“Siputanyo ti Lebadura Dagiti Fariseo”

Pinakdaaran ni Jesus dagiti adalanna: “Siputanyo ti lebadura dagiti Fariseo, nga isu ti panaginsisingpet.” (Luc. 12:1) Ipakita ti umasping a salaysay a silalawag a konkondenaren ni Jesus “ti sursuro” dagiti Fariseo.​—Mat. 16:12.

No dadduma, usaren ti Biblia ti “lebadura,” wenno pangpaalsa, kas simbolo ti kinadakes. Awan duadua a dakes ti epektona kadagiti agdengdengngeg dagiti pannursuro ken kababalin dagiti Fariseo. Apay a napeggad ti pannursuro dagiti Fariseo?

1 Ipagpannakkel dagiti Fariseo a nalintegda ken tagibassitenda dagiti ordinario a tattao.

Dayta a panaginlilinteg ket nailadawan iti maysa kadagiti ilustrasion ni Jesus. Kinunana: “Ti Fariseo nagtakder ket rinugianna nga ikararag dagitoy a banag iti kabukbukodanna, ‘O Dios, agyamanak kenka a saanak a kas iti dadduma a tattao, a manangkikil, nakillo, mannakikamalala, wenno uray kas iti daytoy nga agsingsingir iti buis. Agayunarak iti mamindua iti maysa a lawas, itedko ti apagkapullo ti amin a bambanag a magun-odak.’ Ngem ti agsingsingir iti buis nga agtaktakder iti adayo saanna a kayat uray ti mangitangad kadagiti matana sadi langit, no di ket dinandanogna ti barukongna, a kunkunana, ‘O Dios, mangngaasika kaniak a managbasol.’”​—Luc. 18:11-13.

Inapresiar ni Jesus ti kinapakumbaba ti agsingsingir iti buis: “Ibagak kadakayo, Daytoy a tao simmalog a napan iti pagtaenganna a napaneknekan a nalinlinteg ngem [iti Fariseo]; agsipud ta ti tunggal maysa a mangitan-ok iti bagina maipababanto, ngem ti mangipakumbaba iti bagina maitan-okto.” (Luc. 18:14) Nupay pagaammo a nakusit dagiti agsingsingir iti buis, tinulongan ni Jesus dagidiay dimngeg kenkuana. Adda dagiti agsingsingir iti buis a nagbalin a pasurotna kas kada Mateo ken Zaqueo.

Komusta ngay no panunotentayo a nalalaingtayo ngem iti sabsabali gapu iti inted-Dios nga abilidad wenno pribilehiotayo wenno gapu iti nagkamalian ken pagkapuyan ti sabsabali? Masapul nga iwaksitayo a dagus dayta a kapanunotan ta kuna ti Kasuratan: “Ti ayat naanus ken naasi. Saan a naimon wenno napasindayag wenno natangsit. Saan a naalas ti kababalinna wenno naimut wenno nalaka nga agpungtot. Awan im-impenna a sakit ti nakem. Saanna a pagragsakan ti dakes. Pagragsakanna ketdi ti kinapudno.”​—1 Cor. 13:4-6, Ti Baro a Naimbag a Damag Biblia.

Tuladentayo koma ti kababalin ni apostol Pablo. Kalpasan a dinakamatna a ni “Kristo Jesus immay ditoy lubong tapno mangisalakan kadagiti managbasol,” innayonna: “Siak ti kangrunaan kadagitoy.”​—1 Tim. 1:15.

Salsaludsod nga utoben:

Bigbigek kadi a managbasolak ken agpannuray ti pannakaisalakanko iti di kaikarian a kinamanangngaasi ni Jehova? Wenno ibilangko kadi ti bagik a nangatngato ngem iti dadduma gapu iti nabayagen a matalek a panagserbik, kadagiti pribilehiok iti organisasion ti Dios, wenno kadagiti nainkasigudan nga abilidadko?

  2 Kayat dagiti Fariseo a pagbiliben ti sabsabali babaen ti publiko a panangipakitada iti kinalintegda. Kayatda ti agbalin a natan-ok ken dagiti espesial a titulo.

