1. Ania ti rikna ni Jehova maipapan iti panagtrabaho, ken ania ti impaayna kadagiti parsuana?

MARAGRAGSAKAN ni Jehova iti aniaman a trabaho nga ar-aramidenna. (Sal. 135:6; Juan 5:17) Kayatna a marikna met dayta dagiti anghel ken tattao, isu nga inikkanna ida iti makaay-ayo ken makapnek a trabaho. Kas pagarigan, adda trabaho nga intedna iti inauna nga Anakna idi pinarsuana ti amin a bambanag. (Basaen ti Colosas 1:15, 16.) Kuna kadatayo ti Biblia a sakbay a nagbalin a tao ni Jesus, adda idi iti sibay ti Dios idiay langit “kas nasigo a managobra.”—Prov. 8:30.

2. Ania ti mangipakita a kanayon nga adda napateg ken makapnek a trabaho dagiti espiritu a parsua?

² Manipud Genesis agingga iti Apocalipsis, naglaon ti Biblia kadagiti pagarigan a mangipakita a kanayon nga adda trabaho nga ipapaay ni Jehova kadagiti espiritu nga annakna. Idi nagbasol da Adan ken Eva ken naparuarda iti Paraiso a pagtaenganda, ti Dios “insaadna iti daya ti minuyongan ti Eden dagiti kerubin ken ti dumardarang a tadem ti maysa a kampilan nga agtultuloy nga agpuspusipos tapno bantayanda ti dalan nga agturong iti kayo ti biag.” (Gen. 3:24) Ibaga met ti Apocalipsis 22:6 nga “imbaon [ni Jehova] ti anghelna tapno ipakitana kadagiti  adipenna ti bambanag a masapul a maaramid iti mabiit.”

3. Idi adda ni Jesus ditoy daga, kasano a tinuladna ti ulidan ni Amana?

³ Idi adda ditoy daga ni Jesus kas perpekto a tao, siraragsak nga inaramidna ti trabaho nga inted kenkuana ni Jehova. Kas panangtulad iti ulidan ni Amana, inikkanna met dagiti adalanna iti napateg a trabaho. Pinaggagarna ida no anianto ti maaramidanda, ket kinunana: “Pudno unay kunak kadakayo, ti mangwatwat iti pammati kaniak, aramidento met dayta dagiti trabaho nga aramidek; ket aramidennanto dagiti trabaho a dakdakkel ngem dagitoy, agsipud ta mapanak iti Ama.” (Juan 14:12) Impaganetget ni Jesus ti kinaganat dayta a trabaho idi kinunana: “Masapul nga aramidentayo dagiti trabaho daydiay nangibaon kaniak bayat nga aldaw pay; um-umayen ti rabii inton awanen ti tao a makapagtrabaho.”—Juan 9:4.

4-6. (a) Apay nga agyamantayo iti panangitungpal da Noe ken Moises kadagiti annongen nga inted ni Jehova kadakuada? (b) Ania ti pagpapadaan dagiti annongen nga inted ti Dios iti tao?

⁴ Sakbay pay nga immay ni Jesus ditoy daga, inikkanen ni Jehova dagiti tattao iti makapnek a trabaho. Nupay saan nga intungpal da Adan ken Eva ti annongenda, intungpal ti adu a tattao dagiti annongen nga inted ti Dios kadakuada. (Gen. 1:28) Naipaayan ni Noe kadagiti espesipiko nga instruksion no kasano a bangonenna ti daong a pakaisalakanan ti pamiliana iti dakkel a Layus. Inaramidna no ania ti kinuna ni Jehova. Sibibiagtayo ita gapu ta simamatalek a sinurotna dagiti instruksion ni Jehova!—Gen. 6:14-16, 22; 2 Ped. 2:5.

⁵ Naipaayan ni Moises kadagiti espesipiko nga instruksion para iti pannakaibangon ti tabernakulo ken pannakaorganisar ti kinapadi, ket naan-anay a sinurotna dagita. (Ex. 39:32; 40:12-16) Magunggonaantayo agingga ita gapu ta simamatalek nga intungpalna dayta nga annongen. Kasano? Inlawlawag ni apostol Pablo a ti tabernakulo ken ti urnos ti kinapadi iladladawanda ti “naimbag a bambanag nga umay.”—Heb. 9:1-5, 9; 10:1.

