SANGAPULOKAMI nga agkakabsat ket agnanaed ti pamiliami iti maysa nga away iti Northern Ostrobothnia, Finland. Ubbingkami pay idi bimtak ti Gubat Sangalubongan II. Nupay ginasgasut a kilometro ti kaadayo ti pagtaenganmi manipud iti paggugubatan, di mapunas iti lagipmi dagiti kinaranggas ti gubat. Iti rabii a nabomba dagiti siudad ti Oulu and Kalajoki nga asideg kadakami, nakakitami iti nalabaga a lawag iti tangatang. Imbaga dagiti nagannakmi nga aglemmengkami no makakitakami iti agam-ampayag nga eroplano a pakigubat. Isu nga idi dinakamat ti inauna a manongmi a ni Tauno ti maipapan iti paraiso a daga nga awanton ti panagsagaba, natukay ti pusomi.

Naammuan ni Manong ti kinapudno idi agtawen iti 14 manipud iti literatura dagiti Estudiante ti Biblia. Idi dimteng ti Gubat Sangalubongan II, nagkedked nga agsoldado gapu iti nasanay-Biblia a konsiensiana ket naibalud. Naulpit ti pannakatratona iti pagbaludan. Ngem dayta ti nangpabileg iti determinasionna nga agserbi ken Jehova, ket naregregta manen idi nawayawayaan. Gapu iti nasayaat nga ulidanna, nagutugotkami a mapan kadagiti gimong dagiti Saksi iti asideg a purok. Tumabunokami met kadagiti kombension, nupay masapul nga agurnongkami iti kuarta a pagpletemi. Agdaitkami iti bado nga ilakomi kadagiti kaarrubami, agmulakami iti lasona, ken agpuroskami kadagiti berries. Gapu ta adu ti trabahomi iti talon, kaaduanna a dikam makapaggigiddan a makikombension, isu nga agsisinnublatkami.

Dagiti kinapudno a naadalmi maipapan ken Jehova ken kadagiti panggepna ti nangpauneg iti panagayatmi kenkuana. Nagpabautisarkami a dua idi 1947. (Agtawen ni Annikki iti 15, ket 17 met ni Aili). Nabautisaran met ni manangmi a Saimi iti dayta a tawen. Dakami ti nangyadal ken manangmi a Linnea, nga addaan idin iti asawa. Nagbalin a Saksi ni Jehova ken ti intero a pamiliana. Kalpasan ti panagbautisarmi, pinagbalinmi a kalat ti agpayunir, ket masansan nga agserbikami kas vacation pioneer (auxiliary pioneer itan).

Idi 1955, immakarkami iti siudad ti Kemi, nga adda iti amianan. Nupay okupadokami iti sekular a trabahomi, kayatmi ti agpayunir ngem agduaduakami amangan no dimi masuportaran ti bagbagimi. Impagarupmi a masapul nga umuna nga adda urnongmi. Iti daydi a gundaway a nakasaritami ti maysa a payunir a babai, a nadakamat itay iti pangrugian. Dayta ti nakatulong kadakami a mangbigbig a ti amin-tiempo a panagserbi ken Jehova ket saan nga agdepende iti aniaman nga ik-ikutanmi wenno iti suporta ti pamiliami. Ti kapatgan isu ti panagtalek iti nailangitan nga Amatayo.

Iti daydi a gundaway, umanay laeng ti urnongmi para iti dua a bulan. Isu nga idi Mayo 1957, dua a bulan laeng ti inaplayanmi a panagpayunir iti ili ti Pello, Lapland, iti ngatuen ti Arctic Circle. Kalpasan ti dua a bulan, di pay naksayan ti kuarta a naurnongmi. Isu a kombinsidokamin nga aywanannakami ni  Jehova. Kalpasan ti 50 a tawen a panagserbimi kas payunir, adda pay laeng daydi urnongmi! Mariknami a kasla aktual nga ig-iggaman ni Jehova dagiti imami ken ibagbagana: “Dika agbuteng. Siak tulongankanto.”—Isa. 41:13.

