1, 2. Ania nga annongen ti inted ni Jehova ken ni Moises? Ania ti impasiguradona kenkuana?

MAILADAWAM kadi ti riknam no sumangoka iti saklang ti kabilgan nga agturay ditoy daga ket agsaoka kas pannakabagi ti ili ni Jehova? Mabalin a madanagan ken maamakka, ket mariknam a kasla dimo kabaelan. Kasano a maisaganam ti ibagam? Ania ti mabalinmo nga aramiden tapno napupuersa ti ibagam kas pannakabagi ti mannakabalin-amin a Dios?

² Kasta idi ti mismo a situasion ni Moises. Imbaon ni Jehova ni Moises, “ti kaemmaan pay laeng [idi] iti amin a tattao nga adda iti rabaw ti daga,” a mapan ken Faraon tapno ispalenna ti ili ti Dios a mairurrurumen ken maad-adipen idiay Egipto. (Num. 12:3) Ipakita dagiti pasamak nga awan panagraem ni Faraon ken natangsit. (Ex. 5:1, 2) Ngem kayat ni Jehova nga ibaga ni Moises ken Faraon a palubosanna a pumanaw iti Egipto ti minilmilion nga ad-adipenna! Di pakasdaawan nga insaludsod ni Moises ken Jehova: “Siasinoak tapno mapanak koma ken Faraon ket kasapulan nga iruarko ti annak ti Israel manipud Egipto?” Sigurado a narikna ni Moises a saan a kualipikado ken saanna a kabaelan dayta. Ngem impasigurado kenkuana ti Dios a saanto nga agmaymaysa. “Addaakto kenka,” kinuna ni Jehova.—Ex. 3:9-12.

3, 4. (a) Ania dagiti pakadanagan ni Moises? (b) Iti ania a situasion a mabalin a maamaktayo met a kas ken Moises?

 ³ Ania dagiti pakadanagan ni Moises? Nabatad a mabuteng amangan no saan nga awaten wenno denggen ni Faraon ti maysa a pannakabagi ni Jehova a Dios. Mabuteng met ni Moises baka saan a mamati dagiti padana nga Israelita nga isu ti dinutokan ni Jehova a mangiruar kadakuada manipud Egipto. Isu a kinuna ni Moises ken Jehova: “No kas pagarigan saandak a patien ket saanda nga umimdeng iti timekko, agsipud ta kunaenda, ‘Ni Jehova saan a nagparang kenka.’”—Ex. 3:15-18; 4:1.

⁴ Adda nagpateg a masursurotayo iti sungbat ni Jehova ken ni Moises ken kadagiti simmaruno a napasamak. Mabalin a saantay met ketdi a sumango iti maysa a nangato nga opisial ti gobierno. Ngem nariknam kadin a maysa a karit ti makisarita uray kadagiti gagangay wenno ordinario a tattao maipapan iti Dios ken iti Pagarianna? No kasta, ania ti masursurom iti kapadasan ni Moises?

5. Ania ti inkabil ni Jehova iti ima ni Moises? Kasano a timmured gapu iti dayta? (Kitaen ti ladawan iti rugi ti artikulo.)

