“AGAWIDKA kadagiti kabagiam, ket ipadamagmo kadakuada ti amin a bambanag nga inaramid kenka ni Jehova ken ti panangngaasina kenka,” kinuna ni Jesu-Kristo. Nalabit adda idi ni Jesus idiay Gadara, iti abagatan a daya ti Baybay ti Galilea, ken makisarsarita iti maysa a lalaki a mayat nga agbalin a pasurotna. Ipakita ti sasao ni Jesus a maawatanna ti nainkasigudan a tarigagay ti tao a mangiranud kadagiti kabagianna dagiti makapainteres ken napateg a bambanag.—Mar. 5:19.

Gagangay met ita ti kasta a tarigagay, nupay ad-adda a nabatad dayta iti dadduma a kultura. Isu a no ti maysa ket agbalin nga agdaydayaw iti pudno a Dios a ni Jehova, gagangay a kayatna nga iranud ti baro a pammatina iti kabagianna. Ngem kasanona nga aramiden dayta? Kasanona a madanon ti puso dagiti di manamati a kabagianna—wenno awanan pay ketdi iti pammati? Mangipaay ti Biblia iti positibo ken realistiko a balakad.

Idi umuna a siglo, maysa ni Andres kadagiti nakailasin ken Jesus kas Mesias. Asino ti immuna a nangipadamaganna? “Umuna nasarakan [ni Andres] ti bukodna a kabsat, ni Simon, ket kinunana kenkuana: ‘Nasarakanmi ti Mesias’ (kayatna a sawen, no maipatarus, Kristo).” Kalpasanna, inyam-ammona ni Pedro ken ni Jesus, ket naaddaan ni Pedro iti gundaway nga agbalin nga adalan ni Jesus.—Juan 1:35-42.

Kalpasan ti agarup 6 a tawen, idi agnanaed ni Pedro idiay Joppe, naawis nga agdaliasat nga agpaamianan idiay Cesarea tapno mapan iti balay ni Cornelio, maysa nga opisial ti buyot. Siasino dagiti nadanon ni Pedro a nagtataripnong iti balay? “Ni Cornelio, siempre, sinegseggaanna [ni Pedro ken dagiti kakaduana a nagdaliasat] ket inayabanna a sangsangkamaysa dagiti kabagianna ken nasinged a gagayyemna.” Nangaramid ngarud ni Cornelio iti pamay-an tapno  mangngegan dagiti kabagianna ti mensahe ni Pedro sa impabiangnan kadakuada no awatenda dayta wenno saan.—Ara. 10:22-33.

Ania ti maadaltayo iti wagas a pannakilangen da Andres ken Cornelio iti kakabagianda?

Agpada nga adda panagregget nga inaramidda. Personal nga inyam-ammo ni Andres ti kabsatna a ni Pedro ken ni Jesus, ken inawis met ni Cornelio dagiti kakabagianna tapno mangngeganda ti mensahe ni Pedro. Ngem saan a sisisikap nga immaniobra wenno pinilit da Andres ken Cornelio dagiti kakabagianda nga agbalin a pasurot ni Kristo. Ania ti maadaltayo iti dayta? Nasayaat no tuladentayo ti inaramidda. Mabalin nga iranudtayo ti sumagmamano nga impormasion iti kakabagiantayo ken mangaramidtayo iti pamay-an tapno maammuanda ti kinapudno iti Biblia ken maam-ammoda dagiti kapammatiantayo. Ngem kaskasdi a raementayo ti wayawayada nga agpili ken saantayo a piliten ida. Tapno maammuantayo no kasanotayo a tulongan ida, usigentayo ti kapadasan ti agassawa a taga-Germany a da Jürgen ken Petra.

