1, 2. Kasano a makikomkomunikar ni Jehova kadagiti adipenna?

ITI intero a pakasaritaan ti Biblia, adda dagiti indibidual nga inwanwan ni Jehova iti nadumaduma a pamay-an. Sumagmamano kadakuada ti kinasarita ti Dios babaen iti anghel, wenno babaen iti sirmata wenno tagtagainep, nga impalgakna kadakuada ti mapasamak iti masanguanan. Adda dagidiay inikkan ni Jehova iti espesipiko nga annongen. (Num. 7:89; Ezeq. 1:1; Dan. 2:19) Naipaayan met iti instruksion ti dadduma babaen kadagiti tattao a pannakabagi ni Jehova iti naindagaan a paset ti organisasionna. Aniaman ti pamay-an ni Jehova a mangipaay iti saona, nabendisionan dagidiay nagtulnog kadagiti instruksionna.

² Iwanwanwan ni Jehova dagiti adipenna ita babaen ti Biblia, ti nasantuan nga espirituna, ken ti kongregasion. (Ara. 9:31; 15:28; 2 Tim. 3:16, 17) Nakalawlawag dagiti panangiwanwan a maipapaay kadatayo a kasla aktual a ‘makangkangngegtayo iti sao iti likudantayo a kunkunana: “Daytoy ti dalan. Magnakayo iti dayta.”’ (Isa. 30:21) Arigna iyal-allatiw met ni Jesus kadatayo ti timek ni Jehova bayat nga iturturongna ti kongregasion babaen ti “matalek ken masirib nga adipen.” (Mat. 24:45) Masapul nga ipangagtayo a naimbag dagiti panangiwanwan ken instruksion manipud ken Jehova gapu ta agpannuray ti agnanayon a biagtayo iti panagtulnogtayo kadagita.—Heb. 5:9.

3. Ania ti mabalin a mangsinga iti panagtulnogtayo iti panangiwanwan ni Jehova? (Kitaen ti ladawan iti rugi ti artikulo.)

 ³ Determinado ni Satanas a Diablo a manglapped iti mangispal-biag a panangiwanwan nga ipapaay ni Jehova. Kasta met, mabalin a singaen ti ‘nagulib a pusotayo’ ti panangsurottayo kadagiti instruksion ni Jehova. (Jer. 17:9) Usigentayo ngarud no kasanotayo a mapagballigian dagiti lapped iti panagimdengtayo iti timek ti Dios. Pagsasaritaantayo met no kasano a ti nasinged a pannakikomunikartayo ken Jehova saluadanna ti relasiontayo kenkuana iti aniaman a kasasaad.

4. Kasano nga im-impluensiaan ni Satanas ti pampanunot dagiti tattao?

⁴ Agiwarwaras ni Satanas kadagiti di umiso nga impormasion ken makaallilaw a propaganda tapno impluensiaanna ti pampanunot dagiti tattao. (Basaen ti 1 Juan 5:19.) Malaksid iti nayimprenta a material, maisaksaknap iti intero a daga dagita nga impormasion babaen iti radio, TV, ken Internet—uray kadagiti nasulinek a luglugar. Nupay mabalin a makapainteres dagita, masansan nga itantandudoda ti kababalin ken pagalagadan a maisalungasing kadagiti pagalagadan ni Jehova. (Jer. 2:13) Kas pagarigan, pagparparangen ti media ken industria ti paglinglingayan nga awan pagdaksan ti panagasawa dagiti agkasekso, ket ipapan ti adu a tattao nga istrikto unay ti Biblia maipapan iti homoseksualidad.—1 Cor. 6:9, 10.

5. Ania ti aramidentayo tapno saantay a mayayus kadagiti propaganda ni Satanas?

⁵ Ania ti aramiden dagiti mangay-ayat kadagiti pagalagadan ti Dios tapno saanda a mayayus iti nakaad-adu a propaganda ni Satanas? Kasano a mailasinda ti naimbag ken dakes? ‘Babaen ti panagaluadda maitunos iti sao [ti Dios]’! (Sal. 119:9) Naglaon ti naisurat a Sao ti Dios iti napateg a panangiwanwan a makatulong iti panangilasintayo iti pudno nga impormasion ken iti makaallilaw a propaganda. (Prov. 23:23) Nagadaw ni Jesus iti Kasuratan idi kinunana: “Ti tao agbiag . . . iti tunggal sao a rumrummuar iti ngiwat ni Jehova.” (Mat. 4:4) Masapul a sursuruentayo nga iyaplikar iti biagtayo dagiti prinsipio ti Biblia. Kas pagarigan, nabayag pay sakbay nga isurat ni Moises ti linteg ni Jehova maipapan iti pannakikamalala, ammon ni agtutubo a Jose a basol dayta iti Dios. Dina man la pinanunot a sukiren ni Jehova idi ginargari ti asawa ni Potifar. (Basaen ti Genesis 39:7-9.) Nupay maulit-ulit a kasta, pinili ni Jose a denggen ti timek ni Jehova imbes a ti timek dayta a babai. Tapno mailasintayo ti umiso ken di umiso, napateg nga imdengantayo ti timek ni Jehova ken ditay imdengan ti awan sardayna ken umarimbangaw a propaganda ni Satanas.