⁵ Idi imbaga ni Moises ken Jehova a madanagan amangan no saandanto a patien, tinulongan ti Dios a mangsango iti posible a mapasamak. Kastoy ti kuna ti Biblia: “Kinuna . . . ni Jehova: ‘Ania dayta adda ita imam?’ nga iti dayta kinuna [ni Moises]: ‘Maysa a sarukod.’ Sumaganad kinunana: ‘Ipuruakmo iti daga.’ Gapuna impuruakna iti daga, ket nagbalin a serpiente; ket nangrugi nga adaywan ni Moises. Ni Jehova kinunana ita ken Moises: ‘Iyunnatmo ta imam ket gammatam iti ipusna.’ Gapuna inyunnatna ti imana ket ginammatanna, ket nagbalin a sarukod iti dakulapna. [Kinuna ti Dios:] ‘Tapno iti kasta . . . patienda koma a ni Jehova . . . nagparang kenka.’” (Ex. 4:2-5) Wen, inkabil ti Dios iti ima ni Moises ti pammaneknek a naggapu ken Jehova ti mensahena. Ti gagangay a sarukod a makitkita dagiti tattao ket nagbalin a sibibiag babaen ti pannakabalin ti Dios! Patalgedan daytoy a milagro a ni Moises ket mensahero ti Dios ken inikkan ni Jehova iti autoridad. Gapuna, kinuna kenkuana ti Dios: “Daytoy a sarukod itugotmonto ita imam tapno maaramidmo dagiti pagilasinan babaen iti dayta.” (Ex. 4:17) Yantangay adda iti ima ni Moises ti pammaneknek ti autoridad ti Dios, sikokompiansa a mairepresentarna ti pudno a Dios iti sanguanan dagiti padana nga Israelita ken iti sanguanan ni Faraon.—Ex. 4:29-31; 7:8-13.

6. (a) Ania ti masapul nga adda iti imatayo no mangasabatayo, ken apay? (b) Ilawlawagmo no kasano a ‘ti sao ti Dios ket nabiag ken addaan bileg.’

⁶ No iranranudtayo ti mensahe ti Biblia, mabalin met a maisaludsod kadatayo: “Ania dayta adda ita imam?” Kaaduanna nga adda iggemtayo a Biblia a nakasagana nga usarentayo. Nupay ti dadduma ibilangda ti Biblia kas maysa laeng a gagangay a libro, agsasao kadatayo ni Jehova babaen iti dayta. (2 Ped. 1:21) Naglaon dayta kadagiti kari ti Dios maipapan iti mapasamakto inton agturay ti Pagarianna. Isu a naisurat ni apostol Pablo: “Ti sao ti Dios nabiag ken adda bilegna.” (Basaen ti Hebreo 4:12.) Ti amin a kari ni Jehova ket nabiag, ta kanayon nga agtigtignay a mangitungpal kadagita. (Isa. 46:10; 55:11) No matarusan ti maysa a tao dayta a kinapudno maipapan iti Sao ti Dios, ti mabasbasana iti Biblia ti mangbalbaliw kenkuana.

7. Kasanotayo a ‘maaramat a siuumiso ti sao ti kinapudno’?

⁷ Wen, inkabil ni Jehova iti imatayo ti nabiag a Saona a mausartayo a mangpaneknek a mapagtalkan ti mensahetayo ken naggapu dayta kenkuana. Di pakasdaawan a kalpasan ti panagsurat ni Pablo kadagiti Hebreo, imparegtana iti sansanayenna  idi a ni Timoteo nga ‘aramidenna ti amin a kabaelanna a mangaramat a siuumiso iti sao ti kinapudno.’ (2 Tim. 2:15) Kasanotayo a mayaplikar ti balakad ni Pablo? Babaen ti silalawag a panangbasatayo kadagiti napili a teksto a mabalin a mangtukay iti puso dagidiay dumngeg kadatayo. Makatulong kadatayo dagiti tract a nairuar idi 2013.

8. Ania ti kuna ti maysa a manangaywan iti serbisio maipapan kadagiti baro a tract?

⁸ Maymaysa ti pormat ti amin a baro a tract. Isu a no masursurotayo nga usaren ti maysa kadagita, ammotayo metten nga usaren ti dadduma. Nalaka kadi nga usaren dagita? Insurat ti maysa a manangaywan iti serbisio iti Hawaii, U.S.A.: “Saanmi nga impagarup a nakaep-epektibo gayam dagitoy a baro a tract iti panangasaba iti binalaybalay ken iti publiko.” Nakitana a nadisenio dagita a tract tapno nalaklaka a makasungbat dagiti tattao, ket masansan nga agresulta daytoy iti makapainteres a saritaan. Kunana a gapu dayta iti saludsod ken kadagiti sungbat a pagpilian iti sango dagiti tract. Saan a marikna ti bumalay nga obligado a mangted iti umiso a sungbat.

