1. Ania nga abilidad ti adda kadatayo kas naparsua iti ladawan ti Dios?

MASANSAN a mangmangngegtayo ti pagsasao a, “Like father, like son.” Pudno nga adu nga annak ti umasping unay kadagiti nagannakda. Natawid ngamin ti ubing dagiti genes-na kada tatang ken nanangna. Ti nailangitan nga Amatayo a ni Jehova ti Gubuayan ti biag. (Sal. 36:9) Kas annakna ditoy daga, adda umaspingantayo kenkuana. Gapu ta naparsuatayo iti ladawanna, addaantayo iti abilidad nga agrason, agdesision, ken makigayyem.—Gen. 1:26.

2. Kasano a posible nga agbalin a Gayyemtayo ni Jehova?

² Posible nga agbalin ni Jehova a kasingedan a Gayyemtayo. Ti kasta a pannakigayyem ket posible gapu iti ayatna kadatayo ken iti pammatitayo kenkuana ken iti Anakna. Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Adun a tattao ti naaddaan iti nasinged a relasion ken Jehova. Usigentayo ti dua kadakuada.

3, 4. Ania ti nakaidumaan ni Abraham kadagiti kaputotanna no iti pannakigayyem ken Jehova?

³ Inawagan ni Jehova ti patriarka ken inapo dagiti Israelita kas  “ni Abraham a gayyemko.” (Isa. 41:8) Natukoy met ni Abraham kas ‘mangay-ayat iti Dios.’ (2 Cron. 20:7) Kasano a naaddaan daytoy a matalek a lalaki iti nasinged a relasion iti Namarsua? Gapu iti pammatina.—Gen.15:6; basaen ti Santiago 2:21-23.

⁴ Idi damo, ni Jehova ti Ama ken Gayyem dagiti kaputotan ni Abraham a nagbalin kas nasion ti nagkauna nga Israel. Ngem nakalkaldaang ta napukawda ti pannakigayyemda iti Dios. Apay? Gapu ta saanda a sinalimetmetan ti pammatida kadagiti kari ni Jehova.

5, 6. (a) Kasanoka a nagbalin a Gayyem ni Jehova? (b) Ania dagiti saludsod a nasayaat nga usigentayo?

⁵ Bayat nga umad-adu ti ammom maipapan ken Jehova, tumibtibker met ti pammatim ken umun-uneg ti panagayatmo kenkuana. Panunotem idi damo a naammuam a ti Dios ket maysa a pudno a Persona ken mabalinmo ti agbalin a nasinged kenkuana. Naadalmo met a nayanaktayo kas managbasol gapu iti panagsukir ni Adan. Naawatam a ti kaaduan a tattao iti sangatauan ket naisina iti Dios. (Col. 1:21) Naammuam met nga interesado kadatayo ti naayat a nailangitan nga Amatayo. Idi naadaltayo ti maipapan iti daton a subbot ni Jesus ken namatitayo iti dayta, nangrugitayo metten a suminged iti Dios.

⁶ Bayat a pampanunotentayo dayta, nasayaat nga isaludsodtayo iti bagitayo: ‘Parparang-ayek kadi ti pannakigayyemko iti Dios? Nabileg kadi ti panagtalekko kenkuana, ken inaldaw kadi nga umun-uneg ti panagayatko kenkuana kas patpatgek a Gayyem?’ Ti maysa pay a naaddaan iti nasinged a relasion ken Jehova idi un-unana ket ni Gideon. Usigentayo ti nagsayaat nga ulidanna ken ipapusotayo dayta.

7-9. (a) Ania ti nagpaiduma a kapadasan ni Gideon, ken ania ti resultana? (Kitaen ti ladawan iti rugi ti artikulo.) (b) Kasano nga agbalintayo a gayyem ni Jehova?

⁷ Nagserbi ni Ukom Gideon ken Jehova bayat ti nariribuk a paset ti pakasaritaan ti Israel idi nakastreken ti nasion iti Naikari a Daga. Isalaysay ti Uk-ukom kapitulo 6 a ti anghel ni Jehova ket nagparang ken Gideon idiay Ofra. Iti daydi a tiempo, agpegpeggad ti Israel gapu iti masansan nga iraraut dagiti Midianita. Isu a ti pagir-irikan idi ni Gideon iti trigo ket iti pagpespesan ti ubas imbes nga iti taltalon, tapno mailemmengna a dagus ti trigo. Nakigtot ni Gideon idi nagparang kenkuana ti maysa nga anghel a nangawag kenkuana iti ‘maingel ken mannakabalin.’ Nupay inispal idin ni Jehova dagiti Israelita manipud Egipto, agduadua ni Gideon no ispalen ida ni Jehova iti dayta a tiempo. Kas pannakabagi ti Namarsua, impasigurado ti anghel ken Gideon a tumulong kenkuana ni Jehova.

