1, 2. Ania dagiti punto nga usigentayo maipapan kadagiti nateokratikuan a kombension?

 NABAYAGEN a paset ti moderno a pakasaritaan dagiti Saksi ni Jehova dagiti internasional ken distrito a kombension. Adun kadatayo ti nakatabuno kadagitoy a naragsak nga okasion iti panaglabas ti adu a tawen.

² Rinibun a tawen ti napalabas, nangangay met idi ti ili ti Dios kadagiti nasantuan a kombension. Usigentayo ti sumagmamano a kombension a nailanad iti Kasuratan ken kitaentayo no kasano nga umasping dagita kadagiti kombensiontayo ita. Ammuentayo met no apay a makagunggona ti itatabunotayo kadagita.​—Sal. 44:1; Roma 15:4.

3. (a) Ania ti naidumduma iti kaunaan pay laeng a kombension ti ili ni Jehova? (b) Kasano a naayaban nga aguummong dagiti Israelita?

³ Ti asamblea iti sakaanan ti Bantay Sinai ti kaunaan a dakkel a panagtataripnong dagiti Israelita para iti naespirituan a pannakaisuro. Nakallalagip dayta a pasamak iti pakasaritaan ti pudno a panagdayaw. Sigurado a di nalipatan dagidiay timmabuno dayta a makapagagar nga okasion, ta nakitada ti pannakaiparangarang ti pannakabalin ni Jehova bayat ti panangtedna kadakuada iti Lintegna. (Ex. 19:2-9, 16-19; basaen ti Exodo 20:18; Deuteronomio 4:9, 10.) Iti daydi nga aldaw, nagbalin ti Israel nga ili ti Dios. Di nagbayag kalpasanna, inyurnos ni Jehova no kasano a maummong ti ilina. Imbilinna a mangaramid ni Moises iti dua a trumpeta a pirak, a maaramat a pangayab iti “intero a gimong” tapno aguummongda iti “pagserkan ti tolda ti gimong.” (Num. 10:1-4) Anian a makapagagar dagidi nga okasion!

4, 5. Apay a nakapatpateg dagiti kombension nga inangay da Moises ken Josue?

 ⁴ Idi agpatinggan ti 40 a tawen a panagyan ti Israel iti let-ang, inummong ni Moises dagiti padana nga Israelita. Nagpateg dayta a tiempo iti pakasaritaan ti nasion ti Israel ta asideg idin a sumrekda iti Naikari a Daga. Umiso laeng ngarud nga ipalagip ni Moises kadagiti kakabsatna dagiti amin nga inaramid ken aramidento pay ni Jehova para kadakuada.​—Deut. 29:1-15; 30:15-20; 31:30.

⁵ Nalabit nga iti dayta met laeng a kombension, dinakamat ni Moises ti urnos para iti regular a panagtataripnong ken pannakaisuro ti ili ti Dios. Bayat ti Piesta dagiti Abong-abong iti tunggal tawen ti Sabbath, masapul nga aguummong dagiti lallaki, babbai, ubbing, ken ganggannaet iti Israel iti lugar a pilien ni Jehova ‘tapno makapagimdengda ken tapno masursuroda ti agbuteng ken Jehova ken annadanda nga itungpal ti amin a sasao ti linteg.’ (Basaen ti Deuteronomio 31:1, 10-12.) Isu nga uray iti daytoy a nasapa a pakasaritaan ti ili ti Dios, nalawag a masapul a masansan nga aguummongda tapno usigenda ti sao ken pangpanggep ni Jehova. Idi nasakupen dagiti Israelita ti Naikari a Daga, inummong ni Josue ti intero nga Israel tapno pabilgenna ti panagtalekda ken Jehova yantangay nalikmutda kadagiti pagano a nasion. Kas sungbat, insapata dagiti umili nga agserbida iti Dios.​—Jos. 23:1, 2; 24:1, 15, 21-24.

6, 7. Apay a maikuna a nakapatpateg dagiti kombension ti ili ni Jehova iti moderno a panawen?

