Agserbika iti Dios ti Wayawaya

“Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”​—1 JUAN 5:3.

ANIA TI SUNGBATYO?

Ania ti kayat ni Satanas a panunotentayo mainaig kadagiti linteg ti Dios?

Apay a masapul a pilientayo a naimbag dagiti kakaduatayo?

Ania ti makatulong tapno agtalinaedtayo a nasungdo iti Dios ti wayawaya?

1. Kasano ti panangaramat ni Jehova iti wayawayana, ken ania a wayawaya ti intedna kada Adan ken Eva?

NI Jehova laeng ti addaan iti naan-anay a wayawaya. Ngem kanayon nga umiso ti panangaramatna iti dayta ken saanna a konkontrolen ti tunggal garaw dagiti adipenna. Imbes ketdi, inikkanna ida iti wayawaya nga agpili, isu a nawayada nga agdesision ken mangpennek iti amin nga umiso a tarigagayda. Kas pagarigan, maymaysa laeng ti imbilinna a saan nga aramiden da Adan ken Eva​—ti dida pannangan manipud iti “kayo ti pannakaammo iti naimbag ken dakes.” (Gen. 2:17) Nagpaiduma ngarud a wayawaya ti naited kadakuada bayat nga itungtungpalda ti pagayatan ti Namarsua.

2. Apay a napukaw dagiti orihinal a nagannaktayo ti wayawayada nga inted ti Dios?

² Apay nga inikkan ti Dios dagiti orihinal a nagannaktayo iti dakkel a wayawaya? Binukelna ida sigun iti ladawanna ken inikkanna ida iti konsiensia, ket umiso laeng nga ekspektarenna nga agaramidda iti umiso gapu iti panagayatda kenkuana kas Namarsua. (Gen. 1:27; Roma 2:15) Ngem sayang ta saan nga impateg da Adan ken Eva ti naindaklan a Manangted iti Biag ken ti wayawaya nga intedna kadakuada. Pinilida ketdi ti di maiparbeng a wayawaya nga imbaga kadakuada ni Satanas, ti wayawaya a mangikeddeng iti bukodda a pagalagadan. Ngem imbes a naaddaanda iti dakdakkel a wayawaya, pinagbalinda ti bagbagida agraman dagiti tumaud nga annakda kas ad-adipen ti basol, ket nakaay-ay-ay ti nagbanaganda.​—Roma 5:12.

3, 4. Ania ti kayat ni Satanas a panunotentayo maipapan kadagiti pagalagadan ni Jehova?

³ No naallukoy ni Satanas ti dua a perpekto a tao agraman ti adu nga anghel a tumallikud iti Dios, kabaelannatayo met nga allilawen. Saan a nagbalbaliw ti pamay-anna.  Kayatna a panunotentayo a makapadagsen dagiti pagalagadan ti Dios ken paidamannatayo iti ragsak. (1 Juan 5:3) Mabalin a maimpluensiaantayo iti dayta a kapanunotan no masansan a makikaduatayo kadagidiay kasta ti kapanunotanda. Kuna ti kabsat a babai nga agtawen iti 24 a nakaaramid iti seksual nga imoralidad: “Naimpluensiaanak kadagiti dakes a kakadua, gapu ta diak kayat a maiduma ti opinionko kadagiti padak nga agtutubo.” Nalabit nariknam met no kasano kapigsa ti impluensia dagiti kapatadam.

⁴ Nakalkaldaang ta ti sumagmamano a kameng ti kongregasion Kristiano ti pagtaudan no dadduma ti dakes nga impluensia. “Adda dagiti am-ammok nga agtutubo a makidedeyt iti saantayo a kapammatian,” kuna ti maysa nga agtutubo a Saksi. “Ngem nabigbigko idi agangay a matultuladko ti kababalinda bayat a makikadkaduaak kadakuada. Naapektaran ti espiritualidadko. Diakon matagtagiragsak dagiti naespirituan a taraon iti gimong, ken manmano metten a mapanak mangasaba. Naamirisko a masapul nga isardengkon ti makikadkadua kadakuada!” Ammom kadi a mabalin a dakkel ti impluensia kenka dagiti kakaduam? Usigem ti maysa a makatulong a pagarigan ti Biblia.​—Roma 15:4.