Idi 1958, inrekomenda ti manangaywan iti sirkitomi nga agserbikami kas special pioneer iti Sodankylä, Lapland. Adda laeng idi maymaysa a Saksi sadiay, a maysa a babai. Nagpaiduma ti kapadasanna no kasano a naammuanna ti kinapudno. Nagpasiar ti anakna a kadua ti intero a klaseda ket napanda iti Helsinki, ti kabesera ti Finland. Bayat a magmagnada iti siudad, adda baket a kabsat a nangyawat iti maysa a Ti Pagwanawanan iti daytoy nga ubing, nga adda idi iti kutit ti linia. Imbaga ti baket nga itedna dayta ken nanangna. Kasta ti inaramid ti ubing, ket dagus a nabigbig ni nanangna ti kinapudno.

Nangabangkami iti maysa a siled iti ngatuen ti maysa a pagtistisan iti kayo. Sadiay metten nga aggimongkami. Idi damo, dakami laeng a dua ken ti kabsat a babai ken ti balasangna ti tumabtabuno. Basaenmi laeng ti material a nayeskediul iti tunggal lawas. Idi agangay, maysa a lalaki a dati a makipagad-adal iti Biblia kadagiti Saksi ti nagtrabaho iti dayta a pagtistisan. Inrugida a sangapamiliaan ti makitimpuyog iti grupomi. Idi agangay, nabautisaranda nga agassawa. Indauluan daytoy a kabsat dagiti gimongmi. Kasta met, addada trabahador iti dayta a pagtistisan a nangrugi a makigimong ken immawat iti kinapudno. Sumagmamano a tawen kalpasanna, immadu ti bilangmi agingga a nagbalinkami a kongregasion.

Agaaddayo dagiti lugar a pangasabaanmi. No kalgaw (Hunio-Agosto), magmagna, agbisikleta, ken agbangkakami a mapan kadagiti teritoriami. Nagdakkel ti naitulong dagiti bisikletami. Dagita met ti naglugananmi a makikombension ken bumisita kadagiti nagannakmi, a ginasgasut a kilometro ti kaadayoda. No tiempo ti lam-ek, sapaenmi ti aglugan iti bus a mapan iti maysa a purok sakamto agbalaybalay. No malpasen ti maysa a purok, mapankam manen iti sabali. Napuskol ti niebe, ket saan a regular a mawaknitan ti kalsada. Masansan a surotenmi ti nagnaan dagiti pasagad a guyguyoden dagiti kabalio. Adda dagiti gundaway a gaburan dagiti niebe ti desdes a nagnaan dagiti tattao, ket iti nasapa a primavera (Abril-Mayo), lumukneng dagiti niebe sa dumanum, isu a marigatankami a lumasat.

 Masapul nga agbadokami iti naimeng ta makapaketter ti temperatura. Nagaramatkami iti stocking a delana (wool) ken pagsusukotenmi ti dua wenno tallo a paris ti medias ken agusarkami pay iti atiddog a botas. Ngem masansan a mapno iti niebe dagiti botasmi. Iti agdan ti balay a pangasabaanmi, uksoten ken pampagenmi dagiti botasmi tapno maikkat dagiti kimpet a niebe. Mabasa met dagiti gayadan ti atiddog a kawesmi bayat nga asakenmi dagiti niebe. Ket no lumamiis pay, sumikkil dagita a kasla landok. Kinuna ti maysa nga ina, “Bilibak iti pammatiyo ta umaykayo latta uray nakalamlam-ek.” Pinagnami ti 11 kilometro (7 milia) tapno madanonmi dayta a balay.

Gapu ta agaaddayo dagiti lugar a papananmi, masansan nga umyankami iti balay dagiti tattao. No mumalemen, agdamagkami iti mabalin a pagdagusan. Nanumo laeng ti pagtaengan dagiti lumugar ngem mannakigayyem ken managpadagusda. Saan laeng a pagiddaan ti yopreserda no di pay ket taraon. Masansan a lalat ti ugsa wenno oso ti itedda a pagiddaanmi. No dadduma, komportable met ti pagturoganmi. Kas pagarigan, maysa a babai nga addaan iti dakkel a balay inyulinakami iti maysa a kuarto a nairanta para kadagiti bisita. Addaan dayta iti nagpintas a kama a naap-apan iti nabanglo ken puraw a kubrekama. Kaaduan nga agpatpatnag a makitungtongkami kadagiti bumalay maipapan iti Biblia. Iti maysa a lugar, impausar dagiti agassawa ti kagudua ti kuartoda kas pagturoganmi, ket naturogda iti sabali a kagudua ti kuarto. Parbangonen idi nalpas ti panagsasaritami maipapan iti Biblia ta nagadu dagiti saludsodda nga agassawa.

