1. Pagdiligem ti panangmatmat ti kaaduan maipapan iti panagpaadipen ken ti iparparegta ti Roma 12:11.

TI NAKRISTIANUAN a panagpaadipen ket naiduma unay iti panagpaadipen a pampanunoten ti kaaduan. Para kadakuada, ti panagpaadipen kaipapananna ti pannakairurumen kasta met ti naulpit ken di nainkalintegan a pannakatrato. Ngem ti panagpaadipen a dakdakamaten ti naipaltiing a Sao ti Dios ket situtulok a panagserbi iti naayat nga Apo. Kinapudnona, idi indagadag ni apostol Pablo kadagiti Kristiano idi umuna a siglo nga ‘agpaadipenda ken Jehova,’ iparparegtana nga agserbida iti Dios buyogen ti ayat. (Roma 12:11) Ania ti ramanen daytoy a kita ti panagpaadipen? Kasanotay a maliklikan ti agpaadipen ken Satanas ken iti lubongna? Ken ania dagiti gunggona iti matalek a panagserbi kas adipen ni Jehova?

2. (a) Ania ti mabalin a pakatignayan ti maysa nga adipen a Hebreo nga agtultuloy nga agpaadipen? (b) Ania ti ipakita ti panangipalubos ti maysa nga adipen a matebbengan ti lapayagna?

² Ti Linteg ti Dios nga intedna iti Israel tulongannatayo a mangammo iti kalikaguman kadatayo ni Jehova kas ad-adipenna. Ti maysa nga adipen a Hebreo ket mawayawayaan iti maikapito a tawen ti panagserbina. (Ex. 21:2) Ngem no ay-ayatenna ti apona ken kayatna ti agtultuloy nga agserbi, adda naisangsangayan nga urnos ni Jehova para iti dayta. Ti apo ipidegna ti adipenna iti ruangan wenno hamba ti ruangan sa tebbenganna ti lapayag ti adipenna. (Ex. 21:5, 6) Madlawtayo a nainaig ti lapayag iti daytoy nga urnos. Iti Hebreo a lengguahe, ti panagtulnog ket mainaig iti panagdengngeg ken panagimdeng. Isu a ti panangipalubos ti adipen a matebbengan ti lapayagna ipakitana a kayatna ti agtultuloy nga agtulnog iti apona. Daytoy ti tumulong kadatayo a mangusig no ania ti ramanen ti panagdedikartayo ken Jehova—ti situtulok a panagtulnog maigapu iti ayattayo kenkuana.

3. Apay a nagdedikartayo iti Dios?

³ Idi nagbautisartayo kas Kristiano, inkeddengtayo a pagserbian ni Jehova ken agbalintayo nga adipenna. Nagdedikartayo  gapu iti tarigagaytayo nga agtulnog ken Jehova ken mangaramid iti pagayatanna. Awan ti nangpilit kadatayo a mangaramid iti daytoy. Kinapudnona, uray dagiti ubbing a nagpabautisar, saanda a nagdedikar ken Jehova tapno laeng maay-ayoda dagiti nagannakda no di ket personal a desisionda dayta. Agdedikar ti maysa a Kristiano gapu iti ayatna iti Nailangitan nga Apotayo, ni Jehova. “Daytoy ti kaipapanan ti ayat iti Dios,” insurat ni apostol Juan, “a tungpalentayo dagiti bilinna.”—1 Juan 5:3.

4. Ania ti kasapulan nga aramidentayo tapno agbalintayo nga “ad-adipen iti kinalinteg”?

⁴ Anian a yamantayo ken Jehova ta impalubosna nga agbalintayo nga adipenna! Gapu iti pammatitayo iti daton a subbot ni Kristo, nawayawayaantayo manipud iti panangadipen ti basol. Nupay imperpektotayo, situtulok a nagpasakuptayo iti autoridad ni Jehova ken ni Jesus. Inlawlawag daytoy ni Pablo iti maysa kadagiti naipaltiing a suratna: “Ibilangyo ti bagbagiyo a pudno a natay no mainaig iti basol ngem sibibiag no mainaig iti Dios babaen ken Kristo Jesus.” Kalpasanna, impakdaarna: “Dikay aya ammo a no itultuloyyo nga iparang ti bagbagiyo iti asinoman kas ad-adipen tapno agtulnog kenkuana, ad-adipennakayo agsipud ta agtulnogkayo kenkuana, uray iti basol maipaay iti ipapatay wenno iti kinatulnog maipaay iti kinalinteg? Ngem pagyamanan iti Dios ta ad-adipennakayo idi ti basol ngem nagbalinkayo a natulnog manipud iti puso iti dayta a kita ti sursuro a nakayawatanyo. Wen, yantangay nawayawayaankayo iti basol, nagbalinkayo nga ad-adipen iti kinalinteg.” (Roma 6:11, 16-18) Paliiwem ta dinakamat ti apostol ti ‘panagtulnog manipud iti puso.’ Isu a no idedikartayo ti bagitayo ken Jehova, agbalintayo nga “ad-adipen iti kinalinteg.”