INAGAWNA TI PUSODA

5, 6. Kasano nga inallilaw ni Absalom ti sabsabali, ken nagballigi kadi ti gandatna?

⁵ Naglaon ti Biblia iti adu a pagarigan dagiti tattao a dakes ti impluensiada. Maysa kadakuada ni Absalom nga anak ni Ari David. Nakatataer ni Absalom. Ngem idi agangay, kas ken Satanas, binay-anna a tumanor iti pusona ti kinaagum, ta in-inut nga inagawna ti kinaari ni amana uray no saan nga isu ti agtawid iti trono. * Nagpammarang a maseknan kadagiti padana nga Israelita ken imparipiripna a saan kano a maseknan ti ari kadakuada. Wen, kas inaramid idi ti Diablo iti hardin ti Eden, nagpammarang a nakasaysayaat ni Absalom ket pinadakesna ti mismo nga amana.​—2 Sam. 15:1-5.

⁶ Nagballigi kadi ti nasikap a plano ni Absalom? Nagballigi idi damo ta kuna ti salaysay ti Biblia: “Intultuloy nga inagaw ni Absalom ti puso dagiti tattao ti Israel.” (2 Sam. 15:6) Ngem idi agangay, naisagmak ni Absalom gapu iti kinaambisiosona. Nakalkaldaang ta nangituggod dayta iti ipapatayna agraman ti rinibu a tattao a naguyugoyna.​—2 Sam. 18:7, 14-17.

7. Ania dagiti maadaltayo iti salaysay maipapan ken Absalom? (Kitaen ti ladawan iti panid 14.)

⁷ Apay a nalaka a naallilaw dagidiay nga Israelita? Nalabit nagustuanda dagiti kari ni Absalom. Wenno mabalin a naallukoyda iti pisikal a langana. Aniaman ti makagapu, daytoy ti masiguradotayo: Saanda a nasungdo ken Jehova ken iti dinutokanna nga ari. Ar-aramaten met ita ni Satanas dagiti arig Absalom nga indibidual tapno maagawna ti puso dagiti adipen ni Jehova. Mabalin a kunada, ‘Istrikto unay dagiti pagalagadan ni Jehova. Kitaem, nakaragragsak dagiti amin a saan nga agserserbi ken Jehova!’ Ibilangmo kadi a kinaulbod dagita ket agtalinaedka a nasungdo iti Dios? Bigbigem kadi a ti laeng “perpekto a linteg” ni Jehova, ti linteg ti Kristo, ti mangiturong kenka iti pudno a wayawaya? (Sant. 1:25) No wen, ipakitam ngarud nga ipatpategmo dayta a linteg, ken usarem koma ti wayawayam kas Kristiano iti umiso a pamay-an.​—Basaen ti 1 Pedro 2:16.

8. Ania a kapkapadasan ti mangipakita a saan nga agbanag iti kinaragsak ti di panangikankano kadagiti pagalagadan ni Jehova?

⁸ Dagiti agtutubo ti nangnangruna a puntiria ni Satanas. Maysa a kabsat a lalaki a nasurok a 30 ti tawenna ti nagkuna maipapan iti kinaagtutubona: “Minatmatak kas  restriksion dagiti moral a pagalagadan ni Jehova, imbes a proteksion.” Dayta ti makagapu a nakaaramid iti seksual nga imoralidad. Ngem a saan a nangyeg daytoy kenkuana iti ragsak. “Adu a tawen a makonkonsensiaak ken agbabbabawiak,” kinunana. Malagip met ti maysa a kabsat a babai ti naaramidanna idi agtutubo pay: “No nakaaramidka iti imoralidad, awan ragragsak ken gaganaygayam. Uray 19 a tawenen ti napalabas, malaglagipko pay laeng dayta a dakes nga inaramidko.” Kuna pay ti maysa a kabsat a babai: “Maduddudog ti riknak ken apektado ti isip ken espiritualidadko no pampanunotek ti saem nga impalak-amko kadagiti patpatgek gapu iti inaramidko. Nakaay-ay-ay ti biag no mapukawmo ti anamong ni Jehova.” Saan a kayat ni Satanas a panunotem ti kakasta a pagbanagan ti basol.