Nakipagadal ni Petra iti Biblia kadagiti Saksi ni Jehova ken nabautisaran idi agangay. Ni lakayna a Jürgen ket maysa nga opisial ti militar. Idi damo, saan a maragsakan ni Jürgen iti desision ni baketna. Ngem idi agangay, naamirisna nga ikaskasaba dagiti Saksi ti kinapudno a linaon ti Biblia. Isu nga indedikarna met ti biagna ken Jehova ket agserserbi itan kas panglakayen. Ania ti maibalakadna a pamay-an tapno madanon ti puso ti maysa a kabagian a sabali ti relihionna?

Kinuna ni Jürgen: “Saantayo koma a piliten dagiti kabagiantayo wenno gabsuonan ida iti naespirituan a bambanag. Baka ad-adda laeng a dida dumngeg. Nasaysayaat no in-inut ken nataktika ti panangasabatayo kadakuada. Makatulong met no iyam-ammotayo ida kadagiti kapammatiantayo a kasadaranda ken kapadada iti paginteresan. No aramidentayo dayta, mabalin a maguyugoyda a dumngeg iti mensahetayo.”

Dagus a nagtignay ni apostol Pedro ken dagiti kabagian ni Cornelio iti mensahe ti Biblia. Ngem ti dadduma a nakangngeg iti kinapudno idi umuna a siglo kinasapulanda ti ad-adu a panawen tapno makapagdesisionda.

Adda kakabagian ni Jesus a namati kenkuana bayat ti ministeriona. Kas pagarigan, posible a kasinsinna da Santiago ken Juan ket ikitna ti nanangda a ni Salome. Mabalin a maysa ni Salome iti “adu a sabsabali pay a babbai, a nagserserbi kadakuada [ni Jesus ken dagiti apostol] manipud kadagiti sanikuada.”—Luc. 8:1-3.

Nupay kasta, dadduma a miembro ti pamilia ni Jesus ket saan a dagus a namati. Kas pagarigan, nasurok a makatawen kalpasan ti bautismo ni Jesus, naguummong dagiti tattao iti maysa a balay tapno dumngegda kenkuana. “Ngem idi nangngeg dagiti kabagianna ti maipapan iti dayta, rimmuarda tapno tenglenda, ta kinunkunada: ‘Napukawnan ti nakemna.’” Sumagmamano a tiempo kalpasanna, idi nagsasarita dagiti kakabsatna maipapan iti planona a panagdaliasat, saanna a direkta a sinungbatan ida. Apay? Gapu ta dagiti “kakabsatna, iti kinapudnona, saanda a [namati] kenkuana.”—Mar. 3:21; Juan 7:5.

Ania ti maadaltayo iti pannakilangen ni Jesus iti kakabagianna? Saan a nagsakit ti nakemna idi imbagada a napukawnan ti panunotna. Uray kalpasan ti ipapatay ken panagungarna, nangipaay ni Jesus iti  kanayonan a pammaregta iti kakabagianna babaen ti panagparangna ken Santiago a kabsatna. Nalabit daytoy a pasamak ti nangkombinsir ken Santiago ken iti dadduma pay a kakabsat ni Jesus nga isu a talaga ti Mesias. Isu a karamanda iti panagtataripnong dagiti apostol ken ti dadduma pay nga adalan iti maysa a makinngato a siled idiay Jerusalem nga immawat iti nasantuan nga espiritu. Idi agangay, ni Santiago ken ni Judas, a maysa pay a kabsat ni Jesus, naaddaanda kadagiti napapateg a pribilehio.—Ara. 1:12-14; 2:1-4; 1 Cor. 15:7.

Kas idi umuna a siglo, dadduma a kakabagiantayo ita ti sa la umawat iti kinapudno kalpasan ti adu a tawen. Usigentayo ti kapadasan ni Roswitha. Aktibo idi a Romano Katoliko idi nabautisaran ni lakayna idi 1978 kas Saksi ni Jehova. Idi damo, gapu ta napeklan iti pammatina, binusor ni Roswitha ni lakayna. Ngem iti panaglabas ti tawtawen, insardengna ti bumusor ta nausigna a dagiti Saksi ti mangisursuro iti kinapudno. Nagpabautisar ni Roswitha idi 2003. Ania ti nakatignayanna nga agbalbaliw? Uray bumusbusor ni Roswitha, saan a nagsakit ti nakem ni lakayna. Imbes ketdi, binay-anna nga isu a mismo ti makabigbig iti kinapudno. Ania ti maisingasingna a nasayaat nga aramiden? “Dakkel ti maaramidan ti panagan-anus, panagan-anus ken ad-adu pay a panagan-anus.”

