IDI pumanaw ti ili ti Dios manipud Babilonia idi 537 B.C.E., maseknan ni Jehova iti dalanda nga agpa-Jerusalem. Imbagana kadakuada: “Wayaanyo ti dalan dagiti umili. Gaburanyo, gaburanyo ti kangrunaan a kalsada. Ikkatanyo iti batbato.” (Isa. 62:10) Ania ti nalabit inaramidda kas panagtulnog iti daytoy a bilin? Mabalin nga adda dagiti immun-una tapno tarimaanenda ti kalsada, a nalabit inikkatda dagiti makasali a batbato ken ginaburanda dagiti lasonglasong a paset. Nakatulong la ketdi dayta iti naannayas a panagdaliasat dagiti kakabsatda nga agsubli iti dagada.

Nayarig iti dayta a kalsada ti dalantayo a mangragpat iti naespirituan a kalattayo. Kayat ni Jehova nga awan ti pakasingaantayo iti ilalasattayo iti dayta a dalan. Iparegta kadatayo ti Saona: ‘Palanasem ti turongen ta sakam, ket amin a daldalanmo maipasdek koma a sititibker [wenno, agbanagto iti naimbag].’ (Prov. 4:26) Agtutuboka man wenno saan, magunggonaanka iti daytoy a balakad ti Dios.

Mabalin a nangnangngegmon a naibaga maipapan iti maysa a tin-edyer: ‘Adayonto ti madanon daytoy nga agtutubo.’ Kaaduanna a dagiti agtutubo ket nasalun-at, nasiglat, naalibtak nga agpanunot, ken determinado nga agballigi. Umiso ti kuna ti Biblia: “Ti pintas dagiti agtutubo a lallaki isu ti bilegda.” (Prov. 20:29) No usaren ti maysa nga agtutubo ti talento wenno pigsana nga agserbi ken Jehova, maragpatna dagiti naespirituan a kalatna ken maaddaan iti pudpudno a kinaragsak.

Ngem kas pagaammotayo, ap-apresiaren met dagiti tattao ti abilidad dagiti agtutubotayo. No nalaing iti eskuelaan ti agtutubo a Saksi, mabalin a paregtaen isuna ti guidance counselor, mannursuro, wenno kaeskuelaanna nga agkolehio tapno agballigi iti daytoy a lubong. Wenno mabalin nga adda mangkombinsir iti maysa nga agtutubo a Saksi a nalaing iti isports a pagbalinenna dayta a karerana. Naipasangoka kadin iti  kasta a situasion, wenno adda kadi am-ammom a kasta ti kasasaadna? Ania ti makatulong iti maysa a Kristiano tapno makaaramid iti nainsiriban a desision?

Makatulong dagiti prinsipio ti Biblia iti panagsagana ti maysa a tao nga agdaliasat iti kasayaatan a dalan nga agturong iti biag. “Lagipem, itan, ti Naindaklan a Namarsuam kadagiti aldaw ti kinaagtutubom,” kuna ti Eclesiastes 12:1. Kasano ti kasayaatan a ‘pananglagipmo iti Naindaklan a Namarsua,’ ken kasano met a maaramidan dayta ti maysa nga agtutubo?

Panunotem ti kapadasan ni Eric * nga agnanaed iti Abagatan nga Africa. Magusgustuanna ti soccer. Idi agtawen iti 15, napili kas maysa kadagiti player a mangibagi iti national team. Kaipapanan dayta a mapanto idiay Europa para iti kasayaatan a training, a nalabit mangiturong iti panagbalinna a propesional a soccer player. Ngem kasano a nakatulong kenkuana ti balakad a ‘lagipem ti Naindaklan a Namarsua’? Ken ania ti maadaltayo iti kapadasanna?

Bayat nga ages-eskuela ni Eric, nangrugi a makipagadal iti Biblia kadagiti Saksi ni Jehova. Naammuanna ngarud a naan-anayto a risuten ti Namarsua dagiti problema ti tao. Nabigbig ni Eric a napateg nga usarenna ti tiempo ken pigsana tapno maaramidna ti pagayatan ti Dios. Gapu iti dayta, saannan nga intuloy ti ambisionna nga agbalin a propesional nga umaayam. Nagpabautisar ken impamaysana ti naespirituan a bambanag. Idi agangay, nagbalin a ministerial nga adipen ken naawis nga agadal iti Bible School for Single Brothers.

