SUMAGMAMANO a tawenen ti napalabas, maysa a kabsat a babai nga agnagan Rúbia (1) nga agtawen itan iti 30 ti bimmisita ken Sandra (2), maysa a payunir nga agserserbi iti bassit a kongregasion iti makin-abagatan a Brazil. Iti dayta nga ibibisita ni Rúbia, adda banag a namagbalbaliw iti turongen ti biagna. Ania dayta? Ammuentayo a mismo ken Rúbia.

“Inkuyognak ni Sandra a simmarungkar iti maysa a babai nga iyad-adalanna iti Biblia. Bayat ti panagadal, naibaga ti babai: ‘Ammom Sandra, adda tallo a babbai a katrabahuak a mayat nga agpayadal iti Biblia, ngem imbagak nga urayenda ti batangda. Ammok ngamin nga awan bakante nga eskediulmo para kadakuada iti daytoy a tawen.’  Kasla diak mamati. Masapul pay nga aguray dagidiay mayat nga agsursuro maipapan ken Jehova! Idiay kongregasionmi, marigatanak nga agbirok iti uray maysa laeng a mayadalan. Iti daydi met laeng a gundaway, iti balay dayta nga estudiante ti Biblia, simnek ti nasged a tarigagayko a tumulong iti tattao iti dayta a bassit nga ili. Di nagbayag, pinanawak ti dakkel a siudad a pagnanaedak ket immakarak iti ili a pagpaypayuniran ni Sandra.”

Ania ti nagbanagan ti desision ni Rúbia? Kunana: “Kalpasan laeng ti umuna a dua a bulan a kaaddak sadiay, addaanakon iti 15 nga iyad-adalan iti Biblia ken​—mamatikay man wenno saan​—kas ken Sandra, adu metten ti agur-uray nga agpayadal kaniak!”

Ni Diego (3), nga agtawen itan iti nasurok a 20, ket pimmasiar iti dua a payunir nga agserserbi idiay Prudentópolis, maysa a bassit nga ili iti makin-abagatan a Brazil. Dakkel ti epekto kenkuana dayta nga ibibisitana ta natignay a mangusig manen iti ministeriona. Inlawlawagna: “Iti dati a kongregasionko, saanak unay a naregta ken sumagmamano laeng nga oras ti mairepreportko iti kada bulan. Ngem idi bimmisitaak kadagidiay a payunir ken nangngegko dagiti kapadasanda, nakitak a nakaragragsak ken nakaregregtada. Kayatko a kasdiay koma met ti biagko.” Kalpasan dayta nga ibibisita, inrugin ni Diego ti agpayunir.

Kas ken Diego, maysaka kadi nga agtutubo a Saksi a mangaskasaba ken makigimgimong ngem mariknam a kasla rutina laeng ti ministeriom ken awan ti gaganaygayam? No kasta, mabalin kadi a balbaliwam ti biagmo tapno mariknam ti rag-o ti panagserbi iti lugar a kasapulan ti ad-adu nga agibumbunannag iti Pagarian? Amangan no medio madanaganka no panawam ti komportable a biagmo. Ngem adun nga agtutubo ti nangaramid iti kasta. Situtured a binaliwanda dagiti personal a kalat ken ambisionda tapno naan-anay a makapagserbida ken Jehova. Usigem met ti kapadasan ni Bruno.

Sumagmamano a tawenen ti napalabas, ni Bruno (4), nga agedad itan iti 28, ket nagadal iti nalatak nga eskuelaan ti musika ta ambisionna ti agbalin a maestro  wenno batonero iti orkestra. Gapu ta alisto a nakasursuro, namin-adu a naawis kas batonero iti maysa a symphony orchestra. Asideg idin a maaddaan iti naballigi a karera. Ngem kuna ni Bruno: “Mariknak nga adda kurang iti biagko. Nagdedikarak ken Jehova ngem ammok a diak maipapaay kenkuana ti amin a kabaelak, ket dayta ti mangburburibor kaniak. Inkararagko ken Jehova ti marikriknak, ken imbagak met dayta kadagiti kakabsat iti kongregasion a nataengan iti naespirituan. Kalpasan nga inusigko a naimbag ti kasasaadko, inkeddengko nga ipangpangrunak ti ministeriok imbes a ti musika, nagikkatak iti eskuelaan ti musika, ket nagserbiak iti lugar nga agkasapulan unay kadagiti manangaskasaba iti Pagarian.” Ania ti nagbanagan ti desisionna?

