Kas Insalaysay ni Olivier Randriamora

“Iti kinapudnona ammok no kasano ti agbalin a nanumo kadagiti pagtaraon, iti kinapudnona ammok no kasano ti maaddaan iti kinaruay. Iti amin a banag ken kadagiti amin a kasasaad naadalko ti palimed agpadpada no kasano ti mabsog ken no kasano ti mabisinan . . . Ta iti amin a bambanag addaanak iti bileg gapu iti daydiay mangmangted kaniak iti pannakabalin.”​—Fil. 4:12, 13.

DAGITOY a sasao ni apostol Pablo ti nabayagen a mangparparegta kaniak ken ni baketko nga Oly. Kas ken Pablo, nasursuromi dayta a “palimed” babaen iti naan-anay a panagtalekmi ken Jehova bayat ti panagserbimi Kenkuana ditoy Madagascar.

Naitulagkamin nga agkasar ken Oly idi nangrugi a makipagadal iti Biblia ti ina ni Oly idi 1982. Nakipagadalak met iti Biblia, ket kimmadua kaniak ni Oly idi agangay. Nagkasarkami idi 1983, nabautisarankami idi 1985, ken inrugimi a dagus ti nag-auxiliary pioneer. Nagbalinkami a regular pioneer idi Hulio 1986.

Idi Setiembre 1987, nangrugikami nga agserbi kas special pioneer. Ti immuna a teritoriami ket ti bassit nga ili iti makin-amianan a laud a Madagascar nga awan pay idi ti kongregasionna. Adda agarup 18 a kangrunaan a tribu ken nakaad-adu a babassit a grupo iti Madagascar, agraman ti nadumaduma a kaugalian ken tradision. Malagasy ti opisial a lenguahe ngem adda pay nadumaduma a dialekto. Inrugimi ngarud a sursuruen ti dialekto iti baro a teritoriami, ket nakatulong dayta tapno ad-adda nga awatendakami dagiti lumugar.

Idi damo, gapu ta duduakami laeng, kanayon a siak ti mangiparang iti palawag publiko iti Domingo, ket ni laeng Oly ti kakaisuna nga agpalakpak. Iparangmi met ti amin a paset ti Teokratiko nga Eskuelaan ti Panagministro, nga adda kampay idi bumalay a kasarsarita ni Oly. Anian a bang-armi idi insingasing ti manangaywan iti sirkito nga ibagaymi iti kasasaadmi dagiti gimong!

Saan a nasayaat ti serbisio ti koreo isu a masansan a dimi maaw-awat ti binulan nga alawansmi. Isu a nasursuromi nga anusan no ania laeng ti adda. Iti maysa a gundaway, awan umdas a pagpletemi a tumabuno iti asamblea sirkito, nga agarup 130 kilometro ti kaadayona. Nalagipmi ti kinuna ti maysa a kabsat: “Ibagam ken Jehova dagiti problemam ta isu ti makintrabaho iti ar-aramidem.” Nagkararagkami ngarud ket inkeddengmi a magnakami lattan. Idi pumanawkamin, dimi ninamnama a bumisita ti maysa a kabsat ket inikkannakami iti kuarta nga umanay a pagpletemi iti bus!

PANAGSERBI ITI SIRKITO

Idi Pebrero 1991, nadutokanak kas manangaywan iti sirkito. Ti dati a bassit a grupomi ket buklen idin ti 9 nga agibumbunannag a 3 kadakuada ti bautisado, ken agarup 50 ti masansan a tumabuno. Kalpasan ti pannakasanayko, nagserbikami iti  maysa a sirkito iti kabesera a siudad ti Antananarivo. Idi 1993, nayakarkami iti sabali a sirkito iti makindaya a paset ti pagilian. Naiduma unay dayta iti kasasaad ti naggapuanmi a siudad.

Magmagnakami a mapan kadagiti kongregasion ken naiputputong a grupo, nga uray la umabot no dadduma iti 145 kilometro, a lasatenmi dagiti nasamek a kabambantayan. Sumagmamano laeng ti kargami. Ngem nadagdagsen ti awitmi no adda slide show iti palawagko, a pasaray karaman idi iti ibibisita ti manangaywan iti sirkito. Awiten ni Oly ti slide projector ket bagkatek met ti nadagsen a bateria ti lugan.