6, 7. Ania ti masapul nga aramidentayo tapno maliklikantayo ti dakes a balakad ni Satanas?

⁶ Napno ti lubong kadagiti makariro a narelihiosuan a sursuro ken doktrina isu nga ipagarup ti adu nga awan mamaayna ti panangbirok iti pudno a relihion. Nupay kasta, pinagbalin ni Jehova a nakalawlawag ti panangiwanwanna kadagidiay mayat nga umawat  iti dayta. Masapul nga ikeddengtayo no siasino ti imdengantayo. Yantangay gistay imposible a mapaggiddantayo nga imdengan ti dua a timek, masapul nga ‘ammotayo ti timek’ ni Jesus ken imdengantayo dayta. Isu ti dinutokan ni Jehova a mangaywan kadagiti karnerona.—Basaen ti Juan 10:3-5.

⁷ “Ipangagyo no ania ti mangmangngegyo,” kuna ni Jesus. (Mar. 4:24) Nalawag ken umiso ti balakad ni Jehova, ngem masapul nga ipangag ken umimdengtayo babaen ti panangisaganatayo iti pusotayo nga umawat iti dayta. No ditay agannad, amangan no ti dakes a balakad ni Satanas ti im-imdengantayo imbes a ti naayat a balakad ti Dios. Dimo koma ipalubos a dagiti nailubongan a musika, video, pabuya iti TV, libro, kakadua, edukador, ken dagiti makunkuna nga eksperto ti mangkontrol iti biagmo.—Col. 2:8.

8. (a) Kasano a ti pusotayo pagbalinennatayo a nalaklaka a gundawayan ni Satanas? (b) Ania ti mapasamak kadatayo no ditay ikankano dagiti pagilasinan ti peggad?

⁸ Ammo ni Satanas nga adda pagannayasantayo nga agbasol. No sulisogennatayo a mangpagusto iti dayta, mabalin a marigatantayo nga agtalinaed a nasungdo ken Jehova. (Juan 8:44-47) Kasanotayo a mapagballigian daytoy? Usigem ti kasasaad ti maysa a tao a nagbalin nga okupado unay iti ragragsak agingga a nakaaramid iti dakes nga impagarupna a dina pulos maaramid. (Roma 7:15) Kasano a napasamak dayta? Nalabit in-inut a dinan ikabkabilangan ti timek ni Jehova. Mabalin a saanna a nadlaw dagiti pagilasinan nga agpegpeggad ti pusona wenno inggagarana a di inkankano dagita. Kas pagarigan, nalabit saanen nga agkarkararag, manmanon a mangasaba, wenno nangrugin nga aglangan kadagiti gimong. Nagbanaganna, timmulok iti tarigagayna ket inaramidna ti ammona a dakes. Maliklikantayo dayta a nadagsen a basol no alertotayo iti aniaman a pagilasinan ti peggad ken dagus nga ilintegtayo ti bambanag. No im-imdengantayo ti timek ni Jehova, ditay denggen ti aniaman a kapanunotan dagiti apostata.—Prov. 11:9.

9. Apay a nagpateg a nasapsapa a mailasintayo ti pagannayasantayo nga agbasol?

⁹ Mabalin a masalbar ti biag ti maysa no nasapsapa a matakuatan ti sakitna. Umasping iti dayta, saantayo a maisagmak no dagus a mailasintayo dagiti pagannayasan a mangituggod kadatayo nga agbasol. Ket apaman a matakuatantayo ti kasta a pagannayasan, nainsiriban no dagus nga agtignaytayo, sakbay a ‘matiliwnatayo a sibibiag [ni Satanas] maipaay iti pagayatanna.’ (2 Tim. 2:26) Ania ti rumbeng nga aramidentayo no madlawtayo a naiduman ti pampanunot ken tarigagaytayo kadagiti kalikaguman ni Jehova? Madagdagus koma nga agpaiwanwantayo kenkuana, dumngegtayo iti balakadna, ken naimpusuan nga  ipangagtayo isuna. (Isa. 44:22) Laglagipentayo a no saan a nainsiriban ti desision ti maysa, mabalin a sagabaenna dagiti nakalkaldaang a resulta uray nakapagsublinton ken Jehova. Isu nga adayo a nasaysayaat no agtignaytayo a dagus tapno ditay makaaramid kadagiti nadagsen a basol!