9, 10. (a) Kasanonatay nga igiya dagiti baro a tract a mangusar iti Biblia? (b) Ania kadagita a tract ti kaepektibuan nga us-usarem iti ministerio, ken apay?

⁹ Igiyanatayo ti tunggal tract a mangibasa iti maysa a napili a teksto. Kas pagarigan, kitaem ti tract nga Agpatingganto Pay Ngata ti Panagrigrigat? Ti man pilien ti bumalay kas sungbat ket “wen,” “saan,” wenno “siguro,” ukradem ti makin-uneg a panid sa kunaem, “Kastoy ti kuna ti Biblia.” Kalpasanna, basaem ti Apocalipsis 21:3, 4.

¹⁰ No met usarem ti tract nga Ania ti Makunam Maipapan iti Biblia?, okey lang uray ania kadagiti tallo a sungbat iti sango ti tract ti pilien ti bumalay. Ukradem a dagus ti makin-uneg a panid sa kunaem, “Kuna ti Biblia nga ‘amin a Kasuratan impaltiing ti Dios.’” Mabalinmo nga inayon, “Saan la a dayta ti mabasa iti dayta a teksto.” Kalpasanna, luktam ti Bibliam ket basaem ti intero a 2 Timoteo 3:16, 17.

11, 12. (a) Kasano a mausarmo dagiti tract tapno ad-adda a matagiragsakmo ti ministeriom? (b) Kasano a matulongannaka dagiti baro a tract nga agsagana para iti panagsublim?

¹¹ Agdepende iti reaksion ti bumalay no kasano kaadu ti basaem ken ilawlawagmo kenkuana. Saanka laeng a nakaited iti tract kadagiti tattao no di ket naragsakka ta naibasam pay kadakuada ti Sao ti Dios —uray no maysa wenno dua laeng a teksto. Mabalin nga itultuloymonto ti makisarita inton agsublika.

¹² Makita iti likud ti tunggal tract ti benneg a “Panunotem” a naglaon kadagiti teksto a mabalin a pagsaritaanyo iti sumaruno nga ibibisitam. Iti tract nga Ania Ngata ti Mapasamak iti Masanguanan?, ti saludsod iti sumaruno nga ibibisita ket “Kasano a pasayaaten ti Dios ti lubongtayo?” Naisitar iti dayta ti Mateo 6:9, 10 ken Daniel 2:44. Iti met tract nga Agbiagto Kadi Manen Dagiti Natay?, ti saludsod ket “Apay a lumakay ken mataytayo?” Sa naisitar ti Genesis 3:17-19 ken Roma 5:12.

13. Ilawlawagmo no kasano nga usaren dagiti tract a pangirugi iti panagadal iti Biblia.

¹³ Usarem dagiti tract a mangirugi iti panagadal iti Biblia. No i-scan ti maysa ti QR Code * iti likud ti tract, maiturong isuna iti Web site-tayo ken mabalin a matignay nga agpayadal iti Biblia. Itampok met ti tract ti broshur a Naimbag a Damag Manipud iti Dios! ken dakamatenna ti espesipiko a leksion a basaem iti dayta. Kas pagarigan, ti tract a Siasino ti Mangkonkontrol iti Lubong? ibagana a basaem ti leksion 5 iti dayta a broshur. Ti tract nga Ania ti Sekreto ti Naragsak a Pamilia? iturongnaka iti leksion 9. No usarentayo dagiti tract sigun iti nakairantaanda, sursurotentayo ti nagsayaat a pamay-an a panangusar iti Biblia iti damo a pannakisarita ken iti panagsarungkar. Kas resultana, mabalin nga ad-adu ti mairugim a panagadal iti Biblia. Ania pay ti mabalinmo nga aramiden tapno sieepektibo a mausarmo ti Sao ti Dios iti ministerio?