Immakar ni Bruno iti ili ti Guapiara (agarup 7,000 ti populasionna), agarup 260 kilometro (160 mi) manipud iti siudad ti São Paulo. Saan a kaskarina dayta a panagbalbaliw ta kinunana: “Immakarak iti bassit a balay nga awanan iti refrigerator, TV, wenno Internet. Ngem addaan dayta iti bambanag nga awan idi kaniak​—addaan iti hardin ken pagmulaan iti natnateng!” Bayat nga agserserbi ni Bruno iti bassit a kongregasion, maminsan iti kada lawas nga agmotor a mapan mangasaba kadagiti away nga awitna ti balonna a makan, danum, ken literatura. Adu a tattao iti dayta a lugar ti di pay nakangkangngeg iti naimbag a damag. “Naaddaanak iti 18 nga iyad-adalan iti Biblia,” kinunana. “Maragragsakanak a makakita iti panagbalbaliw dagitoy nga iyad-adalak!” Sana innayon: “Ita, nabigbigko a nasarakakon no ania ti kurang iti biagko​—ti pudpudno a pannakapnek a resulta ti panangyun-una iti panagserbi ken Jehova. Saan koma a kastoy ti karagsakko no intultuloyko dagiti materialistiko nga ambisionko.” Kasano a supsuportaran ni Bruno ti pinansial a kasapulanna idiay Guapiara? Umis-isem a nangikuna: “Mangisursuroak iti panaggitara.” Uray kaskasano, maysa pay laeng isuna a maestro iti musika.

Umasping iti situasion ni Bruno ti kasasaad ni Mariana (5), a dandanin ag-30 ti edadna. Agtrabtrabaho ni Mariana kas abogado ngem saan a naragsak nupay dakkel ti sapulna. Kinunana: “Arigna ‘kamkamatek ti angin.’” (Ecl. 1:17) Pinaregta dagiti kakabsat nga agpayunir. Pinampanunot dayta ni Mariana, agraman ti  gagayyemna a da Bianca (6), Caroline (7), ken Juliana (8), ket inkeddengda ti tumulong iti maysa a kongregasion idiay Barra do Bugres, maysa a naiputputong nga ili iti asideg ti Bolivia, rinibu a kilometro manipud iti pagtaenganda. Ania ti resultana?

Kinuna ni Mariana: “Tallo a bulan laeng koma nga agyanak sadiay. Ngem idi nalpasen dayta, addaanak metten iti 15 nga iyad-adalan iti Biblia! Siempre, kasapulanda ti ad-adu pay a tulong tapno rumang-ayda iti naespirituan. Isu a diak maitured ti agpakada kadakuada. Awan maaramidak no di agtalinaed.” Ket kasta ngarud ti inaramid dagitoy a babbalasang. Naragragsak kadi itan ni Mariana iti baro a karerana? Kinunana: “Nagsayaat ti riknak ta ar-aramatennak ni Jehova a tumulong iti tattao a maaddaan iti nasaysayaat a biag. Maragragsakanak ta us-usarek itan ti tiempo ken pigsak a mangaramid iti banag a talaga a makagunggona.” Kastoy ti inyebkas ni Caroline maipapan iti riknada nga uppat: “No agiddaak iti rabii, mariknak ti pudpudno a rag-o gapu ta inusarko ti biagko nga agserbi ken Jehova. Naipamaysa ti biagko iti itutulong kadagiti iyad-adalak iti Biblia. Nakaay-ayat a makita ti irarang-ayda. Mapampaneknekak ti kinaagpayso ti sasao a: ‘Nanamenyo ken kitaenyo a ni Jehova naimbag.’”​—Sal. 34:8.

Anian a ragsak ni Jehova a makakita iti umad-adu a bilang ti agtutubo a lallaki ken babbai iti intero a lubong a ‘situtulok a mangidatdaton iti bagbagida’ tapno maikasaba ti naimbag a damag ti Pagarianna iti nasulinek a luglugar! (Sal. 110:3; Prov. 27:11) Awan duadua nga amin a kasta a natulok a trabahador ket agsagrap iti naruay a bendision ni Jehova.​—Prov. 10:22.