5. Ania ti masapul a sarangtentayo amin, ken apay?

⁵ Nupay kasta, adda dua a lapped a masapul a sarangtentayo tapno makapagbiagtayo maitunos iti dedikasiontayo. Ti umuna isu ti kinaimperpektotayo. Nakidangadang met ni Pablo iti dayta. “Pudno a pagragsakak ti linteg ti Dios maitunos iti kinatao nga adda iti unegko,” insuratna, “ngem makitak iti kamkamengko ti sabali a linteg a makigubgubat iti linteg ti panunotko ken mangiturturong kaniak a kautibo iti linteg ti basol nga adda iti kamkamengko.” (Roma 7:22, 23) Gapu ta imperpektotayo, masapul a sarangtentayo ti nainlasagan a pagannayasantayo. Imbalakad ni apostol Pedro: “Agbalinkayo a kas siwayawaya a tattao, ket kaskasdi a salsalimetmetanyo ti wayawayayo, saan a kas pangabbong iti kinadakes, no di ket kas ad-adipen ti Dios.”—1 Ped. 2:16.

6, 7. Kasano a pagbalbalinen ni Satanas a makaay-ayo daytoy a lubong?

⁶ Ti maikadua a masapul a sarangtentayo ket daytoy a lubong a konkontrolen dagiti demonio. Ni Satanas, nga agturay iti daytoy a lubong, ar-aramatenna ti amin a pamuspusan tapno madadael ti kinasungdotayo ken Jehova ken ni Jesus. Ikagkagumaannatayo nga adipenen babaen ti panangsulisogna kadatayo nga agaramid iti dakes. (Basaen ti Efeso 6:11, 12.) Ti maysa a pamay-an ni Satanas ket pagparparangenna a makaawis ken makaay-ayo ti lubongna. “No ti asinoman ayatenna ti lubong,” impakdaar ni apostol Juan, “ti ayat ti Ama awan kenkuana; agsipud ta amin a banag iti lubong—ti derrep ti lasag ken ti derrep dagiti mata ken ti panangiparammag iti sanikua a pagbiag ti maysa—saan nga agtaud iti Ama, no di ket agtaud iti lubong.”—1 Juan 2:15, 16.

⁷ Gagangayen iti lubong ti panagtarigagay a bumaknang. Kayat ni Satanas a patientayo a ti kuarta ti mangipaay iti kinaragsak. Agkaraiwara ti dadakkel a pagtagilakuan. Itantandudo dagiti adbertismen ti panagbiag a naipamaysa iti panagpabaknang ken panagragragsak. Ituktukon dagiti travel agency ti panagpasiar iti nagpipintas a lugar a kadua dagiti tattao a nailubongan ti panagpampanunotna. Wen, iparparegta ti amin nga adda iti aglawlawtayo a “pasayaatentayo” ti panagbiagtayo—maitunos iti panangmatmat ti lubong.

8, 9. Ania ti posible a mangadipen kadatayo, ken apay?

 ⁸ Mainaig kadagiti Kristiano idi umuna a siglo nga addaan iti nailubongan a panangmatmat, impakdaar ni Pedro: “Ibilangda kas pagraragsakan ti naluho a panagbiag iti aldaw. Isuda ket mulit ken pakapilawan, a naigamerda buyogen ti di matngelan a panagragragsak iti makaallilaw a sursuroda bayat a makidaydayada a sangsangkamaysa kadakayo. Ta mangyebkasda iti napalangguad a sasao a di makagunggona, ket babaen kadagiti tarigagay ti lasag ken babaen kadagiti nalulok nga ugali sulbogenda dagidiay lumaplapsut pay laeng kadagiti tattao nga agbibiag iti biddut. Bayat nga ikarkarianda ida iti wayawaya, isuda addada nga ad-adipen ti panagrupsa. Ta siasinoman a parmeken ti sabali ket adipenen daytoy.”— 2 Ped. 2:13, 18, 19.

⁹ Saan a pudpudno a nawaya ti tao a mangpempennek iti “derrep dagiti mata[na].” Imbes ketdi, agbalbalin nga adipen ni Satanas a Diablo, ti di makita nga apo daytoy a lubong. (1 Juan 5:19) Napeggad ti agbalin nga adipen ti materialismo ta narigat ti rumuk-at iti dayta.

10, 11. Siasino ita ti kangrunaan a puntiria ni Satanas, ken kasano nga agbalin a karit kadakuada ti edukasion daytoy a lubong?