⁸ Di mapanunot ni Gideon no kasano a ‘maisalakanna ti Israel manipud iti dakulap ti Midian.’ Ngem impasigurado kenkuana ni Jehova: “Agsipud ta addaakto kenka, ket pudno unay a kabilemto ti Midian a kasla maymaysa a tao.” (Uk. 6:11-16) Gapu ta saan nga ammo ni Gideon no kasano a mapasamak dayta, dimmawat iti pagilasinan manipud iti Dios. Paliiwem ta iti daytoy a panagsarita, saan a pinagduaduaan ni Gideon no ni Jehova ket maysa a pudno a Persona.

⁹ Ti simmaruno a napasamak pinabilegna ti pammati ni Gideon ket ad-adda a simminged iti Dios. Nangisagana ni Gideon iti taraon ket indasarna iti sanguanan ti anghel. Insagid ti anghel ti sarukodna iti taraon ket simimilagro a napuoran dayta. Nabigbig ni Gideon a ti anghel ket pannakabagi ni Jehova. Nagbuteng ni Gideon ket kinunana: “Ay, Soberano nga Apo Jehova, iti rason a nakitak a rupanrupa ti anghel ni Jehova!” (Uk. 6:17-22) Ngem adda kadi negatibo nga epekto daytoy iti pannakigayyemna iti Dios? Awan a pulos! Nakarikna ketdi iti talna kas gayyem ti Dios. Ammotayo a kasta gapu iti naipanagan iti altar nga impatakder ni Gideon iti dayta a lugar—“Jehova-salom,” kayatna a sawen, “Ni Jehova ket Talna.” (Basaen  ti Uk-ukom 6:23, 24.) No mennamennaentayo ti inaldaw nga ar-aramiden ni Jehova para kadatayo, mabigbigtayo nga isu ket pudpudno a Gayyem. Ti kanayon a panagkararag iti Dios pagbalinenna a nataltalged ti riknatayo ken pabilgenna ti pannakigayyemtayo kenkuana.

10. Sigun iti Salmo 15:3, 5, ania dagiti kalikaguman ni Jehova tapno agbalintayo a gayyemna?

¹⁰ Ngem adda dagiti makalikaguman tapno agbalintayo a Gayyem ni Jehova. Kas nairekord iti Salmo 15, inkanta ni David ti maipapan kadagiti makalikaguman kadatayo tapno agbalintayo a ‘sangaili iti tolda ni Jehova,’ wenno gayyem ti Dios. (Sal. 15:1) Usigentayo ti dua kadagitoy—ti di panangpardaya ken ti panagbalin a mapagtalkan. Kinuna ni David maipapan iti agbalin a sangaili iti tolda ni Jehova: “Isu saan a nangpardaya babaen iti dilana. . . . Ti pasuksok maibusor iti daydiay awanan basol saanna nga innala.”—Sal. 15:3, 5.

11. Apay a saantay koma a pardayaen dagiti sabsabali?

¹¹ Iti sabali pay a salmo, impakdaar ni David: “Saluadam ta dilam maibusor iti dakes.” (Sal. 34:13) No saantayo nga ipangag daytoy a naipaltiing a balakad, madadael ti relasiontayo iti nalinteg a nailangitan nga Amatayo. Kinapudnona, ti panangpardaya ket aramid ni Satanas, ti kangrunaan a kabusor ni Jehova. Ti sao a “Diablo” ket naggapu iti Griego a sao a kaipapananna ti “manangpardaya.” No naannadtayo iti iyes-estoriatayo maipapan iti sabsabali, agtalinaedtayo a nasinged ken Jehova. Nangnangruna koma nga annadantayo ti ibagbagatayo maipapan kadagiti nadutokan a lallaki iti kongregasion.—Basaen ti Hebreo 13:17; Judas 8.

12, 13. (a) Apay a rumbeng nga agbalintayo a mapagtalkan iti amin a banag? (b) Ania ti mabalin nga epektona iti sabsabali no mapagtalkantayo?