Nabautisaran ni Monika idi 1974, ken nagbalin a Saksi dagiti dua nga annakna kalpasan ti agarup 10 a tawen. Nupay ni Hans a lakayna ket saan a bimmusor, sa laeng natignay nga agpabautisar idi 2006. Ania ti maipaayda a balakad? “Agtalinaedka a matalek ken Jehova, ken saanmo nga ikompromiso ti pammatim aniaman ti mapasamak.” Siempre, napateg ti panangipatalgedda ken Hans nga ay-ayatenda. Ken saanda a naawanan iti namnama nga awatennanto met laeng ti kinapudno.

Dineskribir ni Jesus ti mensahe ti kinapudno kas danum a mangted iti biag nga agnanayon. (Juan 4:13, 14) Kayattayo a mabang-aran dagiti kabagiantayo no inumenda ti nalamiis ken nadalus a danum ti kinapudno. Sigurado a ditay kayat a maltotanda gapu iti sobra a danum a mamimpinsan a maipainum kadakuada. Mabalin a mabang-aran wenno maltotanda, depende iti pamay-antayo a mangilawlawag iti pammatitayo. Kuna ti Biblia a “ti puso daydiay nalinteg agmennamenna tapno makasungbat” ken “ti puso daydiay masirib tignayenna ti ngiwatna a mangipakita iti pannakatarus, ket kadagiti bibigna manginayon iti panangguyugoy.” Kasano a mayaplikartayo daytoy a balakad?—Prov. 15:28; 16:23.

Mabalin a kayat ti asawa a babai nga ilawlawag ti pammatina ken lakayna. No “agmennamenna tapno makasungbat,” siaannad a mapilina dagiti ibagana ket maliklikanna ti agsao a sidadarasudos. Dina koma iparikna nga isu la ti umiso wenno nalaing. Mabalin nga agbanag iti bang-ar ken talna no naannad iti ibagana. Kaano a mas relaks ken nalaklakana nga asitgan ni lakayna? Ania dagiti nagduduma a topiko a magusgustuanna a basaen ken pagsaritaan? Interesado kadi iti siensia, politika, wenno isports? Kasano a matignayna ni lakayna nga aginteres iti Biblia iti wagas a maipakitana latta ti panagraem iti rikna ken opinionna? Ti panangutob ti asawa a babai kadagita a saludsod ket makatulong tapno makapagsao ken makapagtignay buyogen ti pannakatarus.

Ti panangdanon iti puso dagiti saan pay a Saksi a kameng ti pamilia ket saan la a basta panangilawlawag kadakuada iti pammatitayo. Ti koma ibagbagatayo ket nabuyogan iti nasayaat a kababalin.

“Inaldaw koma nga iyaplikartayo dagiti prinsipio ti Biblia. Epektibo dayta a pangtukay iti interes ti kabagiantayo, uray no saanna nga admitiren dayta,” inlawlawag ni Jürgen a nadakamat itay. Kasta met ti makuna ni Hans, a nabautisaran agarup 30 a tawen kalpasan a nabautisaran ni baketna. “Napateg ti nasayaat a kababalin dagiti Kristiano tapno makita ti kabagianda ti nasayaat nga epekto ti kinapudno iti biagda.” Makita koma dagiti kabagiantayo nga uray naiduma ti pammatitayo, agpaay a pagsayaatan dayta imbes a pagdaksan.

