DIMMAKKEL ni Katherine iti Estados Unidos ket nabautisaran kas Saksi ni Jehova idi agtawen iti 16. Napinget a mangasaba ngem manmano laeng dagiti dumngeg iti lugar a pangikaskasabaanna iti mensahe ti Pagarian. Kinunana: “Binasak ti kapkapadasan dagidiay nagkararag iti Dios a mangibaon koma iti tumulong kadakuada a mangam-ammo iti Dios. Kayatko ti makasarak iti kasta a tao, ngem awan met ti masarakak.”

Kalpasan ti adu a tawen a panangaskasaba ni Katherine iti lugarda, napanunotna ti umakar iti lugar nga ad-adu ti dumngeg iti mensahe ti Pagarian. Ngem pinampanunotna no kabaelannanto dayta. Namnaminsan pay laeng a nayadayo iti pamiliana—iti uneg laeng ti dua a lawas—ket inaldaw idi a mail-iliw. Nupay kasta, napigpigsa ti tarigagayna a tumulong kadagiti agbirbirok ken Jehova. Kalpasan a nakapili iti lugar nga umakaranna, nagsurat iti sanga nga opisina iti Guam ket naipaayan iti impormasion a kasapulanna. Isu nga idi Hulio 2007, iti edad a 26, immakar ni Katherine iti Saipan, maysa nga isla iti Taaw Pacifico, agarup 10,000 kilometro (6,000 milia) manipud pagtaenganna. Ania ti resulta ti iyaakarna?

Di nagbayag kalpasan a nakadanon ni Katherine iti baro a kongregasionna, naam-ammona ni Doris nga agtawen iti agarup 45 ken mayat a makipagadal iti Biblia. Idi nalpasdan ti umuna a tallo a kapitulo ti libro nga Isursuro ti Biblia, madanagan ni Katherine. “Nakalalaing nga estudiante ni Doris, ket diak kayat a paayen,” inyestoriana. “Diak pay napadasan ti naaddaan iti regular nga iyad-adalan iti Biblia isu a panagriknak, kasapulanna ti nalalaing a kabsat a mangyadal kenkuana, nalabit maysa a kaedadna.” Inkararag ni Katherine ken Jehova a makabirok koma iti maitutop a kabsat a pangyawatanna ken Doris. Isu nga inkeddengna nga ibaga ken Doris ti planona.

“Sakbay pay a maibagak dayta,” kuna ni Katherine, “imbaga ni Doris nga adda problema a kayatna nga iyuman. Idi naibaganan, inyestoriak kenkuana no kasano a tinulongannak ni Jehova idi naaddaanak iti kasta met laeng a problema. Nagyaman kaniak.” Kalpasanna, kinuna ni Doris ken ni Katherine: “Us-usarennaka ni Jehova a tumulong kaniak. Idi damo nga umayka iti pagtaengak, adun nga oras a basbasaek ti Bibliak. Agsangsangitak a mangikarkararag  iti Dios a mangibaon koma iti tumulong kaniak tapno maawatak ti Biblia. Idi kuan, nagtuktokka metten iti ridawko. Sinungbatan ni Jehova ti kararagko!” Aglulua ni Katherine bayat nga es-estoriaenna ti napasamak. Kinunana: “Ti imbaga ni Doris kaniak ket sungbat ti kararagko. Imparikna ni Jehova a kabaelak nga itultuloy ti panangyadalko.”

Nabautisaran ni Doris idi 2010, ket addaan itan iti sumagmamano nga iyad-adalan iti Biblia. Kuna ni Katherine: “Anian a yamanko ta natungpal met laengen ti nabayag nga arapaapko a makatulong iti napasnek a tao nga agbalin nga adipen ni Jehova!” Agserserbi itan ni Katherine kas special pioneer iti isla ti Kosrae iti Pacifico.

Nasurok a 100 a kakabsat a lallaki ken babbai (agedad iti 19 agingga’t 79) ti agserserbi kadagiti isla iti Micronesia nga addaan iti dakdakkel a panagkasapulan. Ti rikna dagitoy a nareregta a trabahador ket inyebkas ni Erica nga immakar iti Guam idi 2006 idi agtawen iti 19. Kinunana: “Nakaragragsak ti agpayunir iti lugar a mawaw dagiti tattao iti kinapudno. Agyamanak unay ken Jehova iti panangtulongna kaniak a sumrek iti daytoy a kita ti panagserbi. Daytoy ti kasayaatan a biag!” Sirarag-o itan nga agserserbi ni Erica kas special pioneer iti Ebeye iti Marshall Islands. Siempre, adda dagiti karit iti panagserbi iti sabali a pagilian. Usigentayo ti tallo kadagita ken kitaentayo no kasano a napagballigian dagita dagiti immakar iti Micronesia.

Kasasaad ti biag. Idi nakadanon ni Simon nga agtawen iti 22 iti Palau idi 2007, nakitana a sinsilio laeng ti mateggedanna sadiay no idilig iti sueldona idiay England. “Masapul a sursuruek a dagiti laeng kasapulak ti gatangek. Ita, piliek a naimbag no ania a taraon ti gatangek, ken agsursorak tapno maammuak ti kalakaan. No adda madadael nga alikamen, bumirokak iti segunda mano a piesa ket agpatulongak iti makaammo a mangtarimaan iti dayta.” Ania ti epektona ken Simon ti simple a panagbiag? Kinunana: “Dayta ti timmulong kaniak a mangammo no ania a talaga ti nasken ken no kasano ti agbiag a simple. Napaneknekak iti kapadasak a tultulongannak ni Jehova. Bayat ti pito a tawen a panagserbik ditoy, kanayon nga adda pagtaraon ken pagturogak.” Wen, supsuportaran ni Jehova dagiti addaan iti simple a biag gapu ta iyun-unada ti Pagarian.—Mat. 6:32, 33.

