Ni Jehova Ummongenna ti Pamiliana

‘Dawatek kadakayo a salimetmetanyo ti panagmaymaysa ti espiritu.’​—EFE. 4:1, 3.

KASANOM NGA ILAWLAWAG?

Ania ti panggep ti panangaywan ti Dios?

Kasanotayo a “salimetmetan ti panagmaymaysa ti espiritu”?

Ania ti makatulong kadatayo nga ‘agbalin a manangngaasi iti maysa ken maysa’?

1, 2. Ania ti panggep ni Jehova para iti daga ken iti sangatauan?

ANIA ti mapanunotmo no mangngegmo ti sao a “pamilia”? Kinadungngo? Kinaragsak? Sangsangkatunos a panangragpat iti maysa a kalat? Mabalin a mapanunotmo dagita no miembroka ti maysa a naayat a pamilia. Ni Jehova a mismo ti namunganay iti pamilia. (Efe. 3:14, 15) Panggepna a maaddaan iti kinatalged, panagtalek iti tunggal maysa, ken pudpudno a panagkaykaysa ti amin a parsuana idiay langit ken ditoy daga.

² Sipud nagbasol da Adan ken Eva, saanen a karaman ti tao iti nagkaykaysa a pamilia ti Dios. Ngem saan a nagbaliw ti panggep ni Jehova. Siguraduennanto a matagitauan ti Paraiso a daga babaen kadagiti annak da Adan ken Eva. (Gen. 1:28; Isa. 45:18) Insaganana ti amin a kasapulan tapno matungpal daytoy a panggepna. Adu kadagita ti nadakamat iti libro ti Biblia nga Efeso, a ti kangrunaan a temana ket panagkaykaysa. Usigentayo ti sumagmamano a bersikulo iti dayta a libro ken kitaentayo no kasanotay a makidanggay iti pannakaibanag ti panggep ni Jehova a mamagkaykaysa kadagiti amin a parsuana.

TI “PANANGAYWAN” KEN TI IBANAGNA

3. Ania ti “panangaywan” ti Dios a nadakamat iti Efeso 1:10, ken kaano a nangrugi ti umuna a bennegna?

³ Imbaga ni Moises kadagiti Israelita: “Ni Jehova a Diostayo ket maymaysa a Jehova.” (Deut. 6:4) Aniaman nga aramiden ni Jehova ket maitunos iti panggepna. Gapuna, “iti naan-anay a pagpatinggaan dagiti naituding a tiempo,” inrugi ti Dios a pagtignayen ti “maysa a panangaywan”​—ti urnos a mamagkaykaysa kadagiti amin a parsuana idiay langit ken ditoy daga. (Basaen ti Efeso 1:8-10.) Adda dua a benneg daytoy a panangaywan. Umuna, isaganana ti kongregasion dagiti napulotan  nga agbiag idiay langit, a ni Jesu-Kristo ti naespirituan nga Uloda. Nangrugi daytoy idi Pentecostes 33 C.E. idi inrugi ni Jehova nga ummongen dagidiay kadua ni Kristo nga agturay idiay langit. (Ara. 2:1-4) Yantangay naideklara a nalinteg ken maikari dagiti napulotan iti nailangitan a biag gapu iti daton a subbot ni Kristo, bigbigenda a naamponda kas “annak ti Dios.”​—Roma 3:23, 24; 5:1; 8:15-17.

4, 5. Ania ti ibanag ti maikadua a benneg ti panangaywan?

⁴ Maikadua, isaganana dagidiay agnaed iti Paraiso ditoy daga iti sidong ti Mesianiko a Pagarian ni Kristo. Ti umuna a karaman iti daytoy a grupo isu ti “dakkel a bunggoy.” (Apoc. 7:9, 13-17; 21:1-5) Bayat dayta a Sangaribu a Tawen a Turay, tumiponto kadakuada ti binilion a mapagungar. (Apoc. 20:12, 13) Gapuna, ad-addanto pay a makita ti panagkaykaysatayo. Inton ngudo ti sangaribu a tawen, ti “bambanag iti daga” ket maipasangonto iti maudi a pannubok. Dagidiay agtultuloy a matalek ket maampon kas naindagaan nga “annak ti Dios.”​—Roma 8:21; Apoc. 20:7, 8.

⁵ Agpada a maisagsagana itan ti nailangitan ken naindagaan a paset ti panangaywan ti Dios. Ngem kas indibidual, kasanotayo a makidanggay iti panangaywan ti Dios?