Mabalin a nalatak ken nabaknang koman ni Eric no intuloyna ti nailubongan nga ambisionna. Ngem nabigbigna nga agpayso ti prinsipio ti Biblia a: “Ti napapateg a bambanag ti nabaknang isuda ti nabileg nga ilina, ket iti ar-arapaapna kaslada mangsalaknib a pader.” (Prov. 18:11) Wen, ti seguridad nga ipagarup ti maysa a tao a magun-odna babaen ti kinabaknang ket arapaap laeng. Kasta met, dagidiay determinado a bumaknang masansan a ‘salputenda ti intero a bagbagida iti adu nga ut-ot.’—1 Tim. 6:9, 10.

Maragragsakan ti adu nga agtutubo ken natalged ti riknada iti amin-tiempo a panagserbida. Kuna ni Eric: “Timmiponak iti maysa a dakkel a ‘team’ dagiti amin-tiempo nga ad-adipen ni Jehova. Dayta ti kasayaatan a team a pakikaduaak, ket agyamyamanak ken Jehova ta impakitana ti kakaisuna a dalan a mangiturong iti pudpudno a kinaragsak ken balligi.”

Komusta met iti biangmo? Imbes a rumagpatka kadagiti nailubongan nga ambision, mabalinmo kadi nga isagana ti “daldalanmo” iti sanguanan ni Jehova babaen ti panagbalinmo a payunir?—Kitaen ti kahon a “ Nagun-odna ti Bambanag a Di Maipaay ti Unibersidad.”

Idi bimmisita ti maysa a pagassawaan iti sanga nga opisina ti Estados Unidos, nakitada a nakaragragsak dagiti Bethelite. Insurat ti asawa a babai idi agangay: “Nabigbigmi nga awan unay ti ar-aramidenmi.” Inkeddengda ngarud nga usaren ti ad-adu a tiempo ken pigsada nga agserbi ken Jehova.

Idi damo, marigatan dagitoy nga agassawa a mangaramid kadagiti panagbalbaliw. Ngem maysa nga aldaw, inutobda ti teksto para iti dayta nga aldaw a masarakan iti Juan 8:31: “No agtalinaedkayo iti saok, pudno a dakayo dagiti adalak.” Napanunotda: “Saan ngarud a sayang ti aniaman a panagsakripisiomi a mangpasimple iti biagmi.” Inlakoda ti dakkel a balayda, imbatida laeng dagiti bambanag a kasapulanda, sa immakarda iti kongregasion nga agkasapulan iti tulong. Payunirda itan, ngem tumultulongda pay nga agibangon kadagiti Kingdom Hall ken agbolboluntarioda kadagiti kombension distrito. Ania ti panagriknada? “Nakaragragsakkami uray simple laeng ti biagmi—ti panangaramid iti iparparegta ti organisasion ni Jehova nga aramidentayo.”

Insurat ni Solomon: “[Dagita] matam, rebbeng a kumitada a sililinteg iti sanguanan, wen, dagita bukodmo nga agsilnasilnag a mata rebbeng a kumitada a sililinteg iti sanguanam.” (Prov. 4:25) Kas iti drayber a nakapokus ti atensionna iti kalsada, masapul met a liklikantayo dagiti makasinga iti panangaramidtayo kadagiti naespirituan a kalat ken panangragpat kadagita.

Ania a kalat ti mabalinmo a ragpaten? Mabalinmo ti sumrek iti amin-tiempo a panagserbi. Mabalinmo met ti agserbi iti maysa a kabangibang a kongregasion nga addaan iti nalawa a teritoria ken agkasapulan  iti eksperiensiado a manangaskasaba. Wenno mabalin nga adu ti aktibo nga agibumbunannag iti maysa a kongregasion, ngem kurang dagiti agserserbi a panglakayen ken ministerial nga adipen. Mabalinmo kadi ti tumulong iti maysa kadagita a pamay-an? Apay a dika makisarita iti manangaywan iti sirkito tapno maammuam no mabalinmo ti tumulong? No kayatmo ti agserbi iti adayo a lugar, mabalinmo ti agdamag no ania dagiti kongregasion nga agkasapulan iti tulong. *

Subliantayo ti eksena a nailadawan iti Isaias 62:10. Mabalin nga adu a panagregget ti inaramid ti dadduma a Judio tapno malantag ken maikkat dagiti makasali iti panagdaliasat ti ili ti Dios nga agturong iti dagada. Ikagumaam a ragpaten dagiti naespirituan a kalatmo, ket dika sumuksuko. Maragpatmo dagita iti tulong ti Dios. Itultuloymo ti agkiddaw ken Jehova iti sirib bayat nga ik-ikkatem dagiti makasali iti dalanmo. Inton agangay, makitam a tultulongannaka a ‘mangpalanas iti turongen dagita sakam.’—Prov. 4:26.