14, 15. Kasanom a matulad ti ar-aramiden ni Pablo iti ministerio?

¹⁴ Sidadaan ni Pablo a makibagay ‘tapno magun-odna ti kaaduan a tattao’ iti ministeriona. (Basaen ti 1 Corinto 9:19-23.) Paliiwenyo ta inkagumaan ni Pablo a ‘gun-oden dagiti Judio, dagidiay adda iti sidong ti linteg, dagidiay awanan linteg, ken dagiti nakapuy.’ Wen, kayatna a makasarita ti “amin a kita ti tattao, tapno iti amin a pamay-an maisalakan[na] ti sumagmamano.” (Ara. 20:21) Kasanotayo a matulad ni Pablo iti panagsaganatayo a mangdanon iti “amin a kita ti tattao” iti teritoriatayo?—1 Tim. 2:3, 4.

¹⁵ Adda dagiti singasing a presentasion iti binulan a Ti Ministeriotayo iti Pagarian. Usarem dagita. Ngem no adda sabali a topiko a pakaseknan dagiti tattao iti teritoriayo, mangisaganaka iti mayanatup ken makapainteres a presentasion. Panunotem ti kasasaad iti lugaryo, dagiti tattao, ken dagiti pakaseknanda. Kalpasanna, mangpanunotka iti teksto a makatulong kadakuada. Kastoy ti imbaga ti maysa a manangaywan iti sirkito no kasano nga us-usarenda ken baketna ti Biblia: “Ipalubos ti kaaduan a bumalay a basaenmi ti maysa a teksto no dikam agbayag ken direktakami iti punto. Kumablaawkami bayat nga iggemmi ti nakaukrad a Bibliami, sa mangibasakami iti teksto.” Usigem ti sumagmamano a topiko, saludsod, ken teksto a napaneknekanen nga epektibo, ket kitaem no mabalinmo nga usaren dayta iti teritoriayo.

16. Ilawlawagmo no kasano a mausarmo ti Isaias 14:7 iti ministerio.

¹⁶ No agnanaedka iti lugar a masansan ti riribuk, mabalinmo nga isaludsod daytoy iti maysa a tao: “Ania ti makunam no kastoy ti paulo ti damdamag: ‘Natalnan ti intero a lubong, awanen ti riribuk. Nakaragragsak dagiti tattao’? Kasta ti kunaen ti Biblia iti Isaias 14:7. Adu a kari ti Dios maipapan iti natalna a kasasaad iti masanguanan ti masarakan iti Biblia.” Kalpasanna, ibasam ti maysa kadagita a kari manipud iti Biblia.

17. Kasanom nga usaren ti Mateo 5:3 iti pannakisaritam?

 ¹⁷ Marigatan kadi ti adu a lallaki nga agbirok iti trabaho iti lugaryo? No kasta, mabalinmo nga irugi ti saritaan babaen ti kastoy a saludsod: “Kasano ngata kadakkel ti sueldo ti maysa nga ama tapno agbalin a naragsak ti pamiliana?” Kalpasan a sumungbat, mabalinmo nga ibaga: “Ad-adu ngem iti dayta ti sueldo ti adu nga amma, ngem kaskasdi a saan a naragsak ti pamiliada. Isu nga ania a talaga ti kasapulan?” Kalpasanna, basaem ti Mateo 5:3 ken itukonmo ti panagadal iti Biblia.