10, 11. (a) Ania dagiti pagilasinan ti kinapannakkel? (b) Ania a leksion ti masursurotayo iti panagrebelde da Kore, Datan, ken Abiram?

¹⁰ Masapul a laglagipentayo a mabalinnatayo nga iyadayo ti pusotayo manipud ken Jehova. Kas pagarigan, baka agbalintayo a napannakkel ken naagum. Dagitoy a kababalin singaenda ti panagdengngegtayo iti timek ni Jehova ken isagmaknatayo. Ti napannakkel a tao ket nangato ti panangmatmatna iti bagina. Nalabit mariknana nga adda karbenganna a mangaramid iti aniaman a kayatna ken dina kayat nga adda mangibaga iti aramidenna. Isu a mabalin a mariknana a saanna a kasapulan ti panangiwanwan ken balakad dagiti padana a Kristiano, dagiti panglakayen, wenno uray pay ketdi ti organisasion ti Dios. Para iti kasta a tao, kasla arasaas laengen ti timek ni Jehova.

¹¹ Bayat ti panagdaliasat dagiti Israelita idiay let-ang, nagrebelde da Kore, Datan, ken Abiram iti autoridad da Moises ken Aaron. Gapu ta napannakkel dagitoy a rebelde, nagaramidda iti bukodda nga urnos iti panagdayaw ken Jehova. Ania ti inaramid ni Jehova? Pinapatayna ida. (Num. 26:8-10) Adda nakapatpateg a leksion a masursurotayo iti daytoy a salaysay: Mangituggod iti didigra ti panagrebelde ken Jehova. Laglagipentayo met a ti “panagpannakkel adda iti sakbay ti pannakarpuog.”—Prov. 16:18; Isa. 13:11.

12, 13. (a) Mangted iti pagarigan no kasano a ti kinaagum ket mangituggod iti panagbasol. (b) Ilawlawag no kasano nga alisto a dumakkel ti kinaagum no saan a makontrol.

¹² Usigentayo met ti kinaagum. Ti naagum a tao masansan nga aramidenna ti kaykayatna ken dina ikabkabilangan dagiti pagalagadan ni Jehova. Idi immimbag ti kukutel ni Naaman a panguluen ti buyot ti Siria, nangited kadagiti sagut ken ni propeta Eliseo, ngem saan nga inawat ti propeta dagita. Nupay kasta, kayat ti katulonganna a ni Gehazi a tagikuaen dagita ket napanunotna: “Kas sibibiag ni Jehova, agtarayakto a sumurot [ken Naaman] ket mangalaak kenkuana iti maysa a banag.” Kinamatna ni Naaman a saan nga ammo ni Eliseo ket nagulbod ken dimmawat iti “maysa a talento a pirak ken dua a pagsukatan a kawes.” Ania ti napasamak ken Gehazi gapu iti kinaagumna ken iti panagulbodna iti propeta ni Jehova? Kimpet kenkuana ti kukutel ni Naaman!—2 Ar. 5:20-27.

¹³ Mabalin a mangrugi ti kinaagum iti bassit laeng a tarigagay, ngem no saan a makontrol, alisto a dumakkel agingga a daytan ti mangdominar iti kababalin ti maysa a tao. Nabatad daytoy iti salaysay ti Biblia maipapan ken Acan. Kinuna ni Acan: “Idi nakakitaak iti tengnga ti samsam iti maysa nga opisial a kawes manipud Sinar, napintas, ken dua gasut a siklo a pirak ken maysa a barra a balitok, a limapulo a siklo ti dagsenna, iti kasta tinarigagayak ida, ket innalak ida.” Imbes nga iwaksi ni Acan ti dakes a tarigagayna, siaagum a tinakawna dagita ken inlemmengna iti toldana. Idi naipalgak ti dakes nga inaramid ni Acan, imbaga ni Josue a mangyegto ni Jehova iti didigra kenkuana. Iti dayta met la nga aldaw, naub-ubor ni Acan ken ti pamiliana agingga a natayda. (Jos. 7:11, 21, 24, 25) Posible met nga agbalintayo a naagum. Ngarud, ‘agaluadtayo iti tunggal kita ti kinaagum.’ (Luc. 12:15) Nupay makapanunottayo no dadduma kadagiti di nadayaw wenno immoral a bambanag, masapul a kontrolentayo ti panunottayo tapno saan a tumanor dagiti dakes a tarigagay a mangituggod kadatayo nga agbasol.—Basaen ti Santiago 1:14, 15.

