa kadakuada wenno duada a saan a mangyap-aplikar kadagiti prinsipio ti Biblia. No talaga nga ‘agtalekda ken Jehova iti isuamin a pusoda,’ awan ti rason a dida masalbar ti panagasawada.​—Basaen ti Proverbio 3:5, 6.

9. Kasano a nagunggonaan ti dadduma a Kristiano gapu iti dida panangisuko a dagus iti problemado a panagasawada?

⁹ Adu nga agpegpeggad a panagasawa ti nagballigi met laeng iti kamaudiananna. Masansan a nasayaat ti resultana no saan a sumuko a dagus dagiti Kristiano a problemado ti panagasawada. Kas pagarigan, panunotem ti posible a mapasamak no saan a manamati ti maysa nga asawa. Insurat ni apostol Pedro: “Dakayo nga assawa a babbai, agpasakupkayo kadagiti bukodyo nga assawa, tapno iti kasta, no ti asinoman saan a natulnog iti sao, mabalin a magun-od ida nga awan ti sao babaen iti kababalin dagiti assawada a babbai, agsipud ta nasaksianda ti nadalus a kababalinyo agraman ti nauneg a panagraem.” (1 Ped. 3:1, 2) Wen, mabalin nga awaten ti di manamati nga asawa ti kinapudno gapu iti nasayaat a kondukta ti asawana! Pakaidayawan ti Dios ti nasalbar a panagasawa ken mangyeg dayta iti dakkel a bendision iti intero a pamilia.

10, 11. Ania dagiti di ninamnama a problema a tumaud iti panagasawa, ngem ania ti mabalin a masigurado ti maysa a Kristiano?

¹⁰ Gapu ta kayatda a paragsaken ni Jehova, kaaduan nga awanan asawa ti makiasawa kadagiti kapammatianda. Ngem mabalin a dida ninamnama nga agbaliw dagiti kasasaadda. Kas pagarigan, adda dagidiay assawa a maaddaan iti nakaro a sakit ti emosion. Wenno, adda dagiti assawa nga agbalin a di aktibo nga agibumbunannag kalpasan ti kasarda. Ti maysa a pagarigan ket ni Linda * a maysa a naregta a Kristiano ken naayat nga ina. Awan ti naaramidanna idi pinili ti bautisado nga asawana ti agaramid iti dakes. Saan a nagbabawi isu a nailaksid. Ania ti rumbeng nga aramiden ti maysa a Kristiano no kasla awanen ti namnama ti panagasawana gapu iti kasta a rason?

¹¹ Mabalin a maisaludsodmo, ‘Masapul kadi nga ikagumaak a salbaren ti relasionmi nga agassawa aniaman ti mapasamak?’ Awan ti sabali a makaaramid iti desision no di laeng sika. Ngem adda dagiti naimbag a rason a dika sumuko no kasla awanen ti namnama ti panagasawayo. Napateg iti Dios ti maysa a Kristiano no gapu iti konsiensiana ket ibturanna dagiti pakasuotan a resulta ti problemado a panagasawada. (Basaen ti 1 Pedro 2:19, 20.) Babaen ti Sao ken espiritu ni Jehova, tulonganna dagiti Kristiano a mangaramid iti amin a kabaelanda a mangsalbar iti problemado a panagasawada.

NAKASAGANADA A TUMULONG

12. Ania ti panangmatmat kadatayo dagiti panglakayen no agpatulongtayo kadakuada?

¹² No adda problema ti relasionyo nga agassawa, agpatulongkayo kadagiti kakabsat a nataengan iti naespirituan. Maragsakan  dagiti panglakayen a pastor iti kongregasion a mangipaay kadagiti balakad ti Dios manipud iti Biblia. (Ara. 20:28; Sant. 5:14, 15) Diyo koma panunoten a mapukaw ti panagraem dagiti panglakayen no agpatulong ken ibagayo kadakuada ti nadagsen a problema ti panagasawayo. Ad-adda nga ipateg ken raemendakayo no makitada ti napasnek a panangikagumaanyo a mangparagsak iti Dios.

13. Ania a balakad ti masarakan iti 1 Corinto 7:10-16?

¹³ No agpatulong dagiti Kristiano a saan nga agkakapammatian ti pamiliada, mabalin nga usaren dagiti panglakayen ti imbalakad ni Pablo: “Kadagiti naasawaan a tattao mangtedak kadagiti pammilin, kaskasdi a saan a siak no di ket ti Apo, a ti babai saan a sumina iti asawana; ngem no isu agpayso a sumina, agtalinaed koma a di makiasawa wenno no saan makikappia manen iti asawana; ket ti lalaki saanna koma a panawan ti asawana. . . . Ta, asawa a babai, kasano ti pannakaammom no maisalakanmonto ti asawam? Wenno, asawa a lalaki, kasano ti pannakaammom no maisalakanmonto ti asawam?” (1 Cor. 7:10-16) Anian a bendision no agbalin nga adipen ni Jehova ti di manamati nga asawa!

14, 15. Kaano a mabalin nga ikeddeng ti Kristiano nga asawa a sinaan ni lakayna? Apay a napateg nga ikararag ken tingitingenna a naimbag dayta?

¹⁴ Kadagiti ania a kasasaad a mabalin ti Kristiano nga asawa a babai ti “sumina” ken lakayna? Kas pagarigan, pinili ti dadduma ti makisina gapu ta saan a kayat ti asawada a suportaran ida, gapu iti nakaro a pisikal a pannakadangran, wenno gapu ta agpegpeggad ti espiritualidadda.