⁶ Adda met dagiti nakallalagip a kombension iti moderno a pakasaritaan ti ili ni Jehova a nangipakaammo iti napapateg a panagbalbaliw iti nateokratikuan nga aktibidadtayo ken iti pannakaawattayo iti Kasuratan. (Prov. 4:18) Ti kaunaan a kangrunaan a kombension dagiti Estudiante ti Biblia kalpasan ti Gubat Sangalubongan I ket idi 1919 idiay Cedar Point, Ohio, U.S.A. Nakallalagip dayta a panagtataripnong ti agarup 7,000 a tattao gapu ta iti daydi a nairugi ti kampania ti sangalubongan a panangasaba. Idi 1922, bayat ti siam nga aldaw a kombension iti dayta met laeng a lugar, nagpaiduma ti panangipaganetget ni Joseph F. Rutherford iti trabaho a panangasaba. Imparegtana kadagiti dumdumngeg: “Agbalinkayo a matalek ken pudno a saksi maipaay [ken Jehova]. Agtultuloykayo a makidangadang agingga a naan-anay a malangalang ti Babilonia. Isaknapyo ti mensahe. Masapul a maammuan ti lubong a ni Jehova ti Dios ken ni Jesu-Kristo ti Ari dagiti ar-ari ken Apo dagiti ap-appo. Isu daytoy ti aldaw dagiti al-aldaw. Adtoy, agturturayen ti Ari! Dakayo ti mangiwaragawag iti dayta. Ngarud iwaragawagyo, iwaragawagyo, iwaragawagyo, ti Ari ken ti pagarianna.” Dagiti timmabuno ken ti ili ti Dios iti intero a lubong sirarag-o nga inawatda dayta a pammabileg!

⁷ Idiay Columbus, Ohio, idi 1931, magagaran unay dagiti Estudiante ti Biblia a nangawat iti nagan a Saksi ni Jehova. Kalpasanna, idi 1935, idiay Washington, D.C., impalgak ni Kabsat Rutherford no siasino dagiti mangbukel iti “dakkel a bunggoy,” a nailadawan iti Apocalipsis kas ‘sitatakder iti sanguanan ti trono ken iti sanguanan ti Kordero.’ (Apoc. 7:9-17) Idi 1942, bayat ti Gubat Sangalubongan II, impalawag ni Nathan H. Knorr ti makagutugot a diskurso a “Talna​—Agpautto Aya?” Dinakamatna ti “eskarlata ti marisna nga atap nga animal” iti Apocalipsis 17 ken imbagana a dakdakkelto pay ti trabaho a panangasaba kalpasan ti gubat.

8, 9. Apay a nangnangruna a makapabileg ti sumagmamano a kombension?

⁸ Iti Nateokratikuan nga Asamblea idi 1946 a natemaan iti “Dagiti Naragsak a Nasion” idiay Cleveland, Ohio, makapagagar ti palawag ni Kabsat Knorr a napauluan iti “Dagiti Parikut ti Rekonstruksion ken Panagsaknap.” Malagip ti maysa a timmabuno ti gagar nga imbunga dayta a palawag: “Addaak idi iti likudanna iti dayta a plataporma  iti daydi a rabii, ken bayat nga imbinsabinsana ti trabaho a panangasaba ken imbagana ti plano a panangpalawa iti pagtaengan ken paktoria ti Brooklyn Bethel, agal-allungogan ti panagpalakpak dagiti timmabuno. Uray no saanmi a makita ti rupada manipud iti plataporma, nabatad a nakaragragsak ti amin.” Iti maysa nga internasional a kombension idiay New York City idi 1950, naragsakan dagiti timmabuno nga immawat iti New World Translation of the Christian Greek Scriptures, ti umuna a tomo ti maysa a Biblia iti moderno nga Ingles a nangisubli iti nagan ti Dios iti umiso a lugarna.​—Jer. 16:21.

⁹ Makapabileg met dagiti kombension a nangummongan ni Jehova kadagiti matalek a Saksina kalpasan a naidadanes wenno naparitanda. Inkari ni Adolf Hitler a talipuposenna dagiti Saksi ni Jehova idiay Germany, ngem idi 1955 nagkombension ti 107,000 a Saksi iti sigud a nagtataripnongan ni Hitler ken dagiti loyalistana idiay Nuremberg. Adu kadagidiay timmabuno ti nakasangit gapu iti rag-oda! Adu kadagiti 166,518 a timmabuno iti tallo a kombension a “Nadiosan a Debosion” idiay Poland idi 1989 ti naggapu iti Soviet Union ken Czechoslovakia, ken manipud iti dadduma pay a pagilian ti Makin-Amianan a Europa. Dadduma kadakuada ti damona ti makatabuno iti taripnong a buklen ti nasurok a 15 wenno 20 nga adipen ti Dios. Ken panunotem met ti rag-o iti “Nadibinuan a Sursuro” nga Internasional a Kombension idi 1993 idiay Kiev, Ukraine, a nakabautisaran ti 7,402. Dayta pay laeng ti kadakkelan a bilang dagiti Saksi ni Jehova a nabautisaran iti maysa nga aldaw.​—Isa. 60:22; Hag. 2:7.