“SALIMETMETAN TI PANAGMAYMAYSA TI ESPIRITU”

6. Kasano nga ipakita ti Kasuratan a masapul nga agtataripnong dagiti Kristiano?

⁶ Ipakita ti Kasuratan a masapul a literal nga agtataripnong dagiti Kristiano. (1 Cor. 14:23; Heb. 10:24, 25) Ti pudpudno a panagkaykaysa ket saan laeng a basta panagtitipon dagiti tattao iti maymaysa a lugar, kas iti tiendaan wenno istadium a pagay-ayaman. Maaddaantayo iti kasta a panagkaykaysa no iyaplikartayo ti pannursuro ni Jehova ken agpaidalantayo iti nasantuan nga espiritu ti Dios.

7. Ania ti kaipapanan ti ‘panangsalimetmet iti panagmaymaysa ti espiritu’?

⁷ Gapu iti pammatitayo iti daton a subbot ni Kristo, ibilangnatayo ni Jehova kas nalinteg​—kas annakna no napulotantayo wenno kas gagayyemna no kamengtayo ti sabsabali a karnero. Ngem bayat nga agbibiagtayo iti daytoy a sistema, adda latta tumaud a di pagkikinnaawatan. (Roma 5:9; Sant. 2:23) Isu nga imbalakad ti Biblia nga ‘agiinnanustayo.’ Kasano a maitandudotayo ti panagkaykaysa iti kongregasion? Kasapulan a patanorentayo ti ‘naan-anay a napakumbaba a panagpampanunot.’ Kanayonanna, idagadag ni Pablo a sipapasnek nga ikagumaantayo a “salimetmetan ti panagmaymaysa ti espiritu iti mamagkaykaysa a singgalut ti talna.” (Basaen ti Efeso 4:1-3.) Karaman iti daytoy a balakad ti panagpaidalan iti espiritu ti Dios ken panangpatanor iti bungana. Dayta a bunga ti mangrisut iti di pagkikinnaawatan, idinto ta ti ar-aramid ti lasag ket kanayon a mamagsisina.

8. Kasano a mamagsisina ti ar-aramid ti lasag?

⁸ Kasano a mamagsisina ti “ar-aramid ti lasag”? (Basaen ti Galacia 5:19-21.) Ti pannakiabig isinana ti maysa manipud ken Jehova ken iti kongregasion. Kasta met, nasaem ti resulta ti pannakikamalala ta mabalin nga isinana dagiti annak manipud iti nagannakda ken dagiti inosente nga asawa manipud iti asawada. Ti kinarugit apektaranna ti pannakaikaykaysa ti maysa a tao iti Dios ken kadagidiay mangay-ayat kenkuana. Kas pagarigan, no kayattayo a nakapet ti pannakaipigket ti maysa a banag, masapul a nadalus dayta. Ti awan babainna nga aramid ipakitana ti naan-anay a di panagraem kadagiti linteg ti Dios. Amin a dadduma pay nga ar-aramid ti lasag isinada dagiti tattao iti padada a tao ken iti Dios. Ti kasta nga ar-aramid ket naan-anay a di maitunos iti personalidad ni Jehova.

9. Ania a salsaludsod ti mabalintayo nga usigen tapno maammuantayo no ‘sipapasnek nga ikagkagumaantayo a salimetmetan ti panagmaymaysa ti espiritu’?

 ⁹ Nasken ngarud nga isaludsodtayo iti bagitayo: ‘Kasano kapasnekko a mangsalimetmet iti “panagmaymaysa ti espiritu iti mamagkaykaysa a singgalut ti talna”? Ania ti aramidek no adda diak makatunosan? Ibagabagak kadi ti sakit ti nakemko kadagiti gagayyemko tapno kanunongandak? Ur-urayek kadi lattan dagiti panglakayen a mangsolbar iti problema imbes a siak ti agregget a makikappia? No ammok nga adda ing-ingpen kaniak ti maysa, likliklikak kadi tapno saan a madukit ti parikutmi?’ Ipakpakita kadi dagiti sungbattayo a makituntunostayo iti panggep ni Jehova a mamagkaykaysa manen iti amin a bambanag babaen ken Kristo?

10, 11. (a) Kasano kapateg ti pannakikappia iti kakabsattayo? (b) Ania ti masapul nga aramidentayo tapno maadda ti talna ken pamendision ni Jehova?

¹⁰ Kinuna ni Jesus: “No, ngarud, ip-ipanmo ti sagutmo iti altar ket sadiay malagipmo a ti kabsatmo addaan iti maysa a banag a maibusor kenka, panawam ti sagutmo sadiay sanguanan ti altar, ket mapanka; umuna a makikappiaka ken kabsatmo, ket kalpasanna, inton nakasublikan, idatonmo ti sagutmo. Darasem ti makirinnisut.” (Mat. 5:23-25) Insurat ni Santiago a ti “bunga ti kinalinteg naimula ti bin-ina iti sidong dagiti natalna a kasasaad maipaay kadagidiay agar-aramid ti talna.” (Sant. 3:17, 18) Ditay ngarud maibaga a nalinteg ti ar-aramidtayo no saantayo a makikappia iti sabsabali.