Napintas a lugar ti Lapland uray no langalang. Nadumaduma ti pintasna sigun iti panawen. Ngem para kadakami, napimpintas nga amang dagiti tattao a mangapresiar ken Jehova. Karaman kadagiti napasnek a dimngeg ket dagiti dayo nga agtrostroso. No dadduma, mapankami nga agkabsat iti maysa a kalapaw ket madanonmi ti adu a lallaki sadiay. Inapresiar dagitoy a nababaneg a lallaki ti mensahe ti Biblia ket immawatda kadagiti literaturatayo.

Adu ti nagsasayaat a kapadasanmi. Naminsan, saanmi a nakamakam ti bus gapu ta nasapsapa iti lima a minuto ti relo iti estasion. Naglugankami laengen iti sabali a bus nga agturong iti sabali a purok. Saankam pay a pulos nangasaba iti dayta a lugar. Iti damo a balay, adda agtutubo a babai a nagkuna, “Addakayo gayamen, ur-urayenkayo.” Manangna gayam ti maysa nga iyad-adalanmi iti Biblia, ket impaibagana ken manangna a kayatna ti mabisita iti dayta met laeng nga aldaw. Saan a dimmanon kadakami ti kiddawna. Nupay kasta, nairugimi nga iyadalan iti Biblia agraman dagiti kabagianna iti kaarrubada a balay. Di nagbayag, pinagmaymaysami idan nga iyadalan ket nagdagupda iti sangapulo ket dua. Sipud idin, adu a kameng daytoy a pamilia ti nagbalin a Saksi ni Jehova.

Idi 1965, naidestinokami iti maysa a kongregasion iti Kuusamo, iti baba laeng ti Arctic Circle,  ket dayta ti nagbalin a kongregasionmi agingga ita. Manmano laeng idi ti agibumbunannag iti daytoy a kongregasion. Idi damo, medio marigatankami a mangasaba iti dayta a teritoria. Relihioso ngamin unay dagiti tattao ken naatapda kadakami. Ngem adu latta ti mangraraem iti Biblia, ket dayta ti inaramatmi a pangiruangan iti saritaan. Iti kasta a pamay-an, in-inut a naam-ammomi dagiti lumugar. Kalpasan ti agarup dua a tawen, nalaklakan ti mangirugi kadakuada iti panangyadal iti Biblia.

Iti agdama, saankamin a makapagbayag iti pangasabaan, ngem gistay inaldaw pay laeng a rumrummuarkami iti tay-ak. Insingasing ti maysa a kaanakanmi nga agsursuro nga agmaneho ni Manang Aili. Gapu iti dayta, nalaklakan ti panangidanonmi iti naimbag a damag iti nakalawlawa a teritoriami. Naaddaan ni Manang iti lisensia idi 1987 iti edad a 56. Dakkel met ti naitulong ti maysa a naibangon a Kingdom Hall, ta immakarkami iti apartment a kaabayna.

Kasta unay ti rag-omi iti makitkitami a panagrang-ay. Idi inrugimi ti amin-tiempo a panagserbimi iti makin-amianan a Finland, sumagmamano laeng ti agibumbunannag iti dayta a naglawa a teritoria. Ngem adda itan sumagmamano a kongregasion a mangbukel iti maysa a sirkito iti dayta a lugar. Masansan a kadagiti asamblea wenno kombension, adda umasideg kadakami a mangyam-ammo iti bagina sa damagenna no malagipmi pay. Adda met agkuna a mangyad-adalkami iti Biblia iti pagtaenganda idi ubing pay. Nagbunga met laeng ti bin-i a naimula iti adun a tawtawen wenno dinekdekada pay ketdi!—1 Cor. 3:6.

Idi 2008, eksakto a 50 a tawenmin kas special pioneer. Agyamankami ken Jehova ta nakapagpinnaregtakami a dua nga agtultuloy iti daytoy a nagpateg a trabaho. Simple laeng ti biagmi, ngem saan a pulos nagkurang ti material a kasapulanmi. (Sal. 23:1) Nabigbigmi a di koma rumbeng a nagdanagkami idi mangrugikami nga agpayunir! Agingga ita, kankanayon a pabpabilgennakami ni Jehova kas inkarina iti Isaias 41:10: “Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.”