¹⁰ Pumpuntiriaen met ita ni Satanas dagidiay bassit ti kapadasanda, kas iti inaramidna idiay Eden. Dagiti agtutubo ti paggugustona a biktimaen. Saan a maragsakan ni Satanas no ti maysa nga agtutubo, wenno asinoman, ket agboluntario nga agpaadipen ken Jehova. Daytoy a kabusor ti Dios kayatna a madadael ti debosion ken kinasungdo ti amin a nangidedikar iti biagda ken Jehova.

¹¹ Subliantayo ti nadakamat nga adipen a situtulok a nagpatebbeng iti lapayagna. Sigurado a nakarikna iti ut-ot idi damo, ngem kalpasanna adda nabati a permanente a pagilasinan iti desisionna nga agtalinaed nga adipen. Mabalin a narigat, wenno nasaem pay ketdi, para iti maysa nga agtutubo nga agbiag a naiduma kadagiti kapatadanna. Itantandudo ni Satanas ti kapanunotan a magun-odam ti pannakapnek no addaanka iti karera iti daytoy a lubong, ngem masapul nga ipangpangruna dagiti Kristiano ti naespirituan a kasapulanda. “Naragsak dagidiay sipapanunot iti naespirituan a kasapulanda,” kinuna ni Jesus. (Mat. 5:3) Agbibiag dagiti Kristiano maitunos iti pagayatan ti Dios, saan nga iti pagayatan ni Satanas. Pakaragsakanda ti linteg ni Jehova, ket mennamennaenda dayta iti aldaw ken rabii. (Basaen ti Salmo 1:1-3.) Ngem adu a kurso ita iti eskuelaan ti mangagaw iti tiempo ti maysa a Kristiano a para koma iti panagmennamennana iti Sao ti Dios ken iti panagserbina ken Jehova.

12. Ania a panagpili ti pakaipaspasanguan ti adu nga agtutubo ita?

 ¹² Ti nailubongan nga apo mabalin a pagbalinenna a narigat ti kasasaad ti maysa a Kristiano nga adipen. Insaludsod ni Pablo iti umuna a suratna kadagiti taga-Corinto: ‘Maysaka aya nga adipen idi naayabanka?’ Sana imbalakad: “Saannaka koma a pagdanagen dayta; ngem no mabalinmo met ti agwayawaya, . . . gundaway[am].” (1 Cor. 7:21) Gagangay laeng ngarud a kayat ti maysa nga adipen ti mawayawayaan. Iti adu a pagilian ita, ikalikagum ti linteg nga ageskuela dagiti agtutubo iti sumagmamano a tawen. Kalpasanna, agpili ti estudiante no agtultuloy nga agadal wenno saan. No agtultuloy nga ageskuela ti maysa a Kristiano tapno gumun-od iti nangatngato nga edukasion iti daytoy a lubong, mabalin a saanton a nawaya a sumrek iti amin-tiempo a panagserbi.—Basaen ti 1 Corinto 7:23.

13. Ania a kita ti edukasion ti nangnangruna a pakagunggonaan dagiti adipen ni Jehova?

¹³ Pinakdaaran ni Pablo dagiti Kristiano a taga-Colosas: “Agaluadkayo: amangan no adda asinoman a mangkayawto kadakayo kas naanupanna babaen iti pilosopia ken ubbaw a panangallilaw maitunos iti tradision dagiti tattao, maitunos iti pagdamdamuan a bambanag ti lubong ket saan a maitunos ken Kristo.” (Col. 2:8) Adu a mannursuro ita ti mangitantandudo iti “pilosopia ken ubbaw a panangallilaw maitunos iti tradision dagiti tattao.” Ti nangatngato nga edukasion, a mainaig laeng iti akademiko a panagadal, saanna a matulongan dagiti agtutubo a mangpatanor iti praktikal a paglaingan tapno makapagsaganada a sumango kadagiti realidad iti biag. Ngem dagiti agserserbi ken Jehova pilienda ti edukasion a pakasursuruanda kadagiti praktikal a paglaingan a maaramatda a pangsuporta iti simple a biag bayat nga agserserbida iti Dios. Ipappapusoda ti balakad ni Pablo ken ni Timoteo: “Iti kinaagpaysuanna, dayta ket panggun-od iti dakkel a gunggona, daytoy nadiosan a debosion agraman iti pannakapnek. Gapuna, no adda pagtaraon ken pagkawestayo, mapnektayon kadagitoy a banag.” (1 Tim. 6:6, 8) Imbes a gumun-odda iti nangato a kurso ken titulo a pakabigbiganda, ipampamaysa dagiti pudno a Kristiano ti naan-anay a pannakiraman iti ministerio tapno matulonganda ti sabsabali nga agbalin nga ad-adalan ni Kristo.—Basaen ti 2 Corinto 3:1-3.