Masansan a magnakami iti agarup 40 kilometro iti agmalem tapno madanonmi ti sumaruno a kongregasion. Sumang-at ken sumalogkami kadagiti desdes iti bantay, bumallasiwkami kadagiti karayan, ken lumasatkami kadagiti kapitakan. No dadduma, umyankami iti igid ti dalan, ngem kaaduanna a sumapulkami iti purok nga umyananmi. Adda dagiti gundaway nga agpakaasikami nga umyan iti pagtaengan dagiti tattao a dimi am-ammo. Inton adda pagdagusanmin, irugimi metten ti agsagana iti makan. Bumulod ni Oly iti banga ken sumakdo iti danum iti kaasitgan a karayan wenno ban-aw. Mapanak met bumulod iti wasay a pagbalsigko iti kayo a pagsungrod. Nakabaybayag sakbay a makalutokami. No dadduma, gumatangkami iti manok, nga isunto pay laeng ti partienmi ken lutuenmi a sidaen.

Inton makapangankamin, agsakdokami pay iti pagdigusmi. No dadduma, iti kosina lattan ti pagturoganmi. No kasta nga agtudo, maturogkami lattan a nakasanggir iti diding tapno saankami a maslep iti agtedted nga atep.

Ikagumaanmi a kasabaan ti tunggal pakidagusanmi. Inton makadanonkami iti papananmi, makaparagsak ti aglaplapusanan a kinaimbag ken kinamanagpadagus dagiti Kristiano a kakabsat. Uray kasanot’ bannogmi iti dalan, nabang-arankami gapu iti naimpusuan a panangapresiarda iti ibibisitami.

No makidaguskami kadagiti kakabsat, tumulongkami kadagiti trabaho iti balay tapno makaruarda a kaduami iti panangasaba. Saankami a nangnamnama iti aniaman a pagnam-ayan wenno nangina a taraon, a saan a kabaelan dagiti mangpadagus kadakami.

PANAGBISITA KADAGITI NAIPUTPUTONG A GRUPO

Maragsakankami a bumisita kadagiti naiputputong a grupo uray nakaad-adu ti iyeskediulda nga aktibidadmi. Gistay awan ti tiempomi nga ‘aginana iti apagbiit.’ (Mar. 6:31) Iti pagtaengan ti maysa a Saksi a pagassawaan, inawisda amin ti 40 nga iyad-adalanda iti Biblia. Kinadua ni Oly ti kabsat a babai a nangyadal iti 20, ket kinaduak met ti kabsat a lalaki a nangyadal iti sabali pay a 20. Apagpanaw ti maysa nga estudiante, isarunomi a dagus ti sabali. Idi mumalemen, insardengmi pay laeng ti mangyadal tapno aggigimongkami, sa kalpasanna intuloymi manen ti mangyadal. Pasado 8:00 iti rabiin idi nalpaskami!

Iti sabali a grupo a binisitami, kimmuyog ti amin a kakabsat nga immay nangasaba iti kabangibang a purok iti agarup 8:00 iti bigat. Dagiti daan a kawesmi ti inusarmi. Tengngat’ aldawen idi makadanonkami kalpasan ti nawatiwat a pannagnami iti kabakiran. Sinuktanmi dagiti badomi ket insigida  nga inrugimi ti mangasaba. Adukami a mangasaba ngem sumagmamano laeng ti balay a papananmi. Isu nga iti agarup 30 a minuto laeng, nalpasmin ti teritoriami. Inramanmi a trinabaho ti sabali pay a purok. Kalpasanna, inrugimi manen ti nawatiwat a pannagnami nga agawid. Idi damo, medio maupaykami ta nakabaybayag a nagnagnakami ngem agarup maysa nga oras laeng a nangasabakami. Nupay kasta, awan man la ti reklamo dagiti kakabsat ken nakaregregtada latta.

Masarakan iti asideg ti tapaw ti bantay ti maysa a naiputputong a grupo idiay Taviranambo. Nadanonmi sadiay ti maysa a Saksi a pamilia nga agnanaed iti maysa a kalapaw. Adda met sabali a kalapaw iti asideg nga isu ti paggigimonganda. Pagammuan ta nagpukkaw ti kabsat a lalaki nga ay-ayabanna dagiti kakabsat iti sabali a tapaw ti bantay. Nagpukkaw met a simmungbat ti maysa a kabsat. Impukkaw manen ti agaw-awis a kabsat, “Adda ditoyen ti manangaywan iti sirkito!” “Wen, umaykamin!” insungbat met ti kabsat nga adda iti kabangibang a bantay. Maidanon met dayta a mensahe iti dadduma pay nga agnanaed iti adayo. Idi kuan, agsangpeten dagiti tattao ket nasurok a 100 ti bilangmi idi mangrugi ti gimong.