⁶ Bayat a maitungtungpal ti panggep ti Dios, nagduduma met nga annongen ti maipapaay kadagiti adipenna. Nupay mabalin nga agbaliw dagiti annongenda, kanayon nga agpaay dagita a pakaidayawan ni Jehova ken pakagunggonaan dagidiay mamati. Pudno dayta maipapan iti trabaho nga inaramid ni Jesus sakbay ken bayat ti kaaddana ditoy daga. (Juan 4:34; 17:4) Kasta met, ti trabaho a naited kadatayo ita ket agpaay a pakaidayawan ni Jehova. (Mat. 5:16; basaen ti 1 Corinto 15:58.) Apay a maikunatayo a kasta?

7, 8. (a) Iladawam ti trabaho a pribilehio nga itungpal dagiti Kristiano ita. (b) Kasano koma ti rumbeng a panagtignaytayo iti instruksion ni Jehova?

⁷ Sigurado nga umanamongka a maysa a dayaw ti panangawis ni Jehova kadagiti imperpekto a tattao nga agserbi kas katrabahuanna. (1 Cor. 3:9) Dadduma a Kristiano ket makiramraman iti trabaho a panagibangon kas iti inaramid da Noe ken Moises. Adda met dagiti tumultulong nga agibangon kadagiti Assembly Hall, Kingdom Hall, ken sanga nga opisina. Makipaspasetka man iti pannakaretubar ti maysa a Kingdom Hall wenno iti pannakaibangon ti sangalubongan a hedkuartertayo iti Warwick, New York, ipategmo koma dayta a pribilehio. (Kitaen ti diseniona iti rugi ti artikulo.) Dayta ket sagrado a panagserbi. Ngem maaw-awistayo amin a makipaset iti maysa a naespirituan a panagbangon a pakaidayawan met ni Jehova ken pakagunggonaan dagiti natulnog a tattao. (Ara. 13:47-49) Mangipapaay ti organisasion ti Dios kadagiti  instruksion no kasano a sieepektibo a maaramid daytoy a trabaho. Mabalin a kaipapanan dayta no dadduma ti pannakaited kadatayo dagiti baro nga annongen.

⁸ Kanayon a sidadaan nga agpasakup dagiti matalek nga adipen ni Jehova kadagiti instruksion ti organisasionna. (Basaen ti Hebreo 13:7, 17.) Nalabit saantay a naan-anay a matarusan no apay a maipaayantayo iti baro nga annongen. Nupay kasta, ammotayo a nasayaat ti resultana no makikooperartayo ken Jehova iti aniaman a panagbalbaliw nga aramidenna.

9. Ania nga ulidan ti ipakpakita dagiti panglakayen iti kongregasion?

⁹ Ipakpakita dagiti panglakayen ti gagarda a mangitungpal iti pagayatan ni Jehova babaen ti pamay-an a panangidauloda iti kongregasion. (2 Cor. 1:24; 1 Tes. 5:12, 13) Ikagkagumaanda a suroten ti aniaman a panagbalbaliw. Sidadaanda a mangipakat kadagiti baro a pamay-an ti panangasaba. Uray no iti damo ket agkedked ti dadduma a mangorganisar iti panangasaba iti telepono, panangasaba iti pier, wenno publiko a panangasaba, nakitada idi agangay a nagsayaat dagiti resulta. Kas pagarigan, inkeddeng ti uppat a payunir idiay Germany ti mangasaba kadagiti lugar ti negosio a nabayagen a saanda a maar-aramidan. Kinuna ni Michael a maysa kadakuada: “No manon a tawen a dikam nangaskasaba iti kastoy a pamay-an isu a medio agnerbioskami. Ammo la ketdi daytoy ni Jehova isu a pinagballigina ti panangasabami iti daydi nga agsapa. Imbag laengen ta sinurotmi ti instruksion iti Ministeriotayo iti Pagarian ken nagtalekkami iti suporta ni Jehova!” Magagaranka kadi a mangpadas kadagiti baro a pamay-an ti panangasaba iti teritoriayo?

