1. Ania dagiti topiko a regular a maad-adal kadagiti gimongtayo, ket kasanotayo a magunggonaan iti panangrepasotayo kadagita?

BAYAT nga agsagsaganaka iti Panagadal iti Pagwanawanan, mabalin a naibagamon, ‘Saan kadi a napagadalanen idi daytoy a topiko?’ No nabayagen a makigimgimongka kadagiti Saksi ni Jehova, mabalin a madlawmo nga adda dagiti topiko a maulit-ulit a mailawlawag. Regular a paset ti naespirituan a taraontayo ti maipapan iti Pagarian ti Dios, ti subbot, ti panagaramid iti adalan, ken dagiti kualidad a kas iti ayat ken pammati. Babaen ti panangrepasotayo kadagitoy a topiko, agtalinaed a nasalun-at ti pammatitayo ken ‘agbalintayo a managtungpal iti sao, saan a managdengngeg laeng.’—Sant. 1:22.

2. (a) Ania ti masansan a tuktukoyen dagiti pammalagip ti Dios? (b) Kasano a naiduma dagiti linteg ti Dios kadagiti linteg ti tao?

² Ti Hebreo a sao a naipatarus a “pammalagip” ket masansan a tumukoy kadagiti linteg, bilin, ken pagalagadan nga impaay ti Dios iti ilina. Dagiti linteg ken pagalagadan ni Jehova ket kanayon a mapagpiaran, saan a kas kadagiti linteg ti tao a masansan a masapul a mapasayaat wenno masuktan. Pudno a nangipaay idi ti Dios iti sumagmamano a linteg a saanen a kasapulan a suroten ti ilina ita. Ngem dina kayat a sawen nga adda kamali dagita. Kinuna ti salmista: “Ti kinalinteg dagiti pammalagipmo ket agingga iti tiempo a di nakedngan.”—Sal. 119:144.

3, 4. (a) Ania ti mabalin a ramanen dagiti pammalagip ni Jehova? (b) Kasano a magunggonaan dagiti Israelita no ipangagda dagita?

³ Nalabit nadlawmo a no dadduma, dagiti pammalagip ni Jehova ramanenna dagiti pakdaar. Kanayon idi a mapakdaaran ti nasion ti Israel babaen kadagiti propeta ti Dios. Kas pagarigan, sakbay a simrek dagiti Israelita iti Naikari a Daga, impakdaar ni Moises: “Agaluadkayo ta amangan no masulbog ti pusoyo, ket sumiasikayo ket  agdayawkayo kadagiti sabali a didios ket agruknoykayo kadakuada, ket gumil-ayab ti unget ni Jehova kadakayo.” (Deut. 11:16, 17) Ipakita ti Biblia nga adu a pammalagip ti inted ti Dios iti ilina.

⁴ Masansan nga idagadag ni Jehova kadagiti Israelita nga agbutengda kenkuana, dumngegda iti timekna, ken santipikarenda ti naganna. (Deut. 4:29-31; 5:28, 29) No ipangagda dagitoy a pammalagip, masiguradoda nga umawatda iti naruay a bendision.—Lev. 26:3-6; Deut. 28:1-4.

5. Apay a nakirupak ni Jehova maipaay ken Ari Ezekias?

⁵ Iti intero a pakasaritaan ti Israel, sinalimetmetan ti Dios ti karina. Kas pagarigan, idi a ni Ari Senaquerib ti Asiria rinautna ti Juda ken impangtana a padisienna ni Ari Ezekias, bimmallaet ni Jehova babaen ti panangibaonna iti maysa nga anghel. Iti maysa laeng a rabii, pinapatay dayta nga anghel ti “tunggal maingel, nabileg a lalaki” iti buyot ti Asiria, iti kasta napilitan ni Senaquerib nga agsubli iti dagana a napalalo ti bainna. (2 Cron. 32:21; 2 Ar. 19:35) Apay a nakirupak ti Dios maipaay ken Ari Ezekias? Gapu ta “intultuloy [ni Ezekias] ti kimpet ken Jehova. Saan a simiasi iti isusurot kenkuana, no di ket intuloyna a sinalimetmetan dagiti bilinna.”—2 Ar. 18:1, 5, 6.

6. Kasano nga impakita ni Ari Josias ti panagtalekna ken Jehova?

⁶ Ti sabali pay nga ulidan iti panagtulnog kadagiti bilin ni Jehova ket ni Ari Josias. Iti naganus nga edadna a walo, “inaramidna no ania ti umiso kadagiti mata ni Jehova . . . Saan a simiasi nga agturong iti makannawan wenno iti makannigid.” (2 Cron. 34:1, 2) Impakita ni Josias ti panagtalekna ken Jehova babaen ti panangdalusna iti Juda manipud kadagiti idolo ken panangisublina iti pudno a panagdayaw. Kas resultana, nabendisionan ni Josias kasta met ti intero a nasion.—Basaen ti 2 Cronicas 34:31-33.