14. Sigun iti Filipos 3:8, ania ti panangmatmat ni Pablo iti pribilehiona kas adipen ti Dios ken ni Kristo?

¹⁴ Usigem ti ulidan ni apostol Pablo. Isu  ket nasursuruan iti Linteg dagiti Judio babaen ti mannursuro a ni Gamaliel. Ti adal a nagun-odna ket katupag ita ti edukasion iti unibersidad. Ngem ania ti panangmatmatna iti dayta no maidilig iti pribilehiona kas adipen ti Dios ken ni Kristo? Insuratna: “Ibilangko . . . ti amin a bambanag kas pukaw maigapu iti naringbaw a pateg ti pannakaammo ken Kristo Jesus nga Apok.” Sana innayon: “Maigapu kenkuana inawatko ti pannakaipukaw ti amin a bambanag ket ibilangko ida kas adu a basura, tapno magun-odak ni Kristo.” (Fil. 3:8) Daytoy a panangmatmat tulonganna dagiti agtutubo a Kristiano ken dagiti managbuteng-Dios a nagannakda a nainsiriban nga agdesision maipapan iti edukasion. (Kitaen dagiti ladawan.)

15, 16. Ania nga edukasion ti ipapaay ti organisasion ni Jehova, ken ania ti kangrunaan a panggepna?

¹⁵ Ania ti kasasaad iti adu a kolehio wenno unibersidad iti daytoy a lubong? Saan kadi a no dadduma, dagita ti pagtataudan ti rebelion ken riribuk iti politika? (Efe. 2:2) Ngem ti organisasion ni Jehova ipapaayna ti kangatuan a kita ti edukasion iti sidong ti natalinaay a kasasaad ti kongregasion Kristiano. Addaantay amin iti gundaway a magunggonaan iti linawas a Teokratiko nga Eskuelaan iti Panagministro. Adda pay dagiti espesial a panagadal para kadagiti awanan assawa a kakabsat a lallaki a payunir (Bible School for Single Brothers) ken kadagiti agassawa a payunir (Bible School for Christian Couples). Dagitoy a nateokratikuan nga edukasion tulongannatayo nga agtulnog ken Jehova, ti nailangitan nga Apotayo.

¹⁶ Adu ti masarakantayo a naespirituan a kinabaknang iti Watch Tower Publications Index wenno iti Watchtower Library iti CD-ROM. Ti kangrunaan a panggep ti panangadaltayo iti Biblia ket tapno idayawtayo ni Jehova. Isurona kadatayo no kasanotayo a matulongan dagiti sabsabali nga agbalin a gayyem ti Dios. (2 Cor. 5:20) Daytoyto met ti tumulong kadakuada a mangisuro iti sabsabali.—2 Tim. 2:2.

17. Ania dagiti gunggona iti panangpili iti kangatuan nga edukasion?

¹⁷ Iti ilustrasion ni Jesus maipapan kadagiti talento, nakomendaran ti dua a matalek nga adipen ken nakipagragsakda iti apoda babaen ti panangawatda iti kanayonan a trabaho nga intalekna kadakuada. (Basaen ti Mateo 25:21, 23.) Mangyeg iti rag-o ken gunggona ti panangpili iti kangatuan nga edukasion. Usigem ti kapadasan ni Michael. Gapu ta nalaing nga estudiante, kinasarita dagiti mannursurona maipapan iti kurso a mabalinnanto nga alaen iti unibersidad. Nasdaawda ta pinili ni Michael ti ababa a bokasional a kurso, a nakatulong idi agangay iti panagpayunirna. Nagbabawyanna kadi ti desisionna? “Ti nateokratikuan nga edukasion a nagun-odko kas payunir—ken kas maysa a panglakayen itan iti kongregasion—ket nakapatpateg,” kinunana. “Dagiti bendision ken pribilehio a tagtagiragsakek ket adayo a nasaysayaat ngem iti aniaman a kuarta a mabalin koma a nateggedak. Imbag laengen ta saanko a pinili ti nangatngato nga edukasion.”

18. Apay a rumbeng a piliem ti kangatuan nga edukasion?

¹⁸ Ti kangatuan nga edukasion isurona kadatayo ti pagayatan ti Dios ken tulongannatayo nga agpaadipen ken Jehova. Gapu iti dayta, addaantayo iti namnama a “mawayawayaanto iti pannakaadipen iti panagrupsa” ken inton agangay, magun-odtayo ti “nadayag a wayawaya ti annak ti Dios.” (Roma 8:21) Kangrunaanna, masursurotayo ti kasayaatan a pamay-an a panangipakita iti ayattayo iti nailangitan nga Apotayo, ni Jehova.—Ex. 21:5.