Pannakailiw. Kuna ni Erica: “Nasingedak iti pamiliak, ket madanaganak amangan no maapektaran ti ministeriok gapu iti iliwko.” Ania ti inaramidna tapno maisaganana ti bagina? “Sakbay nga immakarak, binasak dagiti artikulo iti Pagwanawanan maipapan iti panangdaer iti iliw. Daytoy ti nangisagana iti pusok a mangsango iti dayta a karit. Iti maysa nga artikulo, impasigurado ti maysa nga ina iti balasangna nga aywanan isuna ni Jehova. Kunana: ‘Nasaysayaat ti panangaywan ni Jehova kenka ngem iti  panangaywanko.’ Dayta ti talaga a nangparegta kaniak.” Ni Hannah ken ni lakayna a Patrick ket agserserbi iti Majuro iti Marshall Islands. Nadaeran ni Hannah ti iliwna babaen ti panangipokusna iti atensionna kadagiti kakabsat iti kongregasion. Kinunana: “Kanayon nga agyamyamanak ken Jehova gapu iti sangalubongan a panagkakabsattayo. Pamiliak metten ida. No saan a gapu iti naayat a suportada, saanak koma a nakapagserbi iti lugar nga addaan dakdakkel a panagkasapulan.”

Pannakibagay. “No umakarka iti sabali a pagilian, gistay baro kenka ti amin,” imbaga ni Simon. “Kailiwko ti agpakatawa a maawatan ti amin.” Kuna ni Erica: “Idi damo, mariknak a kasla nakapimpimanak, ngem dayta ti nakatulong tapno mausigko ti motibok nga immakar. Saanak nga immakar para iti pagimbagak no di ket para ken Jehova.” Innayonna: “Idi agangay, naaddaanakon kadagiti nasayaat a gagayyem, ket agyamyamanak iti dayta.” Inkagumaan ni Simon a sursuruen ti lengguahe a Palauan. Gapu iti dayta, simminged kadagiti kakabsat iti immakaranna a lugar ket ipatpategda isuna. (2 Cor. 6:13) Wen, no agkakadua nga agtrabaho dagiti kassangpet a kakabsat ken dagiti lokal a kakabsat, suminged ti panaggagayyemda. Ania pay ti dadduma a gunggona dagidiay situtulok nga agsaksakripisio iti lugar nga addaan dakdakkel a panagkasapulan?

Kinuna ni apostol Pablo: “Ti agmula a siwawadwad aganinto met a siwawadwad.” (2 Cor. 9:6) Ti prinsipio iti daytoy a teksto ket agaplikar kadagidiay mangpalpalawa iti ministerioda. Ania dagiti ‘siwawadwad nga an-anienda’ iti Micronesia?

Adu pay laeng ti mabalin a mayadalan iti Biblia idiay Micronesia, ket nabatad a makita ti irarang-ay dagidiay agad-adal ken mangan-annurot iti kinapudno iti Sao ti Dios. Mangaskasaba met da Patrick ken Hannah iti Angaur, maysa a bassit nga isla a pagnanaedan ti 320 a tattao. Kalpasan ti panangasabada sadiay iti dua a bulan, adda naam-ammoda nga agsolsolo nga ina. Dagus a nagpayadal iti Biblia daytoy nga ina, impapusona ti kinapudno, ken nangaramid iti adu a panagbalbaliw iti biagna. Kuna ni Hannah: “Kalpasan ti tunggal panangyadalmi kenkuana, inton agawidkamin a nakabisikleta, agkinnitakami ken lakayko sa ibagami: ‘Pagyamanan Jehova!’” Innayon ni Hannah: “Ammok nga adu ti mabalin nga usaren ni Jehova a mangyadani iti daytoy a babai kenkuana, ngem gapu ta agserserbikami iti lugar nga addaan dakdakkel a panagkasapulan, nabirokan ken natulonganmi daytoy a kimmarnero a tao a mangammo ken Jehova. Daytoy ti maysa kadagiti kasayaatan a kapadasanmi iti intero a biagmi!” Kas kinuna ni Erica, “no adda tao a matulongam a mangammo ken Jehova, di mailadawan ti mariknam a rag-o!”

Adu a lugar ti agkasapulan pay iti ad-adu a manangaskasaba iti Pagarian. Kayatmo met kadi ti umakar kadagiti kasta a lugar? Ikararagmo ken Jehova a pabilgenna ti tarigagaymo a mangpalawa iti ministeriom. Ibagam met dayta kadagiti panglakayen iti kongregasionyo, iti manangaywan iti sirkito, wenno kadagidiay nakapagserbin iti lugar nga agkasapulan iti tulong. No adda planom, agsuratka iti sanga nga opisina a makinsakup iti lugar a kayatmo a pagserbian para iti kanayonan nga impormasion. * Nalabit maysakanto kadagiti rinibu a kakabsat a lallaki ken babbai—agtutubo ken nataengan, naasawaan wenno saan—a situtulok nga agsaksakripisio ken ‘agan-ani a siwawadwad.’