Malagipyo Kadi?
Malagipyo Kadi?
Binasayo kadi a naimbag dagiti nabiit pay a ruar Ti Pagwanawanan? Kitaentayo no masungbatantayo dagiti sumaganad a saludsod:
Ti kadi buok ni Samson ti nagtaudan ti pigsana?
Saan a ti mismo a buok ni Samson ti nagtaudan ti pigsana. Irepresentar ti buokna ti naisangsangayan a relasionna iti Dios kas Nazareo. Naapektaran dayta a relasion idi pinakalbuan ni Dalila ni Samson.—4/15, panid 9.
Kas iti literal a pusotayo, ania a tallo a bambanag ti makaipaay iti nasayaat nga impluensia iti piguratibo a pusotayo?
(1) Nasustansia a taraon. No kasano a kasapulan ti literal a pusotayo ti nasustansia a taraon, kasapulantay met ti umdas a kaadu ti makapasalun-at a naespirituan a taraon. (2) Ehersisio. Makatulong ti sireregta a pannakipaset iti ministerio tapno agtalinaed a nasalun-at ti naespirituan a pusotayo. (3) Aglawlaw. Maksayan ti stress no makilangentayo kadagiti kapammatiantayo a maseknan kadatayo.—4/15, panid 16.
Kasano a maisubli ti panagtalek dagiti agassawa no nakikamalala ti maysa kadakuada?
Masapul a (1) dida agilimlimed; (2) agtinnulongda; (3) balbaliwanda ti kababalinda; ken (4) iwaksida ti sakit ti nakemda ken ikagumaanda nga urnosen ti nadadael a relasionda.—5/1, panid 12-15.
Apay a saan koma nga iyaplikar ti agpalawag iti pumpon ti Salmo 116:15 iti tao a pimmusay?
Kuna ti teksto: “Napateg kadagiti mata ni Jehova ti ipapatay dagidiay nasungdona.” Kaipapanan daytoy nga ibilang ti Dios a nakapatpateg ti ipapatay ti amin a nasungdo kenkuana. Saannanto nga ipalubos a naan-anay a mapukaw ditoy daga dagiti adipenna kas maysa a grupo.—5/15, panid 22.
Siasino dagiti colporteur?
Sakbay ti 1931, “colporteur” idi ti awag kadagiti agserserbi itan kas payunir.—5/15, panid 31.
Ania ti sumagmamano a banag a mangipakita a ti Biblia ket saan nga ordinario laeng a libro nga insurat ti tao?
Naglaon ti Biblia iti adu a padto a natungpalen. Umiso a pakasaritaan ti nailanad iti dayta, saan a parparbo. Maitunos dayta iti umiso a siensia, ken agtutunos ti nadumaduma a libro a mangbukel iti dayta. Praktikal dayta iti kaaldawantayo.—6/1, panid 4-8.
Ania ti matuktukoy nga “amin dagitoy a pagarian” iti Daniel 2:44?
Ti matuktukoy isu dagiti pagarian, wenno gobierno, nga inrepresentar ti nadumaduma a paset ti metal a ladawan nga inlawlawag ni Daniel.—6/15, panid 17.
Kaano a ti Anglo-Americano a Turay nagbalin a maikapito a kabilgan a turay iti lubong kas naipadto iti Biblia?
Timmanor daytoy a nagaliansa a turay iti lubong idi nagtignay ti Britania ken Estados Unidos para iti maysa a napateg a panggep idi Gubat Sangalubongan I.—6/15, panid 19.
Kasano a pakawanen ken lipaten ti Dios ti basbasol dagidiay agbabbabawi?
Kuna ni Jehova kadagidiay anamonganna: “Ti basolda saankonton a lagipen.” (Jer. 31:34) Mabalinna a pakawanen dagiti basol maibatay iti subbot. No mangpakawan ti Dios, lipatennan ti basol ket saannanton a lagipen dayta tapno mangdusa.—7/1, panid 18.
Ania dagiti pamatiantayo a pudno dagiti milagro a nailanad iti Biblia?
Masansan a naaramid dagita iti publiko. Simple laeng dagita ken awanan iti adu a pabuya. Nairanta dagita a mangidayaw iti Dios, saan nga iti tao. Nadumaduma a milagro ti naaramid, ken saan nga inlibak dagita uray dagiti bumusbusor. Dagitoy ti pamatiantayo a pudno dagiti milagro a nailanad iti Biblia.—8/1, panid 7-8.