¹¹ Kas pagarigan, iti dadduma a pagilian a nakapasamakan ti gubat, napattapatta a 35 porsiento a daga ti saan a mataltalon gapu ta maamak dagiti mannalon kadagiti naikali a bomba. No adda bumtak a bomba, panawan dagiti mannalon ti talonda, maawanan iti pagsapulan dagiti pumurok, ken agkirang ti taraon kadagiti siudad. Kasta met, malapdan ti naespirituan nga irarang-aytayo no adda kababalintayo a mangdadael iti natalna a relasiontayo iti dadduma. Ngem no nalakatayo a mangpakawan ken maseknantayo iti pagimbagan ti dadduma, maadda ti talna nga agbunga iti pamendision ni Jehova.

12. Kasano a matulongandatayo dagiti panglakayen nga agkaykaysa?

¹² Dakkel met ti maitulong dagiti “sagut a tattao” iti panagkaykaysatayo. Naipaayda a tumulong tapno “makagtengtayo amin iti panagmaymaysa iti pammati.” (Efe. 4:8, 13) Bayat a kaduatayo dagiti panglakayen iti panagserbitayo ken Jehova ken mangipapaayda iti balakad a naibatay iti Sao ti Dios, tultulongandatayo a mangikawes iti baro a personalidad. (Efe. 4:22-24) No balbalakadandaka dagiti panglakayen, mabigbigmo  kadi nga ar-aramaten ida ni Jehova a mangisagana kenka nga agbiag iti baro a lubong nga iturayan ti Anakna? Dakayo a panglakayen, ikagkagumaanyo kadi nga aturen ti sabsabali maipaay iti dayta a panggep?​—Gal. 6:1.

“AGBALINKAYO A MANANGNGAASI ITI MAYSA KEN MAYSA”

13. Ania ti ibungana no ditay ipangag ti balakad iti Efeso 4:25-32?

¹³ Dakamaten ti Efeso 4:25-29 ti kababalin a masapul a liklikantayo. Karaman kadagita ti panagsao iti kinaulbod, panagpungpungtot, kinasadut, ken panangisawang iti rinuker a sasao imbes a dagiti naimbag ken makapabileg a sasao. No ti maysa dina ipangag daytoy a balakad, mapagleddaangna ti nasantuan nga espiritu ti Dios, ta puersa dayta a mamagkaykaysa. (Efe. 4:30) Napateg met nga iyaplikartayo ti sumaganad nga insurat ni Pablo: “Maikkat koma kadakayo ti isuamin a makadangran a kinapait ken unget ken pungtot ken panagririaw ken nabassawang a panagsasao agraman ti isuamin a kinadakes. Ngem agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa no kasano a ti Dios sibubulos a nangpakawan met kadakayo babaen ken Kristo.”​—Efe. 4:31, 32.

14. (a) Ania ti ipamatmat ti sasao nga “agbalinkayo a manangngaasi”? (b) Ania ti makatulong kadatayo nga agbalin a manangngaasi?

¹⁴ Ipamatmat ti sasao nga “agbalinkayo a manangngaasi” a saantayo a manangngaasi no dadduma, isu a kasapulan a pasayaatentayo ti kababalintayo. Umiso laeng ngarud a sursuruentayo nga ikabilangan ti rikna ti sabsabali. (Fil. 2:4) Nalabit adda kayattayo nga ibaga a makapakatawa wenno mamagparang a nalaingtayo. Ngem kinamanangngaasi kadi no makasair met dayta iti sabsabali? Matulongantayo nga ‘agbalin a manangngaasi’ no panunotentayo nga umuna ti ibagatayo.

SURSURUEN NGA IPAKITA TI AYAT KEN PANAGRAEM ITI UNEG TI PAMILIA

15. Ania a pamay-an ti pannakilangen ni Kristo iti kongregasion ti tuktukoyen ni Pablo iti Efeso 5:28?

¹⁵ Iti Biblia, ti relasion ni Kristo iti kongregasion ket nayarig iti relasion ti agassawa. Ipaganetget ti ulidan ni Kristo ti rumbeng a panangidaulo, panangayat, ken panangaywan ti asawa a lalaki ken baketna, kasta met ti panagpasakup ti asawa a babai ken lakayna. (Efe. 5:22-33) Ania a “pamay-an” ti tuktukoyen ni Pablo idi insuratna: “Iti kastoy a pamay-an rebbeng a dagiti lallaki ayatenda dagiti assawada a kas kadagiti bukodda a bagi”? (Efe. 5:28) Dinakamatna kadagiti immuna a bersikulo no kasano nga ‘inayat ni Kristo ti kongregasion ken inyawatna ti bagina a maipaay iti dayta, . . . a dinalusanna iti panangbuggona iti danum babaen ti sao.’ Kinapudnona, agtigtignay ti asawa a lalaki maitunos iti panggep ni Jehova a mangummong manen iti amin a bambanag ken Kristo no ipapaayna ti naespirituan a kasapulan ti pamiliana.