¹² Dagiti adipen ni Jehova ket pagaammo kas mapagtalkan a tattao ken saanda a mananggundaway. Insurat ni apostol Pablo: “Itultuloydakami nga ikararagan, ta agtalekkami nga addaankami iti napudno a konsiensia, yantangay kayatmi ti agbiag a mapagtalkan iti amin a bambanag.” (Heb. 13:18) Gapu ta determinadotayo nga “agbiag a mapagtalkan iti amin a bambanag,” ditay kayat a gundawayan dagiti kapammatiantayo. Kas pagarigan, no agtrabtrabahoda kadatayo, siguraduentayo koma a nainkalintegan ti panangtratotayo kadakuada ken maited ti napagtulagan a sueldo. Kas Kristiano, mapagtalkan koma ti pannakilangentayo kadagiti empleadotayo ken iti sabsabali. Ken no datayo met ti empleado ti kapammatiantayo, saantayo koma a namnamaen ti espesial a pannakatrato.

¹³ Masansan nga apresiaren dagiti di manamati ti nasayaat a kondukta dagiti nakalangenda a Saksi ni Jehova. Kas pagarigan, nadlaw ti direktor ti maysa a dakkel a kompania ti konstruksion a salsalimetmetan dagiti Saksi ni Jehova ti saoda. Kinunana: “Kanayonyo a tungtungpalen ti tulagan.” (Sal. 15:4) Ti kasta a kondukta tulongannatayo nga agtalinaed a gayyem ni Jehova. Maysa pay, pakaidayawan dayta ti naayat a nailangitan nga Amatayo.

14, 15. Iti ministerio, kasanotayo a matulongan dagiti tattao nga agbalin a gayyem ni Jehova?

¹⁴ Adu a tattao a makaskasabaantayo ti mamati iti Dios, ngem saanda nga ibilbilang kas kasingedan a Gayyemda. Kasanotayo ida a matulongan? Usigentayo ti imbilin ni Jesus kadagiti 70 nga adalanna idi imbaonna ida a sagdudua a mapan mangasaba: “Sadinoman a balay a serkanyo kunaenyo nga umuna, ‘Maadda koma ti talna iti daytoy a balay.’ Ket no adda sadiay ti maysa a gayyem ti talna, agtalinaedto kenkuana ti talnayo. Ngem  no awan, agsublinto dayta kadakayo.” (Luc. 10:5, 6) Mabalin a matignay dagiti tattao nga aginteres iti kinapudno no nainggayyeman ti pannakisaritatayo kadakuada. Nalabit makatulong pay dayta tapno agbaliw ti panangmatmat dagiti bumusbusor kadatayo ket dumngegdanto iti mensahetayo iti sabali a gundaway.

¹⁵ No makasaraktayo kadagiti debosionado a tattao a mangan-annurot kadagiti di umiso a narelihiosuan a tradision, itultuloytayo latta ti agbalin a nainggayyeman ken mannakikappia kadakuada. Sibabara koma nga abrasaentayo iti gimong dagiti tattao a maup-upay gapu iti agdama a kasasaad ti lubong ken mayat a mangammo iti ad-adu pay maipapan iti Dios a daydayawentayo. Adu a nagsasayaat a kapadasan ti mabasatayo kadagiti artikulo iti serye a “Ti Biblia Balbaliwanna ti Biag.”

16. Kasano nga agbalintayo a gayyem ken ‘katrabahuan’ ni Jehova?

¹⁶ Masansan a dagiti tattao nga agkadkadua nga agtrabaho ket agbalin a nasinged nga aggayyem. Amin a dedikado ken Jehova ket addaan iti pribilehio a maibilang a gayyemna ken ‘katrabahuanna.’ (Basaen ti 1 Corinto 3:9.) Wen, bayat a mangaskasaba ken agar-aramidtayo iti ad-adalan, ad-adda a matarusantayo dagiti nagsasayaat a kualidad ti nailangitan nga Amatayo. Makitkitatayo met no kasano a tultulongannatayo ti nasantuan nga espiritu tapno maikasabatayo ti naimbag a damag.