14. Ania ti aramidentayo no madlawtayo nga agannayastayo nga agpannakkel wenno agbalin a naagum?

¹⁴ Ti panagpannakkel ken kinaagum ket  agpadpada a mangiturong iti didigra. No sipapanunottayo iti pagbanagan ti dakes nga aramid, malabanantayo dagiti dakes a pagannayasan a mangpakapsut iti panangdengngegtayo iti timek ni Jehova. (Deut. 32:29) Iti Biblia, saan laeng nga ibaga ti pudno a Dios no ania ti umiso no di ket ilawlawagna pay dagiti pagsayaatan dayta, ken dagiti pagdaksan ti panangaramid iti di umiso. No agannayastayo nga agpannakkel wenno agbalin a naagum, nainsiriban a panunotentayo ti dakes a pagbanaganna—ti epektona kadatayo, kadagiti patpatgentayo, ken nangnangruna iti relasiontayo ken Jehova.

15. Ania ti maadaltayo iti ulidan ni Jesus iti pannakikomunikarna ken Amana?

¹⁵ Kayat ni Jehova ti kasayaatan para kadatayo. (Sal. 1:1-3) Ipapaayannatayo iti panangiwanwan iti tiempo a kasapulantayo. (Basaen ti Hebreo 4:16.) Nupay perpekto ni Jesus, regular a nakikomunikar ken Jehova, ken awan ressatna a nagkarkararag. Sinuportaran ken inwanwan isuna ni Jehova kadagiti naisangsangayan a pamay-an. Nangibaon kadagiti anghel nga agserbi ken Jesus, impaayna ti nasantuan nga espirituna, ken inwanwanna idi nangpili iti 12 nga apostol. Nagsao ni Jehova manipud langit ket inyebkasna ti suporta ken anamongna ken Jesus. (Mat. 3:17; 17:5; Mar. 1:12, 13; Luc. 6:12, 13; Juan 12:28) Kas ken Jesus, masapul nga ipeksatayo ti linaon ti pusotayo no agkarkararagtayo iti Dios. (Sal. 62:7, 8; Heb. 5:7) Babaen iti kararag, mapagtalinaedtayo a nasinged ti komunikasiontayo ken Jehova ken makapagballigitayo a mangsurot iti dana ti biag a pakaidayawanna.

16. Kasano a tultulongannatayo ni Jehova tapno mangngegtayo ti timekna?

¹⁶ Nupay nalaka a magun-odan ti balakad nga ipapaay ni Jehova, dinatay piliten a mangsurot iti dayta. Masapul a kiddawentayo ti nasantuan nga espirituna, ket sipaparabur nga ipaayna dayta kadatayo. (Basaen ti Lucas 11:10-13.) Napateg ngarud a ‘siputantayo no kasano ti panagimdengtayo.’ (Luc. 8:18) Kas pagarigan, no kiddawentayo ken Jehova a tulongannatayo a mangparmek iti maysa nga immoral a pagannayasan ngem itultuloytayo met ti agbuya iti pornograpia wenno immoral a pelikula, ipakpakitatayo a saan a naimpusuan ti panagpatulongtayo. Masapul nga addatayo iti lugar wenno situasion a pakagun-odantayo iti nasantuan nga espiritu ni Jehova, kas kadagiti gimong iti kongregasion. Adu nga adipen ni Jehova ti nakaliklik iti didigra gapu iti panagimdengda kenkuana bayat dagiti Nakristianuan a gimongtayo. Kas resultana, nagbalinda nga alerto iti aniaman a dakes a tarigagay a tumantanor iti pusoda, ket inlintegda ti daldalanda.—Sal. 73:12-17; 143:10.

17. Apay a napeggad no agtalektayo iti bagitayo?

¹⁷ Usigem ti kapadasan ni Ari David iti nagkauna nga Israel. Idi agtutubo pay, inabakna ti Filisteo a higante a ni Goliat. Nagbalin ni David a soldado, ken idi agangay, nagbalin nga ari a manangsalaknib ken mangaramid kadagiti desision para iti Israel. Ngem idi nagtalek ni David iti bagina, inallilaw ti pusona ket nakaaramid iti nadagsen a basol idi nakikamalala ken ni Bat-seba, ken impamuspusanna pay ti pannakapapatay ti asawa ni Bat-seba a ni Urias. Idi nadisiplina, sipapakumbaba a binigbigna ti basolna ket naisubli ti nasayaat a relasionna ken Jehova.—Sal. 51:4, 6, 10, 11.

18. Ania ti makatulong tapno maitultuloytayo ti umimdeng iti timek ni Jehova?

¹⁸ Ipangagtayo koma ti balakad a masarakan iti 1 Corinto 10:12 ken liklikantayo ti nalabes a panagtalek iti bagitayo. Gapu ta ditay kabaelan nga ‘iturong ti addangtayo,’ datayo ti agdesision no ti imdengantayo ket ti timek ni Jehova wenno ti timek ti Kabusorna. (Jer. 10:23) Itultuloytayo ngarud ti agkararag, sumurot iti panangiwanwan ti nasantuan nga espiritu, ken kanayon nga umimdengtayo iti timek ni Jehova.