Ngem impakdaar ni Jesus: “Amin dagiti aramid nga aramidenda ket aramidenda tapno maimatangan dagiti tattao; ta paakabaenda dagiti naglaon-kasuratan a kahita nga ikapetda kas pangsaluad, ken padakkelenda dagiti barayubay dagiti kawesda. Kaykayatda ti katan-okan a puesto kadagiti pangrabii ken dagiti makinsango a pagtugawan kadagiti sinagoga, ken dagiti kablaaw kadagiti plasa ken awagan ida dagiti tattao iti Rabbi.” (Mat. 23:5-7) Anian a naiduma ti kababalin ni Jesus kadakuada! Napakumbaba nupay isu ket perpekto nga Anak ti Dios. Idi adda nangawag kenkuana iti “naimbag,” kinunana: “Apay nga awagannak iti naimbag? Awan asinoman a naimbag, malaksid ti maysa, ti Dios.” (Mar. 10:18) Iti sabali pay a gundaway, binugguan ni Jesus ti saksaka dagiti adalanna isu a nangipakita iti pagtuladan ti kinapakumbaba kadagiti pasurotna.​—Juan 13:1-15.

Dagiti pudno a Kristiano masapul a pagserbianda dagiti kapammatianda. (Gal. 5:13) Nangnangruna nga aramiden dayta dagidiay mayat nga agserbi kas manangaywan iti kongregasion. Nasayaat no ti maysa ket ‘rumagpat iti akem a manangaywan.’ Ngem masapul nga aramidenna dayta gapu ta kayatna ti tumulong iti sabsabali. Dayta nga “akem” ket saan a nalatak wenno naturay a posision. Kas ken Jesus, masapul a ‘napakumbaba ti puso’ dagidiay agserbi a manangaywan.​—1 Tim. 3:1, 6; Mat. 11:29.

Salsaludsod nga utoben:

Kaykayatko kadi ti makilangen kadagidiay addaan iti pribilehio iti kongregasion tapno agbalinak a nalatak wenno maikkanak iti kanayonan a pribilehio? Interesadoak laeng kadi kadagiti aspeto ti panagserbi iti Dios a mangyeg iti dayaw kaniak? Ikagkagumaak kadi ti agbalin a nalatak?

  3 Narigatan dagiti ordinario a tattao a mangannurot iti Linteg gapu kadagiti pagalagadan ken tradision dagiti Fariseo.

Inted ni Jehova ti Mosaiko a Linteg kadagiti Israelita tapno ammoda ti rumbeng a panagdayawda kenkuana. Ngem saan a nailanad iti dayta dagiti babassit a detalye. Kas pagarigan, iparit ti Linteg ti panagtrabaho iti Sabbath ngem saanna nga espesipiko a dinakamat no ania dagiti mabalin wenno saan a mabalin nga aramiden iti dayta nga aldaw. (Ex. 20:10) Innayon dagiti Fariseo dagiti bukodda a pagalagadan ken tradision gapu ta ipagarupda a kurang dagiti impormasion a linaon ti Linteg. Inannurot ni Jesus ti Mosaiko a Linteg ngem saanna nga inannurot dagiti istrikto a pagalagadan dagiti Fariseo. (Mat. 5:17, 18; 23:23) Saan laeng a ti linaon ti Linteg ti nakitana no di ket natarusanna ti rason a naited dayta ken ti kinapateg ti asi. Nainkalintegan ni Jesus uray no saan a naaramid dagiti adalanna ti namnamaenna. Kas pagarigan, nupay imbagana iti tallo nga adalanna nga agtalinaedda a siririing ken agtultuloyda nga agbantay iti rabii a pannakaarestona, maulit-ulit a nakaturogda. Nupay kasta, naawatanna ti riknada isu a kinunana: “Ti espiritu, siempre, sigagagar, ngem ti lasag nakapuy.”​—Mar. 14:34-42.

Salsaludsod nga utoben:

Mangar-aramidak kadi kadagiti istrikto a paglintegan wenno pagbalbalinek a linteg ti personal nga opinionko? Nainkalintegan kadi ti namnamaek iti sabsabali?

Panunotem a naimbag ti nagdumaan ti pannursuro ni Jesus ken dagiti Fariseo. Adda kadi makitam a masapul a parang-ayem? No adda, apay a dimo ikagumaan a parang-ayen dayta?

[Ladawan iti panid 28]

Dagiti Fariseo nagikabilda kadagiti naglaon-kasuratan a kahita kadagiti mugingda.​—Mat. 23:2, 5

[Dagiti Ladawan iti panid 29]

Saan a kas kadagiti napannakkel a Fariseo, agserbi iti sabsabali dagiti napakumbaba a panglakayen

[Ladawan iti panid 30]

Nainkalintegan kadi ti namnamaem iti sabsabali kas ken Jesus?