Situtulok nga Agsaksakripisioda​—Idiay Ecuador

MAYSA a baro idiay Italia nga agnagan Bruno ti marigatan nga agdesision. Kagradgraduarna iti haiskul kas kalaingan iti klaseda, ket pilpiliten dagiti kakabagian ken mannursurona nga ageskuela iti kolehio. Ngem sumagmamano a tawen sakbayna, indedikarna ti bagina ken Jehova, nga inkarina nga iyun-unana ti panangaramid iti pagayatan ti Dios. Ania ti nagbalin a desisionna? Inlawlawagna: “Inkararagko ken Jehova nga itungpalko ti dedikasionko ken iyun-unak ti pagayatanna. Ngem imbagak ti agpayso a diak kayat ti makauma a biag. Kayatko ti nagduduma a kita ti panagserbi ken Jehova.”

 Sumagmamano a tawen kalpasanna, addan ni Bruno idiay Ecuador, iti Abagatan nga America. Kinunana: “Sinungbatan ni Jehova ti kararagko iti labes ti ninamnamak.” Nasdaaw ta idi nakadanon idiay Ecuador, adu ti naam-ammona a babbaro ken babbalasang nga immakar sadiay tapno agserbida ken Jehova iti inggat’ kabaelanda.

AGTUTUBO A ‘NANGSUBOK KEN JEHOVA’

Kas iti rinibu nga agtutubo iti intero a lubong, inawat ni Bruno ti awis ni Jehova: “Subokendak, pangngaasiyo, . . . no saankonto a luktan kadakayo dagiti aribengbeng ti langlangit ket pudno a mangibukbokakto kadakayo iti bendision.” (Mal. 3:10) Gapu iti panagayatda iti Dios, inkeddengda a ‘suboken ni Jehova’ babaen ti situtulok a panangisakripisioda iti tiempo, pigsa, ken sanikuada tapno agserbida iti pagilian nga agkasapulan unay kadagiti agibumbunannag iti Pagarian.

Di nagbayag kalpasan a nakadanon dagitoy a boluntario iti baro a teritoriada, napaneknekanda a “dakkel ti anien, ngem bassit dagiti trabahador.” (Mat. 9:37) Kas pagarigan, ni Jaqueline a naggapu idiay Germany ket maragragsakan a nagsurat iti sanga nga opisina ti Ecuador: “Nasurok pay laeng a dua a tawenko ditoy Ecuador ngem 13 ti iyad-adalakon iti Biblia, ket 4 kadakuada ti regularen a makigimgimong. Makaparagsak, saan kadi?” Kinuna ni Chantal a naggapu idiay Canada: “Idi 2008, immakarak iti maysa a lugar iti kosta ti Ecuador a maymaysa laeng ti kongregasionna. Ita, addan tallo a kongregasion sadiay ken  nasurok a 30 a payunir. Makaparagsak a makita ti nakaad-adu a kabbaro a rumangrang-ay!” Innayonna: “Nabiit pay nga immakarak iti siudad a 2,743 metro ti kangatona iti Kabambantayan ti Andes. Nasurok a 75,000 ti populasion dayta a siudad ngem maymaysa laeng ti kongregasion. Talaga a nakabungbunga ti teritoria isu a makapnek ti ministeriok!”

DAGITI RIGAT A NAKAIPASANGUANDA

Siempre, saan a kaskarina ti agserbi iti sabali a pagilian. Iti kinapudnona, adda dagiti tubeng a naipasango iti dadduma nga agtutubo sakbay pay nga umakarda. Kuna ni Kayla a naggapu idiay Estados Unidos: “Makapaupay ti negatibo a komento ti dadduma a kakabsat iti kongregasion. Dida maawatan no apay a kayatko ti agpayunir iti sabali a pagilian. Isu nga agduaduaak no dadduma no umiso met laeng ti desisionko.” Ngem intuloy latta ni Kayla ti planona. Inlawlawagna: “Adu a karkararag ken Jehova ken napaut a pannakitungtong kadagiti nataengan a kakabsat ti nakatulong kaniak a mangbigbig a bendisionan ni Jehova ti situtulok a panagserbi.”

Adu ti marigatan nga agsursuro iti baro a lenguahe. Malagip ni Siobhan a naggapu idiay Ireland: “Nagrigat no diak mayebkas ti kayatko a sawen. Masapul a sursuruek ti agan-anus, ipasnekko nga adalen ti lenguaheda, ken katawaak ti bagik no agkamaliak.” Kastoy met ti kuna ni Anna a naggapu idiay Estonia: “Adayo a narigrigat ti panagsursuro iti Espaniol no idilig iti natapok, nadagaang a klima ti tropiko, ken kaawan ti napudot a pagdigus. No dadduma, kasla kayatkon ti sumuko. Ngem, masapul a panunotek dagiti nasursurok imbes a dagiti kamalik.”

Pannakailiw ti maysa pay a problema. Bigbigen ni Jonathan a naggapu idiay Estados Unidos: “Idi nabiitak pay iti teritoriak, maup-upayak gapu iti pannakayadayok kadagiti gagayyem ken iti pamiliak. Ngem nailiwliwagko dayta gapu ta impamaysak ti personal a panagadal iti Biblia ken ti ministeriok. Idi agangay, napasublik ti rag-ok gapu kadagiti makaparagsak a kapadasak iti ministerio ken baro a gagayyem iti kongregasion.”