DAGITI PARIKUT ITI PANAGDALIASAT

Idi 1996, nayakarkami iti maysa a sirkito nga as-asideg iti Antananarivo, iti makintengnga a kabambantayan ti pagilian. Naiduma met ti rigat iti daytoy a sirkito. Awan ti regular a biahe a mapan kadagiti nasulinek a lugar. Iti naminsan a panagbisitami, nakaeskediul a bisitaenmi ti maysa a grupo iti Beankàna (Besakay), nga agarup 240 kilometro manipud Antananarivo. Kalpasan a nakasaritami ti drayber ti bassit a trak, naglugankamin nga agturong sadiay. Agarup 30 ti pasahero iti uneg ken ruar ti trak, a dadduma ti adda iti tuktok ken adda met dagiti nagbitin iti likud.

Kas iti gagangay a mapaspasamak, naperdian ti lugan isu a nagnagnakami. Kalpasan ti sumagmamano nga oras a pannagnami, addan sumungad a dakkel a trak. Simmardeng latta uray napekpek iti tao ken tagilako. Limmugankami ket inan-anusanmi ti nagtaktakder a nagbiahe. Nakagtengkami iti karayan nga agdama a matartarimaan ti rangtayna. Nagnagnakami manen ket nakadanonkami met laeng iti bassit a purok nga ayan ti sumagmamano nga special pioneer. Nupay saan nga iskediul ti bisitami kadakuada, nakikaduakami pay laeng a nangasaba bayat nga ur-urayenmi a matarimaan ti rangtay ken adda sumangpet a pagluganan.

 Makalawas ti limmabas sakbay nga adda dimteng a lugan ket intuloymi ti nagbiahe. Lasonglasong ti kalsada a pagdalananmi. Pasaray tumulongkami a mangiduron iti lugan iti pagattumeng a danum nga uray la maikagkagliskami. Parbangonen idi nakadanonkami iti maysa a bassit a purok ket dimsaagkami sadiay. Intuloymi pay ti nagna kadagiti tambak ken pagatsiket a napitak a danum sakbay a nakadanonkami iti papananmi.

Dayta ti damo nga ibibisitami iti dayta a lugar isu a kayatmi a kasabaan dagiti agtaltalon ken damagenmi koma no sadino ti ayan dagiti Saksi. Anian a ragsakmi idi maammuanmi nga isuda met gayam dagiti kakabsat a sapsapulenmi!

PANANGPAREGTA KADAGITI DADDUMA NGA AGPAYUNIR

Iti panaglabas ti tawtawen, naragsakankami unay a makakita iti resulta ti panangparegtami kadagiti dadduma nga agpayunir. Idi bimmisitakami iti maysa a kongregasion nga addaan iti siam a regular pioneer, pinaregtami ti tunggal payunir nga aramidenda a kalat ti panangtulong iti maysa nga agibumbunannag nga agbalin a payunir. Idi bimmisitakami manen kalpasan ti innem a bulan, addaandan iti 22 a regular pioneer. Ti dua a babbai a payunir pinaregtada nga agpayunir dagiti ammada, nga agpada a panglakayen. Kalpasanna, pinaregta met dagitoy a panglakayen nga agpayunir ti sabali a panglakayen. Di nagbayag, nadutokan kas special pioneer ti maikatlo a panglakayen. Idi agangay, nagserbi kas manangaywan iti sirkito a kaduana ni baketna. Komusta met dagiti dua a panglakayen? Nagbalin a manangaywan iti sirkito ti maysa, ket boluntario metten ti sabali iti panagbangon iti Kingdom Hall.

Inaldaw nga agyamyamankami iti tulong ni Jehova, a bigbigenmi nga awan ti maaramidanmi iti bukodmi a pigsa. Pudno a mabannog ken agsakitkami no dadduma ngem naragsakkami no pampanunotenmi dagiti resulta ti ministeriomi. Parparang-ayen ni Jehova ti trabahona. Maragsakankami a maaddaan iti nanumo a paset iti dayta, nga agserserbikami itan kas special pioneer. Wen, nasursuromi ti “palimed”​—ti panagtalek ken Jehova, a ‘mangmangted iti pannakabalin’ kadatayo.

[Blurb iti panid 6]

Nasursuromi ti “palimed” ​—ti panagtalek ken Jehova

[Mapa/Dagiti Ladawan iti panid 4]

Ti Madagascar a maawagan iti Big Red Island, ti maikapat a kadakkelan nga isla ditoy daga. Nalabaga ti dagana, ken masarakan sadiay ti adu a nadumaduma a parsua

[Ladawan iti panid 5]

Panagdaliasat ti maysa kadagiti karigatan a kapadasanmi

[Dagiti Ladawan iti panid 5]

Maragsakankami a makikadua iti panangyadal iti Biblia