Salsaludsod Dagiti Agbasbasa

Kasano a “napateg kadagiti mata ni Jehova” ti ipapatay dagiti nasungdo Kenkuana?

▪ Inkanta ti napaltiingan a salmista: “Napateg kadagiti mata ni Jehova ti ipapatay dagidiay nasungdona.” (Sal. 116:15) Napateg ken Jehova ti biag ti tunggal adipenna. Ngem saan la a ti ipapatay ti maysa nga indibidual ti tuktukoyen ti sasao iti Salmo 116.

No mangipaay ti maysa a Kristiano iti palawag iti pumpon, saan a maitutop nga iyaplikarna ti Salmo 116:15 iti tao a pimmusay uray no natay a matalek ken Jehova. Apay? Gapu ta adda nalawlawa a kaipapanan ti sasao ti salmista. Kaipapananna a di ipalubos ti Dios a matay ti amin a nasungdo kenkuana kas grupo gapu ta ibilangna ida a nakapatpateg.​—Kitaem ti Salmo 72:14; 116:8.

Ipasigurado kadatayo ti Salmo 116:15 a saan nga ipalubos ni Jehova a dagiti nasungdo nga adipenna ket naan-anay a mapukaw ditoy daga kas maysa a grupo. Kinapudnona, ti moderno a pakasaritaantayo ipakitana a naibturantayo dagiti nakaro a pakasuotan ken pannakaidadanes. Nalawag a pammaneknek dayta a saan nga ipalubos ti Dios a mapapatay ti amin nga adipenna.

Gapu ta mannakabalin-amin ni Jehova ken sigurado a matungpal ti panggepna, dina ipalubos a madadaeltayo kas maysa a grupo. No ipalubosna, agparang a nabilbileg dagiti kabusorna ken saanen a matungpal ti panggepna a ti daga ket pagnaedan dagiti nasungdo a tattao. Ngem imposible a mapasamak dayta! (Isa. 45:18; 55:10, 11) No awan ti tao a mabati nga agdayaw kenkuana iti naindagaan a paraangan ti naindaklan a naespirituan a templo, awanen ti mangipaay iti sagrado a panagserbi ken Jehova ditoy daga! Awan metten ti mangbukel iti “baro a daga”​—ti nalinteg a kagimongan dagiti tattao ditoy daga nga iturayan ti “baro a langit.” (Apoc. 21:1) Kasta met, saanen a matungpal ti Sangaribu a Tawen a Panagturay ni Kristo gapu ta awanen ti iturayanna ditoy daga.​—Apoc. 20:4, 5.

No ipalubos ti Dios a papatayen dagiti kabusorna ti amin nga adipenna ditoy daga, mapagduaduaan ti saad ken reputasionna. No kasta ti mapasamak, madadael ti saad ni Jehova kas Soberano iti Uniberso. Kanayonanna, gapu iti panagraem ni Jehova iti bagina ken iti nasantuan a naganna, dina ipalubos ti ipapatay dagiti nasungdo kenkuana kas maysa a grupo. Ken panunotem daytoy: Gapu ta “awan ti di kinahustisia” iti Dios, sigurado a pagtalinaedenna ti grupo dagiti tattao a sisusungdo nga agserserbi kenkuana. (Deut. 32:4; Gen. 18:25) Kanayonanna, ti panangipalubosna a matalipupos dagiti adipenna kas maysa a grupo ket saan a maitunos iti Sao ti Dios: “Saanto a panawan ni Jehova ti ilina maipagapu iti naindaklan a naganna.” (1 Sam. 12:22) Kinapudnona, “saanto a baybay-an ni Jehova ti ilina, saannanto met a panawan ti bukodna a tawid.”​—Sal. 94:14.

Anian a makaliwliwa a maammuan a dinto mapukaw ditoy daga ti ili ni Jehova! Aniaman ti mapasamak, agtalinaedtayo koma a nasungdo iti Dios, nga agtalektayo iti karina: “Aniaman nga igam a mabukelto maibusor kenka saanto nga agballigi, ket aniaman a dila a tumakderto a bumusor kenka iti panangukom kondenaremto. Daytoy ti pagtatawidan a sanikua dagiti adipen ni Jehova, ket ti kinalintegda aggapu kaniak.”​—Isa. 54:17.

[Blurb iti panid 22]

Dinto pulos ipalubos ti Dios a matalipupos ti ilina