9. (a) Ania dagiti saludsod a makatulong iti panangusigtayo iti panangmatmattayo ken Jehova ken kadagiti linteg ken prinsipiona? (b) Apay a napateg nga am-ammuentayo a naimbag ti Dios?

⁹ Makapaladingit ta adu nga agtutubo a Saksi​—ken uray pay ti dadduma nga adulto​—ti nagnakem laeng idi sagsagabaendan ti epekto ti dakes nga aramidda. (Gal. 6:7, 8) Isaludsodmo ngarud iti bagim: ‘Mailasinko kadi dagiti naulpit a pangallilaw ni Satanas? Ibilbilangko kadi ni Jehova kas kasingedan a Gayyemko, a kanayon nga agpayso ti ibagbagana ken kayatna ti kasayaatan para kaniak? Talaga kadi a kombinsidoak a saanna a pulos ipaidam kaniak ti aniaman a naimbag a pagragsakak?’ (Basaen ti Isaias 48:17, 18.) Tapno agbalin a “wen” ti sungbatmo, masapul a paunegem ti pannakaammom ken Jehova. Kasapulan nga am-ammuem a naimbag ni Jehova  ken bigbigem a dagiti linteg ken prinsipio ti Biblia ipakpakitada nga ay-ayatennaka, imbes nga ing-ingetannaka.​—Sal. 25:14.

IKARARAGMO A MAADDAANKA ITI MASIRIB KEN NATULNOG A PUSO

10. Apay nga ikagumaantayo a tuladen ti agtutubo a ni Ari Solomon?

¹⁰ Sipapakumbaba nga inkararag ti agtutubo pay laeng idi a ni Solomon: “Maysaak laeng a bassit nga ubing. Diak ammo no kasano ti rummuar ken no kasano ti sumrek.” Kalpasanna, kiniddawna a maaddaan iti masirib ken natulnog a puso. (1 Ar. 3:7-9, 12) Sinungbatan ni Jehova dayta a napasnek a kiddaw. Ipangagnaka met no kasta ti kiddawem, ubingka man wenno nataengan. Siempre, dimo namnamaen a simimilagro nga ikkannaka ni Jehova iti nauneg a pannakaawat ken sirib. Ngem pagbalinennaka a masirib no sipapasnek nga adalem ti Saona, ikararagmo ti nasantuan nga espirituna, ken aprobetsarem dagiti naespirituan a probision babaen iti kongregasion Kristiano. (Sant. 1:5) Kinapudnona, pagbalbalinen ni Jehova a nasirsirib dagiti adipenna, uray dagiti ubbing pay, ngem iti amin a di mangikankano iti balakadna, uray dagidiay makunkuna a “mamasirib ken nasasaririt” iti daytoy a lubong.​—Luc. 10:21; basaen ti Salmo 119:98-100.

11-13. (a) Ania dagiti napateg a maadaltayo iti Salmo 26:4, Proverbio 13:20, ken 1 Corinto 15:33? (b) Kasanom a mayaplikar dagitoy a Nainkasuratan a prinsipio?

¹¹ Ad-adda a maam-ammotayo ni Jehova no basaen ken utobentayo dagiti linaon ti Biblia. Mapaneknekantayo a pudno daytoy iti panangusigtayo kadagiti sumaganad a kasuratan. Aglaon dagitoy iti napapateg a prinsipio mainaig iti panangpili kadagiti pakikaduaantayo: “Saanak a nakikatugaw kadagiti tattao ti di kinapudno; ket saanak a sumrek a kadua dagidiay mangilemmeng iti kinasiasinoda.” (Sal. 26:4) “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.” (Prov. 13:20) “Dagiti dakes a pannakitimpuyog dadaelenda dagiti makagunggona nga ugali.”​—1 Cor. 15:33.