10. Aniada a kombension ti nakallalagip kenka, ken apay?

¹⁰ Nalabit adda met dagiti dimo malipatan a distrito wenno internasional a kombension. Malagipmo pay kadi ti damo a kombension a natabunuam wenno ti kombension a nakabautisaram? Espesial kenka dagitoy a kombension ket tagipatgem koma dagita!​—Sal. 42:4.

11. Ania dagiti regular a pipiesta nga imbilin ti Dios a rambakan dagiti Israelita?

¹¹ Kalikaguman idi ni Jehova nga aguummong dagiti Israelita idiay Jerusalem para iti tallo a piesta iti tunggal tawen​—ti Piesta ti Di Nalebaduraan a Tinapay, Piesta dagiti Lawas (naawagan idi agangay iti Pentecostes), ken Piesta dagiti Abong-abong. Maipapan kadagitoy, imbilin ti Dios: “Iti tallo a pasamak iti makatawen tunggal lalaki kenka agparangto iti sanguanan ti pudno nga Apo, ni Jehova.” (Ex. 23:14-17) Gapu ta bigbigen dagiti ulo ti pamilia a nakapatpateg dagitoy a piesta, tumabunoda idi agraman ti intero a pamiliada.​—1 Sam. 1:1-7; Luc. 2:41, 42.

12, 13. Ania ti kasapulan nga aramiden idi ti adu nga Israelita no tumabunoda kadagiti tinawen a piesta?

¹² Panunotem ti panagsakripisio ti maysa nga Israelita a pamilia iti dayta a panagdaliasat. Kas pagarigan, mabalin a nagdaliasat da Jose ken Maria iti agarup 100 kilometro  manipud Nazaret agingga idiay Jerusalem. Kasano ngata kapaut ti kasta a panagdaliasat, a magmagnada a kadua dagiti babassit nga annakda? Ti salaysay maipapan iti ibibisita ni Jesus idiay Jerusalem idi agtutubo pay ipalgakna a mabalin nga inggrupo nga agdaliasat dagiti agkakabagian ken aggagayyem. Narigat la ketdi ti agdaliasat ken agisagana iti taraon agraman ti pannaturog kadagiti lugar a saanda a nakairuaman. Ngem natalged dagita a panagdaliasat ta ti 12 ti tawenna idi a ni Jesus ket napalubosan a sumina iti pamiliana. Saan la ketdi a malipatan nangruna dagiti agtutubo dagitoy a piesta!​—Luc. 2:44-46.

¹³ Idi naiwarawara dagiti Israelita iti ruar ti pagilianda, nadumaduma a nasion ti naggapuan dagidiay timmabuno kadagiti piesta. Idi Pentecostes ti tawen 33 C.E., nagdaliasat idiay Jerusalem dagiti nasungdo a Judio ken proselita manipud Italia, Libya, Creta, Asia Menor, ken Mesopotamia.​—Ara. 2:5-11; 20:16.

14. Kasano a nagunggonaan dagiti Israelita iti itatabunoda kadagiti tinawen a piesta?

¹⁴ Para kadagiti matalek nga Israelita, ti tampok ken panggep ti kakasta a panagdaliasat isu ti panagdaydayaw ken Jehova a kadua ti rinibu a nasungdo nga adipen ti Dios. Ania ngata ti epekto dayta kadagidiay timmabuno? Masarakan ti sungbat kadagiti bilin ni Jehova iti ilina mainaig iti Piesta dagiti Abong-abong: “Masapul nga agrag-oka bayat ti piestam, sika ken ti anakmo a lalaki ken ti anakmo a babai ken ti adipenmo a lalaki ken ti adipenmo a babai ken ti Levita ken ti ganggannaet nga agnanaed ken ti awan amana nga ubing ken ti balo a babai, nga adda iti uneg dagiti ruanganmo. Pito nga aldaw a rambakamto ti piesta ken Jehova a Diosmo iti disso a piliento ni Jehova, agsipud ta bendisionannakanto ni Jehova a Diosmo iti isuamin nga apitmo ken iti tunggal aramid ta imam, ket agbalinkanto . . . a narag-o.”​—Deut. 16:14, 15; basaen ti Mateo 5:3.

15, 16. Ania dagiti sakripisio nga inaramidmo tapno makatabunoka kadagiti kombension? Apay a saan a sayang ti panagreggetmo?