16. Ania ti resultana no tungpalen dagiti nagannak ti Nainkasuratan a responsabilidadda iti pagtaengan?

¹⁶ Masapul a laglagipen dagiti nagannak a naggapu ken Jehova ti annongenda. Ngem nakalkaldaang ta adu ita ti “awanan nainkasigudan a panagayat.” (2 Tim. 3:1, 3) Adu nga amma ti mangbaybay-a iti responsabilidadda, ket agsagaba dagiti annakda gapu iti dayta. Ngem imbalakad ni Pablo kadagiti Kristiano nga amma: “Dikay ruroden ti annakyo, no di ket itultuloyyo a padakkelen ida iti disiplina ken panangiturong-panunot ni Jehova.” (Efe. 6:4) Sadino koma pay ti umuna a pakasursuruan dagiti annak iti ayat ken panagraem iti autoridad no di iti pamilia? Dagiti nagannak a mangisursuro kadagitoy a banag ket makituntunos iti panangaywan ni Jehova. No pagbalbalinentayo ti pagtaengantayo kas apon ni ayat babaen ti panangiwaksitayo iti amin nga unget  ken pungtot ken nabassawang a panagsasao, isursurotayo dagiti annaktayo nga agbalin a naayat ken managraem iti autoridad. Daytoy ti mangisagana kadakuada nga agbiag iti baro a lubong ti Dios.

17. Ania ti kasapulan tapno masarangettayo ti Diablo?

¹⁷ Laglagipentay koma a sipud idi damo, ti Diablo, a nangsinga iti talna iti uniberso, kayatna a lapdan ti panagreggettayo a mangaramid iti pagayatan ti Dios. Naibanag ni Satanas ti panggepna kas ipakita ti umad-adu nga agdibdiborsio, agkabkabbalay a di nagkasar, ken mapampanuynoyan a panagasawa dagiti agkasekso. Ditay kayat a tuladen ti ar-aramid ken kababalin nga akseptaren itan ti lubong. Ni Kristo ti ulidantayo. (Efe. 4:17-21) Naiparegta ngarud nga “ikapet[tayo] ti naan-anay a kabal manipud iti Dios” tapno masarangettayo ti Diablo ken dagiti demoniona.​—Basaen ti Efeso 6:10-13.

“ITULTULOYYO TI MAGNA ITI AYAT”

18. Ania ti tulbek ti Nakristianuan a panagkaykaysatayo?

¹⁸ Ayat ti pudpudno a tulbek ti Nakristianuan a panagkaykaysatayo. Buyogen ti puso a napnuan iti ayat iti “maysa nga Apo[tayo],” iti “maysa a Dios[tayo],” ken kadagiti kakabsattayo, determinadotayo a ‘mangsalimetmet iti panagmaymaysa ti espiritu iti mamagkaykaysa a singgalut ti talna.’ (Efe. 4:3-6) Kasta nga ayat ti inkararag ni Jesus: “Agkiddawak, saan a maipapan kadagitoy laeng, no di ket maipapan met kadagidiay addaan iti pammati kaniak babaen iti saoda; tapno maymaysada koma amin, a kas kenka, Ama, naikaykaysaka kaniak ket naikaykaysaak kenka, tapno isuda met maikaykaysada koma kadata . . . Ket impakaammok kadakuada ti naganmo ket ipakaammokto dayta, tapno ti ayat a pinangayatmo kaniak maadda koma kadakuada ken siak a maikaykaysa kadakuada.”​—Juan 17:20, 21, 26.

19. Ania koma ti determinasiontayo?

¹⁹ No marigatantayo a mangparmek kadagiti pagkapuyantayo, ayat koma ti mangtignay kadatayo a mangikararag iti kiddaw ti salmista: “Pagkaykaysaem ti pusok nga agbuteng iti naganmo.” (Sal. 86:11) Determinadotayo koma a mangsaranget iti Diablo iti panangikagumaanna a mangyadayo kadatayo iti naayat nga Amatayo ken kadagiti kakabsattayo. Ikagumaantayo ti ‘agbalin a tumutulad iti Dios, kas annak a dungdungnguen, ket itultuloytayo ti magna iti ayat’​—iti pamilia, ministerio, ken kongregasiontayo.​—Efe. 5:1, 2.

[Salsaludsod]

[Ladawan iti panid 29]

Panawanna ti sagutna iti altar, ket mapan makikappia ken kabsatna

[Ladawan iti panid 31]

Dakayo a nagannak, isuroyo dagiti annakyo no kasano nga ipakita ti panagraem