Ti sabali pay a parikut ket ti narigat a kasasaad. Nalabit ti masangpetam a kasasaad ket naiduma iti nakairuamam. Kuna ni Beau a naggapu idiay Canada: “Iti pagilian a naggapuam, gagangay laeng ti kaadda ti serbisio ti danum ken koriente. Ngem awan  dagita ditoy.” Kadawyan iti napanglaw a pagpagilian ti kinapobre, saan a komportable a pagluganan, ken di pannakaammo nga agbasa ken agsurat. Naibturan ni Ines a naggapu idiay Austria dagiti kasta a kasasaad gapu ta napatpateg kenkuana ti nasayaat a kababalin dagiti tattao iti teritoriana. Kinunana: “Managpadagus, nasingpet, mannakitulong, ken napakumbabada. Kangrunaan ti amin, interesadoda unay nga agsursuro maipapan iti Dios.”

“BENDISION AGINGGA NGA AWANEN PANAGKASAPULAN”

Nupay agsaksakripisio dagitoy a babbaro ken babbalasang nga agserserbi idiay Ecuador, mangipapaay ni Jehova iti ‘nawadwadwad a bambanag’ ngem iti ninamnamada. (Efe. 3:20) Kinapudnona, mariknada nga immawatda iti “bendision agingga nga awanen panagkasapulan.” (Mal. 3:10) Kastoy ti makunada maipapan iti ministerioda:

Bruno: “Inrugik ti nagserbi ditoy Ecuador iti nakapimpintas a rehion ti Amazon. Idi agangay, timmulongak iti panangpalawa iti sanga nga opisina ti Ecuador. Ita, agserserbiakon iti Bethel. Idi addaak idiay Italia, inkeddengko nga iyun-unak ni Jehova, ket talaga a pempenkenna ti tarigagayko a makapagserbi kenkuana iti nadumaduma a pamay-an.”

Beau: “Nasingsingedak itan ken Jehova gapu ta ditoy Ecuador maipaayko amin a panawenko para kadagiti naespirituan nga aktibidad. Nakapagpasiarak pay kadagiti nagpipintas a lugar a tinartarigagayak unay idi a makita.”

Anna: “Impagarupko no saan a mabalin nga agserbi a kasla misionero ti maysa a balasang a kas kaniak. Ngem makunak itan a posible gayam. Gapu iti pamendision ni Jehova, maragragsakanak a mangyadal iti Biblia, tumulong nga agibangon iti Kingdom Hall, ken naaddaanak iti adu a gagayyem.”

Elke: “Idi addaak pay idiay Austria, masansan nga ikarkararagko ken Jehova a maaddaanak koma iti uray maysa laeng nga iyad-adalan iti Biblia. Ngem ditoy Ecuador, addaanakon iti 15 nga iyad-adalan iti Biblia! Maragragsakanak no makitkitak ti naragsak a ruprupa dagiti rumangrang-ay nga iyad-adalak.”

Joel: “Nagmayat ti agserbi ken Jehova iti dimo pay napnapanan a lugar. Masursurom ti ad-adda pay nga agpannuray kenkuana, ken makaparagsak a makita a bembendisionan ni Jehova ti panagreggetmo! Iti damo a tawenko ditoy sipud panaggapuk idiay Estados Unidos, ti grupo a pagserserbiak a buklen idi ti 6 a kakabsat ket addaanen iti 21 nga agibumbunannag. Adda 110 a timmabuno iti Memorial.”

MABALINMO MET KADI TI AGBOLUNTARIO?

Dakayo a babbaro ken babbalasang a kakabsatmi, ipalubos kadi ti sirkumstansiayo a makapagserbikayo iti sabali a pagilian a dakdakkel ti panagkasapulan kadagiti manangiwaragawag iti Pagarian? Siempre, kasapulan ti naannad a panagplano para iti kasta a nadagsen a desision. Kangrunaan a kasapulam ti nabileg a panagayat ken Jehova ken iti pada a tao tapno matignayka nga agboluntario iti sabali a pagilian. No addaanka iti kasta nga ayat ken ipalubos ti kasasaadmo, sipapasnek nga ikararagmo dayta ken Jehova. Nasayaat met no ibagam dayta kadagiti Kristiano a nagannakmo ken kadagiti panglakayen iti kongregasion. Nalabit makitamto a kabaelam ti makiraman iti daytoy makapagagar ken makapnek a kita ti sagrado a panagserbi.

[Blurb iti panid 3]

“Adu a karkararag ken Jehova ken napaut a pannakitungtong kadagiti nataengan a kakabsat ti nakatulong kaniak a mangbigbig a bendisionan ni Jehova ti situtulok a panagserbi.”​—Kayla manipud Estados Unidos

[Kahon/Ladawan iti panid 6]

Panagsagana nga agserbi iti sabali a pagilian

• Regular ken sipapasnek nga adalem ti Biblia

• Repasuem ti Agosto 2011 a Ti Ministeriotayo iti Pagarian, panid 4-6

• Makisaritaka kadagiti kakabsat a nakapagserbin iti sabali a pagilian

• Ammuem ti kultura ken pakasaritaan ti pagilian a kayatmo a papanan

• Sursuruem uray ti sumagmamano laeng a sasao iti lenguaheda

[Kahon/Ladawan iti panid 6]

Ti dadduma a nakapagserbi iti sabali a pagilian supsuportaranda ti bagida babaen ti . . .

• panagtrabaho iti sumagmamano a bulan iti kada tawen iti pagilianda

• panangipaabang iti balay wenno apartmentda

• negosio nga impaaywanda iti sabali

• panagtrabaho iti tulong ti Internet

[Dagiti Ladawan iti panid 4, 5]

1 Jaqueline manipud Germany

2 Bruno manipud Italia

3 Beau manipud Canada

4 Siobhan manipud Ireland

5 Joel manipud Estados Unidos

6 Jonathan manipud Estados Unidos

7 Anna manipud Estonia

8 Elke manipud Austria

9 Chantal manipud Canada

10 Ines manipud Austria