10. Ania dagiti panagbalbaliw iti organisasion iti kallabes a tawtawen?

¹⁰ No dadduma, adda dagiti maaramid a panagbalbaliw iti organisasion. Iti kallabes a tawtawen, napagtitipon ti sumagmamano a sanga nga opisina. Nupay saan a nalaka ti kasta a panagbalbaliw para kadagiti kakabsat nga agserserbi kadagitoy a sangay, nakitada idi agangay dagiti pagsayaatanna. (Ecl. 7:8) Maragragsakan dagitoy a natulnog a trabahador a makipaset iti moderno-aldaw a pakasaritaan ti ili ni Jehova!

11-13. Aniada a karit ti nakaipasanguan ti dadduma gapu kadagiti panagbalbaliw iti organisasion?

¹¹ Adda maadaltayo kadagidiay naapektaran iti panagtitipon ti sumagmamano a sanga nga opisina. Dadduma kadakuada ti adun a dekada nga agserserbi kas Bethelite iti pagilianda. Maysa a pagassawaan nga agserserbi iti maysa a bassit a sanga nga opisina iti Makintengnga nga America ti nakiddaw a makitipon iti sanga nga opisina ti Mexico a dakdakkel iti gistay 30 a daras. “Nakarigrigat a panawan dagiti kapamilia ken gagayyem,” kuna ni Rogelio. Kinuna met ti sabali pay a kabsat nga agnagan Juan a nakiddaw nga umakar iti Mexico: “Maikawaak iti sabali a kustombre ken kultura.”

¹² Kasta met ti nagbalin a problema dagiti Bethelite iti dadduma a pagilian iti Europa a nakiddaw nga umakar iti sanga nga opisina ti Germany. Saan a kaskarina para kadakuada ti pumanaw iti bukodda a pagilian. Mabalin a kailiw ti dadduma a taga-Switzerland ti nakapimpintas a kabambantayan ti Alps, ken kailiw met ti dadduma a taga-Austria ti basbassit a pamilia ti Bethel iti pagilianda.

¹³ Para kadagidiay umakar iti sabali a pagilian, masapul nga iruamda ti bagbagida kadagiti baro a pagyanan, katrabaho, ken nalabit baro a kita ti trabaho. Masapul met a sursuruenda ti makibagay iti baro a kongregasionda ken mangasaba iti baro a teritoria, a nalabit sabali ti lengguahena. Mabalin a narigat dagita a panagbalbaliw. Ngem napagballigian dagita ti adu a Bethelite. Apay?

14, 15. (a) Kasano nga impakita ti adu a kakabsat nga ipatpategda ti pribilehioda a makipagtrabaho ken Jehova, sadinoman dayta? (b) Ania a nasayaat nga ulidan ti ipakpakitada?

 ¹⁴ Kuna ni Grethel: “Inawatko ti awis gapu iti ayatko ken Jehova. Saan a napateg kaniak no sadino ti pagserserbiak a pagilian, ti ayanko a patakder, wenno no ania ti pribilehiok.” Kuna met ni Dayska: “Siraragsak nga inawatko ti awis gapu ta nabigbigko a naggapu dayta ken Jehova.” Umanamong iti dayta da André ken Gabriela ket kinunada: “Daytoy ti nangted kadakami iti gundaway nga ad-adda nga agserbi ken Jehova babaen ti saanmi a panangyun-una kadagiti personal a tarigagaymi.” Mamati dagitoy nga agassawa a no adda dagiti panagbalbaliw iti organisasion ni Jehova, nasayaat no naimpusuan nga awatentayo dagita.