18. Kasanom nga usaren ti Jeremias 29:11 tapno maliwliwam ti sabsabali?

¹⁸ Adda kadi didigra a nabiit pay a napasamak iti lugaryo? Mabalin a kastoy ti panangirugim iti saritaan: “Adda koma kayatko nga ibaga a makaliwliwa a mensahe ti Biblia. (Basaen ti Jeremias 29:11.) Nadlawmo kadi ti tallo a banag a kayat ti Dios para kadatayo? ‘Talna,’ ‘masanguanan,’ ken ‘namnama.’ Saan kadi a makaliwliwa a maammuan a kayatna a maaddaantayo iti nasayaat a biag? Ngem kasano ngata a mapasamak dayta?” Kalpasanna, mangpili iti mayanatup a leksion iti broshur a Naimbag a Damag.

19. Ilawlawagmo no kasano a mausar ti Apocalipsis 14:6, 7 iti pannakisarita kadagiti relihioso a tattao.

¹⁹ Relihioso kadi dagiti tattao iti lugaryo? No wen, mabalinmo nga irugi ti saritaan iti kastoy: “No adda anghel nga agsao kenka, dumngegka kadi? (Basaen ti Apocalipsis 14:6, 7.) Gapu ta ibagbaga daytoy nga anghel nga ‘agbutengtayo iti Dios,’ saan kadi a napateg a maammuan no asino ti tuktukoyenna a Dios? Kuna ti anghel nga isu ‘Daydiay nangaramid iti langit ken iti daga.’ Ania ngata ti naganna?” Sa basaem ti Salmo 124:8, nga agkuna: “Ti tulongtayo adda iti nagan ni Jehova, ti Nangaramid iti langit ken daga.” Kalpasanna, ibagam a kayatmo nga ilawlawag kenkuana ti ad-adu pay maipapan ken Jehova a Dios.

20. (a) Kasanotay nga usaren ti Proverbio 30:4 a mangisuro iti nagan ti Dios? (b) Ania a partikular a teksto ti napadasmo nga epektibo?

²⁰ Mabalin a kastoy ti panangirugim iti pannakisaritam iti maysa nga agtutubo: “Kayatko nga ibasa kenka ti maysa a teksto a naglaon iti nakapatpateg a saludsod. (Basaen ti Proverbio 30:4.) Awan ti tao a makaaramid iti daytoy, isu a sigurado a ti Namarsua ti mailadladawan. * Kasanotay ngata a maammuan ti naganna? Kayatko nga ipakita kenka ditoy Biblia.”

21, 22. (a) Kasano a ti maysa a napili a teksto mabalbaliwanna ti biag ti maysa a tao? (b) Ania ti determinasionmo bayat nga itungtungpalmo ti ministeriom?

²¹ Ditay ammo no anianto ti epektona kadagiti tattao ti ibasatayo a napili a teksto. Kas pagarigan, dua a Saksi idiay Australia ti nagtuktok iti balay ti maysa a babai. Maysa kadakuada ti nangisaludsod iti bumalay, “Ammoyo kadi ti nagan ti Dios?” sana imbasa ti maysa a teksto—ti Salmo 83:18. “Nabiglaak iti dayta!” kinuna ti babai. “Idi nakapanawdan, nagmanehoak a napan iti maysa a bookstore a 56 kilometro (35 milia) ti kaadayona tapno kitaek ti dadduma a bersion ti Biblia ken kitaek met ti nagan ti Dios iti diksionario. Nakombinsirak a ti nagan ti Dios ket Jehova, ket pinanunotko no ania pay ngata ti diak ammo.” Di nagbayag, inrugida a dua iti nobiona ti makipagadal iti Biblia, ket nabautisaranda idi agangay.

²² Ti Sao ti Dios balbaliwanna ti biag dagidiay mangbasa iti dayta ken mamati kadagiti nabiag a kari ni Jehova. (Basaen ti 1 Tesalonica 2:13.) Nabilbileg ti mensahe ti Biblia a mangdanon iti puso dagiti tattao ngem iti aniaman nga ibagatayo. Dayta ti gapuna nga usarentayo koma ti Sao ti Dios agingga a posible. Nabiag dayta!