Nangipaay ni apostol Pedro iti nakapatpateg a balakad kadagiti assawa a babbai nga addaan iti di manamati nga assawa: “Agpasakupkayo kadagiti bukodyo nga assawa, tapno iti kasta, no ti asinoman saan a natulnog iti sao, mabalin a magun-od ida nga awan ti sao babaen iti kababalin dagiti assawada a babbai, agsipud ta nasaksianda ti nadalus a kababalinyo agraman ti nauneg a panagraem. Ket ti arkosyo saan koma a daydiay makinruar a panangsallapid iti buok ken  ti panangikapet kadagiti balitok a pagarkos wenno ti panangikawes kadagiti makinruar a kawes, no di ket isu koma ti nalimed a kinatao ti puso iti di agrupsa a pagan-anay ti naulimek ken naalumamay nga espiritu, nga addaan dakkel a pateg iti imatang ti Dios.”—1 Ped. 3:1-4.

Insurat ni Pedro a mabalin a maguyugoy ti asawa a lalaki babaen ti nasayaat a kababalin ni baketna. Dayta a Nainkasuratan a prinsipio ti pinampanunot ni Christa isu a sipud idi nabautisaran idi 1972, ikagkagumaanna a tignayen ti puso ni lakayna babaen ti nasayaat a kababalinna. Nupay nakipagadal idi ni lakayna kadagiti Saksi, saanna nga impapuso ti kinapudno. Nakatabuno metten kadagiti Nakristianuan a gimong ken nakalanglangennan dagiti kakabsat iti kongregasion. Nupay kasta, rinaem dagiti kakabsat ti kalinteganna nga agpili. Ania ti inaramid ni Christa tapno madanonna ti puso ni lakayna?

Kinunana: “Determinadoak nga agtalinaed iti dalan ni Jehova. Kasta met, ikagumaak a kombinsiren ni lakayko nga ‘awan ti sao’ babaen ti nasayaat a kababalinko. No la ket awan ti maikompromiso a prinsipio ti Biblia, aramidek ti amin tapno mapagustuak ti kayatna. Ken siempre, raemek ti wayawayana nga agpili ken impabiangko ken Jehova ti bambanag.”

Ipakita ti kapadasan ni Christa a nakapatpateg ti pannakibagay. Pinagtalinaedna ti makapabileg a naespirituan a rutinana, a pakairamanan ti regular a pannakigimong ken ti aktibo a pannakiramanna iti ministerio. Ngem mannakaawat met isuna, nga ammona a karbengan ni lakayna ti maipaayan iti ayat, panawen, ken atensionna. Agbalintay koma a mannakibagay ken mannakaawat iti pannakilangentayo kadagiti di manamati a kabagiantayo. “Ta iti tunggal banag adda naituding a tiempo,” kuna ti Biblia. Karaman iti dayta ti tiempo a pannakikadua iti pamiliam, nangruna iti asawam, a ditay kapammatian. Agresulta dayta iti nasayaat a komunikasion. Ipakita dagiti kapadasan a no nasayaat ti komunikasion, saan a makarikna iti liday, pannakabaybay-a, ken imon dagiti di manamati a miembro ti pamilia.—Ecl. 3:1.

“Napateg nga ipakitatayo nga ay-ayatentayo dagiti kameng ti pamiliatayo ken ikararagantayo ida,” kuna ni Holger, a ti amana ket nabautisaran 20 a tawen kalpasan ti bautismo ti dadduma a miembro ti pamiliana. Innayon ni Christa a ‘saanto a pulos maawanan iti namnama nga awatento met laeng ni lakayna ti kinapudno ket dumasig ken Jehova.’ Kanayon koma a positibo ti panangmatmattayo kadagiti di manamati a kabagiantayo, ken ditay maawanan iti namnama.

Ti koma kalattayo ket mapagtalinaed a nasinged ti relasiontayo kadagiti kabagiantayo, maikkantay ida iti gundaway a mangbigbig iti kinapudno, ken madanontay ti pusoda babaen ti mensahe ti Biblia. Ken iti amin a banag, makilangentay koma kadakuada “buyogen ti naalumamay a kababalin ken nauneg a panagraem.”—1 Ped. 3:15.