17. Kasano a dagiti naespirituan a taraon manipud kadagiti asamblea ken kombensiontayo ipakitada a Gayyemtayo ni Jehova?

¹⁷ No kanayontayo a makiraman iti trabaho a panagaramid iti ad-adalan, ad-adda a suminged ti riknatayo ken Jehova. Mapalpaliiwtayo no kasano a laplapdan ni Jehova dagiti bumusbusor kadatayo. Iti napalabas a tawtawen, saan kadi a nakitatayo no kasanonatayo nga iwanwanwan ti Dios? Masmasdaawtayo iti aglaplapusanan a naespirituan a taraon a maipapaay kadatayo. Ipakpakita dagiti programa iti asamblea ken kombension a maawatan ti naayat nga Amatayo dagiti parikut ken kasapulantayo. Kalpasan ti maysa a kombension, insurat ti maysa a pamilia: “Talaga a natukay ti pusomi iti programa. Nariknami nga ay-ayaten unay ni Jehova ti tunggal maysa kadatayo ken kayatna nga agballigitayo.” Inyebkas met ti maysa a pagassawaan a taga-Germany ti panagyamanda iti nabara a panangabrasa dagiti kakabsat ken pannakaipaay dagiti kasapulanda iti itatabunoda iti maysa nga espesial a kombension idiay Ireland. Kinunada pay: “Ngem ti pagyamyamananmi unay ket ni Jehova ken ti dinutokanna nga Ari a ni Jesu-Kristo ta inawisdakami nga agbalin a paset daytoy nagkaykaysa nga ili. Saantay laeng a pagsasaritaan dayta a panagkaykaysa no di ket inaldaw a tagtagiragsakentayo.  Dagiti kapadasanmi iti espesial a kombension iti Dublin kanayonto nga ipalagipna kadakami ti nagpateg a pribilehiomi a makikadua kadakayo nga agserbi iti naindaklan a Dios.”

18. Ania ti isaludsodtayo iti bagitayo maipapan iti pannakisaritatayo ken Jehova?

¹⁸ Suminged dagiti aggayyem no kanayonda nga agtungtong. Uso ita ti panagteks ken pannaki-chat iti Internet. Ngem komusta ti personal a komunikasiontayo iti kasingedan a Gayyemtayo, ni Jehova? Isu ti “Managdengngeg iti kararag.” (Sal. 65:2) Ngem kasano kasansan ti pannakisaritatayo kenkuana?

19. Ania ti makatulong no marigatantayo a mangyebkas ken Jehova iti linaon ti pusotayo?

¹⁹ Adda dagiti adipen ti Dios a marigatan a mangyebkas iti rikrikna ken linaon ti pusoda. Ngem kayat ni Jehova nga iyebkastayo dayta no agkararagtayo. (Sal. 119:145; Un. 3:41) No marigatantayo a mangyebkas iti riknatayo, adda makatulong kadatayo. Insurat ni Pablo kadagiti Kristiano idiay Roma: “Ti parikut a no ania ti ikararagtayo a kasapulantayo saantayo nga ammo, ngem ti espiritu a mismo agdawat a maipaay kadatayo buyogen dagiti asug a di mayebkas. Ngem daydiay mangsukimat iti puspuso ammona no ania ti panggep ti espiritu, agsipud ta agdawdawat a maitunos iti Dios maipaay kadagiti sasanto.” (Roma 8:26, 27) Ti panangmennamennatayo kadagiti sasao a nairekord kadagiti libro ti Biblia a kas iti Job, Salmo, ken Proverbio matulongannatayo a mangyebkas ken Jehova iti adda iti kaunggantayo.

20, 21. Ania a liwliwa ti ipaay kadatayo ti sasao ni Pablo iti Filipos 4:6, 7?

²⁰ No adda dagiti nadagsen a parikuttayo, ipangagtayo ti naipaltiing a balakad ni Pablo kadagiti taga-Filipos: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” Sigurado a mabang-aran ken maliwliwatayo no yebkastay iti kasingedan a Gayyemtayo ti amin a pakaringgorantayo, gapu ta kinuna ni Pablo: “Ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Fil. 4:6, 7) Kanayon koma nga apresiarentayo ti awan kapadana a “talna ti Dios” a pudno a mangsalsaluad iti puso ken panunottayo.

²¹ Makatulong ti kararag tapno sumingedtayo ken Jehova. Gapuna, ‘agkararagtayo koma a di agressat.’ (1 Tes. 5:17) Sapay koma ta matulongannatayo daytoy a panagadal a mangpatibker iti relasiontayo iti Dios ken iti determinasiontayo a mangannurot kadagiti nalinteg a pagalagadanna. Ken mennamennaentayo met koma dagiti bendision a sagsagrapentayo agsipud ta ni Jehova ti pudpudno nga Ama, Dios, ken Gayyemtayo.