¹² Ania dagiti napateg a maadaltayo kadagitoy a teksto? (1) Kayat ni Jehova a pilientayo a naimbag dagiti kakaduatayo. Kayatna a masalaknibantayo iti moral ken espiritual. (2) Maimpluensiaantayo nga agaramid iti naimbag wenno dakes babaen kadagiti kalanglangentayo. Dayta ti agdadata a kinapudno. Ipakita dagita a teksto a gutgutugoten ni Jehova ti pusotayo. Kasano? Paliiwem ta saan a nailanad dagitoy a bersikulo kas bilbilin, kas iti “dika . . . ” Imbes ketdi, naisuratda kas iti aktual a mapaspasamak. Arigna ibagbaga ni Jehova kadatayo: ‘Kastoy ti pagbanaganna no kastoy ti aramidem. Ania ti piliem? Ania ti adda iti pusom?’

¹³ Gapu ta naglaon dagitoy a tallo a bersikulo kadagiti pamunganayan a kinapudno, agaplikarda met iti kaaldawantayo ken iti adu a situasion. Kas pagarigan, isaludsodmo dagitoy iti bagim: Kasano a maliklikak ti pannakikadua kadagidiay “mangilemmeng iti kinasiasinoda”? Kadagiti ania a situasion a makalangenko ida? (Prov. 3:32; 6:12) Siasino ti “masirib a tattao” a kayat ni Jehova a pakilangenak? Siasino “dagiti maag” a kayatna a liklikak? (Sal. 111:10; 112:1; Prov. 1:7) Ania dagiti ‘makagunggona nga ugalik’ a madadael no makitimpuyogak kadagiti dakes a kakadua? Dagiti laeng kadi taga-lubong ti maibilang a dakes a kakadua? (2 Ped. 2:1-3) Ania ti sungbatmo kadagitoy a saludsod?

14. Kasano nga agbalin nga ad-adda a makagunggona ti Panagdaydayaw ti Pamiliayo?

¹⁴ Usigem met ti dadduma pay a teksto ti Biblia a mangipalgak iti kapanunotan ti Dios mainaig iti bambanag a pakaseknam ken ti pamiliam. * Dakayo a nagannak, nasayaat a pagsasaritaanyo ti kakasta a topiko bayat ti Panagdaydayaw ti Pamiliayo. Silalagipkayo  koma a ti panggepyo ket tulongan ti tunggal miembro ti pamiliayo a naan-anay a mangtagipateg iti nauneg a panagayat ti Dios kadatayo kas ipakita dagiti linteg ken prinsipiona. (Sal. 119:72) Ti kasta a panagadal pasingedenna ti intero a pamiliayo ken Jehova ken ti relasionyo iti tunggal maysa.

15. Kasanom a maibaga no talaga a patpatanorem ti masirib ken natulnog a puso?

¹⁵ Kasanom a maibaga no talaga a patpatanorem ti masirib ken natulnog a puso? Ti maysa a pamay-an isu ti panangidilig iti pampanunotmo iti pampanunot dagiti matalek a tattao idi ugma, kas ken Ari David, a nagsurat: “Ti panangaramid iti pagayatam, O Diosko, nagragsakak, ket ti lintegmo adda kadagiti makin-uneg a pasetko.” (Sal. 40:8) Kuna met ti nangisurat iti Salmo 119: “Anian a panagayatko iti lintegmo! Iti intero nga agmalem isu dayta ti pakaseknak.” (Sal. 119:97) Saan a kaskarina nga agtubo ti kasta nga ayat ta resulta dayta ti napasnek a panagadal iti Biblia, panagkararag, ken panagmennamenna. Rumayray met dayta nga ayat bayat a mariknam a bembendisionan ni Jehova ti panagtulnogmo kadagiti pagalagadanna.​—Sal. 34:8.