¹⁵ Personal a desision ti pannakisina wenno saan. Ngem no bautisado ti maysa, masapul nga ikararag ken tingitingenna a naimbag dayta. Kas pagarigan, ti laeng kadi di manamati nga asawa ti makimbasol nga agpegpeggad ti espiritualidad ti maysa a Kristiano, wenno nabaybay-anna a mismo ti panagadalna iti Biblia ken saan a talaga a regular iti gimong ken iti ministerio?

16. Apay a saan nga agapura dagiti Kristiano a makidiborsio?

¹⁶ Saantayo nga agapura a makidiborsio no ipatpategtayo ti relasiontayo iti Dios ken ap-apresiarentayo ti sagutna a panagasawa. Kas adipen ni Jehova, kayattayo a santipikaren ti nasantuan a naganna. Gapuna, ditay kayat nga iplano ti lumapsut iti maysa panagasawa tapno laeng makaasawatayo manen iti sabali.​—Jer. 17:9; Mal. 2:13-16.

17. Kaano a maibagatayo a ti Dios inayabanna dagiti naasawaan a Kristiano iti talna?

¹⁷ Masapul nga ikagumaan ti maysa a di manamati ti asawana a taginayonen a natibker ti relasionda kas agassawa. Ngem no inaramidnan ti amin a kabaelanna a mangsalbar iti panagasawada, saan koma a makonsiensia no makisina latta ti di manamati  nga asawana. Insurat ni Pablo: “No sumina daydiay di mamati, bay-an a sumina; ti kabsat a lalaki wenno ti kabsat a babai saan a paadipen iti sidong dagiti kasta a kasasaad, no di ket ti Dios inayabannakayo iti talna.”​—1 Cor. 7:15. *

AGTALEK KEN JEHOVA

18. Uray no saanen a masalbar ti panagasawa ti maysa, ania ti mabalin a nasayaat a resulta ti panagreggetna?

¹⁸ No adda problema ti relasionyo nga agassawa, dumawatkayo iti bileg ken ni Jehova ken kanayon nga agtalekkayo kenkuana. (Basaen ti Salmo 27:14.) Subliantayo ni Linda a nadakamat itay. Nagdiborsioda idi agangay nupay adu a tawen nga inkagumaanna a salbaren ti panagasawada. Nasayangan kadi iti panagreggetna? “Saan a pulos,” kinunana. “Nagsayaat a pangsaksi dayta iti sabsabali. Nadalus ti konsiensiak. Kangrunaanna, nakatulong iti balasangko dagidi a tawtawen tapno makapagtalinaed a natibker iti kinapudno. Nagbalin a naregta ken dedikado a Saksi ni Jehova.”

19. Ania ti mabalin a resultana no ikagumaan ti maysa a salbaren ti panagasawana?

¹⁹ Maragsakan ti maysa a Kristiano nga agnagan Marilyn ta nagtalek iti Dios ken ikagumaanna a sinalbar ti panagasawada. “Kayatko idi ti makisina ken lakayko gapu ta dinak supsuportaran iti pinansial ken agpegpeggad ti espiritualidadko,” kinunana. “Dati a panglakayen ni lakayko. Ngem gapu iti di nainsiriban a pannakisosio iti negosio, naglanganen kadagiti gimong ken awanen ti komunikasionmi. Napabutnganak unay iti iyaatake dagiti terorista iti siudadmi isu a liniklikakon ti makilangen iti sabsabali. Naamirisko idi agangay nga adda met basolko. Insublimi ti komunikasionmi, ti panagadal ti pamiliami, ken nagbalinkami a regular kadagiti gimong. Nasingpet dagiti panglakayen ken tinulongandakami. Simmayaat manen ti relasionmi nga agassawa. Idi agangay, naaddaan manen ni lakayko kadagiti pribilehio iti kongregasion. Nupay narigat ti napasaranmi, nakaadalkami isu a naragsak ti resultana.”

20, 21. No maipapan iti panagasawa, ania koma ti determinasiontayo?

²⁰ Naasawaantayo man wenno saan, kanayontayo koma nga agtalek ken Jehova ken dumawattayo iti bileg. No adda problema ti panagasawatayo, masapul nga ikagumaantayo a solbaren dayta, ket laglagipentayo a dagiti agassawa “saandan a dua, no di ket maymaysadan a lasag.” (Mat. 19:6) Ken laglagipentayo a no ditay makisina iti di manamati nga asawatayo uray adda dagiti pakarigatantayo, mabalin a maragsakantayto a makakita kenkuana nga agbalin nga adipen ni Jehova.

²¹ Aniaman ti kasasaadtayo, annadantayo koma ti panagtigtignaytayo tapno makaipaaytayo iti nasayaat a panangsaksi kadagiti saan nga agdaydayaw ken Jehova. No problemado ti panagasawatayo, sipapasnek nga ikararagtayo dayta, tingitingentayo a naimbag ti motibotayo, utobentayo a naimbag ti Kasuratan, ken agpatulongtayo kadagiti panglakayen. Kangrunaanna, determinadotayo koma a mangparagsak ken Jehova a Dios aniaman ti aramidentayo ken ipakitatayo ti pudpudno nga apresasiontayo iti nagsayaat a sagutna a panagasawa.

[Footnotes]

[Salsaludsod]

[Blurb iti panid 10]

Masansan a nasayaat ti resultana no saan a sumuko a dagus dagiti Kristiano a problemado ti panagasawada

[Blurb iti panid 12]

Kanayon nga agtalekka ken Jehova ken dumawatka iti bileg

[Ladawan iti panid 9]

Bendisionan ni Jehova dagiti Kristiano a mangikagkagumaan a mangsalbar iti problemado a panagasawada

[Ladawan iti panid 11]

Makaipaay iti liwliwa ken naespirituan a tulong ti kongregasion Kristiano