7. Ania ti resulta ti di panangikankano ti Israel kadagiti pammalagip ni Jehova?

⁷ Nupay kasta, makapaladingit ta saan a kanayon a nagtalek ti Israel kadagiti pammalagip ni Jehova. Iti ginasgasut a tawen, adda dagiti tiempo a natulnogda ken adda met dagiti tiempo a nasukirda. No kumapuy ti pammatida, masansan a kaslada kadagidiay dineskribir ni apostol Pablo nga “iyallaalla ditoy ken idiay ti tunggal angin ti sursuro.” (Efe. 4:13, 14) Ket kas naipakpakauna, nagsagabada gapu iti saanda a panagtalek kadagiti pammalagip ti Dios.—Lev. 26:23-25; Jer. 5:23-25.

8. Ania ti masursurotayo iti kapadasan dagiti Israelita?

 ⁸ Kasanotayo a magunggonaan iti kapadasan dagiti Israelita? Kas kadakuada, maipapaayan dagiti ad-adipen ti Dios ita iti balakad ken disiplina. (2 Ped. 1:12) Mapalagipantayo tunggal basaentayo ti naipaltiing a Sao ti Dios. Yantangay addaantayo iti wayawaya nga agpili, adda kadatayo no agtulnogtayo kadagiti bilin ni Jehova wenno surotentayo ti ipagaruptayo nga umiso. (Prov. 14:12) Usigentayo ti dadduma a rason no apay a makapagtalektayo kadagiti pammalagip ni Jehova ken no kasano a magunggonaantayo iti panangipangag kadagita.

9. Idi adda dagiti Israelita idiay let-ang, kasano nga impasigurado ni Jehova a tartarabayenna ida?

⁹ Idi inrugi dagiti Israelita ti panagdaliasatda iti “nakaam-amak a let-ang” a nagpaut iti 40 a tawen, saan a detalyado nga inlawlawag kadakuada ni Jehova no kasano nga idalan, salakniban, ken aywananna ida. Nupay kasta, maulit-ulit nga impakitana a makapagtalekda kenkuana ken kadagiti instruksionna. Babaen ti maysa nga ulep iti aldaw ken maysa nga apuy iti rabii, impalagip ni Jehova kadagiti Israelita a tartarabayenna ida iti ilalasatda iti dayta a let-ang. (Deut. 1:19; Ex. 40:36-38) Impaayna met dagiti kangrunaan a kasapulanda. “Dagiti mismo a kawesda saan a narunot, ket dagiti met laeng sakada saan a limteg.” Wen, “saanda a nagkurang iti aniaman.”—Neh. 9:19-21.

10. Kasano nga idaldalan ni Jehova ti ilina ita?

¹⁰ Asidegen a makadanon dagiti adipen ti Dios ita iti nalinteg a baro a lubong. Agtaltalektayo kadi nga ipaay ni Jehova dagiti kasapulantayo tapno malasatantayo ti um-umay a “dakkel a rigat”? (Mat. 24:21, 22; Sal. 119:40, 41) Agpayso a saan a mangipapaay ni Jehova iti ulep wenno apuy a mangiturong kadatayo iti baro a lubong. Ngem ar-aramatenna ti organisasionna a mangpalagip kadatayo. Kas pagarigan, ad-adda a maipagpaganetget ita ti panangpabileg iti espiritualidadtayo babaen ti personal a panagbasa iti Biblia, Panagdaydayaw ti Pamilia, kasta met ti regular a pannakigimong ken panangasaba. Nangaramidtayo kadin kadagiti panagbalbaliw tapno masurottayo dagitoy nga instruksion? No kasta ti aramidentayo, mapatanortayo ti nabileg a pammati a mangispal kadatayo nga agturong iti baro a lubong.

11. Ania dagiti pamay-an nga ipakpakita ti Dios ti pannakaseknanna kadatayo?

¹¹ Iwanwanwannatayo met ti organisasion ti Dios a mangaramid iti nasayaat a desision iti inaldaw a panagbiagtayo. Kas pagarigan, maidagdagadag kadatayo nga agbalintayo a balanse iti material a bambanag ken pagtalinaedentayo a simple ti matatayo tapno maksayan ti panagdanagtayo. Mapalpalagipantayo met maipapan iti panagkawkawes ken panaglanglanga, panangpili iti nasayaat a paglinglingayan, ken panangikeddeng iti kaadu ti edukasion a kasapulan. Sa panunotentayo met dagiti maipapaay a pammalagip a tumulong kadatayo nga agbalin a natalged iti pagtaengan, lugan, Kingdom Hall, ken agsagana kadagiti tumaud nga emerhensia. Dagita a pammalagip ipakitada a maseknan ti Dios kadatayo.