MAKIDANGADANGKA PARA ITI NAKRISTIANUAN A WAYAWAYAM!

16. Ania ti masapul a bigbigentayo tapno agballigitayo a mangilaban iti pudno a wayawayatayo?

¹⁶ Ipakita ti historia a siraranggas a nakigubat dagiti tattao para iti wayawaya ti nasionda. Ad-adda pay ngarud nga ilabanmo ti Nakristianuan a wayawayam! Bigbigem koma a dagiti kabusormo ket saan laeng a ni Satanas, ti lubong, ken ti makasabidong nga espirituna. Masapul met a labanam ti bukodmo a kinaimperpekto, agraman ti nagulib a pusom. (Jer. 17:9; Efe. 2:3) Ngem mabalinmo ti mangabak babaen ti tulong ni Jehova. Bassit man wenno dakkel a banag ti nagballigiam, adda dua a nagsayaat a resultana. Umuna, maparagsakmo ti puso ni Jehova. (Prov. 27:11) Maikadua, bayat a mapaspasaram ti panangruk-at ti “perpekto a linteg [ti Dios] a kukua ti wayawaya,” ad-adda met a determinadoka nga agtalinaed iti ‘akikid a dalan’ nga agturong iti agnanayon a biag. Maaddaankanto met iti dakdakkel a wayawaya nga ipaay ni Jehova kadagiti nasungdo nga adipenna.​—Sant. 1:25; Mat. 7:13, 14.

17. Apay a saantayo koma a maupay gapu iti kinaimperpektotayo, ken ania a tulong ti ipaay ni Jehova?

¹⁷ Siempre, agkamalitayo amin no dadduma. (Ecl. 7:20) Ngem no mailaw-anka, dika koma maupay ken dimo panunoten nga awanen ti serserbim. No maitibkolka, bumangonka ken agtultuloyka, uray kaipapanan dayta nga agpatulongka kadagiti panglakayen. Kinuna ni Santiago a ti iyebkasda a “kararag ti pammati paimbagennanto ti addaan sagubanit, ket isu ibangonto ni Jehova. Kasta met, no nakaaramid kadagiti basol, mapakawanto dayta kenkuana.” (Sant. 5:15) Saanmo koma a liplipatan a naasi unay ti Dios ken inyasidegnaka iti kongregasion gapu iti naimbag a nakitana kenka. (Basaen ti Salmo 103:8, 9.) Isu a manamnamam a tulongannaka ni Jehova basta naan-anay ti pusom maipaay kenkuana.​—1 Cron. 28:9.

18. Ania ti aramidentayo maitunos iti kararag ni Jesus a nailanad iti Juan 17:15?

¹⁸ Iti kararag ni Jesus iti maudi a rabii a kaduana ti 11 a matalek nga apostolna, insawangna dagitoy a nakallalagip a sasao: “Aywanam ida gapu iti daydiay nadangkes.” (Juan 17:15) Saan laeng a dagiti apostolna ti pakaseknanna no di ket ti amin a pasurotna. No kasta, masiguradotayo a sungbatan ni Jehova ti kararag ni Jesus babaen ti panangaywanna kadatayo iti daytoy napeggad a tiempo. ‘Kadagidiay magmagna iti kinatarnaw, ni Jehova ti kalasag ket saluadannanto ti mismo a dalan dagidiay nasungdona.’ (Prov. 2:7, 8) Wen, saan a kaskarina ti agbalin a natarnaw, ngem dayta ti kakaisuna a mangiturong iti agnanayon a biag ken pudno a wayawaya. (Roma 8:21) Dimo koma ipalubos nga adda mangisiasi kenka manipud iti dayta a dalan!

[Footnotes]

[Salsaludsod]

[Dagiti Ladawan iti panid 14]

Kasanotayo a mailasin dagiti arig Absalom ita ken kasanotayo a masalakniban ti bagbagitayo manipud iti impluensiada?