¹⁵ Gapu ta napagtitipon ti sumagmamano a sanga nga opisina, adda dagiti Bethelite a naibaon nga agpayunir. Kasta ti napasamak iti dadduma a Bethelite idi napagtitipon dagiti sanga nga opisina ti Denmark, Norway, ken Sweden tapno mabukel ti sanga nga opisina ti Scandinavia. Karaman kadakuada da Florian ken Anja. Kinunada: “Ibilangmi a makapagagar a karit ti baro nga annongenmi. Dakkel a pribilehio ti agserbi ken Jehova iti sadinoman a pangibaonanna kadakami. Maibagami a bembendisionannakami ni Jehova!” Uray no saan a kasta ti kasasaad ti kaaduan kadatayo, mabalintay kadi a tuladen dagitoy a kakabsat a nangyun-una kadagiti interes ti Pagarian? (Isa. 6:8) Kanayon a bendisionan ni Jehova dagidiay mangipatpateg iti pribilehioda a makipagtrabaho kenkuana, sadinoman dayta.

16. (a) Ania ti kuna ti Galacia 6:4 nga aramidentayo? (b) Ania a kadakkelan a pribilehio ti mabalin a matagiragsak ti asinoman?

¹⁶ Gapu ta imperpektotayo, masansan nga idiligtayo ti bagitayo iti sabsabali. Ngem ibaga kadatayo ti Sao ti Dios nga ipamaysatayo ti panunottayo kadagiti banag a kabaelantayo nga aramiden. (Basaen ti Galacia 6:4.) Saan nga amin ket agbalin a panglakayen, payunir, misionero, wenno Bethelite. Siempre, nasayaat amin dagitoy a pribilehio,  ngem ditay koma liplipatan nga adda maymaysa a kadakkelan pay laeng a pribilehio a pagpapadaantayo amin—ti panagbalin a katrabahuan ni Jehova. Tagipatgentay koma daytoy a pribilehio!

17. Ania dagiti ditay maliklikan bayat nga addatayo iti lubong ni Satanas? Ngem apay a saantay koma a maupay?

¹⁷ Bayat nga addatayo iti lubong ni Satanas, mabalin a malimitaran ti panagserbitayo ken Jehova. Mabalin nga adda dagiti kasasaad a ditay kontrolado, kas iti responsabilidad iti pamilia wenno parikut iti salun-at. Ngem saan koma a dagita ti pakaupayantayo. Dimo tagibassiten ti maar-aramidam bayat nga ikaskasabam ti nagan ti Dios ken ti Pagarianna. Ti napateg ket ar-aramidem ti amin a kabaelam ken ikarkararagmo a bendisionan ni Jehova dagiti kakabsat nga ad-adu ti maar-aramidanda ngem sika. Laglagipem a napateg iti imatang ni Jehova ti tunggal maysa a mangidaydayaw iti naganna!

18. Ania koma ti situtulok nga idiantayo pay laeng, ken apay?

¹⁸ Iti laksid dagiti pagkapuyan ken kinaimperpektotayo, maragsakan ni Jehova a mangusar kadatayo kas katrabahuanna. Anian a naisangsangayan a pribilehio ti makipagtrabaho iti Diostayo kadagitoy maudi nga al-aldaw! Situtuloktayo koma ngarud a mangidian pay laeng iti adu kadagiti personal a tarigagaytayo ta ammotayo nga idiay baro a lubong, ipaayannatayto ni Jehova iti “pudpudno a biag”—ti agnanayon a biag iti sidong ti naragsak ken natalna a kasasaad.—1 Tim. 6:18, 19.

19. Ania a naragsak a masakbayan ti ikarkari kadatayo ni Jehova?

¹⁹ Nakaas-asidegtayon iti baro a lubong! Panunotem ti imbaga ni Moises kadagiti Israelita idi sakbay a sumrekda iti Naikari a Daga: “Ni Jehova a Diosmo pudno a pagbalinennakanto nga aglaplapusanan iti tunggal aramid ta imam.” (Deut. 30:9) Inton malpasen ti Armagedon, dagidiay nakipagtrabaho iti Dios tagikuaendanto ti daga kas inkarina. Kalpasanna, rugiantayton ti baro nga annongentayo—ti panamagbalin iti daga a napintas a paraiso!