12. (a) Ania a punto ti maulit-ulit a dinakamat ni Jesus kadagiti adalanna? (b) Ania nga ulidan ti kinapakumbaba ti nayukuok iti isip ni Pedro, ken ania koma ti epekto dayta kadatayo?

¹² Idi umuna a siglo, kanayon a maipapaayan ti ili ti Dios kadagiti pammalagip. Masansan a dakamaten ni Jesus kadagiti adalanna ti pateg ti kinapakumbaba. Nupay kasta, saanna laeng nga imbaga kadakuada ti kaipapanan ti panagbalin a napakumbaba no di ket inyulidanna pay a mismo dayta. Iti maudi nga aldawna ditoy daga kas tao, inummong ni Jesus dagiti apostolna tapno rambakanda ti Paskua. Bayat  a mangmangan dagiti apostolna, timmakder ni Jesus ket binugguanna dagiti sakada—maysa nga annongen a gagangay nga aramiden ti adipen. (Juan 13:1-17) Nayukuok iti isipda daytoy a kinapakumbaba ni Jesus. Agarup 30 a tawen kalpasanna, ni apostol Pedro, a presente iti daydi a pannangan, nangipaay iti balakad kadagiti kapammatianna maipapan iti kinapakumbaba. (1 Ped. 5:5) Ti ulidan ni Jesus tignayennatay koma nga agbalin a napakumbaba iti pannakilangentayo iti maysa ken maysa.—Fil. 2:5-8.

13. Ania a napateg a kualidad ti impalagip ni Jesus a nasken a patanoren dagiti adalanna?

¹³ Masansan met a dakamaten ni Jesus kadagiti adalanna a kasapulanda ti nabileg a pammati. Idi saanda a naparuar ti sairo iti maysa a barito, insaludsodda ken Jesus: “Apay a saanmi a kabaelan a paruaren dayta?” Insungbat ni Jesus: “Gapu iti bassit a pammatiyo. Ta pudno kunak kadakayo, No addaankayo iti pammati a kas iti kabassit ti bukel ti mustasa, . . . awanto ti di mabalin kadakayo.” (Mat. 17:14-20) Iti intero a ministerio ni Jesus, insurona kadagiti adalanna a nakapatpateg ti pammati. (Basaen ti Mateo 21:18-22.) Ap-aprobetsarentay kadi dagiti kombension, asamblea, ken gimong iti kongregasion a mangpabileg iti pammatitayo? Saan laeng a makaparagsak dagitoy a panagtataripnong, no di ket gundaway pay dagitoy a maiparangarangtayo ti panagtalektayo ken Jehova.

14. Apay a napateg a patanorentayo ti ayat a kas iti impakita ni Kristo?

¹⁴ Naglaon ti Kristiano a Griego a Kasuratan iti nakaad-adu a pammalagip maipapan iti panangipakita iti ayat iti maysa ken maysa. Kinuna ni Jesus a ti maikadua a kadakkelan a bilin ket, “Ayatem ti padam a tao a kas iti bagim.” (Mat. 22:39) Ti kabsat ni Jesus iti ina a ni Santiago inawaganna met ti ayat kas ti “naarian a linteg.” (Sant. 2:8) Insurat ni apostol Juan: “Dungdungnguen, isursuratko kadakayo, saan a ti maysa a baro a bilin, no di ket ti maysa a daan a bilin nga adda kadakayon nanipud idi damo.” (1 Juan 2:7, 8) Ania ti tuktukoyen ni Juan a “daan a bilin”? Tuktukoyenna ti bilin a mainaig iti ayat. Makuna a “daan” ta inted dayta ni Jesus “idi damo,” sumagmamano a dekada idin ti napalabas. Ngem “baro” met dayta ta naawagan iti managsakripisio nga ayat, ti kita ti ayat a kasapulan dagiti adalan bayat a sanguenda dagiti baro a kasasaad. Kas ad-adalan ni Kristo, ditay kadi pagyamanan dagiti pakdaar a mangsaluad kadatayo tapno saantay nga agbalin a managimbubukodan a kas ti kaaduan iti daytoy a lubong, iti kasta saan a lumamiis ti ayattayo iti padatayo a tao?

15. Ania ti kangrunaan a panggep ni Jesus ditoy daga?

¹⁵ Maseknan ni Jesus iti pagimbagan ti  sabsabali. Makitatayo dayta idi inagasanna dagiti masakit ken nangpagungar kadagiti natay. Ngem saan a daytoy ti kangrunaan a panggep ni Jesus no di ket ti panangasaba ken panangisurona, nga adayo a nasaysayaat ti epektona iti biag dagiti tattao. Kasano? Dagidiay inagasan ken pinagungar ni Jesus idi umuna a siglo, kas pagarigan, ket limmakay ken natayda met laeng idi agangay. Ngem dagidiay nangipangag iti mensahe nga inkasabana ket naaddaan iti namnama nga agbiag nga agnanayon.—Juan 11:25, 26.