¹⁵ Anian a nagsayaat nga ulidan dagitoy a nagkauna a panagtataripnong para iti ili ti Dios ita! Nupay adun ti nagbalbaliw iti panaglabas ti ginasut a tawtawen, saan a nagbaliw dagiti napateg nga aspeto dagitoy a kombension. Idi tiempo ti Biblia, masapul nga agsakripisio dagiti tumabuno kadagitoy a taripnong. Kasta met ita ti kasasaad ti adu. Ngem saan a sayang dagiti panagreggetda. Agingga ita, napateg dagitoy a naespirituan nga okasion ta ipaayandatayo iti impormasion ken pannakaawat tapno mataginayontayo ti nasinged a relasiontayo iti Dios. Gutugotennatayo dagiti kombension a mangyaplikar kadagiti maad-adaltayo, tulongandatayo a mangliklik kadagiti parikut, ken paregtaendatayo a mangipamaysa kadagiti kalat ken aktibidad a mangbang-ar imbes a mangpadagsen kadatayo.​—Sal. 122:1-4.

¹⁶ Kanayon a makaparag-o dagiti kombension. Kastoy ti napaliiw iti maysa a dakkel a kombension idi 1946: “Nagsayaat a kitaen ti rinibribu a saksi a sitatalna nga agkakatugaw, ken ad-adda pay a makaparagsak a denggen ti orkestra a dangdanggayan ti timek ti umariwekwek nga agkankanta iti kankanta ti Pagarian a pangidaydayaw ken Jehova.” Innayon ti report: “Adu a kakabsat ti napan iti Volunteer Service Department tapno agboluntarioda iti nadumaduma a departamento gapu iti rag-oda nga agserbi kadagiti kapammatianda.” Nariknam met kadin ti kasta a rag-o kadagiti distrito wenno internasional a kombension?​—Sal. 110:3; Isa. 42:10-12.

17. Ania dagiti nabiit pay a panagbalbaliw iti urnos dagiti kombension?

 ¹⁷ Adda dagiti panagbalbaliw iti urnos dagiti kombension. Kas pagarigan, ti sumagmamano nga adipen ti Dios malagipda dagidi kombension a nagpaut iti walo nga aldaw. Adda dagiti sesion iti agsapa, malem, ken rabii. Kanayon a paset ti programa ti panangasaba iti tay-ak. No dadduma, mangrugi ti programa iti alas nuebe ti agsapa, ken masansan nga adda pay dagiti sesion agingga iti alas nuebe ti rabii. Adu a tiempo ken pigsa ti busbosen dagiti boluntario iti panangisaganada iti pamigat, pangngaldaw, ken pangrabii dagiti tumabuno. Ngem iti agdama, sumagmamano laengen nga aldaw dagiti kombension, ken gapu ta nasapsapa nga agsagana dagiti pamilia ken indibidual para iti taraonda, maipamaysada ti agdengngeg iti naespirituan a programa.

18, 19. Ania dagiti segseggaam a paset dagiti kombension, ken apay?

¹⁸ Adu ti mangsegsegga kadagiti paset ti kombension a nabayagen a karaman iti programa. Ti naespirituan a ‘taraon iti umiso a tiempo,’ a mangipaay kadatayo iti nalawlawag a pannakaawat kadagiti padto ken pannursuro ti Biblia, ket saan laeng nga aggapu kadagiti palawag no di pay ket kadagiti baro a publikasion a mairuar iti kombension. (Mat. 24:45) Dagita a baro a ruar ti masansan a makatulong kadagiti napasnek nga indibidual a mangipateg kadagiti kinapudno iti Kasuratan. Dagiti makagutugot a naibatay-Biblia a drama ti mangparegta kadagiti agtutubo ken nataengan tapno usigenda ti motiboda ken saluadanda ti bagbagida maibusor iti di nadiosan a kapanunotan daytoy a lubong. Makatulong met kadatayo ti palawag iti bautismo tapno mausigtayo dagiti prioridadtayo. Maragsakantayo met a makakita kadagidiay agpabautisar kas simbolo ti dedikasionda ken Jehova.

¹⁹ Wen, dagiti kombension ket nabayagen a paset ti nasin-aw a panagdayaw. Tumulong dagitoy tapno agbalintayo a naragsak nga ad-adipen ni Jehova ken makapagserbitayo kenkuana uray iti daytoy narigat a tiempo. Babaen kadagita nga okasion, mapabileg ti espiritualidadtayo, makaam-ammotayo kadagiti baro a gagayyem, ken maapresiartayo ti sangalubongan a panagkakabsattayo. Dagita met ti us-usaren ni Jehova a mangbendision ken mangaywan kadatayo. Kayattay la ketdi nga iyurnos a nasaksakbay dagiti aktibidadtayo tapno matabunuan ken magunggonaantayo iti tunggal sesion dagiti kombension.​—Prov. 10:22.