“Natungpal Met Laengen ti Arapaapko”

Agserserbi idi ni Emilia kas regular pioneer 15 a tawenen ti napalabas, ngem kasapulan idi a sumardeng. Nupay kasta, iti kallabes a tawtawen, mailiw iti nakaragragsak a biagna idi payunir pay, isu a kayatna manen ti agpayunir.

Mapukpukaw ti rag-o ni Emilia gapu iti adu a tiempo a busbusbosenna iti trabahona. Naminsan, insennaayna kadagiti katrabahuanna: “Maksayan koma ti orasko nga agtrabaho!” Nakadanon daytoy iti boss-na ket dinamagna no agpayso. Imbaga ni Emilia a pudno dayta. Ngem tapno maaprobaran, masapul nga anamongan dayta ti maysa a direktor ta awan ti kasta a probision iti kompaniada. Nagsagana ni Emilia a makisarita iti direktor ket inkararagna nga agbalin koma a kalmado ken natured.

Iti pannakisarita ni Emilia, sitataktika ngem situtured a kiniddawna a maksayan koma ti oras a panagtrabahona. Inlawlawagna nga us-usarenna ti tiempona a tumulong iti sabsabali no malpas ti trabahona: “Maysaak a Saksi ni Jehova, ket tumultulongak kadagiti tattao iti naespirituan a pamay-an. Nababa itan ti moralidad dagiti tattao ket napateg a maammuanda ti nasayaat a prinsipio ken pagalagadan, isu a kasapulanda ti iranranudko a pannakaammo iti Biblia. Ipasiguradok nga itultuloyko ti agtrabaho iti amin a kabaelak ngem kayatko nga ad-adu ti tiempok a tumulong iti sabsabali. Isu a kayatko koma a maksayan ti orasko nga agtrabaho.”

Dimngeg a naimbag ti direktor ket kinunana a pinampanunotna met idi ti agboluntario a tumulong iti sabsabali. Kalpasanna kinuna ti direktor: “Gapu kadagiti imbagam a rason, umanamongak iti kiddawmo. Ngem napanunotmo kadin a kaipapanan dayta a basbassitton ti sapulmo?” Imbaga ni Emilia nga inkabilangannan dayta, ket pasimplienna ti biagna no isu ti kasapulan. Kinunana pay: “Ti kapatgan kaniak isu ti panangaramid iti banag a makagunggona kadagiti tattao.” Kuna ti direktor: “Bilibak kadagiti kas kenka a mangisaksakripisio iti tiempoda para iti sabsabali.”

Awan pay empleado iti dayta a kompania a naikkan iti kasta a konsiderasion. Ngem napatgan ti kiddaw ni Emilia nga agtrabaho iti uppat laeng nga aldaw iti kada lawas. Nasdaaw ta naingato ti sueldona, isu a kas met laeng iti dati ti sapulna. Kinunana: “Natungpal met laengen ti arapaapko, ket makapagpayunirak manen!”

Pinampanunotmo kadin no mabaliwam ti kasasaadmo tapno makapagpayunirka, wenno makasublika a payunir?

[Blurb iti panid 32]

Imbaga ti direktor: “Bilibak kadagiti kas kenka a mangisaksakripisio iti tiempoda para iti sabsabali”