16. Kasano kasaknap itan ti pannakaikasaba ti Pagarian ken ti trabaho a panagaramid iti adalan?

¹⁶ Ti trabaho a panangasaba nga inrugi ni Jesus idi umuna a siglo ket nakasaksaknapen iti kaaldawantayo. Wen, imbilin ni Jesus kadagiti adalanna: “Inkayo ngarud ket mangaramidkayo iti ad-adalan kadagiti tattao iti amin a nasion.” (Mat. 28:19) Pudno a kasta ti inaramidda, ket kasta met ti ar-aramidentayo ita! Nasurok a pito a milion nga aktibo a Saksi ni Jehova ti sireregta a mangipakpakaammo iti Pagarian ti Dios iti nasurok a 230 a dagdaga, ket regular a yad-adalanda iti Biblia ti minilion a tattao. Daytoy a trabaho a panangasaba ket pammaneknek nga agbibiagtayon iti maudi nga al-aldaw.

17. Ania a balakad ti impaay da Pablo ken Pedro?

¹⁷ Nalawag a nakatulong dagiti pammalagip tapno agtalinaed a natibker ti pammati dagiti nagkauna a Kristiano. Panunotem laengen ti pannakaparegta ni Timoteo iti pammalagip ni apostol Pablo, a sibabalud idi idiay Roma: “Itultuloymo a salimetmetan ti pagtuladan iti makapasalun-at a sasao a nangngegmo kaniak.” (2 Tim. 1:13) Kalpasan ti panangparegta ni apostol Pedro kadagiti padana a Kristiano a patanorenda dagiti kualidad a kas iti panagibtur, nainkabsatan a panagayat, ken panagteppel, kinunana: “Madadaanak a kanayon a mangipalagip kadakayo kadagitoy a banag, nupay ammoyo ida ken sititibker a naipasdek[kayo] iti kinapudno.”—2 Ped. 1:5-8, 12.

18. Ania ti panangmatmat dagiti Kristiano idi umuna a siglo kadagiti pammalagip?

¹⁸ Wen, dagiti surat da Pablo ken Pedro impalagipda ti “sasao a napalabasen nga insawang dagiti nasantuan a mammadto.” (2 Ped. 3:2) Nakasuron kadi dagiti kakabsattayo idi umuna a siglo gapu iti kasta a pammalagip? Saan, ta ebkas dayta ti ayat ti Dios, ket nakatulong dayta tapno ‘agtultuloyda a rumang-ay iti di kaikarian a kinamanangngaasi ken pannakaammo iti Apo ken Manangisalakantayo a ni Jesu-Kristo.’—2 Ped. 3:18.

19, 20. Apay a masapul nga agtalektayo kadagiti pammalagip ni Jehova, ken kasano a magunggonaantayo iti dayta?

¹⁹ Ita, ad-adu ti panggapuantay nga agtalek kadagiti pammalagip ni Jehova, a nailanad iti mapagpiaran a Saona, ti Biblia. (Basaen ti Josue 23:14.) Mabasatayo iti dayta dagiti pannakilangen ti Dios kadagiti imperpekto a tattao iti las-ud ti rinibu a tawen. Daytoy a salaysay ket nairekord agpaay a pagimbagantayo. (Roma 15:4; 1 Cor. 10:11) Makitkitatayon dagiti kaitungpalan dagiti padto ti Biblia. Dagiti padto ket kas kadagiti pammalagip a nasaksakbay a naibaga. Kas pagarigan, minilion a tattao ti dimmasig iti pudno a panagdayaw ken Jehova, kas naipadto a mapasamak iti “kamaudianan a paset dagiti aldaw.” (Isa. 2:2, 3) Dagiti dumakdakes a kasasaad ti lubong ket kaitungpalan met ti padto ti Biblia. Ken kas nadakamaten, ti sangalubongan a panangasaba ita ket kaitungpalan dagiti sasao ni Jesus.—Mat. 24:14.

²⁰ Iti ginasgasut a tawen, pinaneknekan ti Namarsua a makapagpannuraytayo kenkuana. Ania ti magunggonatayo no agtalektayo kadagiti pammalagipna? Kastoy ti kuna ni Rosellen: “Bayat nga agtaltalekak ken Jehova, ad-adda met a mapampaneknekak a siaayat a tartarabayen ken pabpabilgennak.” Magunggonaantay met no ipangagtayo dagiti pammalagip ni Jehova.